Библи – цӕрӕнбонты мӕ хъаруйы мӕсыг

Радзырдта йӕ Марсо Леруа

«РАЙДИАНЫ Хуыцау сфӕлдыста арв ӕмӕ зӕхх»,– райдыдтон мӕ уаты сусӕгӕй кӕсын. Сусӕгӕй та цӕмӕн? Уымӕн ӕмӕ мӕ фыд ӕппындӕр Хуыцауыл не ’ууӕндыд, ӕмӕ, мӕ къухы цы чиныг уыд, уый йӕ зӕрдӕмӕ нӕ фӕцыдаид. Уыцы чиныг та уыд Библи.

Уый размӕ Библи никуы кастӕн, ӕмӕ Райдианы чиныгӕй фыццаг ныхӕстӕ куы бакастӕн, уӕд мӕ цыма арв ӕрцавта, афтӕ фӕдӕн. Уӕд ахъуыды кодтон: «Ӕрдзы закъӕттӕ кӕрӕдзиимӕ куыд баст сты, ууыл-иу дзӕгъӕлы нӕ дис кодтон! Ныр ӕй бамбӕрстон, афтӕ цӕмӕн у, уый!» Библийӕ мӕ бон мӕхи атонын нал уыд, ӕмӕ йӕ изӕры аст сахатӕй суанг райсомы цыппар сахатмӕ фӕкастӕн. Уӕдӕй фӕстӕмӕ Хуыцауы Ныхас алы бон дӕр кӕсын. Фӕнды мӕ радзурын, Библи кӕй кӕсын, уый мын цӕрӕнбонты хъарутӕ куыд лӕвӕрдта.

«Хъуамӕ йӕ алы бон дӕр кӕсай»

Ӕз райгуырдтӕн 1926 азы, ӕвзалыкъахӕг шахтерты хъӕу Вермелы, цӕгат Францийы. Дыккаг дунеон хӕсты рӕстӕджы ӕвзалы нӕ бӕстӕйы уыд тынг ахсджиаг. Ӕмӕ шахтӕйы кӕй куыстон, уымӕ гӕсгӕ мӕ ӕфсадмӕ нӕ акодтой. Фӕлӕ мӕн фӕндыд мӕ царды уавӕртӕ фӕхуыздӕр кӕнын, ӕмӕ райдыдтон радиоэлектроникӕ ӕмӕ электрикӕ ахуыр кӕнын. Ӕрдзы закъӕттӕ кӕрӕдзиимӕ куыд баст сты, уый мӕ дисы уӕд бафтыдта. 21 азы мыл куы цыди, уӕд мын, мемӕ чи ахуыр кодта, уыдонӕй иу лӕппу радта Библи ӕмӕ мын загъта: «Адӕймагӕн ацы чиныг ӕнӕбакӕсгӕ нӕй». Уый уыд мӕ фыццаг Библи. Кӕронмӕ йӕ куы бакастӕн, уӕд мӕ фидарӕй бауырныдта, Хуыцауы Ныхас кӕй у, уый ӕмӕ Хуыцау адӕмӕн йӕ фӕндтӕ уыцы чиныджы кӕй ӕргом кӕны.

Афтӕ мӕм касти, ӕмӕ мӕ сыхӕгты дӕр зӕрдиагӕй бафӕнддзӕн Библи кӕсын, ӕмӕ ма аст Библийы ссардтон. Фӕлӕ мыл худын райдайдзысты ӕмӕ мӕ ныхмӕ рацӕудзысты, уый ӕнхъӕл нӕ уыдтӕн. Мӕ хӕстӕджытӕй мӕнгуырнындзинӕдтыл хӕст чи уыд, уыдон мын загътой: «Ацы чиныг кӕсын куы райдайай, уӕд ӕй хъуамӕ алы бон дӕр кӕсай». Ӕмӕ йӕ бӕгуыдӕр кастӕн, ӕмӕ уыцы хъуыддагыл никуы фӕфӕсмон кодтон. Уыцы ӕгъдау цӕрӕнбонты никуы фехӕлдтон.

Библи зӕрдиагӕй кӕй кӕсын, уый мӕ сыхӕгтӕй иуӕй-иутӕ куы базыдтой, уӕд мын радтой, Йегъовӕйы Ӕвдисӕнты публикацитӕй сӕм цы уыд, уыдонӕй. Иу брошюрӕ дзы уыди, «Иу дуне, иу хицауад» *, зӕгъгӕ (нывыл у французаг ӕвзагыл). Уый ӕмбарын кодта, Библи афтӕ цӕмӕн зӕгъы, зӕгъгӕ, адӕмы сӕ зындзинӕдтӕй ӕрмӕст Хуыцауы Паддзахад фервӕзын кӕндзӕн (Матф. 6:10). Уӕд мӕ тынг бафӕндыд уыцы диссаджы ныфсы тыххӕй иннӕтӕн дӕр дзурын.

 Библи мӕ фыццаг чи айста, уыдонӕй иу уыд Ноэль, гыццылӕй йемӕ ӕмбӕлттӕ уыдыстӕм. Ноэль уыд католик, ӕмӕ, сауджыныл чи ахуыр кодта, иу ахӕм адӕймагимӕ баныхас кодта, цӕмӕй нӕ дыууӕ дӕр йемӕ фембӕлдаиккам. Кӕд мӕ ныфс нӕ хастон, уӕддӕр, Псаломы 115:4–8 ӕмӕ Матфейы 23:9, 10 цы бакастӕн, уымӕй зыдтон, гуымирытӕн куы фӕкувынц ӕмӕ дины разамонджытӕм кадджын нӕмттӕй куы фӕдзурынц, уый Хуыцауы зӕрдӕмӕ кӕй нӕ цӕуы. Уый фӕрцы фӕныфсджындӕр дӕн ӕмӕ мӕ бон сси мӕ ног дины сӕрыл фидарӕй дзурын. Фӕстагмӕ Ноэль сси Ӕвдисӕн ӕмӕ абон дӕр Хуыцауӕн иузӕрдионӕй лӕггад кӕны.

Мӕ хистӕр хоимӕ дӕр ныхас кодтон. Йӕ лӕгмӕ уыд дӕсныты чингуытӕ ӕмӕ йӕ хӕйрӕджытӕ хъыгдардтой. Фыццаг мӕм афтӕ касти, ӕмӕ уыцы уавӕры мӕ бон ницы бауыдзӕн, фӕлӕ Библийы цы стихтӕ кастӕн, зӕгъӕм, Дзуттӕгты 1:14, уыдон мӕ ныфс бауагътой, Йегъовӕйы зӕдтӕ мын кӕй ӕххуыс кӕндзысты. Мӕ сиахс Библийы фӕдзӕхстытӕ йӕ царды ӕххӕст кӕнын куы райдыдта ӕмӕ йӕм дӕснытимӕ баст цыдӕриддӕр уыди, уыдӕттӕ куы аппӕрста, уӕд ӕй хӕйрӕджытӕ нал хъыгдардтой. Мӕ сиахс дӕр ӕмӕ мӕ хо дӕр систы зынгзӕрдӕ Ӕвдисӕнтӕ.

1947 азы мӕ хӕдзармӕ ӕрбахоста Артур Эмион. Уыцы ӕфсымӕр уыд Америкӕйӕ. Кӕдӕй-уӕдӕй Йегъовӕйы Ӕвдисӕнимӕ ныхас кодтон! Ӕз ӕй бафарстон, Ӕвдисӕнтӕ кӕм ӕмбырд кӕнынц, уымӕй. Ӕмӕ мын загъта, дӕс километры дарддӕр, Льевены, иу гыццыл къорд кӕй ӕмбырд кӕны. Уӕды рӕстӕджы велосипед балхӕнын дӕр зын уыди, ӕмӕ цалдӕр мӕйы ӕмбырдтӕм къахӕй цыдтӕн. Уӕдмӕ Йегъовӕйы Ӕвдисӕнтӕн Францийы аст азы сӕ хъуыддаг уыд ӕхгӕд. Уӕд ӕнӕхъӕн Францийы 2380 йеддӕмӕ нӕ уыдысты, бирӕтӕ дзы уыдысты польшӕйаг иммигранттӕ. 1947 азы 1 сентябры Йегъовӕйы Ӕвдисӕнтӕн Францийы ногӕй радтой сӕрибардзинад. Ӕмӕ Парижы, Вилла Гиберы уынджы, ногӕй скуыста филиал. Францийы иу пионер дӕр кӕй нӕ уыд, уымӕ гӕсгӕ 1947 азы декабры «Информатор»-ы (ныр у «Нӕ хъусын кӕныны хъуыддаг») уыд хъусинаг, зӕгъгӕ, хъӕуы пионертӕ – мӕй 150 сахаты чи хъусын кӕндзӕн, ахӕм хъусынгӕнджытӕ (1949 азы та сахӕтты нымӕц фӕкъаддӕр ӕмӕ сси 100 сахаты). Ӕз разы уыдтӕн Иоанны 17:17 фыст ныхӕстимӕ: «[Хуыцауы] ныхас у рӕстдзинад». Ӕмӕ 1948 азы аргъуыд райстон, 1949 азы та декабры райдыдтон пионерӕй лӕггад кӕнын.

Ахӕстонӕй фӕстӕмӕ Дюнкеркмӕ

Фыццаг мӕ снысан кодтой Аженмӕ, хуссар Францимӕ, фӕлӕ дзы бирӕ нӕ фӕдӕн. Шахтӕйы кӕй нал куыстон, уымӕ гӕсгӕ мӕ хъуамӕ ӕфсадмӕ акодтаиккой. Ӕз не сразы дӕн, ӕмӕ мӕ ахӕстоны сбадын кодтой. Уым мын уый бар нӕ уыд, цӕмӕй мӕм Библи уыдаид, фӕлӕ уӕддӕр Псаломты чиныгӕй цалдӕр сыфы самал кодтон. Уыдон кӕсгӕйӕ-иу мӕм хъарутӕ фӕзынди. Ахӕстонӕй куы рацыдтӕн, уӕд хъуыдытӕ кодтон: «Ӕххӕстрӕстӕг лӕггад кӕнын уал ныууадзон ӕмӕ уал мӕхи кой бакӕнон ӕви куыд?» Ацы хатт дӕр та мын Библи баххуыс кодта. Лӕмбынӕг хъуыды кодтон, Павел Филиппӕгтӕм 4:11–13 цы ныффыста, ууыл: «Алцыдӕр у мӕ бон, хъару мын чи дӕтты, уый фӕрцы». Ӕмӕ мӕхицӕн фидарӕй загътон, дарддӕр пионерӕй кӕй лӕггад кӕндзынӕн. 1950 азы мӕ снысан кодтой Дюнкеркмӕ, уый размӕ кӕм хъусын кодтон, уыцы горӕтмӕ.

Уырдӕм куы ’рцыдтӕн, уӕд мӕм ӕппындӕр ницы уыд. Дыккаг дунеон хӕсты рӕстӕджы горӕт тынг ныппырх ӕмӕ дзы зын уыди цӕрӕнбынат ссарын. Раздӕр-иу дзы цы бинонтӕн хъусын кодтон, уыдонмӕ куы бацыдтӕн, уӕд мӕм ракасти хӕдзары ӕфсин ӕмӕ цингӕнгӕйӕ загъта: «Мистер Леруа, куыд ӕхсызгон мын у, ахӕстонӕй дӕ кӕй рауагътой! Мӕ лӕг афтӕ фӕзӕгъы, зӕгъгӕ, дам, дӕ хуызӕн адӕм фылдӕр куы уаид, уӕд хӕст дӕр никуы уыдаид». Туристтӕн сӕм уыд хицӕн гыццыл хӕдзар, ӕмӕ цалынмӕ цӕуын нӕ райдыдтой, уӕдмӕ уал мӕ уым цӕрын бауагътой. Тӕккӕ уыцы бон мын Артур Эмионы ӕфсымӕр Эванс куысты тыххӕй дӕр загъта *. Эванс куыста наулӕууӕны тӕлмацгӕнӕгӕй ӕмӕ агуырдта, нау ӕхсӕв чи хъахъхъӕдтаид, ахӕм лӕджы. Гъемӕ мӕ бакодта науы капитаны ӕххуысгӕнӕгмӕ. Ахӕстоны фӕстӕ мыл царм ӕмӕ стджыты йеддӕмӕ ницыуал баззад. Афтӕ мӕллӕг цӕмӕн дӕн, уый Эванс ӕххуысгӕнӕгӕн куы бамбарын кодта, уӕд мын загъта, зӕгъгӕ нӕм холодильникы цы хӕринаг ис, уымӕй дӕхимӕ  фӕкӕс. Ахъуыды-ма кӕнут, иу бонмӕ ссардтон цӕрӕнбынат, куыст ӕмӕ хӕринаг! Уӕд ноджы хуыздӕр бамбӕрстон, Йесойы ныхӕстӕ, Матфейы 6:25–33 фыст чи ис, уыдон, раст кӕй сты.

Пионертӕй иумӕ лӕггад кодтам Симон Аполинарскиимӕ. Ӕмӕ туристтӕ цӕуын куы райдыдтой, уӕд нӕ бахъуыди ног бынат бацагурын, фӕлӕ нӕ лӕггад уадзынвӕнд нӕ кодтам. Бынат ссардтам иу зӕронд бӕхдоны, фынӕй та кодтам хъӕмпын гобӕттыл. Ӕнӕхъӕн бон-иу уыдыстӕм хъусын кӕнынмӕ. Бӕхдоны хицауӕн дӕр хорз хабар дзырдтам, ӕмӕ фӕстагмӕ уый дӕр ӕмӕ ма ноджыдӕр бирӕтӕ рӕстдзинад базыдтой. Гыццыл фӕстӕдӕр бынӕттон газетты ныффыстой, Дюнкерк, дам, Йегъовӕйы Ӕвдисӕнтӕй байдзаг ӕмӕ, дам, сӕ уӕхи хизут. Афтӕмӕй та армыдзаг йеддӕмӕ нӕ уыдыстӕм: ӕз, Симон ӕмӕ ма цалдӕр хъусынгӕнӕджы. Зындзинӕдтыл куы ӕмбӕлдыстӕм, уӕд-иу хъуыды кодтам нӕ чырыстон ныфсыл ӕмӕ ныл Йегъовӕ куыд тыхсы, ууыл, ӕмӕ-иу бафидар стӕм. 1952 азы мӕ ӕндӕр ранмӕ куы снысан кодтой, уӕд Дюнкеркы уыд 30 хъусынгӕнӕджы бӕрц.

Ног хӕстӕ – ног хъарутӕ

Горӕт Амьены бирӕ нӕ фӕдӕн, афтӕ мӕ снысан кодтой сӕрмагонд пионерӕй Булонь-Бийанкурмӕ, Парижмӕ ӕввахс. Уым бирӕтимӕ Библи ахуыр кодтон ӕмӕ сӕ фӕстӕдӕр чидӕртӕ пионертӕй, чидӕртӕ та миссионертӕй лӕггад кӕнын райдыдтой. Иу ӕрыгон лӕппу, Ги Мабила, зӕгъгӕ, сси Йегъовӕйы Ӕвдисӕн, ӕмӕ фӕстӕдӕр райдыдта районон цӕстдарӕгӕй лӕггад кӕнын, стӕй та облӕстон цӕстдарӕгӕй. Уый фӕстӕ, абон Лувьейы (Парижӕй гыццыл дарддӕр) цы Вефил ис, уым типографи куы арӕзтой, уӕд дзы уыди цӕстдарӕг. Адӕмимӕ Библийыл арӕх кӕй ныхас кодтон, уый фӕрцы Хуыцауы Ныхас мӕ зонды ноджы арфдӕр бынат скодта. Уый мын уыд стыр цины хос, стӕй уый руаджы сдӕн хуыздӕр ахуыргӕнӕг.

1953 азы мӕ бынтон ӕнӕнхъӕлӕджы снысан кодтой районон цӕстдарӕгӕй Эльзас-Лотарингимӕ. 1871 азӕй 1945 азмӕ Германи Эльзас-Лотаринги йӕхимӕ дыууӕ хатты ӕрбаиу кодта. Уый тыххӕй мӕ хъуыди немыцаг ӕвзаг иу гыццыл уӕддӕр сахуыр кӕнын. Районон цӕстдарӕгӕй лӕггад кӕнын куы райдыдтон, уӕд уыцы бӕстӕйы машинӕтӕ, телевизортӕ кӕнӕ мыхуыргӕнӕн машинкӕтӕ бирӕ нӕ уыд, радиотранзистортӕ ӕмӕ дзы компьютертӕ та ӕппындӕр нӕ уыд. Фӕлӕ афтӕ зӕгъӕн нӕй, ӕмӕ мӕ цардӕй райгонд нӕ уыдтӕн. Уыцы рӕстӕг уыдтӕн тынг амондджын. Библийы фыст ис, цӕмӕй нӕ цӕст иу цӕмӕдӕр арӕзт уа. Ӕмӕ уыцы уынаффӕмӕ гӕсгӕ уӕд бирӕ ӕнцондӕр уыд цӕрын, уымӕн ӕмӕ нӕ уӕд Йегъовӕйӕн лӕггад кӕнынӕн бирӕ цыдӕртӕ нӕ хъыгдардта (Матф. 6:19–22).

1955 азы Парижы цы конгресс уыд, «Уӕлахиздзау паддзахад», зӕгъгӕ, уый никуы ферох кӕндзынӕн. Уым базонгӕ дӕн Иренӕ Коланскаяимӕ, фӕстӕдӕр мӕ цард кӕимӕ баиу кодтон, уыцы хоимӕ. Иренӕ пионерӕй лӕггад кӕнын райдыдта мӕнӕй иу аз раздӕр. Йӕ ныййарджытӕ уыдысты польшӕйӕгтӕ. Уыдон  бирӕ азты зынгзӕрдӕйӕ лӕггад кодтой Йегъовӕйӕн. Францийы сын хъусын кодта Адольф Вебер. Уый раздӕр уыд Расселлы цӕхӕрадонгӕс ӕмӕ Европӕмӕ ӕрцыд хорз хабар хъусын кӕнынмӕ. Иренӕимӕ нӕ цард баиу кодтам 1956 азы, ӕмӕ дарддӕр иумӕ лӕггад кодтам. Уӕдӕй фӕстӕмӕ у мӕ зынаргъ ӕххуысгӕнӕг!

Дыууӕ азы фӕстӕ ӕрцыд ӕндӕр ӕнӕнхъӕлӕджы хабар – снысан мӕ кодтой облӕстон цӕстдарӕгӕй. Фӕлӕ фӕлтӕрд ӕфсымӕртӕ кӕй нӕ фаг кодта, уый тыххӕй дарддӕр дӕр иуӕй-иу ӕмбырдтӕ бӕрӕг кодтон районон цӕстдарӕджы бӕсты дӕр. Сӕрибар рӕстӕг мын ӕппындӕр нӕ уыд. Иуӕй мӕ хъуыди мӕй 100 сахаты хъусын кӕнын, иннӕмӕй та мӕ алы къуыри дӕр хъуыди раныхӕстӕ дзурын, ӕртӕ чиныгахуыры бӕрӕг кӕнын, ӕмбырдты документтӕм кӕсын ӕмӕ стӕй уый тыххӕй отчет филиалмӕ ӕрвитын. Афтӕмӕй-иу кӕм хъуамӕ ссардтаин рӕстӕг Хуыцауы Ныхас кӕсынӕн? Уӕд ӕрхъуыды кодтон иу мадзал: зӕронд Библийӕ-иу хицӕн сыфтӕ ралыг кодтон ӕмӕ-иу сӕ мемӕ хастон. Ӕмӕ-иу искӕмӕ куы ’нхъӕлмӕ кастӕн, уӕд-иу сӕ кастӕн. Уыцы рӕстӕг-иу мыл цыма тӕвд бон уазал дымгӕ радымдта, афтӕ-иу уыдтӕн. Уый фӕрцы-иу мӕ хъарутыл хъарутӕ бафтыд ӕмӕ дарддӕр дӕр, кӕм уыдтӕн, уым лӕггад кодтон.

1967 азы мӕ Иренӕимӕ фӕхуыдтой Вефилмӕ, Булонь-Бийанкурмӕ. Снысан мӕ кодтой лӕггады хайадмӕ, ӕмӕ абоны онг дӕр, 40 азы дӕргъы, лӕггад кӕнын уыцы хайады. Мӕ куысты мын уӕлдай ӕхсызгон у, Библийы стихты фӕдыл нӕм цы фарстатӕ ӕрбарвитынц, уыдонӕн дзуапп дӕттын. Куыд тынг уарзын Хуыцауы Ныхасы ӕрфытӕ сгарын ӕмӕ «хорз хабары сӕрыл» тох кӕнын! (Фил. 1:7). Ӕхсызгон ма мын вӕййы Вефилы бинонтимӕ райсомӕй хӕрды размӕ Библийы стихыл ныхас кӕнын. 1976 азӕй та лӕггад кӕнын Францийы Филиалы комитеты.

Царды ӕппӕты хуыздӕр фӕндаг

Кӕд-иу хатт зындзинӕдтыл дӕр сӕмбӕлдтӕн, уӕддӕр мын абонӕй зындӕр никуы уыд. Мӕныл дӕр ӕмӕ Иренӕйыл дӕр азтӕ сӕ уӕз ӕруагътой ӕмӕ не ’нӕниздзинад фӕцудыдта, ӕмӕ нӕ цас фӕнды, уыйбӕрц нӕ бон аразын нал у. Фӕлӕ уӕддӕр Хуыцауы Ныхас иумӕ кӕй фӕкӕсӕм ӕмӕ йӕ кӕй фӕахуыр кӕнӕм, уый фӕрцы нӕ ныфс у фидар. Мах ацӕуӕм автобусыл не ’мбырды территоримӕ ӕмӕ уым адӕмӕн нӕ ныфсы тыххӕй зӕрдиагӕй фӕдзурӕм. Ӕз ӕмӕ Иренӕ ӕххӕстрӕстӕг цал азы лӕггад кӕнӕм, уыдон иумӕ куы бафтауай, уӕд рауайдзысты 120 азӕй фылдӕр. Уымӕ гӕсгӕ се ’ппӕтӕн дӕр зӕрдиагӕй зӕгъӕм: кӕд уӕ фӕнды, ӕмӕ амондджын уат ӕмӕ уӕ цард дзӕгъӕлы ма ацӕуа, уӕд ӕххӕстрӕстӕг лӕггад кӕнут. Паддзах Давид Псалом 37:25 ныффыста, куы «базӕронд», уӕд, ӕмӕ уыйау ӕз дӕр «никуы федтон рӕстгӕнӕджы рохуаты баззайгӕ».

Цӕрӕнбонты мын Йегъовӕ йӕ Ныхасы фӕрцы хъарутӕ лӕвӕрдта. 60 азы размӕ мӕ хӕстӕджытӕ загътой, Библи цӕрӕнбонты кӕй кӕсдзынӕн. Ӕмӕ раст уыдысты. Ӕцӕгдӕр, Библи алы бон дӕр кӕсын, ӕмӕ ууыл никуы фӕфӕсмон кодтон!

[Фиппаинӕгтӕ]

[Ныв 5 фарсыл]

Ӕз ӕмӕ Симон

[Ныв 5 фарсыл]

Облӕстон цӕстдарӕгӕй лӕггад кӕнгӕйӕ

[Ныв 5 фарсыл]

Фыццаг мын кӕй радтой, уый хуызӕн Библи

[Ныв 6 фарсыл]

Нӕ чындзӕхсӕвы бон

[Ныв 6 фарсыл]

Иренӕимӕ нын ӕхсызгон у Библи кӕсын ӕмӕ йӕ ахуыр кӕнын