Кӕсджыты фарстатӕ

Библийы цы бакастӕн, уый фӕдыл мӕм фарста куы фӕзына кӕнӕ, цавӕрдӕр уавӕры куыд бакӕнон, уый куы нӕ зонон, уӕд цы хъуамӕ саразон?

Ӕмбисӕндтӕ 2:1–5 нӕ разӕнгард кӕнынц, цӕмӕй ӕмбарындзинад ӕмӕ арфуынындзинад «ӕмбӕхст хӕзнатау» агурӕм. Уӕдӕ цӕмӕй Библийӕ цавӕрдӕр фарстайӕн дзуапп ссарӕм кӕнӕ, цавӕрдӕр уавӕры куыд бакӕнӕм, уый бамбарӕм, уый тыххӕй нӕ хъӕуы ӕппӕт тыхтӕй архайын. Куыд у нӕ бон уый аразын?

Чиныджы, «Хуыцауы Ныхас хъусынгӕнджыты скъола – стыр ӕххуыс дӕуӕн», зӕгъгӕ, 33–38 фӕрстыл ис сӕр «Иртасын куыд хъӕуы». Уым дзырд цӕуы, «ӕууӕнкджын ӕмӕ зондджын цагъары» уагъд литературӕйы фӕрцы нӕ фарстатӕн дзуапп ссарын нӕ бон куыд у, ууыл (Матф. 24:45). 36 фарсыл дзы ис уынаффӕтӕ, «Хъахъхъӕнӕн мӕсыджы уагъд литературӕйы индекс»-ӕй пайда кӕнӕн куыд ис, уый фӕдыл. Уыцы индекс ис бирӕ ӕвзӕгтыл, ӕмӕ дзы ӕрмӕг агурӕн ис алыхуызон темӕтӕм ӕмӕ Библийы стихтӕм гӕсгӕ. Цавӕрдӕр дзырд кӕнӕ стихы фӕдыл нӕм фарста куы уа, уӕд ӕй нӕ бон у уым бацагурын ӕмӕ фенын, кӕцы статьяты кӕнӕ чингуыты у нӕ бон нӕ фарстайӕн дзуапп ссарын. Дӕ фарстайӕн дзуапп ссарынӕн дӕ бахъӕудзӕн фӕразондзинад. Рох дӕ ма уӕд, уыцы хъуыддаг «ӕмбӕхст хӕзнатӕ» агурынӕй уӕлдай кӕй нӕу. Уымӕ гӕсгӕ дӕ бахъӕудзӕн рӕстӕг дӕр ӕмӕ хъарутӕ дӕр.

Кӕй зӕгъын ӕй хъӕуы, нӕ литературӕйы алы фарстайыл ӕмӕ алы стихыл нӕ цыди дзырд. Стӕй дӕ цы стих цымыдис кӕны, уый кӕд нӕ публикациты ӕвзӕрст цыди, уӕддӕр дзы дӕ фарстайӕн, гӕнӕн ис, дзуапп ма уа. Уымӕй уӕлдай, Библийы иуӕй-иу хабӕрттӕ лыстӕггай фыст не ’рцыдысты, ӕмӕ нӕм уыцы хабӕртты фӕдыл дӕр, гӕнӕн ис, ӕмӕ фарстатӕ фӕзына. Хъуамӕ афтӕ ӕнхъӕл ма уӕм, ӕмӕ-иу нӕ алы фарстайӕн дӕр дзуапп уайтагъд ссардзыстӕм. Нӕ литературӕйы нӕ фарстайӕн дзуапп куы нӕ уа, уӕд хъуамӕ нӕхӕдӕг хатдзӕгтӕ ма кӕнӕм. Науӕд уый расайдзӕн, «рацагур-бацагур кӕй хъӕуы, ахӕм фарстатӕ», ӕмӕ уыдон та, «Хуыцауӕй цы цӕуы ӕмӕ уырнындзинад цы фидар кӕны, ахӕмӕй... ницы дӕттынц» (1 Тим. 1:4; 2 Тим. 2:23; Тит. 3:9). Филиалты ӕмӕ Йегъовӕйы Ӕвдисӕнты сӕйраг хайады цы ӕфсымӕртӕ лӕггад кӕнынц, уыдонӕн сӕ бон нӕу дзуапп раттын, нӕ литературӕйы ӕвзӕрст чи нӕ цыд, уыцы фарстатӕй алкӕцыйӕн дӕр. Фӕлӕ нӕ бон у фидарӕй зӕгъын, Библи нын уый фаг зонд кӕй дӕтты, цӕмӕй нӕ цард раст аразӕм. Нырма кӕй не ’мбарӕм, ахӕм фарстатӕ дӕр кӕй ис, уый та нын хорз фадат у, цӕмӕй равдисӕм, нӕ Хуыцауыл ӕмӕ йын йӕ Ныхасыл фидарӕй кӕй ӕууӕндӕм. (Кӕс «Баввахс у Иегъовӕмӕ», 185–187 фӕрстӕ.)

Зӕгъӕм, цы фарста дӕ тыхсын кӕны, уый фӕдыл ӕрмӕг бацагуырдтай, фӕлӕ уӕддӕр бӕлвырд дзуапп не ссардтай, уӕд та куыд? Уӕд дӕ бон у фӕлтӕрдджын чырыстонимӕ аныхас кӕнын, зӕгъӕм, уе ’мбырды хистӕр нӕлгоймӕгтӕй искӕимӕ. Уыдон Библи хорз зонынц, стӕй Йегъовӕйӕн лӕггад кӕнынц бирӕ азты дӕргъы. Дӕхи дӕр ӕмӕ дын дӕ уавӕртӕ дӕр хорз кӕй зонынц, уымӕ гӕсгӕ сӕ бон у, ӕмӕ дын баххуыс кӕной, дӕ царды дӕ цавӕрдӕр уавӕры фӕдыл уынаффӕ куы хъӕуа, уӕд. Стӕй дӕ макуы рох кӕнӕд Йегъовӕмӕ кувын дӕр. Дзур ын, цыдӕриддӕр дӕ тыхсын кӕны, уый. Кур дзы сыгъдӕг тых, цӕмӕй дӕ раст зондыл араза, ӕмӕ дын ратдзӕн, дӕ уавӕры дӕ чи хъӕуа, уыцы зонд ӕмӕ арфуынындзинад (Ӕмб. 2:6; Лук. 11:13).