«Кӕд рынчын дӕн, уӕддӕр ӕнустӕм афтӕ нӕ уыдзынӕн!»

Радзырдта йӕ Сарӕ ван дер Монд

Адӕм мын арӕх фӕзӕгъынц: «Сарӕ, дӕ мидбылхудтӕй адӕймагмӕ цӕрын ӕрцӕуы. Ӕдзух афтӕ хъӕлдзӕг цӕмӕн вӕййыс?» Ӕз сын фӕзӕгъын, диссаджы ныфс мын кӕй ис ӕмӕ сын ӕй бамбарын кӕнын: «Кӕд рынчын дӕн, уӕддӕр ӕнустӕм афтӕ нӕ уыдзынӕн!»

ӔЗ РАЙГУЫРДТӔН 1974 азы Парижы (Франци). Мӕ мад мӕ зынтӕй ныййардта, ӕмӕ фӕстӕдӕр дохтыртӕ мӕ ныййарджытӕн загътой, рынчынӕй кӕй райгуырдтӕн (мӕ низ у церебралон паралич). Ме уӕнгтӕ мӕ коммӕ нӕ кастысты ӕмӕ мын дзурын дӕр зын уыди, адӕм мын мӕ ныхӕстӕ зынтӕй ӕмбӕрстой. Фӕстӕдӕр ма суртӕ кӕнын дӕр райдыдтон, стӕй уыдтӕн рынчынгӕнаг.

Дыууӕ азы мыл куы цыди, уӕд нӕ бинонтӕ алыгъдысты Мельбурнмӕ (Австрали). Уымӕй дыууӕ азы куы рацыд, уӕд нӕ нӕ фыд ныууагъта, ӕмӕ мӕ мадимӕ дыууӕйӕ баззадыстӕм. Уӕд фыццаг хатт мӕхиуыл банкъардтон, Хуыцау мӕм куыд ӕввахс у, уый. Мӕ мад уыд Йегъовӕйы Ӕвдисӕн ӕмӕ-иу мӕ йемӕ кодта ӕмбырдтӕм. Уым базыдтон, Хуыцау мӕ кӕй уарзы ӕмӕ мыл кӕй тыхсы. Хуыцау мыл кӕй тыхсти, стӕй мӕ мӕ мад дӕр кӕй уарзта, уый фӕрцы ницӕмӕй тарстӕн, кӕд нӕ цард афтӕ тынг фӕивта, уӕддӕр.

Мӕ мад мын бацамыдта, Йегъовӕмӕ кувын куыд хъӕуы, уый. Кӕй зӕгъын ӕй хъӕуы, кувын мын дзурынӕй бирӕ ӕнцондӕр у. Куы фӕкувын, уӕд мын мӕ ныхӕстӕ мӕхинымӕр дзурын ӕнцон вӕййы. Мӕ ныхас ӕнцонӕмбарӕн кӕй нӕу, уымӕ гӕсгӕ мын тынг ӕхсызгон у, Йегъовӕ мӕ хорз кӕй ӕмбары, мӕхинымӕр куы фӕдзурын, уӕд дӕр ӕмӕ, хъӕрӕй куы фӕдзурын, уӕд дӕр (Пс. 65:2).

Фылдӕр зындзинӕдтӕ куыд сфӕрӕзтон

Фондз азы мыл куы цыд, уӕд мӕ низ афтӕ стыхджын, ӕмӕ, цӕмӕй мӕ бон цӕуын уыдаид, уый тыххӕй-иу мын мӕ къӕхтыл бакодтой уӕззау ӕфсӕйнаг фидаргӕнӕнтӕ. Ӕмӕ-иу цӕугӕ нӕ кодтон, фӕлӕ хилгӕ. Иуӕндӕс азмӕ та мӕ къӕхтыл ӕппындӕр нал лӕууыдтӕн, ӕмӕ мӕ бахъуыд электрон коляскӕ. Ӕмӕ иу цӕмӕй коляскӕйӕ сынтӕгмӕ ӕмӕ сынтӕгӕй коляскӕмӕ бахызтаин, уый тыххӕй-иу мӕ бахъуыд, токӕй чи кусы, ахӕм уӕзисӕн.

Хатт-иу мӕ низы тыххӕй мӕхимӕ ныхъхъуыстон. Фӕлӕ-иу стӕй ӕрхъуыды кодтон, нӕ хӕдзары цы ӕгъдау уыд, уый: «Дӕ бон цы нӕу аразын, ууыл ма мӕт кӕн. Фӕлӕ дӕ бон цы у аразын, уый араз». Уый фӕрцы сахуыр дӕн бӕхыл бадын, ленк кӕнын, лодкӕ науфыййӕгтӕй тӕрын, стӕй-иу ӕрдзы хъӕбысы пъалаткӕты улӕфыдтӕн, ӕмӕ ма-иу суанг машинӕ дӕр тардтон, ӕндӕр машинӕтӕ кӕм нӕ уыд, ахӕм фӕндагыл. Арӕхсын ма ныв кӕнынмӕ, хуыйынмӕ, бийынмӕ ӕмӕ ӕлыгӕй алыхуызон мигӕнӕнтӕ аразынмӕ дӕр.

Уӕззау рынчын кӕй дӕн, уый тыххӕй чидӕртӕ дызӕрдыг кодтой, Хуыцауӕн лӕггад  кӕнын мӕхи фӕнд кӕй у, ууыл. 18 азы мыл куы цыд, уӕд мӕ мӕ ахуыргӕнӕг ардыдта, цӕмӕй хӕдзарӕй ацыдаин ӕмӕ мӕ мады дин ныууагътаин. Суанг ма, кӕм цардаин, ахӕм бынат ссарынӕй дӕр мын зӕрдӕ бавӕрдта. Фӕлӕ йын ӕз загътон, мӕ дин кӕй никуы ныууадздзынӕн ӕмӕ хӕдзарӕй дӕр ӕрмӕстдӕр уӕд кӕй ацӕудзынӕн, ӕмӕ цӕттӕ куы уон иунӕгӕй цӕрынмӕ.

Уыцы хабарӕй гыццыл фӕстӕдӕр донаргъуыд райстон ӕмӕ сдӕн Йегъовӕйы Ӕвдисӕн. Дыууӕ азы фӕстӕ мӕхицӕн иу гыццыл квартирӕ ссардтон ӕмӕ уырдӕм цӕрынмӕ ацыдтӕн. Уым мын хорз у, уымӕн ӕмӕ мӕ цард дӕр мӕхӕдӕг аразын, стӕй мӕм хъусдард дӕр ис.

Уый ӕнхъӕл нӕ уыдтӕн

Мӕ царды-иу бирӕ ахӕм хабӕрттӕ уыди, ӕмӕ-иу мӕ уырнындзинад фӕлвӕрд цыд. Иу бон мыл ӕрцыд, ӕнхъӕл дӕр кӕмӕн нӕ уыдтӕн, ахӕм хабар: иумӕ кӕимӕ ахуыр кодтон, ахӕм лӕппу мын загъта, зӕгъгӕ, нӕ цард баиу кӕнӕм. Уый мын ӕхсызгон куыннӕ уыд. Иннӕ чызджытау мӕн дӕр фӕнды, цӕмӕй мын цардӕмбал уа. Фӕлӕ уыцы лӕппу дӕр мӕнау уыд рынчын, ӕмӕ иумӕ амондджын куыд хъуамӕ уыдаиккам? Сӕйрагдӕр та уый уыд, ӕмӕ уыцы лӕппу Йегъовӕйӕн нӕ лӕггад кодта. Иумӕйагӕй нын ницы уыд, нӕдӕр, цӕуыл ӕууӕндыдыстӕм, уый, нӕдӕр, цы арӕзтам, уый, стӕй нӕ нысӕнттӕ дӕр тынг хицӕн кодтой. Уӕдӕ уӕд нӕ цард куыд хъуамӕ баиу кодтаиккам? Мӕн фӕндыд Хуыцауы фӕдзӕхстмӕ байхъусын ӕмӕ ӕрмӕст Чырыстийы фӕдылдзӕуӕгмӕ смой кӕнын (1 Кор. 7:39). Уымӕ гӕсгӕ уыцы лӕппуйӕн уӕзданӕй мӕ хъуыды бамбарын кодтон.

Афтӕ кӕй бакодтон, ууыл абон дӕр нӕ фӕсмон кӕнын. Ӕмӕ ӕппындӕр нӕ дызӕрдыг кӕнын, Хуыцау зӕрдӕ кӕмӕй бавӕрдта, уыцы ног дунейы амондджын кӕй уыдзынӕн (Пс. 145:16; 2 Пет. 3:13). Уӕдмӕ та уал архайдзынӕн, цӕмӕй Йегъовӕйӕн иузӕрдионӕй лӕггад кӕнон ӕмӕ абоны цардӕй дӕр райгонд уон.

Тынг бӕллын, мӕ коляскӕйӕ кӕд фӕгӕпп кӕндзынӕн ӕмӕ сагау цӕрдӕг кӕд адугъ кӕндзынӕн, уыцы бонмӕ. Уӕд ӕз цингӕнгӕ ныхъхъӕр кӕндзынӕн: «Кӕд рынчын уыдтӕн, уӕд ныр та ӕнустӕм ӕнӕниз дӕн!»