Ӕфсымӕртӕн ӕххуыс кӕнӕм фылдӕр хӕстӕм тырнынӕн
Ӕфсымӕртӕн ӕххуыс кӕнӕм фылдӕр хӕстӕм тырнынӕн
«Алцыдӕр кӕмӕн бацамоной, уый суыдзӕн йӕ ахуыргӕнӕджы хуызӕн» (ЛУК. 6:40).
1. Йесо зӕххыл куы лӕггад кодта, уӕд цы сарӕзта, цӕмӕй, йӕхӕдӕг цы куыст райдыдта, уый ма ӕрлӕууыдаид?
АПОСТОЛ ИОАНН йӕ Евангелийы кӕрон ныффыста ахӕм ныхӕстӕ: «Уӕвгӕ, Йесо ма ноджыдӕр бирӕ ӕндӕр хъуыддӕгтӕ сарӕзта. Фӕлӕ се ’ппӕты тыххӕй бӕстон ныффысс, зӕгъгӕ, уӕд уыцы чингуытӕ дунейы дӕр нӕ бацӕуиккой» (Иоан. 21:25). Ӕцӕгдӕр, Йесойӕн зӕххыл цыбыр рӕстӕгмӕ бирӕ бантыст саразӕн. Уӕлӕрвтӕм ацӕуыны размӕ йӕ хъуыди, цы куыст райдыдта, уый чи адарддӕр кодтаид, ахӕм адӕймӕгты ссарын. Стӕй сын хъуыди бацамонын, уыцы куыст куыд хъуамӕ кодтаиккой, уый дӕр. Н. э. 33 азы Йесо уӕлӕрвтӕм куы ацыд, уӕд зӕххыл ныууагъта хъусынгӕнджыты гыццыл къорд, фӕлӕ бирӕ нӕ рацыд, афтӕмӕй сӕ нымӕц схызт цалдӕр минмӕ (Хъуыд. 2:41, 42; 4:4; 6:7).
2, 3. а) Абон ӕмбырды ӕфсымӕрты ӕххуыс уӕлдай тынгдӕр цӕмӕн хъӕуы? ӕ) Ацы статьяйы цӕуыл аныхас кӕндзыстӕм?
2 Абон хорз хабар чи хъусын кӕны, уыдон сты 7 000 000 фылдӕр ӕмӕ ӕгас дунейы дӕр се ’мбырдтӕ сты 100 000 фылдӕр. Ӕмӕ уыцы ӕмбырдты тынг хъӕуы, йӕхимӕ разамынд чи иса, ахӕм ӕфсымӕрты ӕххуыс, зӕгъӕм, хистӕр нӕлгоймӕгты ӕххуыс. Ахӕм хӕстӕм чи тырны, уый раппӕлинаг у, уымӕн ӕмӕ «хорз хъуыддагмӕ бӕллы» (1 Тим. 3:1).
3 Фӕлӕ цӕмӕй ӕфсымӕр ӕмбырды исты хӕстӕ ӕххӕст кӕна, уый тыххӕй уал ӕй хъӕуы цавӕрдӕр къахдзӕфтӕ скӕнын. Кӕд ӕм уӕлдӕр ахуыр ӕмӕ цыдӕр курдиӕттӕ ис кӕнӕ царды бирӕ цыдӕртӕ федта, уӕддӕр уый ууыл дзурӕг нӕу, ӕмӕ уыцы хъуыддагмӕ цӕттӕ у. Йӕ удыхъӕды йӕ фидар кӕнын хъӕуы, Библимӕ гӕсгӕ бӕрнон ӕфсымӕртӕм цы миниуджытӕ хъуамӕ уа, уыдон. Нӕ бон куыд у ӕфсымӕртӕн уыцы хъуыддаджы ӕххуыс кӕнын? Йесо загъта: «Алцыдӕр кӕмӕн бацамоной, уый суыдзӕн йӕ ахуыргӕнӕджы хуызӕн» (Лук. 6:40). Ацы статьяйы аныхас кӕндзыстӕм, Йесо йӕ ахуыргӕнинӕгты куыд цӕттӕ кодта ӕмӕ дзы махӕн та нӕ бон цы у зондӕн райсын.
«[Ӕз] уӕ хонын мӕ хӕлӕрттӕ»
4. Йесо йӕ ахуыргӕнинӕгтӕн ӕцӕг ӕмбал кӕй уыди, уый куыд равдыста?
4 Йесо йӕхи йӕ ахуыргӕнинӕгтӕй уӕлдӕр никуы ӕвӕрдта, фӕлӕ сӕ йе ’мбӕлттыл нымадта. Йӕ рӕстӕг сын не ’вгъау кодта, ӕууӕндыд сыл, ӕмӕ сын афтӕ дӕр уымӕн загъта, «мӕ Фыдӕй цыдӕриддӕр фехъуыстон, уый уын раргом кодтон», зӕгъгӕ. (Бакӕс Иоанны 15:15.) Иухатт ӕй йӕ ахуыргӕнинӕгтӕ бафарстой: «Кӕд ӕрцӕудзысты уыцы хабӕрттӕ, стӕй, кӕй ӕрцыдтӕ ӕмӕ ацы цардӕвӕрдӕн йӕ кӕрон кӕй ӕрхӕццӕ, уый цӕмӕй уыдзӕн бӕрӕг?» Ахъуыды-ма кӕн, Йесо сын сӕ фарстайӕн дзуапп куы радта, уӕд сын куыд ӕхсызгон уыдаид! (Матф. 24:3, 4). Йесо сӕ нӕ сусӕг кодта йӕ хъуыдытӕ ӕмӕ йӕ зӕрдӕйы сагъӕстӕ дӕр. Куы йӕ хъуамӕ ӕрцахстаиккой, уыцы ӕхсӕв Петры, Иаковы ӕмӕ Иоанны акодта Гефсиманийы дыргъдонмӕ. Уыцы тыхст сахат ӕй хъуыди Хуыцауимӕ аныхас кӕнын. Ӕмӕ кӕд ӕртӕ апостолы, Йесо цӕй тыххӕй куывта, уый нӕ хъуыстой, уӕддӕр ӕй ӕмбӕрстой, куыд хъуырдухӕн кодта, уый (Мар. 14:33–38). Иухатт та уыцы ӕртӕ апостолы раз «йӕ хуыз аивта», ӕмӕ сӕ уыцы хабар дӕр тынг бафидар кодта (Мар. 9:2–8; 2 Пет. 1:16–18). Йесо йӕ ахуыргӕнинӕгтӕн ӕцӕг ӕмбал кӕй уыди, уый фӕрцы уыдысты ӕнӕфӕцудгӕ ӕмӕ сын цы ахсджиаг куыст бахӕс кодта, уый дарддӕр кодтой.
5. Хистӕр нӕлгоймӕгтӕ ӕмбырды иннӕтӕн куыд ӕххуыс кӕнынц?
5 Абон дӕр ӕмбырды хистӕр нӕлгоймӕгтӕ Йесойау хотӕн ӕмӕ ӕфсымӕртӕн ӕххуыс кӕнынц, ӕмӕ сты се ’мбӕлттӕ. Уыдон сӕ сӕ уарзтӕй тавынц ӕмӕ сын сӕ рӕстӕг не ’вгъау кӕнынц. Кӕй зӕгъын ӕй хъӕуы, хистӕр нӕлгоймӕгтӕн сӕ бон алцы нӕ вӕййы иннӕтӕн радзурын. Фӕлӕ-иу хъуамӕ ӕфсымӕртӕн радзурой, Библийы цы хорз хъуыдытӕ ссарынц, уыдон. Кӕстӕриуӕггӕнӕг ӕфсымӕр нырма ӕрыгон куы уа, уӕд дӕр дзы хистӕр нӕлгоймаг йӕхи уӕлдӕр не ’вӕрдзӕн. Хистӕр нӕлгоймӕгтӕ ӕмбарынц, ӕрыгон кӕстӕриуӕггӕнӕг ӕфсымӕртӕн рӕстдзинады фӕндагыл ныронг дӕр бирӕ цыдӕртӕ кӕй бантыст ӕмӕ сын фидӕны ноджы фылдӕр кӕй бантысдзӕн. Уыдон дӕр Йегъовӕйы уарзынц ӕмӕ ӕмбырдӕн стыр ӕххуыс сты.
«Ӕз уын равдыстон, куыд хъуамӕ кӕнат, уый»
6, 7. Йесо йӕ ахуыргӕнинӕгтӕн цавӕр цӕвиттон ныууагъта ӕмӕ сын уый куыд баххуыс кодта?
6 Кӕд Йесойы ахуыргӕнинӕгтӕ Хуыцауы Ныхас уарзтой, уӕддӕр, цы уавӕрты схъомыл сты ӕмӕ раздӕр куыд цардысты, уымӕ гӕсгӕ-иу хатт раст нӕ хъуыды кодтой (Матф. 19:9, 10; Лук. 9:46–48; Иоан. 4:27). Фӕлӕ-иу сӕ Йесо уайдзӕфты бын никуы фӕкодта ӕмӕ-иу сӕм мӕсты дӕр не сси. Ӕмӕ сыл стыр уӕргътӕ дӕр не ’вӕрдта, ома сӕ бон цы нӕ уыд, уый сӕ нӕ домдта. Стӕй-иу сын ахӕмӕй дӕр ницы аразын кодта, йӕхӕдӕг цы нӕ арӕзта. Йесо сын алы хъуыддаджы дӕр уыди фӕзминаг. (Бакӕс Иоанны 13:15.)
7 Цавӕр цӕвиттон ныууагъта Йесо йӕ ахуыргӕнинӕгтӕн? (1 Пет. 2:21, фип.). Уый кодта хуымӕтӕг цард ӕмӕ йын уый фӕрцы фылдӕр рӕстӕг уыд иннӕтӕн лӕггад кӕнынӕн (Лук. 9:58). Йесо уыди бонзонгӕ ӕмӕ алкӕддӕр амыдта, Хуыцауы Ныхасы цы фыст ис, уый (Иоан. 5:19; 17:14, 17). Стӕй уыди хӕларзӕрдӕ, ӕмӕ иннӕтӕн йемӕ тынг ӕнцон уыд. Йӕ алы хъуыддаг дӕр ууыл дзурӕг уыди, ӕмӕ адӕмы уарзта (Матф. 19:13–15; Иоан. 15:12). Йесо куыд царди ӕмӕ йӕм цы миниуджытӕ уыд, уый тынг баххуыс кодта йӕ апостолтӕн. Зӕгъӕм, Иаков мӕлӕты цӕстытӕм кӕсгӕйӕ нӕ фӕтарст, фӕлӕ Йегъовӕйыл кӕронмӕ иузӕрдионӕй баззад (Хъуыд. 12:1, 2). Иоанн та Йесойы къахвӕдтыл иузӕрдионӕй цыди 60 азӕй фылдӕр (Рарг. 1:1, 2, 9).
8. Хистӕр нӕлгоймӕгтӕ ӕрыгон ӕфсымӕртӕн ӕмӕ иннӕтӕн дӕр фӕзминаг куыд сты?
8 Хистӕр нӕлгоймӕгтӕ дӕр сӕрныллӕг кӕй сты, иннӕты удуӕлдай уарзтӕй кӕй уарзынц ӕмӕ сын сӕ рӕстӕг ӕмӕ сӕ хъарутӕ кӕй не ’вгъау кӕнынц, уый фӕрцы фӕзминаг сты ӕрыгон ӕфсымӕртӕн (1 Пет. 5:2, 3). Уымӕй уӕлдай хистӕр нӕлгоймӕгтӕ сӕ фидар уырнындзинадӕй, стӕй ӕфсымӕрты ӕмӕ хоты куыд ахуыр кӕнынц, куыд цӕрынц ӕмӕ куыд хъусын кӕнынц, уымӕй фӕзминаг куы вӕййынц, уӕд сын уый фӕхӕссы стыр циндзинад, уымӕн ӕмӕ уӕд иннӕтӕн дӕр сӕ бон вӕййы афтӕ архайын (Дзут. 13:7).
Хъусын кӕнынмӕ сӕ бацӕттӕ кодта
9. Йесо йӕ ахуыргӕнинӕгты хъусын кӕныны хъуыддагмӕ куыд бацӕттӕ кодта?
9 Йесо зӕххыл дыууӕ азы куы фӕлӕггад кодта, уӕд йӕ 12 апостолы дӕр арвыста хъусын кӕнынмӕ. Фӕлӕ уал сын уый размӕ бацамыдта, уыцы куыст куыд хъуамӕ кодтаиккой, уый (Матф. 10:5–14). Иухатт та йӕ зӕрды уыди цалдӕр мин адӕймаджы фондз дзулы ӕмӕ дыууӕ кӕсагӕй бафсадын. Фӕлӕ уал йӕ ахуыргӕнинӕгтӕн бацамыдта, адӕмы куыд хъуыди ӕрбадын кӕнын, цӕмӕй хӕринаг се ’ппӕтмӕ дӕр ӕрхаудаид (Лук. 9:12–17). Йесо-иу йӕ ахуыргӕнинӕгтӕн бӕлвырд бамбарын кодта, цы сӕ хъуыди аразын ӕмӕ йӕ куыд хъуамӕ арӕзтаиккой, уый. Апостолты Йесо кӕй ахуыр кодта ӕмӕ сын Хуыцау йӕ сыгъдӕг тыхӕй кӕй ӕххуыс кодта, уый фӕрцы цӕттӕ уыдысты, цӕмӕй н. э. 33 азы хъусын кӕныны хъуыддаджы сӕхимӕ разамынд райстаиккой ӕмӕ хорз хабар дарддӕр парахат кодтаиккой.
10, 11. Ногтӕн ӕмбырды хъуыддӕгты архайынӕн куыд ис ӕххуыс кӕнӕн?
10 Абон та нӕлгоймӕгты ӕмбырды хъуыддӕгты архайынмӕ цӕттӕ кӕнын кӕд райдайӕм? Куыддӕр Библи ахуыр кӕнын райдайынц, афтӕ. Чидӕртӕ сӕ хорз кӕсын нӕ фӕзонынц, ӕмӕ сын уыцы хъуыддаджы фӕхъӕуы баххуыс кӕнын. Дарддӕр сын баххуыс кӕнӕм бирӕ ӕндӕр хъуыддӕгты дӕр. Ӕмбырдтӕм цӕуын куы райдайынц, уӕд бамбарынц, цы сӕ хъӕуы аразын, цӕмӕй сын Хъусынгӕнджыты скъолайы хӕслӕвӕрдтӕ дӕттын райдайой ӕмӕ ӕнӕаргъуыд хъусынгӕнджытӕ суой. Донаргъуыд куы райсынц, уӕд та сӕ ӕфсымӕртӕ ноджы фылдӕр цӕуылдӕрты сахуыр кӕнынц. Зӕгъӕм, бацамонынц сын, Паддзахады залмӕ зилын куыд хъӕуы, уый. Рӕстӕг куы рацӕуы, уӕд сын хистӕр нӕлгоймӕгтӕ бамбарын кӕнынц, цы хъӕуы, цӕмӕй кӕстӕриуӕггӕнӕг ӕфсымӕртӕ суой.
11 Донаргъуыд чи райста, ахӕм ӕфсымӕрӕн хистӕр нӕлгоймӕгтӕ ӕмбырды цавӕрдӕр хъуыддаг куы бахӕс кӕнынц, уӕд ын бӕлвырд бамбарын кӕнынц, цы йӕ хъӕуы саразын. Ӕмӕ йӕ куыд хъӕуы саразын, уый йын ӕвдисгӕ дӕр ракӕнынц. Цыдӕр ын куы нӕ уайа, уӕд уайтагъд ахӕм хъуыдымӕ не ’рцӕудзысты, йӕ бон ӕй нӕу ӕххӕст кӕнын, зӕгъгӕ. Фӕлӕ та йын ногӕй фӕлмӕнӕй бацамондзысты, цы хъӕуы аразын ӕмӕ йӕ куыд ис саразӕн, уый дӕр. Хистӕр нӕлгоймӕгтӕ зонынц, ӕфсымӕр ӕмбырды иннӕтӕн куы лӕггад кӕна, уӕд ын уый стыр циндзинад кӕй хӕсдзӕн. Ӕмӕ сын уымӕ гӕсгӕ ӕхсызгон у ног ӕфсымӕрты ахуыр кӕнын, цӕмӕй сын ӕмбырды цы бахӕс кӕнынц, уый ӕнӕзивӕгӕй ӕххӕст кӕной (Хъуыд. 20:35).
Уынаффӕмӕ чи хъусы, уый у зондджын
12. Йесойы уынаффӕтӕ йӕ ахуыргӕнинӕгтӕн стыр ӕххуыс цӕмӕн уыдысты?
12 Йесо-иу йӕ ахуыргӕнинӕгтӕн, кӕм хъуыди, уым хицӕнӕй уынаффӕ дӕр радта, ӕмӕ сӕ афтӕмӕй дӕр ахуыр кодта. Зӕгъӕм, Йесойы иу самариаг хъӕумӕ куы нӕ бауагътой, уӕд ын Иаков ӕмӕ Иоанн загътой: «Фӕнды дӕ, уӕд зӕгъӕм, ӕмӕ арвӕй арт ӕрцӕуа ӕмӕ сӕ аныхъуыра?» Фӕлӕ сын Йесо уый тыххӕй бауайдзӕф кодта (Лук. 9:52–55). Иннӕ хатт та йӕм Иаков ӕмӕ Иоанны мад куы бахатыд, зӕгъгӕ мын мӕ фыртты дӕ Паддзахады кадджын бынӕтты ӕрбадын кӕн, уӕд Йесо дыууӕ ӕфсымӕрӕн комкоммӕ загъта: «Мӕ рахиз фарс ӕмӕ мӕ галиу фарс чи ӕрбаддзӕн, уый мӕнӕй кӕнгӕ нӕу. Уыцы бынӕтты ӕрбаддзысты, мӕ Фыд сӕ кӕмӕн ӕрцӕттӕ кодта, уыдон» (Матф. 20:20–23). Йесо-иу алкӕддӕр лӕвӕрдта бӕлвырд ӕмӕ, адӕмӕн пайда чи хаста, ахӕм уынаффӕтӕ. Стӕй йӕ уынаффӕтӕ алкӕддӕр уыдысты Фыстадӕй. Фӕндыди йӕ, цӕмӕй йӕ ахуыргӕнинӕгтӕ сахуыр уыдаиккой, Хуыцауы Ныхасы цы фыст ис, ууыл лӕмбынӕг хъуыды кӕнын ӕмӕ уымӕ гӕсгӕ архайын (Матф. 17:24–27). Йесо ӕмбӕрста, ӕнӕххӕст кӕй сты, уый, ӕмӕ, сӕ бон цы нӕ уыд, уый сӕ никуы домдта. Кӕд-иу сын исты уынаффӕ радта, уӕддӕр уый тыххӕй, ӕмӕ сӕ тынг уарзта (Иоан. 13:1).
13, 14. а) Уынаффӕ раттын кӕмӕн бахъӕуы? ӕ) Хистӕр нӕлгоймӕгты ӕфсымӕрӕн уынаффӕ раттын кӕд фӕхъӕуы?
13 Ӕмбырды иннӕтӕн лӕггад кӕнынмӕ чи тырны, уыцы ӕфсымӕртӕй алкӕмӕн дӕр хаттӕй-хатт бахъӕуы Библийӕ уынаффӕ раттын. Ӕмбисӕндты 12:15 ис ахӕм ныхӕстӕ: «Ӕнӕзондмӕ йӕ фӕндаг раст кӕсы, уынаффӕмӕ чи хъусы, уый та у зондджын». Иу ӕрыгон ӕфсымӕр загъта: «Раздӕр мӕм афтӕ касти, ӕмӕ уый аккаг нӕ дӕн, цӕмӕй ӕмбырды цыдӕр хӕстӕ ӕххӕст кӕнон. Фӕлӕ мын хистӕр нӕлгоймаг бамбарын кодта, раст кӕй нӕ хъуыды кодтон. Йегъовӕ афтӕ нӕ зӕгъы, ӕмӕ цӕмӕй иннӕтӕн лӕггад кӕнай, уый тыххӕй хъуамӕ алцӕмӕй дӕр ӕххӕст уай».
14 Хистӕр нӕлгоймӕгтӕ уый куы уыной, ӕмӕ ӕфсымӕр йӕ уагахастӕй фӕзминаг нӕу ӕмӕ йӕ уый хъыгдары размӕ цӕуын, уӕд хъуамӕ бацархайой, цӕмӕй йӕ раст зондыл саразой, ӕмӕ уый хъуамӕ кӕной фӕлмӕнӕй (Гал. 6:1). Вӕййы афтӕ дӕр, ӕмӕ ӕфсымӕр цавӕрдӕр хъуыддӕгтӕм раст цӕстӕй нӕ кӕсы, ӕмӕ йын уӕд дӕр фӕхъӕуы уынаффӕ раттын. Зӕгъӕм, хистӕр нӕлгоймӕгтӕ бафиппайдтой, ӕфсымӕры кӕй нӕ фӕнды йӕхи уӕлдай хатт батыхсын кӕнын. Уӕд хорз уаид, куы йӕ сразӕнгард кӕниккой Йесойы цӕвиттоныл ахъуыды кӕнынмӕ. Йесо хорз хабар зынгзӕрдӕйӕ хъусын кодта ӕмӕ йӕ ахуыргӕнинӕгтӕн дӕр уый бафӕдзӕхста (Матф. 28:19, 20; Лук. 8:1). Йе та, зӕгъӕм, ӕфсымӕр йӕхи иннӕтӕй уӕлдӕр ӕвӕры. Уӕд ын хистӕр нӕлгоймӕгтӕ йӕ зӕрдыл ӕрлӕууын кӕндзысты, Йесо йӕ ахуыргӕнинӕгтӕн цы ныхӕстӕ загъта, уыдон, сымах афтӕ ма кӕнут, зӕгъгӕ (Лук. 22:24–27). Кӕнӕ та, чи зоны, ӕфсымӕрӕн зын у иннӕтӕн хатыр кӕнын. Уӕд та йын йӕ зӕрдыл ӕрлӕууын кӕнӕн ис, Йесо саузӕрдӕ цагъары тыххӕй цы фӕсномыг ныхас радзырдта, уый. Кӕд уыцы цагъарӕн йӕхицӕн стыр хӕс ныххатыр кодтой, уӕддӕр дзы ӕндӕр чидӕр цы гыццыл хӕс дардта, уый ныххатыр кӕнын ӕй нӕ бафӕндыд (Матф. 18:21–35). Хистӕр нӕлгоймӕгты ӕфсымӕрӕн уынаффӕ раттын куы хъӕуа, уӕд ын хъуамӕ ӕнӕмӕнгӕй раттой, ӕмӕ цас тагъддӕр, уыйас хуыздӕр. (Бакӕс Ӕмбисӕндтӕ 27:9.)
«Дӕхиуыл кус»
15. Ӕфсымӕртӕн сӕ бинонтӕ куыд ӕххуыс кӕнынц, цӕмӕй сӕ бон иннӕтӕн лӕггад кӕнын уа?
15 Хистӕр нӕлгоймӕгтӕй бирӕ кӕнгӕ у, цӕмӕй ӕфсымӕртӕ ӕмбырды сӕхимӕ алыхуызон хӕстӕ исой. Фӕлӕ иннӕтӕн дӕр сӕ бон бирӕ у уыцы хъуыддаджы саразын. Зӕгъӕм, ӕфсымӕрӕн стыр ӕххуыс уыдзысты йӕ бинонтӕ. Ӕмӕ кӕд ӕфсымӕр хистӕр нӕлгоймаг у, уӕд дӕр ын йӕ хӕстӕ ӕххӕст кӕнын бирӕ ӕнцондӕр уыдзӕн, йӕ ус ӕмӕ йӕ сывӕллӕттӕ ӕмбаргӕ куы уой ӕмӕ дзы ӕгӕр бирӕ куы нӕ домой, уӕд. Сӕхицӕй йӕ кӕй атонынц, уый фӕрцы йӕ бон вӕййы иннӕтӕн лӕггад кӕнын, ӕмӕ йын уый хӕссы стыр циндзинад. Хистӕр нӕлгоймӕгтӕн сӕ бинонтӕ ӕрмӕст сӕхиуыл кӕй нӕ хъуыды кӕнынц, уый тыххӕй сӕ мах дӕр тынг бузныг стӕм (Ӕмб. 15:20; 31:10, 23).
16. а) Ӕфсымӕр ӕмбырды иннӕтӕн лӕггад кӕндзӕн ӕви нӕ, уый сӕйраджыдӕр кӕмӕй кӕнгӕ у? ӕ) Кӕд ӕфсымӕры кӕстӕриуӕггӕнӕг ӕфсымӕрӕй кӕнӕ хистӕр нӕлгоймагӕй лӕггад кӕнын фӕнды, уӕд ӕй цы хъӕуы аразын?
16 Кӕд ӕфсымӕрӕн иннӕтӕ феххуыс кӕнынц, уӕддӕр ӕмбырды хотӕн ӕмӕ ӕфсымӕртӕн лӕггад кӕнынмӕ сӕйраджыдӕр йӕхӕдӕг хъуамӕ тырна. (Бакӕс Галатӕгтӕм 6:5.) Кӕй зӕгъын ӕй хъӕуы, ӕфсымӕр кӕстӕриуӕггӕнӕг ӕфсымӕр кӕнӕ хистӕр нӕлгоймаг куы нӕ уа, уӕддӕр йӕ бон у иннӕтӕн ӕххуыс кӕнын ӕмӕ хъусын кӕныны хъуыддаджы ӕппӕт хъарутӕй архайын. Фӕлӕ йӕ кӕд фӕнды, цӕмӕй йын йӕ бӕрны ахӕм хӕстӕ баконой, уӕд хъуамӕ архайа, бӕрнон ӕфсымӕртӕ цавӕр хъуамӕ уой, уый тыххӕй Библийы цы фыст ис, уымӕ гӕсгӕ (1 Тим. 3:1–13; Тит. 1:5–9; 1 Пет. 5:1–3). Уӕдӕ кӕд ӕфсымӕр ахӕм хӕстӕм тырны, уӕд хъуамӕ ахъуыды кӕна, фӕхуыздӕр кӕнын ӕй цы хъӕуы, ууыл. Ӕмӕ йӕ уый тыххӕй та хъӕуы Библи алы бон дӕр кӕсын, лӕмбынӕг ӕй иртасын ӕмӕ цы базоны, ууыл арф хъуыды кӕнын. Стӕй йӕ хъӕуы Йегъовӕмӕ зӕрдӕбынӕй кувын ӕмӕ хъусын кӕныны хъуыддаджы йӕ удӕй арт цӕгъдын. Афтӕмӕй уый архайдзӕн, апостол Павел Тимофейӕн цы уынаффӕ радта, уымӕ гӕсгӕ: «Дӕхиуыл кус, цӕмӕй Хуыцауыл иузӕрдион уай – уый уӕд дӕ нысан» (1 Тим. 4:7).
17, 18. Ӕфсымӕрмӕ афтӕ куы кӕса, ӕмӕ ӕмбырды цавӕрдӕр хӕстӕ ӕххӕст кӕныны аккаг нӕу, уӕд ын цы баххуыс кӕндзӕн? Ӕмӕ йӕ иннӕтӕн лӕггад кӕнын куы нӕ фӕнда, уӕд та йын куыд кӕнгӕ у?
17 Фӕлӕ ӕфсымӕрмӕ афтӕ куы кӕса, ӕмӕ уый аккаг нӕу, цӕмӕй кӕстӕриуӕггӕнӕг ӕфсымӕрӕй кӕнӕ хистӕр нӕлгоймагӕй лӕггад кӕна, уӕд ын цы баххуыс кӕндзӕн? Йегъовӕ ӕмӕ йыл Йесо кӕй тыхсынц, уый ӕдзухдӕр йӕ зӕрдыл куы дара. Зӕгъӕм, Библийы Йегъовӕйы тыххӕй фыст ис, зӕгъгӕ нын алы бон дӕр нӕ уаргъ хӕссы (Пс. 68:19). Уӕдӕ нӕ уӕларвон Фыд ахӕм ӕфсымӕртӕн ӕнӕмӕнгдӕр баххуыс кӕндзӕн, цӕмӕй уыцы хъуыддагмӕ ӕндӕр цӕстӕй ракӕсой. Кӕстӕриуӕггӕнӕг ӕфсымӕрӕй кӕнӕ хистӕр нӕлгоймагӕй чи нӕма лӕггад кӕны, уыдонӕн ма баххуыс кӕндзӕн уый дӕр, ӕмӕ сӕ зӕрдыл куы дарой, Йегъовӕйы организацийы йӕхимӕ разамынд чи иса, ахӕм фӕлтӕрд ӕфсымӕртӕ тынг кӕй хъӕуы. Сӕ бон ма у Йегъовӕмӕ кувын ӕмӕ дзы йӕ сыгъдӕг тых курын. Сыгъдӕг тыхӕй цы миниуджытӕ гуыры, уыдонмӕ хауы фарн ӕмӕ хиуыл хӕцын. Ацы миниуджытӕ сӕм куы уа, уӕд сӕ бон бауыдзӕн, чи сӕ къуылымпы кӕны, уыцы хъуыдытӕ сӕхицӕй фӕсурын (Лук. 11:13; Гал. 5:22, 23). Иннӕтӕн удуӕлдайӕ лӕггад кӕнын кӕй фӕнды, уыдонӕн Йегъовӕ ӕнӕмӕнг раарфӕ кӕндзӕн.
18 Ӕмӕ ӕфсымӕры иннӕтӕн лӕггад кӕнын нӕ фӕнды, уӕд та йын куыд кӕнгӕ у? Апостол Павел ныффыста: «Хуыцау уӕ йӕхӕдӕг, ӕхсызгон ын цы у, уымӕ гӕсгӕ фидар кӕны, цӕмӕй уӕ фӕндгӕ дӕр кӕна ӕмӕ архайгӕ дӕр кӕнат» (Фил. 2:13). Уӕдӕ уыцы фӕнд адӕймагӕн Хуыцау дӕтты, ӕмӕ йын хъару дӕр дӕтдзӕн, цӕмӕй йӕ бон уа иннӕтӕн лӕггад кӕнын ӕмӕ йын йӕ фӕндон ӕххӕст кӕнын (Фил. 4:13). Стӕй йӕ бон у Хуыцауӕй ӕххуыс курын, цӕмӕй, раст цы у, уый араза (Пс. 25:4, 5).
19. Йегъовӕ йӕ адӕмӕн «авд фыййауӕй» ӕмӕ «аст кънйазӕй» зӕрдӕ кӕй бавӕрдта, уый цӕуыл дзурӕг у?
19 Хистӕр нӕлгоймӕгтӕ ӕфсымӕрты зӕрдиагӕй кӕй ахуыр кӕнынц, уый тыххӕй сын Йегъовӕ арфӕ кӕны. Стӕй арфӕ кӕны, иннӕтӕн лӕггад кӕнынмӕ чи тырны, уыцы ӕфсымӕртӕн сӕхицӕн дӕр. Йегъовӕ зӕрдӕ бавӕрдта, йӕ адӕмӕн кӕй ратдзӕн «авд фыййауы» ӕмӕ «аст кънйазы». Уый ууыл дзурӕг у, ӕмӕ ӕмбырдты йӕхимӕ разамынд чи иса, ахӕм ӕфсымӕртӕ фаг уыдзӕн (Мих. 5:5). Ӕмӕ абон ӕцӕгдӕр ӕмбырдты ис, иннӕтӕн сӕрныллӕгӕй лӕггад кӕнын кӕй фӕнды ӕмӕ уыцы хъуыддагмӕ алцӕмӕй дӕр цӕттӕ чи у, ахӕм ӕфсымӕртӕ. Уыдон Йегъовӕйӕн кад хӕссынц ӕмӕ махӕн та стыр арфӕдзинад сты!
Цавӕр дзуапп ратдзынӕ?
• Йесо йӕ ахуыргӕнинӕгты хъусын кӕныны хъуыддагмӕ куыд бацӕттӕ кодта?
• Хистӕр нӕлгоймӕгтӕн сӕ бон куыд у Йесойы фӕзмын ӕмӕ ног ӕфсымӕртӕн ӕххуыс кӕнын, цӕмӕй ӕмбырды сӕхимӕ разамынд исой?
• Ӕфсымӕрӕн йӕ бинонтӕ куыд ӕххуыс кӕнынц, цӕмӕй ӕмбырды иннӕтӕн лӕггад кӕна?
• Цӕмӕй ӕфсымӕр ӕмбырды иннӕтӕн лӕггад кӕна, уый тыххӕй йӕхӕдӕг цы хъуамӕ араза?
[Фарстатӕ ахуыр кӕнынӕн]
[Нывтӕ 31 фарсыл]
Библи чи ахуыр кӕны, уымӕн куыд ис ӕххуыс кӕнӕн, цӕмӕй размӕ цӕуа?
[Ныв 32 фарсыл]
Ӕфсымӕр фылдӕр хӕстӕм кӕй тырны, уый йӕ бон куыд у равдисын?
