Радзырдта йӕ Лоис Дидур

Алчидӕр нӕ кӕддӕр цӕмӕйдӕр загъта, фӕлтау афтӕ куы нӕ бакодтаин, зӕгъгӕ. Фӕлӕ 50 азы ӕххӕстрӕстӕг лӕггад кӕнын, ӕмӕ нӕ хъуыды кӕнын, цӕмӕй уыцы азты дӕргъы, Йегъовӕйы рахиз фарс кӕй дӕн, уый мын ӕвзӕрӕй исты ӕрхастаид. Фӕнды мӕ радзурын, афтӕ цӕмӕн зӕгъын, уый тыххӕй.

ӔЗ РАЙГУЫРДТӔН 1939 азы ӕмӕ схъомыл дӕн Канадӕйы, Саскачеваны провинцийы, хъӕуы. Уыди ма мын цыппар хойы ӕмӕ иу ӕфсымӕр. Цардыстӕм фермӕйы, нӕ алыварс та иууылдӕр уыди быдыртӕ. Уый уыди тынг амондджын рӕстӕг. Иу бон нӕм ӕрбацыдысты Йегъовӕйы Ӕвдисӕнтӕ ӕмӕ мӕ фыдимӕ ныхас кодтой. Ӕз сӕ бафарстон, Хуыцауӕн ном ис, зӕгъгӕ. Уыдон нын Псаломы 83:18 равдыстой Йегъовӕйы ном. Ӕмӕ мӕ уӕд бафӕндыд Хуыцауы тыххӕй ӕмӕ йӕ Ныхасы тыххӕй ноджы фылдӕр базонын.

Уыцы рӕстӕг, фермӕты чи цард, уыдоны сывӕллӕттӕ цыдысты, иу уат кӕм уыд, ахӕм скъолатӕм, ахуыр дзы кодтой ӕстӕм къласы онг. Скъоламӕ-иу хъуыди цалдӕр километры цӕуын, ӕмӕ-иу цыдысты бӕхтыл кӕнӕ та къахӕй. Ахуыргӕнӕг-иу цард скъоладзауты бинонтӕм ӕмӕ йӕ уыдон дардтой. Иу аз уыцы рад ӕрхауд мӕ ныййарджытӕм. Царди нӕм ног ахуыргӕнӕг, Джон Дидур, зӕгъгӕ.

Уӕд ӕй ӕз нӕ зыдтон, уыцы лӕппу Хуыцауы Ныхас кӕй иртӕста. Мӕ фыд уыд коммунизм ӕмӕ социализмы фарс. Ӕмӕ иухатт ӕз дӕр коммунизм ӕмӕ социализмы сӕрыл куы дзырдтон, уӕд мын Джон фӕлмӕнӕй загъта: «Иу адӕймагӕн дӕр уый бар нӕй, цӕмӕй иннӕтӕн хицау уа. Уыцы бар ӕрмӕстдӕр Хуыцауӕн ис». Уый фӕстӕ ма ахӕм фарстатыл арӕх ныхас кодтам.

Джон райгуырд 1931 азы, ӕмӕ, хӕст цы бӕллӕхтӕ расайы, уый тыххӕй зыдта. 1950 азы Корейӕйы хӕст куы райдыдта, уӕд Джон алыхуызон динты кусджыты фарста, хӕсты уын хӕцӕн ис, зӕгъгӕ. Ӕмӕ йын дзы алчидӕр дзуапп радта, чырыстӕттӕн, дам, хӕсты хӕцӕн ис. Фӕстӕдӕр та уымӕй бафарста Йегъовӕйы Ӕвдисӕнты. Уыдон ын Библийӕ бамбарын кодтой, фыццаг чырыстӕттӕ уыцы  хъуыддагмӕ цы цӕстӕй кастысты, уый. 1955 азы Джон донаргъуыд райста. Ӕз та донаргъуыд райстон иннӕ аз. Нӕ дыууӕйы дӕр фӕндыд нӕ цард ӕмӕ нӕ хъарутӕ иууылдӕр Йегъовӕйӕн раттын (Пс. 37:3, 4). 1957 азы июлы та Джонимӕ нӕ цард баиу кодтам.

Бирӕ азты дӕргъы-иу афтӕ рауад, ӕмӕ-иу нӕ чындзӕхсӕвы бон ӕрхауд конгрессы бонтӕм. Тынг ӕхсызгон-иу нын уыд, бинонты цардӕн стыр аргъ чи кодта, уыцы мингай адӕмы ’хсӕн-иу кӕй уыдыстӕм, уый. Фыццаг хатт ӕхсӕнадӕмон конгрессы уыдыстӕм 1958 азы. Саскачеванӕй Нью-Йоркмӕ ацыдыстӕм машинӕйыл, уыдыстӕм фондзӕй. Къуырийы бӕрц боныгӕтты машинӕйыл цыдыстӕм, ӕхсӕвы та-иу ӕрлӕууыдыстӕм пъалаткӕйы. Бетлехемы (штат Пенсильванийы) фембӕлдыстӕм иу ӕфсымӕрыл, ӕмӕ нӕ фӕстаг ӕхсӕв йӕхимӕ фӕхуыдта. Мах уый ӕнхъӕл нӕ уыдыстӕм, ӕмӕ нын тынг ӕхсызгон уыд. Афтӕ ныл кӕй батыхст, уый фӕрцы нӕхимӕ базылдыстӕм ӕмӕ Нью-Йоркмӕ сыгъдӕгӕй, аив кондӕй ӕрхӕццӕ стӕм. Уыцы стыр конгрессы ноджы хуыздӕр бамбӕрстам, куыд хорз ӕмӕ куыд ӕхсызгон у Йегъовӕйӕн лӕггад кӕнын! Псаломзарӕггӕнӕг раст ныффыста: «Адӕймаг дӕ рахиз фарс лӕууа – уый циндзинад хӕссы ӕнустӕм» (Пс. 16:11).

ЛӔГГАД КӔНӔМ ПИОНЕРТӔЙ

Афӕдзы фӕстӕ, 1959 азы, райдыдтам Саскачеваны пионертӕй лӕггад кӕнын. Уӕд цардыстӕм къуыбырыл, цӕрынӕн чи уыд, иу ахӕм гыццыл фургоны. Уырдыгӕй нӕм цалдӕр километрмӕ зындысты быдыртӕ, ӕмӕ уыцы быдырты уыдысты, кӕм хъусын кодтам, уыцы бынӕттӕ дӕр.

Иу бон филиалӕй райстам диссаджы писмо. Джон уӕд трактор арӕзта, ӕмӕ йӕм ӕз уайтагъд азгъордтон. Уыцы писмойы фыст уыд, сӕрмагонд пионертӕй нӕ кӕй ӕрвитынц горӕт Ред-Лейкмӕ (провинци Онтарио). Кӕм ис, уый нӕ зыдтам, ӕмӕ уыцы бынат уайтагъд нӕ картӕтыл агурын райдыдтам.

Уыцы бынат тыгъд быдыртӕй куыд тынг хицӕн кодта! Ныр нӕ алыварс уыди стыр хъӕдтӕ, стӕй гыццыл горӕттӕ, сызгъӕрин кӕм къахтой, уыцы шахтӕты цур. Фыццаг бон нӕхицӕн цӕрӕнбынат куы агуырдтам, уӕд ныхас кодтам иу сылгоймагимӕ. Уый фехъуыста йӕ сыхаг гыццыл чызг ӕмӕ уайтагъд йӕ мадмӕ азгъордта ӕмӕ йын хабар радзырдта. Йӕ мад ахӕм хӕларзӕрдӕ разынд, ӕмӕ нӕ йӕхимӕ фӕхуыдта. Нӕ хуыссӕн лӕууыди сыджытбын, сыджыткъул пъадвалы. Иннӕ бон ссардтам дыууӕуатон хъӕдын хӕдзар, фӕлӕ дзы афтид къултӕ йеддӕмӕ ницы уыд, нӕдӕр дзы дон уагъд уыди. Ӕрмӕст дзы лӕууыд, сугӕй арт кӕм кодтой, ахӕм ӕфсӕйнаг пец. Дӕрдджын дзаумӕтты дуканийы нӕхицӕн цалдӕр дзаумайы балхӕдтам, ӕмӕ ӕппӕт уыдӕттӕ нӕ фаг уыдысты.

209 километрӕй хӕстӕгдӕр нӕм ӕмбырд никуы уыд. Сызгъӕринкъахджытӕй бирӕтӕ ӕрцыдысты Европӕйӕ, ӕмӕ-иу нын лӕгъстӕ кодтой, цӕмӕй сын Библи сӕхи ӕвзагыл ссардтаиккам. Бирӕ нӕ рацыд, афтӕ Библи ахуыр кодтам 30 адӕймагимӕ. Ӕмӕ нӕм ӕхсӕз мӕймӕ фӕзынд иу гыццыл ӕмбырд.

Иу сылгоймагимӕ Библи ахуыр кодтам, ӕмӕ йӕ лӕг телефонӕй фӕдзырдта йӕ сауджынмӕ, цӕмӕй йын йӕ усы раст зондыл сарӕзтаид. Уыцы сауджынимӕ куы фембӕлдыстӕм, уӕд нын афтӕ бакодта, хъуамӕ, дам, Хуыцау Троицӕ кӕй у, адӕмӕн уый дӕр амонат. Кӕимӕ ахуыр кодтам, уыцы сылгоймаг сӕ католикон Библи рахаста ӕмӕ сауджынӕн загъта, цӕмӕй йӕ ныхӕстӕ Библийӕ сбӕлвырд кодтаид. Уӕд сауджын Библи стъолмӕ баппӕрста ӕмӕ загъта, ӕз, дам, уый хъуаг нӕ дӕн, цӕмӕй исты бӕлвырд кӕнон. Куы фӕцӕйцыд, уӕд сын украинагау афтӕ, адоны, дам, феддӕдуар кӕнут ӕмӕ, дам, сӕ уӕ хӕдзармӕ макуыуал бауадзут. Уый йӕ кӕцӕй зыдта, ӕмӕ Джон украинагау ӕмбары!

Уый фӕстӕ Ред-Лейкы бирӕ нал фестӕм, уымӕн ӕмӕ Джоны хъуамӕ бацӕттӕ кодтаиккой районон цӕстдарӕгӕй лӕггад кӕнынмӕ. Фӕлӕ-ма ахъуыды кӕнут, иу азы фӕстӕ Джонӕн облӕстон конгрессы донаргъуыды фӕдыл раныхас куы уыд, уӕд, донаргъуыд чи иста, уыдоны ’хсӕн уыди уыцы сылгоймаджы лӕг дӕр! Уӕд сауджынимӕ цы хабар ӕрцыд,  уый йӕ хъуыдытыл бафтыдта ӕмӕ йӕ бафӕндыд, Библи цы дзуры, уый базонын.

ӔМБЫРДТӔ БӔРӔГ КӔНӔМ

Мӕ лӕг районон цӕстдарӕгӕй куы лӕггад кодта ӕмӕ-иу ӕмбырдтӕ куы бӕрӕг кодтам, уӕд-иу ӕрлӕууыдыстӕм алыхуызон бинонтӕм, ӕмӕ нын уый афтӕ ӕхсызгон уыди, ӕмӕ диссаг. Чи-иу нӕ суазӕг кодта ӕмӕ иу бинонтау кӕимӕ цардыстӕм, уыдон нын тынг зынаргъ систы. Иухатт цардыстӕм уӕллаг уӕладзыджы, зымӕджы-иу хъарм чи нӕ кодта, ахӕм уаты. Райсомӕй-иу раджы фехъуыстам, ацӕргӕ хо-иу нӕ уатмӕ сабыргай куыд бацыди ӕмӕ-иу гыццыл пецы арт куыд скодта, уый. Уый фӕстӕ-иу уайтагъд фездӕхти тасимӕ ӕмӕ хъарм донимӕ, цӕмӕй-иу нӕхи барӕвдз кодтаиккам. Уыцы уӕздан, фӕлмӕн хойӕ бирӕ цӕуылдӕрты сахуыр дӕн.

Ӕмбырдтӕ кӕй бӕрӕг кодтам, уый фӕрцы ӕз Йегъовӕмӕ тынг баввахс дӕн. Альбертӕйы цы районты лӕггад кодтам, уыдонӕй иуы Дард Цӕгаты уыд шахтерты горӕт ӕмӕ дзы царди ӕрмӕстдӕр иу хо. Йегъовӕйы организаци уыцы иунӕг хомӕ цы цӕстӕй каст? Ӕхсӕз мӕйӕ ӕхсӕз мӕймӕ-иу уырдӕм хӕдтӕхӕгыл атахтыстӕм, къуыри-иу йемӕ фӕлӕггад кодтам ӕмӕ-иу ӕмбырдтӕ ауагътам, горӕты стыр ӕмбырды куыд вӕййы, раст афтӕ. Уымӕй бӕрӕг уыд, Йегъовӕ йӕ алы гыццыл фысыл дӕр куыд тыхсы ӕмӕ йӕ йӕ зӕрдӕйы хъармӕй куыд тавы, уый.

Йӕ хӕдзары-иу нӕ чи суазӕг кодта, уыдонӕй нӕ бирӕтӕ рох нӕ уыдысты, кӕрӕдзимӕ писмотӕ фыстам. Мӕ зӕрдыл ӕрлӕууы Джоны фыццаг лӕвӕрттӕй иу – уый уыди рӕсугъд къопп фыссӕн гӕххӕттытимӕ. Уыцы гӕххӕттытыл-иу не ’мбӕлттӕм писмотӕ фыстам, ӕмӕ нын уый тынг ӕхсызгон уыд. Ныр дӕр ма уыцы къопп мӕхимӕ ис.

Торонтойы куы лӕггад кодтам, уӕд нӕм Канадӕйы Вефилӕй иу ӕфсымӕр фӕдзырдта ӕмӕ нӕ бафарста, Вефилы лӕггад кӕнын уӕ нӕ фӕндид, зӕгъгӕ. Куыд уӕм кӕсы, дзуапп ӕй кӕд хъуыди? Гӕнӕн уӕвгӕйӕ, дам, райсом! Ӕмӕ йын иннӕ бон разыйы дзуапп радтам.

ЛӔГГАД КӔНӔМ ВЕФИЛЫ

Кӕдӕмфӕнды нӕ ма снысан кодтаиккой,– алкӕм дӕр уыдтам, Йегъовӕйы рахиз фарс лӕууай, уый алы уавӕрты дӕр циндзинад куыд хӕссы, уый. Ӕмӕ 1977 азы Вефилмӕ куы ’рцыдыстӕм, уӕд дӕр афтӕ рауад. Уым иумӕ лӕггад кодтам сӕрст чырыстӕттӕй кӕимӕдӕрты, ӕмӕ уый фӕрцы федтам, куыд алыхуызон сты. Стӕй ма федтам уый дӕр, ӕмӕ Хуыцауы Ныхасӕн куыд тынг аргъ кодтой.

Вефилы цард ӕндӕрхуызон уыд, ӕмӕ мӕ зӕрдӕмӕ цыди. Зӕгъӕм, ныр нӕ дзаумӕттӕ чемоданы нӕ уыдысты, фӕлӕ скъаппы. Стӕй ныр лӕггад кодтам иу ӕмбырды. Вефилы цы куыст кодтон, уымӕй уӕлдай ма-иу кодтон экскурситӕ дӕр, ӕмӕ мын уый стыр циндзинад хаста. Экскурсимӕ-иу чи ’рбацыд, уыцы ӕфсымӕртӕ ӕмӕ хотӕн-иу радзырдтон, Вефилы цы куыст цӕуы, уый тыххӕй, сӕ фарстатӕн-иу дзуапп лӕвӕрдтон, ӕмӕ-иу уыдон дӕр дзырдтой, цы хъуыды кӕнынц, уый.

Азтӕ куыд атахтысты, уый ӕмбаргӕ дӕр нӕ бакодтам. 1997 азы Джоны фӕхуыдтой Скъоламӕ Филиалты комитетты уӕнгтӕн (Паттерсонмӕ, штат Нью-Йорчы). Уый фӕстӕ нӕ бафарстой, зӕгъгӕ уӕ нӕ фӕндид Украинӕйы лӕггад кӕнын. Йегъовӕмӕ, дам, скувут ӕмӕ, дам, уыцы хъуыддагыл дзӕбӕх ахъуыды кӕнут. Уыцы бон изӕрмӕ йӕ зыдтам, разыйы дзуапп кӕй ратдзыстӕм.

НОГ БЫНАТ – УКРАИНӔ

1992 азы уыдыстӕм стыр ӕхсӕнадӕмон конгрессы Санкт-Петербурджы (Уӕрӕсейы), уый фӕстӕ та 1993 азы Киевы (Украинӕйы). Уӕд тынг бауарзтам, Скӕсӕн Европӕйы нын чи цӕры, уыцы ӕфсымӕртӕ ӕмӕ хоты. Львовы цардыстӕм иу зӕронд хӕдзары, дыккаг уӕладзыджы. Нӕ рудзгуытӕй зынди иу кӕрт, уыди дзы гыццыл цӕхӕрадон, кӕрчытӕ ӕмӕ иу стыр сырх уасӕг. Афтӕ мӕм каст, цыма Саскачеваны фермӕйы дӕн. Уыцы хӕдзары цардыстӕм дыууадӕсӕй. Ӕмӕ-иу нӕ алы бон дӕр райсомӕй раджы хъуыди горӕтыл Вефилмӕ цӕуын.

Украинӕйы кӕй лӕггад кодтам, уый тыххӕй цы зӕгъӕн ис? Уымы ӕфсымӕртӕ федтой бирӕ зындзинӕдтӕ, фӕлварӕнтӕ, хъусын кӕнын сӕ нӕ уагътой,  бадтысты ахӕстӕтты, фӕлӕ уӕддӕр сӕ уырнындзинад нӕ фӕцудыдта. Ӕмӕ ахӕм ӕфсымӕрты ’хсӕн кӕй уыдыстӕм, уымӕ гӕсгӕ нӕхицӕй цыдӕр ӕнхъӕл никуы уыдыстӕм. Куы-иу сӕ ӕппӕлыдыстӕм, уӕд-иу загътой: «Мах уый Йегъовӕйы тыххӕй арӕзтам». Афтӕ никуы ахъуыды кодтой, ӕмӕ иунӕг сты. Ныр дӕр ма дзы искӕмӕн истӕй тыххӕй бузныг куы зӕгъай, уӕд афтӕ бакӕны: «Бузныг Йегъовӕйӕн». Уыдон зонынц, хорзӕй цыдӕриддӕр ис, уый Йегъовӕйӕ кӕй цӕуы.

Украинӕйы бирӕтӕ ӕмбырдтӕм къахӕй фӕцӕуынц ӕмӕ сын вӕййы рӕстӕг, цӕмӕй аныхӕстӕ кӕной, кӕрӕдзи бафидар кӕной. Цӕуын сӕ бахъӕуы сахаты бӕрц кӕнӕ та фылдӕр. Львовы ис 50 ӕмбырдӕй фылдӕр, ӕмӕ дзы 21 ӕмбырдӕн фембӕлдтӕ вӕййы иу стыр Паддзахады залты комплексы. Алы хуыцаубон дӕр ӕфсымӕртӕ ӕмбырдтӕм куыд фӕцӕйцӕуынц, уый фенын иу диссаг вӕййы.

Украинаг ӕфсымӕртӕ ӕмӕ хотӕ тынг уӕздан, фӕлмӕн адӕм сты, стӕй дын сӕ уд дӕр нӕ бахӕлӕг кӕндзысты, ӕмӕ сыл тагъд ацахуыр стӕм. Ныр дӕр ма ӕвзаг дзӕбӕх нӕ зонын ӕмӕ, цы фӕдзурынц, уый арӕх нӕ бамбарын, фӕлӕ мӕ не стыхсынц. Цы зӕгъинаг вӕййынц, уый сын арӕх сӕ цӕстытӕм кӕсгӕйӕ бамбарын.

Не ’фсымӕрты ’хсӕн цы ӕууӕнк ис, уый ноджы хуыздӕр федтон, 2003 азы Киевы ӕхсӕнадӕмон конгресс куы уыди, уӕд. Метромӕ ныххызтыстӕм, адӕмӕй дзы къух бакӕнӕн нӕ уыд. Ӕмӕ куыддӕр платформӕмӕ бацыдыстӕм, афтӕ нӕм ӕрбацыд иу гыццыл чызг ӕмӕ нын сабырӕй афтӕ: «Фӕдзӕгъӕл дӕн, мӕ бабуйы нал арын». Уыцы чызг ныл плакеткӕтӕ федта ӕмӕ йӕ зыдта, Йегъовӕйы Ӕвдисӕнтӕ кӕй стӕм. Диссаг уый уыд, ӕмӕ нӕ фӕтарст, кӕугӕ дӕр нӕ кодта. Немӕ ма уыди районон цӕстдарӕджы бинойнаг дӕр, ӕмӕ уый гыццыл чызджы акодта, конгрессы сӕфт дзаумӕттӕ кӕдӕм хастой, уыцы хайадмӕ. Ӕмӕ гыццыл фӕстӕдӕр йӕ бабуимӕ фембӕлдысты. Уыцы гыццыл чызджы хабар мӕ никуы ферох уыдзӕн. Суанг цалдӕр мин адӕймаджы ’хсӕн куы фӕдзӕгъӕл, уӕд дӕр нӕ дызӕрдыг кодта, Хуыцау ын кӕй баххуыс кӕндзӕн.

2001 азы майы нӕ ног филиал Хуыцауӕн куы нывонд кодтой, уӕд Украинӕмӕ алы бӕстӕтӕй ӕрцыд бирӕ ӕфсымӕртӕ ӕмӕ хотӕ. Хуыцаубоны райсомӕй стадионы уый фӕдыл уыд сӕрмагонд раныхас. Ӕмӕ уый фӕстӕ нӕ ног Вефил фенынмӕ дуне ӕфсымӕртӕ ӕмӕ хотӕ куыд ӕрбацӕйцыд, уый ныр дӕр ма мӕ цӕстытыл уайы! Сӕхи куыд дардтой ӕмӕ куыд уӕздан уыдысты, уый уынгӕйӕ мӕ зӕрдӕ суынгӕг. Ӕмӕ ноджы тынгдӕр аргъ кӕнын райдыдтон, Хуыцауӕн кӕй лӕггад кӕнын, уый цы циндзинад хӕссы, уымӕн.

ӔНӔНХЪӔЛӔДЖЫ ХАБАР

Хъыгагӕн, 2004 азы Джонмӕ ссардтой рак. Джоны дзӕбӕх кӕнынмӕ ацыдыстӕм Канадӕмӕ. Фыццаг хатт ын химиотерапи куы скодтой, уӕд тынг ӕвзӕр уыд, ӕмӕ цалдӕр къуырийы фӕци реанимацийы. Ӕппынфӕстаг йӕхимӕ ӕрцыди. Кӕд ын дзурын тынг зын уыд, уӕддӕр-иу йӕ цӕстытӕй алкӕддӕр бӕрӕг уыд, рынчынфӕрсӕг-иу ӕм чи ӕрбацыд, уыдонӕй алкӕмӕй дӕр тынг бузныг кӕй у.

Фӕлӕ Джон йӕ къахыл нал слӕууыд, ӕмӕ уыцы аз фӕззӕджы фӕзиан. Афтӕ мӕм каст, цыма мӕ иу ӕмбис нал и. Джонимӕ иумӕ Йегъовӕйӕн кӕй лӕггад кодтам, уый нын хаста стыр циндзинад. Ӕз хъуыды кодтон, дарддӕр куыд бакӕнон, зӕгъгӕ. Ӕмӕ сфӕнд кодтон фӕстӕмӕ Украинӕмӕ ацӕуын. Вефилы бинонтӕ ӕмӕ мӕ ӕмбырд сӕ уарзондзинадӕй кӕй барӕвдыдтой, уый тыххӕй сӕ тынг бузныг дӕн.

Царды цы уынаффӕтӕ рахастам, уыдоныл никуы фӕфӕсмон кодтам. Нӕ цард уыд цинӕйдзаг, хорз йеддӕмӕ мӕ бон ӕвзӕрӕй ницы у ӕрхъуыды кӕнын. Ӕз ӕй зонын, Йегъовӕйы хорздзинады тыххӕй нын нырма бирӕ цыдӕртӕ ис базонинаг. Ӕмӕ мӕ ныфс ис, ӕнустӕм дӕр ын кӕй лӕггад кӕндзынӕн, уымӕн ӕмӕ, Йегъовӕйы рахиз фарс кӕй дӕн, уый мын хӕссы стыр циндзинад.

[Хицӕнгонд текст 6 фарсыл]

«Царды цы уынаффӕтӕ рахастам, уыдоныл никуы фӕфӕсмон кодтам»

[Ныв 3 фарсыл]

Джонимӕ нӕ цард куы баиу кодтам, уыцы бон

[Ныв 4 фарсыл]

Ред-Лейкы, Онтариойы, сӕрмагонд пионерӕй куы лӕггад кодтон, уӕд

[Ныв 5 фарсыл]

Джонимӕ Украинӕйы, 2002 азы