Чырыстӕттӕй исчи порнографимӕ куы кӕса, уӕд уый гӕнӕн ис, ӕмӕ йӕ ӕмбырдӕй дӕр ацух кӕной?

▪ О, уый гӕнӕн ис. Ӕмӕ уымӕ гӕсгӕ хъуамӕ ӕмгӕрон дӕр ма цӕуӕм порнографимӕ,– фӕнды чиныджы уа, фӕнды журналы, кинойы, видеойы ӕви Интернеты.

Абон порнографи ӕгас дунейыл дӕр куыд апарахат, афтӕ никуыма. Зӕгъӕн ис, ӕмӕ алкӕмӕн дӕр ис уый фадат, цӕмӕй Интернеты хӕлд нывтӕм ӕмӕ кинотӕм кӕса. Гъемӕ уыцы хӕцгӕ низӕй чи фӕхъӕстӕ, уыдонӕн сӕ нымӕц бонӕй-бонмӕ кӕны фылдӕр. Ӕрыгӕттӕй ӕмӕ ацӕргӕтӕй иуӕй-иутӕ Интернеты цыдӕр агургӕйӕ бахауынц, хӕлд нывтӕ кӕм февдисынц, ахӕм веб-сайттӕм. Иннӕтӕ та хӕдзары кӕнӕ куысты ахӕм сайттӕм сӕхӕдӕг бацӕуынц, уӕддӕр мӕ ничи базондзӕн, зӕгъгӕ. Фӕлӕ чырыстӕттӕн ацы хъуыддагмӕ уӕлӕнгай цӕстӕй кӕсӕн нӕй. Цӕуылнӕ?

Сӕйраджыдӕр уымӕн, ӕмӕ нӕ Йесо бафӕдзӕхста: «Сылгоймагмӕ чи кӕсы ӕмӕ йӕм йӕхи чи мондаг кӕны, уый фӕхӕтыд йемӕ йӕ зӕрдӕйы мидӕг» (Матф. 5:28). Кӕй зӕгъын ӕй хъӕуы, сӕ цард чи баиу кодта, ахӕм нӕлгоймаг ӕмӕ сылгоймаг кӕрӕдзи сӕ уарзтӕй рӕвдауой ӕмӕ ӕмуат ӕрцӕуой, уым ӕвзӕрӕй ницы ис, стӕй сын уый хӕссы ӕхсызгондзинад дӕр (Ӕмб. 5:15–19; 1 Кор. 7:2–5). Фӕлӕ порнографийӕ та уый зӕгъӕн нӕй. Цы ӕлгъаг хъуыддӕгтӕ дзы февдисынц, уыдон адӕймаджы бафтауынц, Йесо кӕй ныхмӕ дзырдта, ахӕм чъизи ӕмӕ хӕлд хъуыдытыл. Порнографимӕ  чи кӕсы, уый цӕуы Хуыцауы бӕлвырд разамынды ныхмӕ. Йӕ Ныхасы афтӕ фыст ис: «Уӕдӕ амарут уӕ зӕххон буары фӕндтӕ: хӕтындзинад, чъизи митӕ, монцӕй судзын, фыдбылыз фӕндтӕ, стӕй зыд кӕнын, уымӕн ӕмӕ зыд кӕнын у мӕнгхуыцӕуттӕн кувын» (Кол. 3:5).

Фӕлӕ цы зӕгъӕн ис, порнографимӕ иу кӕнӕ дыууӕ хатты чи бакаст, ахӕм чырыстонӕй? Зӕгъӕн ис, ӕмӕ кӕддӕр псаломзарӕггӕнӕг Асаф цы тӕссаг уавӕры бахауд, уый дӕр ахӕм уавӕры ис. Асаф йӕхи тыххӕй ныффыста: «Мӕн та мӕ къах иннӕрдӕм фӕцӕйхаста, иу гыццыл ма, ӕмӕ мӕ къӕхтӕ фӕбырыдаиккой». Чырыстӕттӕй исчи бӕгънӕг нӕлгоймӕгты кӕнӕ сылгоймӕгты нывтӕм йе та, нӕлгоймаг ӕмӕ сылгоймаг хӕлд митӕ куыд кӕнынц, уымӕ куы кӕса, уӕд ма уый гӕнӕн куыд ис, ӕмӕ Хуыцауы раз йӕ цӕсгом ма фӕчъизи кӕна ӕмӕ дзы ма адард уа? Ахӕм чырыстон дӕр, ӕвӕццӕгӕн, Асафау йӕхицӕн ӕнцой нал ардзӕн. Асаф загъта: «Алы бон дӕр мыл цӕуы бӕллӕхтӕ, алы райсом дӕр мыл ӕмбӕлы уайдзӕфтӕ» (Пс. 73:2, 14).

Порнографийы къӕппӕджы чи бахауд, уый хъуамӕ бамбара, йӕ хабар хорз кӕй нӕу ӕмӕ йӕ ӕххуыс кӕй хъӕуы. Ӕмӕ йӕ уый тыххӕй хъӕуы ӕмбырды хистӕр нӕлгоймӕгтӕм бацӕуын. Библийы фыст ис: «Гӕнӕн ис, ӕмӕ йӕ адӕймаг ӕмбаргӕ дӕр ма бакӕна, афтӕмӕй рӕдыд къахдзӕф сараза. Фӕлӕ-иу уӕддӕр сымах, фӕлтӕрд чырыстӕттӕ, бацархайут ахӕм адӕймаджы раст зондыл саразыныл, ӕмӕ уый аразут фӕлмӕнӕй. Ӕрмӕст уӕ алчидӕр йӕхимӕ кӕсӕд» (Гал. 6:1). Иу кӕнӕ дыууӕ хистӕр нӕлгоймаджы йемӕ аныхас кӕндзысты ӕмӕ уый тыххӕй Йегъовӕмӕ скувдзысты, ӕмӕ уӕд «уырнындзинадӕй райгуыргӕ куывды фӕрцы рынчын сдзӕбӕх уыдзӕн... ӕмӕ [йӕ] тӕригъӕдтӕ дӕр хатыргонд ӕрцӕудзысты» (Иак. 5:13–15). Ахӕм ӕххуыс чи бацагуры, уыдон порнографийы къӕппӕгӕй раирвӕзынц ӕмӕ Асафау сӕхиуыл бавзарынц, куыд хорз у Хуыцаумӕ ӕввахс кӕнын (Пс. 73:28).

Фӕлӕ Павел куыд загъта, афтӕмӕй ӕмбырды уыди, тӕригъӕд чи сарӕзта ӕмӕ «йӕ чъизи хъуыддӕгтыл, кӕй хӕтыд ӕмӕ хӕлд митӕ кӕй кодта», ууыл чи не ’рфӕсмон кодта, ахӕмтӕ дӕр (2 Кор. 12:21) *. Ацы ран дзырдбаст «чъизи хъуыддӕгтӕ» цы грекъаг дзырдӕй ӕрцыд тӕлмац, уый тыххӕй профессор Марвин Винсент ныффыста, зӕгъгӕ, уый нысан кӕны ӕлгъаг, ӕнаккаг митӕ. Йӕ бӕллӕх уый у, ӕмӕ порнографийы, нӕлгоймаг ӕмӕ сылгоймаг ӕмуат куыд ӕрцӕуынц, ӕрмӕст уыдӕттӕ нӕ февдисынц, фӕлӕ дзурыны аккаг дӕр чи нӕу, ахӕм фидиссаг хабӕрттӕ: гомосексуализм, ома нӕлгоймаг нӕлгоймагимӕ, кӕнӕ сылгоймаг сылгоймагимӕ ӕмуат куыд ӕрцӕуы, йе та цалдӕрӕй иумӕ ӕмуат куыд ӕрцӕуынц, кӕнӕ фосимӕ куыд схуыссынц, сывӕллӕттимӕ алы чъизи митӕ куыд кӕнынц, цалдӕр адӕймагӕй искӕмӕн тыхми куыд бакӕнынц, сылгоймӕгтӕн ӕгъатыр митӕ куыд фӕкӕнынц, стӕй сӕ чъизи монцтӕ бафсадынӕн искӕмӕн алы фыдмитӕ куыд фӕкӕнынц, уыдӕттӕ. Павелы рӕстӕджы дӕр уыди, «зондӕй талынджы» чи уыд, ахӕмтӕ. Уыдон «се ’фсарм бынтондӕр фесӕфтой ӕмӕ хӕлд митыл бафтыдысты, ӕмӕ ӕнӕфсисӕй алы чъизи хъуыддӕгтӕ кодтой» (Еф. 4:18, 19).

Павел ма «чъизи хъуыддӕгты» кой кӕны Галатӕгтӕм 5:19 дӕр. Иу бритайнаг ахуыргонд куыд ӕмбарын кӕны, афтӕмӕй ацы стихы дзырдбаст «чъизи хъуыддӕгтӕ» уый нысан кӕны, ӕмӕ адӕймаг йе ’лгъаг монцты фӕдыл ацӕуы. Уӕдӕ кӕцы чырыстон зӕгъдзӕн, ӕмӕ, уӕлдӕр цы хӕлд ӕмӕ ӕлгъаг миты кой кодтам, уыдонмӕ чи кӕсы, уый йе ’лгъаг монцты фӕдыл нӕ цӕуы ӕмӕ йӕхи нӕ чъизи кӕны? Галатӕгтӕм 5:21 Павел загъта, зӕгъгӕ, «ахӕм хъуыддӕгтӕ чи кӕны, уыдон Хуыцауы паддзахад бынӕн нӕ райсдзысты». Уӕдӕ кӕд чырыстӕттӕй исчи порнографийыл бафтыд ӕмӕ уыцы хӕлд нывтӕм дзӕвгар рӕстӕг кӕсы, фӕлӕ нӕ фӕсмон кӕны ӕмӕ йӕ уыцы ӕвзӕр хъуыддаг ныууадзын нӕ фӕнды, уӕд ын ӕмбырды бынат нӕй. Ахӕм адӕймаджы ӕмбырдӕй ацух кӕндзысты, цӕмӕй иннӕтӕ дӕр йӕ зондыл ма ацӕуой ӕмӕ ӕмбырд сыгъдӕгӕй баззайа (1 Кор. 5:5, 11).

Порнографийы къӕппӕджы чи бахауд, уыдонӕй чидӕртӕ хистӕр нӕлгоймӕгтӕм бацыдысты, ӕмӕ сын уыдон баххуыс кодтой сӕ зондахаст ӕмӕ сӕ цард цӕхгӕр фӕивынӕн. Ӕмӕ уый стыр ныфс уадзы, ахӕм хъуыддӕгтыл чи бафтыд, уыдоны. Фыццаг ӕнусы Сардисы цӕрӕг чырыстӕтты Йесо разӕнгард кодта: «Бафидар кӕн, чи ма дӕм ис, мӕлӕты къахыл лӕуд чи уыд, уыдоны... цы райстай ӕмӕ цы фехъуыстай, уый дӕ зӕрдыл дар, архай уымӕ гӕсгӕ ӕмӕ ӕрфӕсмон кӕн. Куы нӕ райхъал уай, уӕд... цы афон ӕрцӕудзынӕн, уый зонгӕ дӕр нӕ бакӕндзынӕ» (Рарг. 3:2, 3). Уӕдӕ адӕймагӕн ис уый фадат, цӕмӕй ӕрфӕсмон кӕна, ӕмӕ йӕ «арты дзыхӕй» раскъӕфой (Иуд. 22, 23).

Фӕлӕ цас хуыздӕр уаид, уыцы сӕрсӕфӕнмӕ ӕмгӕрон дӕр куы нӕ бацӕуиккам. Цӕй уӕдӕ нӕ алчидӕр йӕхи хизӕд, порнографимӕ цыдӕриддӕр хауы, уыдӕттӕй.

[Фиппаинаг]

[Хицӕнгонд текст 30 фарсыл]

Порнографийы къӕппӕджы чи бахауд, уый хъуамӕ бамбара, йӕ хабар хорз кӕй нӕу ӕмӕ йӕ ӕххуыс кӕй хъӕуы