Искуы дӕ исчи уынаффӕ агуырдта? Зӕгъӕм, афтӕ дӕ бафарста: «Куыд бакӕнон? Уыцы бадтмӕ ацӕуон? Ацы куысты ныллӕууон? Ацы адӕймагимӕ ӕмбӕлын райдайон?»

Хатт адӕймаджы фӕхъӕуы, йе ’мбӕлттимӕ, йӕ бинонтимӕ кӕнӕ та суанг Йегъовӕимӕ дӕр куыд у, ууыл чи фӕзындзӕн, ахӕм хъуыддаг аскъуыддзаг кӕнын. Ӕмӕ дӕ куы бафӕрса, ацы уавӕры куыд бакӕнон, зӕгъгӕ, уӕд ын цавӕр уынаффӕ ратдзынӕ? Дӕхи зондӕй йын ратдзынӕ уынаффӕ ӕви йын йе ’ргом, Библи цы дзуры, уымӕ раздахдзынӕ? Арӕхдӕр куыд фӕдӕттыс уынаффӕ? Дзырд гыццыл хъуыддагыл цӕуа ӕви стыр, уӕддӕр нӕ хъуамӕ рох ма уа, Ӕмбисӕндты 15:28 цы фыст ис, уый: «Рӕстгӕнӕджы зӕрдӕ дзуапп раттыны размӕ дзӕбӕх ахъуыды кӕны». Уӕдӕ ӕркӕсӕм, Библийӕ нын фондз уагӕвӕрды куыд баххуыс кӕндзысты хорз уынаффӕтӕ дӕттынӕн.

1 Адӕймаг цы уавӕры ис, уый хорз бамбар.

«Адӕймагмӕ куы нӕ байхъусай, афтӕмӕй дзуапп куы раттай, уӕд уый у ӕнӕзонд ми ӕмӕ худинаг» (ӔМБ. 18:13).

Цӕмӕй адӕймагӕн хорз уынаффӕ раттӕм, уый тыххӕй хъуамӕ ӕмбарӕм, уыцы хъуыддаджы фӕдыл йӕхӕдӕг цы хъуыды кӕны ӕмӕ цы уавӕры ис, уый. Ӕрхӕссӕм цӕвиттон: адӕймаг дӕм телефонӕй ӕрбадзырдта ӕмӕ дӕ фӕрсы, кӕуылты уӕм цӕугӕ у, зӕгъгӕ. Цӕмӕй йын фӕндаг бацамонай, уый тыххӕй дӕ цы хъӕуы зонын? Хъуамӕ уал базонай, кӕцы ран ис, уый, ӕмӕ йын уӕд дӕ бон уыдзӕн, фӕндаг хуыздӕр кӕуылты у акӕнын, уый бацамонын. Уӕдӕ цӕмӕй адӕймагӕн хорз уынаффӕ раттай, уый тыххӕй дӕр хъуамӕ базонай, «кӕцы ран ис», ома цы уавӕры ис ӕмӕ уыцы хъуыддаджы фӕдыл цы хъуыды кӕны, уый. Йӕ хабӕрттӕ йын кӕронмӕ куы нӕ зонай, уӕд ын дӕ бон бауыдзӕн хорз уынаффӕ раттын? Адӕймаджы уавӕр хорз куы нӕ бамбарай ӕмӕ йын афтӕмӕй уынаффӕ куы раттай, уӕд, чи зоны, йӕ зонд ноджы тынгдӕр схӕццӕ уа (Лук. 6:39).

Базон, уыцы фарстайы фӕдыл йӕхӕдӕг исты ӕрмӕг бацагуырдта ӕви нӕ. Хорз ма уаид, уынаффӕ дӕ чи агуры, уыцы адӕймаджы куы бафӕрсис: «Дӕумӕ гӕсгӕ дын раст уынаффӕ рахӕссынӕн Библийӕ цавӕр уагӕвӕрдтӕ баххуыс кӕндзысты? Куыд бакӕнинаг дӕ, уый дӕм хорз цӕмӕн кӕсы, ӕмӕ дзы ӕвзӕрӕй та цы ис? Дӕхӕдӕг уый фӕдыл исты ӕрмӕг бацагуырдтай? Цы дын зӕгъынц иннӕтӕ та, хистӕр нӕлгоймӕгтӕ, дӕ ныййарджытӕ кӕнӕ, демӕ Библи чи ахуыр кӕны, уый?»

Ацы фарстатӕн дын цы дзуапп ратта, уымӕй базондзынӕ, раст уынаффӕ рахӕссынӕн йӕхӕдӕг цы сарӕзта, уый, стӕй иннӕтимӕ уый фӕдыл аныхас кодта ӕви нӕ, уый дӕр. Уый фӕрцы ма бамбардзынӕ, ӕцӕгдӕр ӕй фӕнды, раст куыд уыдзӕн, афтӕ бакӕнын ӕви, «йӕ хъустӕн ӕхсызгон кӕй ныхӕстӕ уой», ахӕм уынаффӕгӕнӕджы агуры йӕхицӕн (2 Тим. 4:3).

  2 Уынаффӕ раттынмӕ тагъд ма кӕн.

«Алы адӕймаг дӕр хъуамӕ рӕвдз уа байхъусынмӕ, дзурынмӕ та тагъд ма кӕна» (ИАК. 1:19).

Чи зоны нӕм афтӕ кӕса, ӕмӕ адӕймагӕн уынаффӕ цас тагъддӕр раттӕм, уыйас хуыздӕр. Фӕлӕ ацы хъуыддаджы тагъд кӕнын нӕ хъӕуы, уӕлдайдӕр та, адӕймагмӕ цы фарста фӕзынд, уый бӕстон куы нӕ раиртасӕм, уӕд. Ӕмбисӕндты 29:20 фыст ис: «Искуы федтай, йӕ ныхӕстыл чи нӕ ахъуыды кӕны, ахӕм адӕймаджы? Уымӕй ӕнӕзондӕн фылдӕр ныфс ис».

Уынаффӕ раттыны размӕ-иу лӕмбынӕг ахъуыды кӕн: «Ацы фарстайы фӕдыл цы хъуыды кӕнын, уый Хуыцауы зонды ныхмӕ нӕу? Мыййаг мыл „ацы дунейы зонд“ нӕ фӕзынд?» (1 Кор. 2:12, 13). Рох дӕ ма уӕд: адӕймаджы хорз дӕ фӕнда, ӕрмӕст уый фаг нӕу. Зӕгъӕм, Йесо йӕ ахуыргӕнинӕгтӕн, хъизӕмайраг мӕлӕт ӕм кӕй ӕнхъӕлмӕ кӕсы, уый тыххӕй куы загъта, уӕд ын Петр бауынаффӕ кодта: «Дӕхицӕн фӕтӕригъӕд кӕн, Хицау. Ахӕм ми дыл макуы ӕрцӕуӕд». Ацы хабарӕй цы ис зондӕн райсӕн? Уынаффӕ дӕтгӕйӕ лӕмбынӕг куы нӕ уӕм, уӕд махӕн дӕр нӕ хабар афтӕ рауайдзӕн, ӕмӕ «Хуыцауы хъуыдытӕ» нӕ дзурдзыстӕм, фӕлӕ «адӕймаджы» хъуыдытӕ (Матф. 16:21–23). Адӕймагӕн баххуыс кӕнын хорз хъуыддаг у, фӕлӕ хъуамӕ нӕ зӕрдыл дарӕм, нӕ зонд ӕмӕ Хуыцауы зонд иу кӕй не сты. Уымӕ гӕсгӕ ахсджиаг у уынаффӕ раттыны размӕ лӕмбынӕг ахъуыды кӕнын (Иов 38:1–4; Ӕмб. 11:2).

3 Сӕрныллӕг у – дӕ уынаффӕтӕ уӕнт Хуыцауы Ныхасӕй.

«Мӕхи фӕндӕй... ницы аразын, фӕлӕ мӕ мӕ Фыд куыд сахуыр кодта, афтӕ... дзурын» (ИОАН. 8:28).

Уынаффӕ дӕ чи агура, уыцы адӕймагӕн, мыййаг, афтӕ зӕгъдзынӕ: «Ӕз дӕ бынаты куы уаин, уӕд афтӕ ӕмӕ афтӕ бакӕнин»? Афтӕ дӕм куы кӕса, ӕмӕ йӕ фарстайӕн дзуапп раттын ӕнцон у, уӕд дӕр хъуамӕ Йесойау уай сӕрныллӕг ӕмӕ бонзонгӕ. Кӕд зӕххыл Йесойӕ зондджындӕр ӕмӕ фӕлтӕрдджындӕр адӕймаг нӕ уыд, уӕддӕр афтӕ загъта: «Ӕз мӕхи фӕндӕй нӕ дзырдтон, фӕлӕ мын мӕ... Фыд йӕхӕдӕг бафӕдзӕхста, куыд ӕмӕ цы зӕгъон, уый» (Иоан. 12:49, 50). Йесойы амындтӕ ӕмӕ уынаффӕтӕ алкӕддӕр уыдысты йӕ Фыды фӕндонмӕ гӕсгӕ.

Лукайы 22:49 кӕсӕм, ӕфсӕддонтӕ Йесойы ӕрцахсынмӕ куы ӕрбацыдысты, уӕд ӕй йӕ ахуыргӕнинӕгтӕ кӕй бафарстой, дӕ сӕрыл рахӕцӕм, зӕгъгӕ. Ахуыргӕнинӕгтӕй ма сӕ иу йӕ хъамамӕ дӕр фӕлӕбурдта. Ацы хабары кой ма цӕуы Матфейы 26:52–54 дӕр. Фенӕн дзы ис, суанг уыцы уавӕры дӕр Йесо уый фадат кӕй ссардта, цӕмӕй уыцы ахуыргӕнинагӕн бамбарын кодтаид, Йегъовӕ уый тыххӕй цы хъуыды кӕны, уый. Йесо ахӕм зондджын уынаффӕ уый фӕрцы радта, ӕмӕ йӕ зӕрдыл дардта, Райдианы 9:6 цы уагӕвӕрд ис, стӕй 22 псаломы ӕмӕ Исайы 53 сӕры цы пехуымпар-ныхӕстӕ ис фыст, уыдон. Ӕмӕ афтӕмӕй бирӕты тугныккалдӕй бахызта ӕмӕ Йегъовӕйы зӕрдӕ барухс кодта.

  4 Пайда кӕн нӕ литературӕйӕ.

«Чи у уыцы ӕууӕнкджын ӕмӕ зондджын цагъар, йӕ хицау йӕ хӕдзаронты кӕй бар бакодта, цӕмӕй сын хӕринаг афоныл дӕтта?» (МАТФ. 24:45).

Йесо ӕууӕнкджын цагъары снысан кодта, цӕмӕй нын дӕтта, нӕ уырнындзинад нын чи фидар кӕны, ахӕм хӕринаг. Адӕймагӕн дӕ цавӕрдӕр ахсджиаг хъуыддаджы фӕдыл уынаффӕ раттын куы фӕхъӕуы, уӕд рӕстӕг ссарыс, уый фӕдыл нӕ литературӕйы цы ӕрмӕг ис, уый бӕстон раиртасынӕн?

Бирӕ ӕрмӕг ссарӕн ис, «Индекс публикаций Сторожевой Башни»-йы фӕрцы, стӕй, компьютеры кӕй сӕвӕрынц, уыцы библиотекӕйы (Watchtower Library) *. Адон сты хорз кусӕнгӕрзтӕ ӕмӕ сӕ хъуамӕ ӕдзухдӕр пайда кӕнӕм. Мингай фарстаты фӕдыл дзы ис бирӕ статьятӕ, ӕмӕ уынаффӕ чи агуры, уымӕн фӕуыдзысты стыр ӕххуыс. Дӕ бон нӕу ахӕм адӕймагӕн бацамонын, куыд ис уыцы кусӕнгӕрзты фӕрцы Библийӕ алыхуызон уагӕвӕрдтыл лӕмбынӕг ахъуыды кӕнӕн, цӕмӕй раст уынаффӕ рахӕсса? Адӕймаг картӕйы фӕрцы базоны, кӕцы фӕндагыл ӕй хъӕуы цӕуын, цӕмӕй бынатмӕ бахӕццӕ уа. Раст афтӕ, уынаффӕ чи агуры, уымӕн дӕр нӕ литературӕйы фӕрцы йӕ бон уыдзӕн ахӕм уынаффӕтӕ хӕссын, цӕмӕй дарддӕр дӕр царды фӕндагыл цӕуа ӕмӕ «бынатмӕ», ома ног дунемӕ, бахӕццӕ уа.

Хистӕр нӕлгоймӕгтӕй бирӕтӕ хъусынгӕнджытӕн бацамыдтой, «Индекс»-ӕй кӕнӕ компьютеры ӕвӕрд библиотекӕйӕ куыд ис пайда кӕнӕн, уый. Ӕмӕ ӕфсымӕрты ӕмӕ хоты исты уынаффӕ рахӕссын куы бахъӕуы, уӕд уый фӕдыл ӕрмӕг ссарынц ӕмӕ Библимӕ гӕсгӕ раст чи у, ахӕм уынаффӕ рахӕссынц. Афтӕмӕй сӕхӕдӕг сахуыр вӕййынц Библи иртасын ӕмӕ нын Йегъовӕ ӕууӕнкджын цагъары уагъд литературӕйы уылты цы разамынд дӕтты, уымӕ гӕсгӕ архайын, ӕрмӕст ахсджиаг хъуыддӕгтӕ скъуыддзаг кӕнгӕйӕ нӕ, фӕлӕ гыццыл хъуыддӕгты дӕр. Уый фӕрцы сӕ зонд ахуыр кӕнынц, «раст цы у ӕмӕ цы нӕу, уый ӕмбарын» (Дзут. 5:14).

5 Иннӕты бӕсты уынаффӕ ма хӕсс.

«Йӕхи хӕссинаг алчидӕр йӕхӕдӕг ахӕсдзӕн» (ГАЛ. 6:5).

Йегъовӕ нӕ алкӕмӕн дӕр бар радта, цӕмӕй-иу нӕхӕдӕг равзарӕм, йӕ уагӕвӕрдтӕм гӕсгӕ архайдзыстӕм ӕви нӕ (Дык. з. 30:19, 20). Хатт адӕймагӕн йӕ уавӕрмӕ Библийӕ цалдӕр уагӕвӕрды дӕр фӕхауы, ӕмӕ дзы кӕцымӕ гӕсгӕ архайдзӕн, уый йӕхӕдӕг хъуамӕ аскъуыддзаг кӕна. Иуӕй-иу уавӕрты хуыздӕр вӕййы, адӕймагӕн хистӕр нӕлгоймӕгтӕ куы раттынц уынаффӕ. Кӕд нырма хӕрзӕрыгон у, уӕд та хуыздӕр уаид, йӕ ныййарджытӕ йын куы баххуыс кӕниккой. Уӕдӕ дӕ исчи уынаффӕ куы кура, уӕд-иу ахъуыды кӕн: «Уый бар мын ис, ӕмӕ, ацы уавӕры куыд кӕнгӕ у, уый йын амонон?»

[Фиппаинаг]

[Рамкӕ/Ныв 8 фарсыл]

Ахӕм фарстатӕ иртасӕн ис бинонты ахуыры рӕстӕг

Исчи дӕ куы бафӕрса, мӕнӕ ацы уавӕры куыд бакӕнон, зӕгъгӕ, уӕд дӕ бон у уыцы фарста бинонты ахуыры рӕстӕг раиртасын. Цавӕр статьятӕ кӕнӕ йын Библийӕ цавӕр уагӕвӕрдтӕ у дӕ бон ссарын, цӕмӕй йын раст уынаффӕ рахӕссынӕн баххуыс кӕнай? Зӕгъӕм, бафарста дӕ, ацы адӕймагимӕ ӕмбӕлын райдайон, зӕгъгӕ. Ахӕм уавӕры дӕ бон у «Индекс»-ӕй кӕнӕ компьютеры библиотекӕйӕ спайда кӕнын. «Индекс»-ы дӕ бон у ахӕм сӕргӕндтӕ ссарын, «Свидания» кӕнӕ «Брак», зӕгъгӕ, ӕмӕ дзы, уыцы фарстамӕ чи хауы, ахӕм дӕлсӕргӕндтӕ равзарын. Уымӕй уӕлдай ма дӕ бон у, сӕргӕндты бынмӕ цы уӕлӕмхасӕн ӕрмӕг ис, «Смотри также», зӕгъгӕ, уымӕ дӕр ӕркӕсын. Чи зоны дзы уыцы фарстайы фӕдыл фылдӕр ӕрмӕг ссарай.

[Рамкӕ 9 фарсыл]

Мах тынг бузныг стӕм Йегъовӕйӕ, йӕ организацийы уылты нын кӕй ӕххуыс кӕны, цӕмӕй нӕхи бон дӕр уа иннӕтӕн хорз уынаффӕтӕ дӕттын ӕмӕ куы хъӕуа, уӕд махӕн дӕр раттой уынаффӕ. Екклесиасты 12:11 фыст ис: «Зондджынты ныхӕстӕ сты, галты кӕмӕй фӕтӕрынц, ахӕм цыргъ хъилты хуызӕн. Ӕмӕ, зондджын хъуыдытӕ чи ӕмбырд кӕны, уыдон сты къуырд зӕгӕлты хуызӕн. Уыцы ныхӕстӕ сты иу фыййауӕй». Галты-иу кӕмӕй тардтой, уыцы «цыргъ хъилимӕ» абарӕн ис, адӕймагӕн уарзгӕйӕ кӕй раттынц, ахӕм хорз уынаффӕ – уый фӕрцы адӕймаг бамбары, куыд ӕй хъӕуы бакӕнын, уый. Стӕй зӕгӕлты фӕрцы хӕдзар фидар куыд фӕлӕууы ӕмӕ дзы цӕрын ӕдас куыд вӕййы, афтӕ хорз уынаффӕйы фӕрцы дӕр адӕймагӕн йӕ бон у хъуыддаг афтӕ аскъуыддзаг кӕнын, цӕмӕй йӕхи фыдбылызӕй бахиза. Стихы цы «иу фыййауы» кой цӕуы, уый у Йегъовӕ, ӕмӕ ӕмбаргӕ чи у, уыдонӕн стыр циндзинад хӕссы, йӕ «зондджын хъуыдытӕм», кӕнӕ уынаффӕтӕм, кӕй хъусынц, уый.

Уӕдӕ иннӕтӕн уынаффӕ дӕтгӕйӕ мах дӕр хъуамӕ фӕзмӕм нӕ Фыййау Йегъовӕйы. Уынаффӕ нӕ чи куры, уыдонмӕ-иу лӕмбынӕг байхъусӕм ӕмӕ сын кӕд нӕ бон у баххуыс кӕнын, уӕд-иу фӕстӕ ма фӕлӕууӕм. Нӕ уынаффӕ Библийы уагӕвӕрдтӕм гӕсгӕ куы уа, уӕд адӕймагӕн ӕнӕмӕнгдӕр пайда ӕрхӕсдзӕн ӕмӕ ӕппынфӕстаг ӕнусон цардӕй схайджын уыдзӕн.