Радзырдта йӕ Макс Ллойд

Уый уыди 1955 азы Парагвайы, Хуссар Америкӕйы. Миссионертӕй иумӕ цы ӕфсымӕримӕ лӕггад кодтам, уыимӕ цы хӕдзары уыдыстӕм, уый алыварс ӕхсӕвы мӕсты адӕм ӕрӕмбырд ӕмӕ райдыдтой хъӕр кӕнын: «Нӕ хуыцау у тугмондаг хуыцау, ӕмӕ йӕ хъӕуы гринготы туг!» Фӕлӕ мах, гринготы (фӕсарӕйнӕгты), уырдӕм цы ӕрхаста?

ФЫЦЦАГ уал уын радзурдзынӕн, уымӕй бирӕ азты размӕ цы хабӕрттӕ ӕрцыд, уыдоны тыххӕй. Ӕз схъомыл дӕн Австралийы, уым мӕ Йегъовӕ ахуыр кӕнын райдыдта йӕ фӕндон ӕххӕст кӕнын. 1938 азы иу Йегъовӕйы Ӕвдисӕн мӕ фыдӕн радта чиныг «Знӕгтӕ». Мӕ фыд ӕмӕ мӕ мадӕн уӕдмӕ дӕр сӕ зӕрдӕмӕ нӕ цыди, бынӕттон сауджынтӕ цы дзырдтой, уый, уымӕн ӕмӕ Библийӕн йӕ кӕцыдӕр хӕйттӕ аргъӕуттыл нымадтой. Афӕдзы фӕстӕ мӕ ныййарджытӕ сӕхи Йегъовӕйӕн снывонд кодтой ӕмӕ донаргъуыд райстой. Уӕдӕй фӕстӕмӕ нӕ бинонтӕн ӕппӕты сӕйрагдӕр сси Йегъовӕйы фӕндон ӕххӕст кӕнын. Стӕй донаргъуыд райста мӕ хо Лесли дӕр, мӕнӕй уыд фондз азы хистӕр, ӕмӕ ӕз та донаргъуыд райстон 1940 азы, фараст азы мыл куы цыди, уӕд.

Дыккаг дунеон хӕст куы райдыдта, уымӕй бирӕ нӕ рацыд, афтӕ Австралийы Йегъовӕйы Ӕвдисӕнты литературӕ мыхуыр кӕнын ӕмӕ парахат кӕнын нал уагътой. Ӕмӕ уый фӕрцы гыццылӕй сахуыр дӕн, цӕуыл ӕууӕндын, уый ӕрмӕстдӕр Библийӕ ӕмбарын кӕнын. Библи-иу мемӕ скъоламӕ ахастон, цӕмӕй-иу уырдыгӕй равдыстаин, тырысайӕн цӕуылнӕ табу кӕнын ӕмӕ, хӕсты чи архайы, уыцы бӕстӕты фарс цӕуылнӕ дӕн (Рац. 20:4, 5; Матф. 4:10; Иоан. 17:16; 1 Иоан. 5:21).

Скъолайы мӕ хуыдтой «немыцаг шпион», ӕмӕ мӕ уый тыххӕй бирӕтӕ сӕхи хызтой. Уыцы рӕстӕг-иу скъолайы ӕвдыстой кинотӕ. Кинойы размӕ-иу хъуамӕ алчидӕр сыстадаид ӕмӕ гимн азарыдаид. Ӕз-иу бадгӕйӕ куы баззадтӕн, уӕд-иу мӕ дыууӕ кӕнӕ ӕртӕ лӕппуйы мӕ сӕрыхъуынтӕй хӕрдмӕ ивӕзтой, цӕмӕй-иу сыстадаин. Библийӕ цы зыдтон, ууыл фидар кӕй хӕцыдтӕн, уый тыххӕй мӕ фӕстагмӕ скъолайӕ ратардтой. Фӕлӕ уӕддӕр скъолайы программӕ хӕдзары ахуыргӕнгӕйӕ фӕдӕн.

МӔ НЫСАН МӔ КЪУХЫ БАФТЫД

Ӕз мӕ разы нысан сӕвӕрдтон, 14 азы мыл куы сӕххӕст уа, уӕд ӕххӕстрӕстӕг пионерӕй лӕггад кӕнын кӕй райдайдзынӕн. Фӕлӕ мын мӕ ныййарджытӕ куы загътой, зӕгъгӕ уал хъуамӕ кусын райдайай, уӕд мын тынг хъыг уыди. Загътой ма мын, зӕгъгӕ, дам, дӕхӕдӕг фиддзынӕ, хӕдзары дыл цы хардз кӕнӕм, уымӕн, ӕмӕ, дам, дыл 18 азы куы сӕххӕст уа, уӕд та, дам, пионерӕй лӕггад кӕнын райдайдзынӕ. Кусын куы райдыдтон, уӕд-иу нӕм арӕх мӕ мызды тыххӕй ныхас рауад. Ӕз-иу сын ӕмбарын кодтон, уыцы ’хца пионерӕй лӕггад кӕнынӕн кӕй ӕмбырд кӕнын, фӕлӕ-иу мын сӕ уӕддӕр айстой.

 Пионерӕй лӕггад кӕнын кӕд хъуамӕ райдыдтаин, уыцы рӕстӕг куы ’рцыд, уӕд мӕ мӕ ныййарджытӕ ӕрбадын кодтой ӕмӕ мын загътой, ме ’хцатӕ мын банчы кӕй ӕвӕрдтой. Ӕмӕ мын сӕ уый фӕстӕ иууылдӕр фӕстӕмӕ радтой, цӕмӕй мӕ бон уыдаид дзаумӕттӕ ӕмӕ ма мӕ пионерӕй лӕггад кӕнынӕн ноджыдӕр цы хъуыд, уыдӕттӕ балхӕнын. Афтӕмӕй мӕ уыдон ахуыр кодтой мӕхи дарын, цӕмӕй макӕмӕ мацӕмӕ ӕнхъӕлмӕ кастаин. Уый мын царды стыр ӕххуыс фӕци.

Леслиимӕ ма гыццылтӕ куы уыдыстӕм, уӕд-иу нӕм хӕдзары пионертӕ арӕх ӕрлӕууыдысты. Ӕмӕ-иу нын ӕхсызгон уыди семӕ лӕггад кӕнын. Алы сабат ӕмӕ хуыцаубоны дӕр-иу хъусын кодтам хӕдзарӕй-хӕдзармӕ, уынджы, стӕй-иу адӕмимӕ Библи ахуыр кодтам. Уыцы азты хъусынгӕнджытӕн сӕ нысан уыд мӕй 60 сахаты хъусын кӕнын. Мӕ мадӕн-иу уыцы нысан искуы иу хатт йеддӕмӕ йӕ къухы алы хатт дӕр бафтыд. Ӕмӕ афтӕмӕй мӕнӕн дӕр ӕмӕ Леслийӕн дӕр уыд фӕзминаг.

ПИОНЕРӔЙ ЛӔГГАД КӔНЫН ТАСМАНИЙЫ

Пионерӕй лӕггад кӕнын куы райдыдтон, уӕд мӕ фыццаг арвыстой австралиаг сакъадах Тасманимӕ, мӕ хо йӕ лӕгимӕ кӕм лӕггад кодтой, уырдӕм. Фӕлӕ уыдон уым бирӕ нал фесты, уымӕн ӕмӕ сӕ фӕхуыдтой Галаады скъолайы 15 къласмӕ. Ӕз уыдтӕн тынг ӕфсӕрмыгӕнаг, стӕй уый размӕ хӕдзарӕй афтӕ дард никуы никӕм уыдтӕн. Кӕмӕдӕрты афтӕ каст, ӕмӕ дзы ӕртӕ мӕйӕ фылдӕр нӕ бафӕраздзынӕн. Фӕлӕ иу аз дӕр нӕма рацыд, афтӕ мын 1950 азы ӕмбырды мӕ бӕрны бакодтой стыр хӕстӕ. Цы хӕстӕ ӕххӕст кодтон, уыдон абарӕн ис, абон хистӕр нӕлгоймӕгты советы координатор цы хӕстӕ ӕххӕст кӕны, уыдонимӕ. Фӕстӕдӕр мӕ снысан кодтой сӕрмагонд пионерӕй, ӕмӕ райдыдтон иу ӕрыгон ӕфсымӕримӕ лӕггад кӕнын.

Сӕрмагонд пионертӕй нӕ снысан кодтой, хибар ран чи уыд, ахӕм горӕтмӕ, цӕргӕ та дзы кодтой, ӕрхуыкъахӕн шахтӕты чи куыста, уыдон. Уыцы горӕты Йегъовӕйы Ӕвдисӕнтӕ нӕ уыд. Уырдӕм ӕрцыдыстӕм автобусыл изӕрырдӕм, ӕмӕ фыццаг ӕхсӕв ӕрлӕууыдыстӕм иу зӕронд уазӕгдзӕрӕны. Иннӕ бон хӕдзарӕй-хӕдзармӕ куы хъусын кодтам, уӕд ма-иу адӕмы афарстам, нӕ бон ӕрлӕууын кӕм уа, ахӕм бынат никуы зонут, зӕгъгӕ. Изӕрырдӕм нын иу нӕлгоймаг загъта, зӕгъгӕ, пресвитерайнаг аргъуаны раз ис сауджыны хӕдзар, фӕлӕ дзы ныр ничи цӕры, ӕмӕ, дам, уӕ бон у диакъонимӕ аныхас кӕнын. Диакъон разынд хӕларзӕрдӕ адӕймаг ӕмӕ нӕ уыцы хӕдзармӕ бауагъта. Уӕ цӕстытыл-ма ауайын кӕнут: алы бон дӕр сауджыны хӕдзарӕй рацӕуӕм ӕмӕ фӕцӕуӕм хъусын кӕнынмӕ!

Уыцы горӕты нӕм адӕм тынг хорз хъуыстой. Семӕ-иу хорз аныхас кодтам, стӕй бирӕтимӕ Библи ахуыр кӕнын дӕр райдыдтам. Уыдӕттӕ Тасманийы сӕйраг горӕты аргъуаны хистӕртӕ куы фехъуыстой ӕмӕ, Йегъовӕйы Ӕвдисӕнтӕ сауджыны хӕдзары кӕй цӕрынц, уый куы базыдтой, уӕд диакъонӕн загътой, цӕмӕй нӕ феддӕдуар кодтаид. Ӕмӕ та уынджы аззадыстӕм!

Иннӕ бон фӕссихормӕ фӕхъусын кодтам, стӕй нӕхицӕн цӕрӕнбынат агурын райдыдтам. Фӕлӕ, стадионы адӕм кӕм фӕбадынц, уымӕй хуыздӕр бынат не ссардтам. Нӕ чемодантӕ уым бамбӕхстам ӕмӕ фӕстӕмӕ хъусын кӕнынмӕ ацыдыстӕм. Талынг кодта, фӕлӕ ма нӕ фӕндыд цалдӕр  хӕдзармӕ бацӕуын, цӕмӕй нӕ уынг кӕронмӕ фӕуыдаиккам. Ӕмӕ нын иу хӕдзары иу нӕлгоймаг загъта, йӕ зӕххы кӕрон ын дыууӕуатон хӕдзар кӕй ис ӕмӕ нӕ уырдӕм цӕрынмӕ кӕй бауадздзӕн!

ЛӔГГАД КӔНЫН РАЙОНОН ЦӔСТДАРӔГӔЙ, АХУЫР КӔНЫН ГАЛААДЫ СКЪОЛАЙЫ

Уыцы ран аст мӕйы бӕрц куы фӕлӕггад кодтон, уӕд мӕм Австралийы филиалӕй ӕрцыд писмо, зӕгъгӕ дӕ снысан кодтам районон цӕстдарӕгӕй. Ӕз уый ӕнхъӕл нӕ уыдтӕн, уымӕн ӕмӕ мыл 20 азы йеддӕмӕ нӕ цыд. Дыууӕ къуырийы бӕрц мӕ ахуыр кодтой, ӕмӕ стӕй райдыдтон ӕмбырдтӕ бӕрӕг кӕнын. Мӕнӕй хистӕр чи уыд, уыдон,– ӕмӕ ахӕмтӕ та, зӕгъӕн ис, уыдысты се ’ппӕт дӕр,– ӕрыгон кӕй уыдтӕн, уый тыххӕй мыл ӕнӕрвӕссон нӕ кодтой, фӕлӕ мын мӕ лӕггадӕн аргъ кодтой.

Иу ӕмбырдӕй иннӕмӕ цӕуыл нӕ цыдтӕн, ахӕм, ӕвӕццӕгӕн, нал баззад! Иу къуыри автобусыл цыдтӕн, иннӕ къуыри – трамвайыл, стӕй машинӕйыл кӕнӕ та мотоциклыл фӕстейӕ бадгӕйӕ, ӕмӕ ма-иу мӕ хъуыди мӕ чемоданыл ӕмӕ мӕ сумкӕйыл дӕр хӕцын. Ме ’мчырыстӕттимӕ цӕрын-иу мын тынг ӕхсызгон уыди. Иу ӕмбырды иу бӕрнон ӕфсымӕрӕн йӕ хӕдзар уыд ӕрдӕгарӕзт, фӕлӕ йӕ уӕддӕр тынг фӕндыд, цӕмӕй уымӕ баззадаин. Уыцы къуыри мӕ сынтӕг уыд ваннӕ, фӕлӕ нӕ дыууӕ дӕр уӕд куыд тынг бафидар стӕм!

1953 азы та мыл ӕрцыд ӕндӕр диссаджы хабар: фӕхуыдтой мӕ Галаады скъолайы 22 къласмӕ. Фӕлӕ цин куыд кодтон, тыхсгӕ дӕр афтӕ кодтон. Хъуыддаг уый мидӕг уыд, ӕмӕ 1950 азы 30 июлы мӕ хо йӕ лӕгимӕ Галаады скъола куы фесты, уӕд сӕ снысан кодтой Пакистанмӕ. Уымӕй афӕдз дӕр нӕ рацыд, афтӕ Лесли уым фӕрынчын ӕмӕ амард. Ӕмӕ хъуыды кодтон: уыцы хабарӕй нырма бирӕ нӕ рацыд, ӕмӕ ныр мӕн дӕр искуыдӕм куы арвитой, уӕд мӕ ныййарджытӕ цы зӕгъдзысты? Фӕлӕ мын уыдон загътой: «Ацу ӕмӕ дӕ Йегъовӕ кӕдӕм арвита, уым лӕггад кӕн». Мӕ фыды уый фӕстӕ нал федтон. Уый амард 1957 азы.

Бирӕ нӕ рацыд, афтӕ ӕз ӕмӕ ма ноджыдӕр фондз австралиаг ӕфсымӕр ӕмӕ хойы науыл Нью-Йоркмӕ фӕцӕйцыдыстӕм. Хъуыди нӕ ӕхсӕз къуырийы цӕуын. Фӕндагыл Библи кастыстӕм, ахуыр ӕй кодтам ӕмӕ ма науыл кӕимӕ цыдыстӕм, уыдонӕн хъусын кодтам. Скъола уыд штат Нью-Йорчы цӕгат хайы, Саут-Лансингы. Ӕмӕ цалынмӕ уырдӕм ацыдыстӕм, уӕдмӕ бахаудыстӕм, стадион «Янки»-йы цы ӕхсӕнадӕмон конгресс цыди, уымӕ. Уый уыди 1953 азы июлы. Уыцы конгрессы уыди 165 829 адӕймаджы!

Галаады скъолайы нӕ къласы цы 120 адӕймаджы уыд, уыдон уыдысты зӕххы алы къуымтӕй. Скъолайы фӕстаг боны онг нӕ ничи зыдта, кӕй кӕдӕм снысан кӕндзысты, уый. Ӕмӕ йӕ куы базыдтам, уӕд нын куыддӕр фадат фӕци, афтӕ иууылдӕр ныййарц стӕм Галаады библиотекӕмӕ, цӕмӕй, цы бӕстӕтӕм нӕ снысан кодтой, уыдоны тыххӕй исты базыдтаиккам. Мӕн снысан кодтой Парагваймӕ, уыцы бӕстӕ та зындгонд уыд революцитӕй. Уырдӕм куы ’рцыдтӕн, уымӕй гыццыл фӕстӕдӕр иу райсом райхъал дӕн ӕмӕ иннӕ миссионерты афарстон, зӕгъгӕ, ӕнӕхъӕн ӕхсӕв адӕм цы «бӕрӕг кодтой». Уыдон бахудтысты ӕмӕ загътой: «Дӕ къух нӕм авӕр. Уый уыди дӕ фыццаг революци. Дуарӕй-ма ӕддӕмӕ акӕс». Алы тигъыл дӕр лӕууыд ӕфсӕддонтӕ!

 АХӔМ ХАБАР НӔ ФЕРОХ КӔНДЗЫНӔ

Иухатт районон цӕстдарӕгимӕ ацыдыстӕм, дард ран чи уыд, ахӕм ӕмбырд бабӕрӕг кӕнынмӕ, стӕй ма хъуамӕ равдыстаиккам кино «Ног дунейы чи цӕры, уыцы адӕм» (The New World Society in Action). Уырдӕм нӕ бахъуыди аст-фараст сахаты цӕуын, фыццаг поездыл, стӕй бӕхуӕрдоныл, фӕстагмӕ та галуӕрдоныл. Немӕ рахастам генератор ӕмӕ кинопроектор. Бынатмӕ куы бахӕццӕ стӕм, уӕд иннӕ бон фермӕтыл азылдыстӕм ӕмӕ адӕмы се ’ппӕты дӕр фӕхуыдтам уыцы изӕр киномӕ бакӕсынмӕ. Ӕмӕ иу-15 адӕймаджы ӕрбацыд.

Кинойӕ иу-20 минуты куы рацыд, уӕд нын загътой, цӕмӕй тагъддӕр хӕдзармӕ бацыдаиккам. Мах дӕр нӕ проектор раскъӕфтам ӕмӕ мидӕмӕ балыгъдыстӕм. Бӕстӕ гуыпп-гӕрах сси. Уыдон уыдысты уыцы лӕгтӕ, афтӕ чи хъӕр кодта: «Нӕ хуыцау у тугмондаг хуыцау, ӕмӕ йӕ хъӕуы гринготы туг!» Гринготӕ дзы дыууӕ йеддӕмӕ нӕ уыд, ӕмӕ сӕ иу уыдтӕн ӕз! Киномӕ чи касти, уыдон уыцы адӕмы хӕдзармӕ бабырсын нӕ бауагътой. Фӕлӕ уыцы лӕгтӕ ӕхсӕвы ӕртӕ сахатыл ӕрбаздӕхтысты, ӕмӕ та ӕхсын райдыдтой ӕмӕ ӕртхъирӕн кодтой, зӕгъгӕ уӕ уӕддӕр фӕстӕмӕ горӕтмӕ хъӕуы, ӕмӕ нын уӕд та цы фӕуыдзыстут.

Уӕд ӕфсымӕртӕ пъӕлицӕмӕ бадзырдтой. Ӕмӕ нӕм иу пъӕлицӕйаг сихорӕй дыууӕ бӕхимӕ ӕрцыд, цӕмӕй нӕ горӕтмӕ акодтаид. Фӕндагыл-иу пыхсытӕм кӕнӕ бӕлӕстӕм куы фӕцӕйхӕццӕ кодтам, уӕд-иу пъӕлицӕйаг йӕ дамбаца систа ӕмӕ-иу нӕ разӕй фӕндаг федта. Куыд ӕй бамбӕрстон, афтӕмӕй уыцы ран фӕндагыл цӕуынӕн хъуыди бӕх, ӕмӕ фӕстӕдӕр мӕхицӕн иу бӕх самал кодтон.

ӔРЦЫД ФЫЛДӔР МИССИОНЕРТӔ

Кӕд сауджынтӕ ӕдзух нӕ ныхмӕ цыдысты, уӕддӕр хъусын кӕныны хъуыддаг размӕ цыди. 1955 азы ма нӕм ӕрцыд ноджыдӕр фондз ног миссионеры. Уыдонӕй иу уыд Элси Свансон, фӕци Галаады скъолайы 25 кълас. Иуцасдӕр филиалы иумӕ фӕлӕггад кодтам, цалынмӕ йӕ ӕндӕр горӕтмӕ не снысан кодтой, уӕдмӕ. Уыцы хо йӕ цард снывонд кодта Йегъовӕйӕн лӕггад кӕнынӕн, кӕд йӕ ныййарджытӕ рӕстдзинады фӕндагыл никуы ӕрлӕууыдысты ӕмӕ йын ӕххуыс дӕр нӕ кодтой, уӕддӕр. 1957 азы 31 декабры Элсиимӕ нӕ цард баиу кодтам. Цӕргӕ та кодтам хицӕнӕй миссионерты хӕдзары Парагвайы хуссар хайы.

Хӕдзармӕ нӕм дон уагъд нӕ уыд, фӕлӕ нӕм фӕстӕрдыгӕй кӕрты уыди цъай. Мидӕгӕй нӕм нӕдӕр душ уыди, нӕдӕр уазӕгдон, нӕдӕр нӕм гӕрзтӕхсӕн машинӕ уыд. Нӕ нӕм уыди холодильник дӕр, ӕмӕ нӕ хӕринагӕй цыдӕртӕ хъуыди алы бон дӕр ӕлхӕнын. Фӕлӕ ахӕм хуымӕтӕг цард кӕй кодтам, стӕй ӕмбырды хотӕ ӕмӕ ӕфсымӕртимӕ нӕ кӕрӕдзи тынг кӕй уарзтам, уымӕ гӕсгӕ уыцы рӕстӕг тынг амондджын уыдыстӕм.

1963 азы мӕ мады бабӕрӕг кӕнынмӕ Австралимӕ куы ’рцыдыстӕм, уымӕй гыццыл фӕстӕдӕр  мӕ мады инфаркт ныццавта. Ӕвӕццӕгӕн, йӕ фырты дӕс азы фӕстӕ кӕй федта, уый цин не сфӕрӕзта. Фӕстӕмӕ Парагваймӕ ацӕуыны рӕстӕг куы ’рхӕццӕ, уӕд нӕ бахъуыди нӕ царды ӕппӕты зындӕр фарста аскъуыддзаг кӕнын: мӕ мады рынчындоны хуысгӕйӕ ныууадзӕм, кӕд ӕм исчи фӕкӕсид, зӕгъгӕ, ӕмӕ афтӕ тынг кӕй уарзтам, уыцы куыст кӕнынмӕ фӕстӕмӕ Парагваймӕ аздӕхӕм? Элсиимӕ бирӕ фӕкуывтам ӕмӕ аскъуыддзаг кодтам, кӕй баззайдзыстӕм. Нӕ бон сси мӕ мадмӕ кӕсын дӕр ӕмӕ ӕххӕстрӕстӕг лӕггад кӕнын дӕр, цалынмӕ 1966 азы нӕ амард, уӕдмӕ.

Стыр кадыл нымайын, бирӕ азты дӕргъы Австралийы районон ӕмӕ облӕстон цӕстдарӕгӕй кӕй лӕггад кодтон, уый, стӕй Хистӕр нӕлгоймӕгты скъолайы ахуыргӕнӕг кӕй уыдтӕн, уый дӕр. Уый фӕстӕ ма нӕ царды уыди ӕндӕр ивындзинад дӕр. Австралийы фыццаг Филиалы комитет куы фӕзынд, уӕд мӕ уырдӕм снысан кодтой. Уый фӕстӕ ног филиал куы арӕзтам, уӕд мӕ снысан кодтой арӕзтадон комитеты сӕрдарӕй. Ӕмӕ, фӕлтӕрд чи уыд ӕмӕ ӕмвӕндӕй чи архайдта, бирӕ ахӕм кусджыты фӕрцы арӕзт ӕрцыд рӕсугъд филиал.

Уый фӕстӕ мӕ снысан кодтой уацамындӕн дзуапдӕттӕг хайадмӕ – уыцы хайад йӕ хъус дары, бӕстӕйы хъусын кӕныны хъуыддаг куыд цӕуы, уымӕ. Стӕй ма мӕм ахӕм кад ӕрхауд, ӕмӕ лӕггад кодтон зоналон цӕстдарӕгӕй ӕмӕ бӕрӕг кодтон иннӕ филиалтӕ, цӕмӕй сын ӕххуыс кодтаин ӕмӕ сын сӕ ныфсыл ныфс ӕфтыдтаин. Иуӕй-иу бӕстӕтӕ бӕрӕг кӕнгӕйӕ мӕ уырнындзинад уӕлдай тынгдӕр бафидар. Уыцы бӕстӕты фембӕлдтӕн, Йегъовӕйыл иузӕрдион кӕй уыдысты, уый тыххӕй цалдӕр азы кӕнӕ дӕсгай азты ахӕстӕтты ӕмӕ концлагерты чи фӕци, ахӕм ӕфсымӕртӕ ӕмӕ хотимӕ.

НЫР КӔМ ЛӔГГАД КӔНӔМ

2001 азы филиалтӕ куы бӕрӕг кодтам, уӕд хӕдзармӕ фӕлладӕй ӕрыздӕхтыстӕм. Уым нӕм ӕнхъӕлмӕ касти писмо: Бруклины (Нью-Йорчы) фӕзынд Америкӕйы Иугонд Штатты Филиалы комитет, ӕмӕ мӕ хуыдтой уым лӕггад кӕнынмӕ. Элсиимӕ уый тыххӕй фӕкуывтам, дзӕбӕх ахъуыды кодтам ӕмӕ стӕй ӕхсызгонӕй сразы стӕм. Ӕмӕ ныр 11 азӕй фылдӕр лӕггад кӕнӕм Бруклины.

Тынг амондджын дӕн, ахӕм цардӕмбал мын кӕй ис, ӕмӕ зӕрдӕрайгӕйӕ аразы, Йегъовӕ цыдӕриддӕр зӕгъы, уый. Мӕныл дӕр ӕмӕ Элсийыл дӕр цӕуы фӕйнӕ 81 азы, ӕмӕ ныр дӕр не ’нӕниздзинадӕй нӕ хъаст кӕнӕм. Мах зӕрдиагӕй ӕнхъӕлмӕ кӕсӕм, Йегъовӕ нӕ ӕнусты дӕргъы куы ахуыр кӕна, уыцы рӕстӕгмӕ, стӕй йын йӕ фӕндон чи ӕххӕст кӕны, уыдонӕн цы стыр арфӕдзинӕдтӕ ӕрцӕттӕ кодта, уыдонмӕ дӕр.

[Хицӕнгонд текст 19 фарсыл]

Иу къуыри автобусыл цыдтӕн, иннӕ къуыри – трамвайыл, стӕй машинӕйыл кӕнӕ та мотоциклыл фӕстейӕ бадгӕйӕ, ӕмӕ ма-иу мӕ хъуыди мӕ чемоданыл ӕмӕ мӕ сумкӕйыл дӕр хӕцын

[Хицӕнгонд текст 21 фарсыл]

Мах зӕрдиагӕй ӕнхъӕлмӕ кӕсӕм, Йегъовӕ нӕ ӕнусты дӕргъы куы ахуыр кӕна, уыцы рӕстӕгмӕ

[Нывтӕ 18 фарсыл]

Галиуырдыгӕй: Австралийы районон цӕстдарӕгӕй куы лӕггад кодтон, уӕд Рахизырдыгӕй: мӕ ныййарджытимӕ

[Ныв 20 фарсыл]

Нӕ чындзӕхсӕвы бон, 1957 азы 31 декабрь