«Зӕрдиагӕй архайут, Хуыцауы сыгъдӕг тых кӕй дӕтты, уыцы иудзинады цӕрыныл» (ЕФ. 4:3).

1, 2. Йегъовӕ зӕххы ӕмӕ адӕмы тыххӕй цы сфӕнд кодта?

БИНОНТӔ. Ацы ныхас куы фехъусыс, уӕд дӕ цӕстытыл цы ауайы? Фӕйнӕрдӕм чи нӕ хӕцы, фӕлӕ кӕрӕдзийӕн чи ӕххуыс кӕны, ахӕм ӕнгом, амондджын бинонтӕ? Мыййаг, дӕ цӕстытыл ахӕм бинонтӕ ауайынц, ӕмӕ дзы алкӕмӕн дӕр у ӕдас, сывӕллӕттӕ, куыд ӕмбӕлы, афтӕ хъомыл кӕнынц, ахуыр кӕнынц ӕмӕ сӕ алчидӕр йӕ хъуыдытӕ сӕрибарӕй дзуры? Кӕд ахӕм бинонты ’хсӕн схъомыл дӕ, уӕд, ӕвӕццӕгӕн, дӕ цӕстытыл уыдӕттӕ ауайынц. Йегъовӕ йӕхӕдӕг у бинонты царды Бындурӕвӕрӕг (Еф. 3:14, 15). Ӕмӕ йӕ фӕнд уыди, цӕмӕй, уӕлӕрвты дӕр ӕмӕ зӕххыл дӕр чидӕриддӕр ис, уыдон уыдаиккой иу бинонтӕ ӕмӕ дзы алкӕмӕн дӕр уыдаид ӕдас, кӕрӕдзийыл ӕууӕндыдаиккой ӕмӕ се ’хсӕн уыдаид иудзинад.

² Адам ӕмӕ Евӕ тӕригъӕд куы сарӕзтой, уӕд адӕм Хуыцауы бинонтӕй нал уыдысты. Фӕлӕ уымӕй Йегъовӕйӕн йӕ фӕнд нӕ фехӕлд. Уый ӕнӕмӕнг афтӕ бакӕндзӕн, ӕмӕ, зӕхх Дзӕнӕт куы суа, уӕд иууылдӕр байдзаг уыдзӕн Адам ӕмӕ Евӕйы байзӕддӕгтӕй (Райд. 1:28; Ис. 45:18). Йегъовӕ алцыдӕр бацӕттӕ кодта, цӕмӕй уыцы фӕнд сӕххӕст кӕна. Цы сарӕзта, уый тыххӕй базонӕн ис, Павел ефесӕгтӕм цы фыстӕг ныффыста, уымӕй, ӕмӕ дзы сӕйраджыдӕр дзырд цӕуы иудзинадыл. Йегъовӕйы фӕнд у, уӕлӕрвты чи ис ӕмӕ зӕххыл чи ис, уыдоны иу бинонтау баиу кӕнын. Уӕдӕ ӕркӕсӕм уыцы чиныгӕй цалдӕр стихмӕ ӕмӕ базонӕм, нӕ бон куыд у Йегъовӕйы фӕндмӕ гӕсгӕ архайын.

ХЪУЫДДӔГТӔН РАЗАМЫНД СФИДАР КОДТА

3. Ефесӕгтӕм 1:10 цы разамынды кой ис, уый цы у? Хуыцау цы разамынд сфидар кодта, уымӕ цы хъуыддӕгтӕ хауы, уыдонӕй фыццаг цы у?

³ Йегъовӕ цыдӕриддӕр аразы, уый алкӕддӕр вӕййы йӕ фӕндимӕ баст. Ӕмӕ «афон куы ’рцыд, уӕд» Хуыцау «хъуыддӕгтӕн разамынд сфидар кодта» – уымӕ хауы, уӕлӕрвты ӕмӕ зӕххыл чидӕриддӕр ис, уыдоны иу  бинонтау баиу кӕнынӕн цы аразы, уый. (Бакӕс Ефесӕгтӕм 1:8–10.) Хуыцау цы разамынд сфидар кодта, уымӕ хауы дыууӕ хъуыддаджы. Фыццаг: Хуыцау цӕттӕ кӕны сӕрст чырыстӕтты уӕлӕрвты цӕрынмӕ, ӕмӕ уым уыдон дарддӕр архайдзысты Йесо Чырыстийы дӕлбар. Уыцы хъуыддаг райдыдта н. э. 33 азы Фӕндзайӕм боны. Уӕд Йегъовӕ райдыдта ӕмбырд кӕнын, Чырыстиимӕ иумӕ уӕларвон паддзахады чи уыдзӕн, уыдоны (Хъуыд. 2:1–4). Чырыстийы нывонды фӕрцы Хуыцау сӕрст чырыстӕтты банымайы рӕстгӕнджытыл ӕмӕ царды аккагыл. Уыдон ӕй зонынц, Хуыцау сӕ йӕ хъӕбултӕ кӕй схуыдта (Ром. 3:23, 24; 5:1; 8:15–17).

4, 5. Хуыцау цы разамынд сфидар кодта, уымӕ цы хъуыддӕгтӕ хауы, уыдонӕй дыккаг цы у?

⁴ Дыккаг хъуыддаг: Хуыцау цӕттӕ кӕны, зӕххыл дзӕнӕты Мессийӕйы Паддзахады дӕлбар чи цӕрдзӕн, уыцы адӕмы. Уыдонмӕ фыццаджыдӕр хауынц «тынг бирӕ адӕм» (Рарг. 7:9, 13–17; 21:1–5). Чырысти мин азы дӕргъы Паддзах куы уа, уӕд та сӕм ӕрбаиу уыдзысты, чи райгас уыдзӕн, уыцы миллиардгай адӕм дӕр (Рарг. 20:12, 13). Ахъуыды-ма кӕн, уӕд нын цас фадӕттӕ уыдзӕн, не ’хсӕн ӕцӕг иудзинад кӕй ис, уый равдисынӕн! Тынг бирӕ адӕм ӕмӕ, чи райгас уа, уыдон иумӕ уыдзысты, «зӕххыл цы ис, уыдон». Уыцы адӕм миназы кӕрон фӕстаг хатт фӕлвӕрд ӕрцӕудзысты. Ӕмӕ, иузӕрдион чи разына, уыдоны Хуыцау банымайдзӕн йӕ зӕххон сывӕллӕттыл (Ром. 8:21; Рарг. 20:7, 8).

⁵ Абон Йегъовӕ сӕрст чырыстӕтты цӕттӕ кӕны уӕлӕрвты цӕрынмӕ, тынг бирӕ адӕмы та – зӕххыл дзӕнӕты цӕрынмӕ. Фӕлӕ махӕй та алкӕмӕн дӕр нӕ бон куыд у, Хуыцау цы разамынд сфидар кодта, уымӕ гӕсгӕ архайын?

«ХУЫЦАУЫ СЫГЪДӔГ ТЫХ КӔЙ ДӔТТЫ, УЫЦЫ ИУДЗИНАДЫ ЦӔРУТ»

6. Библийӕ куыд у бӕрӕг, чырыстӕттӕ иумӕ кӕй хъуамӕ ӕмбырд кӕной?

⁶ Библийӕ бӕрӕг у, чырыстӕттӕ иумӕ кӕй хъуамӕ ӕмбырд кӕной (1 Кор. 14:23; Дзут. 10:24, 25). Фӕлӕ уый ууыл дзурӕг нӕу, ӕмӕ ӕнӕуи цасдӕр рӕстӕг иу ран арвитӕм, зӕгъӕм, адӕм базармӕ куыд ӕрбацӕуынц кӕнӕ стадионы куыд ӕрӕмбырд вӕййынц, афтӕ. Ӕцӕг иудзинадмӕ фылдӕр цыдӕр хауы. Ахӕм иудзинад нӕ къухы уӕд бафты, Йегъовӕйы амындтӕм гӕсгӕ куы фӕархайӕм ӕмӕ сыгъдӕг тыхӕн бар куы фӕдӕттӕм, цӕмӕй нын нӕ удыхъӕд ива.

7. «Хуыцауы сыгъдӕг тых кӕй дӕтты, уыцы иудзинады цӕрут», зӕгъгӕ, куыд ӕмбарын хъӕуы?

⁷ Чырыстийы нывонды фӕрцы Йегъовӕ сӕрст чырыстӕтты дӕр ӕмӕ ӕндӕр фысты дӕр нымайы рӕстгӕнджытыл: сӕрст чырыстӕтты хоны йӕ фырттӕ, ӕндӕр фысты та – йӕ хӕлӕрттӕ. Фӕлӕ уӕддӕр, цалынмӕ ацы дунейы цӕрӕм, уӕдмӕ-иу не ’хсӕн истытӕ рауайдзӕн (Ром. 5:9; Иак. 2:23). Афтӕ куы нӕ уаид, уӕд ма Библийы ахӕм уынаффӕ цӕмӕн уаид, «кӕрӕдзийӕн барут», зӕгъгӕ? Уӕдӕ не ’хсӕн иудзинад цӕй фӕрцы уыдзӕн? Хъуамӕ архайӕм, цӕмӕй «алкӕддӕр уӕм сӕрныллӕг, фӕлмӕн». Уымӕй уӕлдай ма Павел разӕнгард кӕны, цӕмӕй зӕрдиагӕй архайӕм, «Хуыцауы сыгъдӕг тых кӕй дӕтты, уыцы иудзинады цӕрыныл ӕмӕ кӕрӕдзийыл баст уӕм фарны тӕгтӕй». (Бакӕс Ефесӕгтӕм 4:1–3.) Цӕмӕй ацы уынаффӕмӕ гӕсгӕ цӕрӕм, уый тыххӕй хъуамӕ Хуыцауы сыгъдӕг тыхы разамындмӕ хъусӕм ӕмӕ йын бар дӕттӕм, цӕмӕй нын нӕ мидӕг йӕ дыргъ рӕзын кӕна. Уыцы дыргъмӕ цы миниуджытӕ хауы, уыдон, кӕрӕдзийӕ чи адард, уыцы адӕмы фӕстӕмӕ баиу кӕнынц. Тӕригъӕдджын буары хъуыддӕгтӕ та адӕмы кӕрӕдзийӕ фӕхицӕн кӕнынц.

8. Тӕригъӕдджын буары хъуыддӕгты тыххӕй иудзинад куыд фехӕлы?

⁸ Ӕркӕсӕм-ма, иудзинад «тӕригъӕдджын буары хъуыддӕгты» тыххӕй куыд фехӕлы, уымӕ. (Бакӕс Галатӕгтӕм 5:19–21.) Хӕтгӕ чи кӕны, уый фӕхицӕн вӕййы Йегъовӕйӕ ӕмӕ ӕмбырдӕй. Исчи йӕ цардӕмбалыл гадзрахатӕй куы рацӕуы, уӕд уый тыххӕй бинонты цард фехӕлы ӕмӕ сывӕллӕттӕ сӕ ныййарджытӕй фӕхицӕн вӕййынц. Чъизи хъуыддӕгтӕ чи кӕны, уый адард вӕййы Хуыцауӕй дӕр ӕмӕ йе ’мбӕлттӕ ӕмӕ йӕ хиуӕттӕй дӕр. Зӕгъӕм, дыууӕ дзаумайы куы ныхасай ӕмӕ дзы иу сыгъдӕг куы уа, иннӕ та – нӕ, уӕд кӕрӕдзийыл нӕ баныхӕсдзысты. Афтӕ адӕймаг дӕр сыгъдӕг цард куы нӕ кӕна, уӕд уый гӕнӕн  нӕй, ӕмӕ Хуыцауимӕ ӕмӕ йӕ адӕмимӕ иудзинады уа. Хӕлд митӕ чи кӕны, уый ӕвдисы, Хуыцауы раст закъӕттӕ ӕппындӕр кӕй ницӕмӕ дары *. Тӕригъӕдджын буары хъуыддӕгтӕм ма ноджыдӕр цы хъуыддӕгтӕ хауы, уыдон дӕр адӕмы кӕрӕдзийӕ ӕмӕ Хуыцауӕй фӕхицӕн кӕнынц. Йегъовӕ ахӕм хъуыддӕгтӕй йе сӕфт уыны.

9. Нӕ бон куыд у сбӕлвырд кӕнын, «Хуыцауы сыгъдӕг тых кӕй дӕтты, уыцы иудзинады цӕрыныл» зӕрдиагӕй архайӕм ӕви нӕ?

⁹ Уӕдӕ нӕ алчидӕр хъуамӕ ахъуыды кӕна: «Цымӕ зӕрдиагӕй архайын, цӕмӕй ме ’фсымӕртимӕ ӕмӕ мӕ хотимӕ, „Хуыцауы сыгъдӕг тых кӕй дӕтты, уыцы иудзинады цӕрон ӕмӕ кӕрӕдзийыл баст уӕм фарны тӕгтӕй“? Искӕимӕ кӕрӕдзи куы нӕ бамбарӕм, уӕд куыд бакӕнын? Мыййаг, уыцы адӕймагӕй ме ’мбӕлттӕн фӕхъаст кӕнын, цӕмӕй мӕ фарс рахӕцой? Кӕнӕ, цӕмӕй мӕхи ма бахъӕуа фидауын, уый тыххӕй хабар хистӕр нӕлгоймӕгтӕн радзурын, зӕгъгӕ йӕ уыдон равзарӕнт? Кӕд мӕм исчи истӕуыл хӕрам у, уӕд дзы мӕхи дард фӕласын, зӕгъгӕ мӕ куы нӕ уына, уӕд хуыздӕр уыдзӕн?» Афтӕ куы кӕнӕм, уӕд цымӕ зӕгъӕн уыдзӕн, ӕмӕ Йегъовӕйы фӕндмӕ гӕсгӕ архайӕм, ома, Йегъовӕ ӕппӕт дӕр Чырыстийы фӕрцы фӕстӕмӕ иумӕ ӕрӕмбырд кӕнын кӕй фӕнд кӕны, уымӕ гӕсгӕ?

10, 11. а) Не ’фсымӕртимӕ фӕрнӕй цӕмӕн хъуамӕ цӕрӕм? ӕ) Цӕмӕй не ’хсӕн фарн уа ӕмӕ нын Йегъовӕ арфӕ кӕна, уый тыххӕй цы хъуамӕ аразӕм?

¹⁰ Йесо загъта: «Дӕ нывондимӕ нывондхӕссӕнмӕ куы ӕрцӕуай, ӕмӕ дӕм де ’фсымӕр цӕйдӕр тыххӕй кӕй фӕхъыг, уый дӕ зӕрдыл куы ӕрлӕууа, уӕд дӕ нывонд ныууадз нывондхӕссӕны раз, ацу, бафидау уал де ’фсымӕримӕ, стӕй раздӕх ӕмӕ ӕрхӕсс дӕ нывонд. Бафидау ӕвӕстиатӕй» (Матф. 5:23–25, «Ног Фӕдзӕхст», 2004). Иаков та ныффыста: «Рӕстдзинады мыггаг тыд ӕрцӕуы ӕмӕ тыллӕг ӕрхӕссы, фарн кӕм ис, уым ӕмӕ, фарн чи уарзы, уыдонӕн» (Иак. 3:17, 18). Уӕдӕ не ’хсӕн фарн куы нӕ уа, уӕд нӕ бон нӕ уыдзӕн, раст цы у, уый аразын.

¹¹ Ахъуыды-ма кӕнӕм ахӕм цӕвиттоныл. Хӕстытӕ кӕм вӕййы, ахӕм бӕстӕтӕй кӕцыдӕрты зӕхкусджытӕ минӕтӕй куы нӕ тӕрсиккой, уӕд-иу 35 проценты фылдӕр зӕхх бакусиккой. Минӕ куы фехӕлы, уӕд зӕхкусджытӕ сӕ зӕххытӕ ныууадзынц, хъӕуты цӕрджытӕн куыст нал вӕййы, горӕтты та хӕринаг нал фӕфаг кӕны. Раст афтӕ, кӕд нӕ кӕцыдӕр миниуджыты тыххӕй нӕ бон нӕу не ’фсымӕртимӕ фӕрнӕй, хӕларӕй цӕрын, уӕд нӕ уый нӕ уадздзӕн уырнындзинады рӕзын ӕмӕ фӕлтӕрдджындӕр кӕнын. Фӕлӕ хатыр кӕныныл фӕстиат куы нӕ кӕнӕм ӕмӕ, иннӕтӕн хорз куыд уа, ууыл куы архайӕм, уӕд не ’хсӕн уыдзӕн фарн ӕмӕ нын Йегъовӕ арфӕ кӕндзӕн.

12. Хистӕр нӕлгоймӕгтӕ нын куыд ӕххуыс кӕнынц, цӕмӕй не ’хсӕн иудзинад уа?

¹² Цӕмӕй не ’хсӕн иудзинад уа, уымӕн ма нын стыр ӕххуыс сты, Йегъовӕ нын лӕварӕн кӕй радта, уыцы адӕймӕгтӕ дӕр – хистӕр  нӕлгоймӕгтӕ. Уыдон лӕвӕрд сты, цӕмӕй нын ӕххуыс кӕной уырнындзинады иу зондмӕ ӕрцӕуынӕн (Еф. 4:8, 13). Хистӕр нӕлгоймӕгтӕ немӕ куы фӕлӕггад кӕнынц, стӕй нын Хуыцауы Ныхасмӕ гӕсгӕ хорз уынаффӕтӕ куы фӕдӕттынц, уӕд нын афтӕмӕй феххуыс кӕнынц нӕ удыхъӕд ногмӕ ивынӕн (Еф. 4:22–24). Уынаффӕ дын куы раттынц, уӕд ӕй фембарыс, уый дӕ Йегъовӕ кӕй цӕттӕ кӕны ног дунейы йӕ Фырты дӕлбар цӕрынмӕ? Хистӕр нӕлгоймӕгтӕ, сымахӕн дӕр уӕ нысан уый вӕййы, иннӕты раст зондыл куы фӕаразут, уӕд? (Гал. 6:1).

«КӔРӔДЗИМӔ УТ ХӔЛАРЗӔРДӔ»

13. Ефесӕгтӕм 4:25–32 цы уынаффӕ ис, уымӕ куы нӕ хъусӕм, уӕд уый цӕмӕ ӕркӕндзӕн?

¹³ Ефесӕгтӕм 4:25–29 дзырд цӕуы, не ’хсӕн сӕ кой дӕр кӕмӕн хъуамӕ ма уа, ахӕм хъуыддӕгтыл. Уыдонмӕ хауынц мӕнг ныхас кӕнын, мӕсты кӕнын, зивӕг кӕнын ӕмӕ ӕмбыд ныхас кӕнын, иннӕты чи бафидар кӕндзӕн, ахӕм хорз ныхӕстӕ нӕ, фӕлӕ. Адӕймаг ацы уынаффӕмӕ куы нӕ хъуса, уӕд Хуыцауы сыгъдӕг тыхы маст бауадздзӕн. Ӕмӕ не ’хсӕн иудзинад та сӕйраджыдӕр сыгъдӕг тыхы фӕрцы ис (Еф. 4:30). Павел ма ноджыдӕр цы ныффыста, уымӕ гӕсгӕ архайын дӕр ӕнӕмӕнг хъӕуы, цӕмӕй не ’хсӕн фарн ӕмӕ иудзинад уа. Уый ныффыста: «Ныууадзут алы фыдӕх, маст, знӕт, хъӕр-хъӕлӕба, ӕфхӕрӕн ныхас, стӕй, ӕвзӕрӕй цыдӕриддӕр ис, уый. Ӕмӕ кӕрӕдзимӕ ут хӕларзӕрдӕ, уӕ кӕрӕдзийы зын ӕмбарут, ӕмӕ уын Чырыстийы фӕрцы Хуыцау зӕрдӕйӕ куыд ныххатыр кодта, сымах дӕр кӕрӕдзийӕн афтӕ зӕрдӕйӕ хатыр кӕнут» (Еф. 4:31, 32).

14. а) Павел ахӕм уынаффӕ цӕмӕн радта, «кӕрӕдзимӕ ут хӕларзӕрдӕ», зӕгъгӕ? ӕ) Цӕй фӕрцы уыдзыстӕм хӕларзӕрдӕ?

¹⁴ Павел ахӕм уынаффӕ, «кӕрӕдзимӕ ут хӕларзӕрдӕ», зӕгъгӕ, уымӕн радта, ӕмӕ иуӕй-иу хатт хӕларзӕрдӕ нӕ разынӕм ӕмӕ нӕ фӕхъӕуы уыцы миниуӕгыл ноджы тынгдӕр бакусын. Уӕдӕ хъуамӕ нӕхи ӕнӕмӕнг сахуыр кӕнӕм фылдӕр иннӕтыл хъуыды кӕнын, нӕхиуыл нӕ, фӕлӕ (Фил. 2:4). Чи зоны нӕ иуӕй-иу хатт фӕфӕнды ахӕм исты зӕгъын, цӕмӕй иннӕтӕ ахудой кӕнӕ афтӕ зӕгъой, мӕнӕ куыд зондджын у, зӕгъгӕ. Фӕлӕ цымӕ уыцы ныхас, хӕларзӕрдӕ кӕй дӕ, ууыл дзурӕг уыдзӕн? Исты зӕгъыны размӕ уал-иу хъуыды куы акӕнӕм, уӕд уый фӕрцы кӕрӕдзимӕ хӕларзӕрдӕ уыдзыстӕм.

БИНОНТЫ ’ХСӔН АХУЫР КӔНӔМ ИННӔТЫ УАРЗЫН ӔМӔ СЫН КАД КӔНЫН

15. Лӕгтӕ Чырыстийы куыд хъуамӕ фӕзмой, уый Ефесӕгтӕм 5:28 куыд зыны?

¹⁵ Чырысти ӕмбырдӕн куыд у, уый Библи абарста, лӕг йӕ усӕн куыд вӕййы, уыимӕ. Чырыстийы цӕвиттон лӕгӕн ууыл дзурӕг у, ӕмӕ хъуамӕ йӕ усӕн разамынд дӕтта, уарза йӕ ӕмӕ йыл тыхса, усӕн та ууыл дзурӕг у, ӕмӕ хъуамӕ йӕ лӕджы коммӕ кӕса (Еф. 5:22–33). Павел афтӕ куы ныффыста, «раст афтӕ лӕгтӕ дӕр, сӕхи буар куыд уарзынц, афтӕ хъуамӕ уарзой сӕ устыты», зӕгъгӕ, уӕд цӕй кой кодта? (Еф. 5:28). Павел уый размӕ ныффыста: «Чырысти дӕр ӕмбырд куыд бауарзта ӕмӕ йӕхи йӕ сӕрвӕлтау куыд радта, афтӕ, цӕмӕй йӕ Хуыцауы ныхасы донӕй ныхса, ссыгъдӕг ӕй кӕна». Уӕдӕ лӕг хъуамӕ йӕ бинонтӕй алкӕмӕн дӕр ӕххуыс кӕна, цӕмӕй Йегъовӕмӕ ӕввахс уой. Афтӕмӕй уый архайдзӕн Йегъовӕйы фӕндмӕ гӕсгӕ, ома, ӕппӕт дӕр Чырыстийы фӕрцы фӕстӕмӕ иумӕ ӕрӕмбырд кӕнын кӕй фӕнд кӕны, уымӕ гӕсгӕ.

16. Ныййарджытӕ сӕ хӕстӕ куы феххӕст кӕнынц, уӕд сӕ къухы цы бафты?

¹⁶ Ныййарджытӕ хъуамӕ ма рох кӕной, Йегъовӕйӕ лӕвӕрд хӕс кӕй ӕххӕст кӕнынц. Хъыгагӕн, абоны дунейы бирӕ «бинонты ’хсӕн уарзондзинад нал ис» (2 Тим. 3:1, 3). Бирӕ фыдӕлтӕ сӕ хӕстӕ не ’ххӕст кӕнынц ӕмӕ уый зиан хӕссы сӕ сывӕллӕттӕн. Фӕлӕ Павел чырыстӕттӕн загъта: «Уӕ сывӕллӕтты ма мӕсты кӕнут, фӕлӕ сӕ хъомыл кӕнут, Йегъовӕ куыд амоны, афтӕ, ӕмӕ сӕ йӕ зондыл аразут» (Еф. 6:4). Сывӕллӕттӕ фыццаджыдӕр бинонты ’хсӕн ахуыр кӕнынц иннӕты уарзын ӕмӕ хистӕртӕн кад кӕнын. Ӕмӕ уыдӕттыл йӕ сывӕллӕтты чи сахуыр кодта, уыцы ныййарджытӕн ӕнтысы, Йегъовӕ цы разамынд сфидар кодта, уымӕ гӕсгӕ архайын.  Сывӕллӕттӕ куы ӕмбарой, ӕмӕ сӕ сӕ ныййарджытӕ уарзынц, ныййарджытӕ сӕ сывӕллӕттыл сӕ пырх куы нӕ калой, куы нӕ сыл хъӕр кӕной, ӕфхӕрӕн ныхас сын куы нӕ кӕной, уӕд сывӕллӕттӕ ахуыр кӕндзысты иннӕты уарзын ӕмӕ хистӕртӕн кад кӕнын. Уый та сӕ бацӕттӕ кӕндзӕн Хуыцауы ног дунейы цӕрынмӕ.

17. Цы нӕ хъӕуы, цӕмӕй Хӕйрӕгӕн ныхкъуырд раттӕм?

¹⁷ Дун-дунейы цы фарн уыди, уый фыццаг фехӕлдта Хӕйрӕг. Ӕмӕ йӕ хъуамӕ ӕмбарӕм, нӕ ныхмӕ тынг кӕй цӕудзӕн ӕмӕ нӕ кӕй хъыгдардзӕн Хуыцауы фӕндон ӕххӕст кӕнын. Ныртӕккӕ фылдӕрӕй-фылдӕр кӕнынц, чи ахицӕн вӕййы, ахӕм бинонтӕ. Бирӕтӕ сӕ цард закъонмӕ гӕсгӕ нал баиу кӕнынц, фӕлӕ ӕнӕуи бацӕрынц. Суанг ма, гомосексуалисттӕ сӕ цард кӕй баиу кӕнынц, уый дӕр бирӕтӕм диссаг нал кӕсы. Ӕмӕ ма Хӕйрӕджы ӕндӕр цы хъӕуы. Фӕлӕ мах нӕ цард ацы дунейы ӕгъдӕуттӕм гӕсгӕ нӕ аразӕм. Махӕн фӕзминаг у Чырысти (Еф. 4:17–21). Уымӕ гӕсгӕ нӕ Библи фӕдзӕхсы, зӕгъгӕ, «уӕхи сифтонг кӕнут, Хуыцау цыдӕриддӕр хӕстон дзауматӕ дӕтты, уыдонӕй», цӕмӕй нӕ бон уа Хӕйрӕгӕн ӕмӕ йӕ дӕлимонтӕн ныхкъуырд раттын. (Бакӕс Ефесӕгтӕм 6:10–13.)

«ЦӔРУТ УАРЗГӔЙӔ»

18. Цӕмӕй не ’хсӕн иудзинад уа, уый тыххӕй ӕнӕмӕнг цы хъӕуы?

¹⁸ Цӕмӕй не ’хсӕн иудзинад уа, уый тыххӕй нӕ ӕнӕмӕнг хъӕуы уарзондзинад. Мах ӕппӕт зӕрдӕйӕ уарзӕм нӕ «иу Хицауы», нӕ «иу Хуыцауы» ӕмӕ нӕ кӕрӕдзийы, ӕмӕ нӕ зӕрдиагӕй фӕнды архайын, цӕмӕй, «Хуыцауы сыгъдӕг тых кӕй дӕтты, уыцы иудзинады цӕрӕм ӕмӕ кӕрӕдзийыл баст уӕм фарны тӕгтӕй» (Еф. 4:3–6). Йесо куывта ахӕм уарзондзинады тыххӕй: «Ӕрмӕст уыдоны тыххӕй дӕ нӕ курын, фӕлӕ мыл сӕ ныхасмӕ гӕсгӕ чи баууӕнда, уыдоны тыххӕй дӕр, цӕмӕй се ’ппӕт дӕр ӕмвӕндӕй архайой. Ды, мӕ Фыд, мемӕ иудзинады куыд дӕ ӕмӕ ӕз та демӕ иудзинады куыд дӕн, афтӕ уыдон дӕр уой немӕ иудзинады... Ӕмӕ сын ӕз дӕ ном раргом кодтон ӕмӕ сын ӕй ноджыдӕр раргом кӕндзынӕн, цӕмӕй, ды мӕн куыд бауарзтай, уыдон дӕр афтӕ уарзой иннӕты, ӕмӕ цӕмӕй ӕз уон семӕ иудзинады» (Иоан. 17:20, 21, 26).

19. Дӕ фӕнд цы у?

¹⁹ Кӕд нӕ мидӕг цавӕрдӕр миниуӕджы тыххӕй тох цӕуы, уӕд нӕ уарзондзинад сразӕнгард кӕндзӕн псаломзарӕггӕнӕгау афтӕ кувынмӕ: «Ӕрбангом мын кӕн мӕ зӕрдӕ, цӕмӕй дын дӕ номӕй тӕрсон» (Пс. 86:11). Цӕй уӕдӕ Хӕйрӕджы ныхмӕ фидар фӕлӕууӕм ӕмӕ йӕ ма бауадзӕм, цӕмӕй нӕ нӕ уарзӕгой Фыдӕй ӕмӕ не ’фсымӕртӕ ӕмӕ нӕ хотӕй адард кӕна. Уӕдӕ зӕрдиагӕй архайӕм «Хуыцауы фӕзмыныл, уымӕн ӕмӕ йӕ уарзон хъӕбултӕ стӕм, ӕмӕ... цӕрӕм уарзгӕйӕ» – нӕ бинонты ’хсӕн дӕр, уацамынды дӕр ӕмӕ ӕмбырды дӕр (Еф. 5:1, 2).

[Фиппаинаг]

[Фарстатӕ ахуыр кӕнынӕн]

[Ныв 29 фарсыл]

Йӕ нывонд нывондхӕссӕны раз ныууагъта ӕмӕ ацыд, цӕмӕй йе ’фсымӕримӕ бафидауа

[Ныв 31 фарсыл]

Ныййарджытӕ, уӕ сывӕллӕтты ахуыр кӕнут иннӕтӕн кад кӕнын