Фынддӕс азы размӕ Эмилийӕ лӕггад кодта ӕххӕстрӕстӕг пионерӕй. Фӕлӕ йӕ уавӕртӕ фӕивтой ӕмӕ йӕ бон нал уыд пионерӕй лӕггад кӕнын. Фӕстаг цалдӕр азы-иу Эмилийӕ арӕх хъуыды кодта, уӕд куыд амондджын уыди, ууыл. Ӕмӕ йӕ тынг фӕндыди ногӕй пионерӕй лӕггад кӕнын.

Фӕлӕ Эмилийӕйӕн куыст йӕ рӕстӕг иууылдӕр иста, ӕмӕ йӕ цардӕй йӕ зӕрдӕ нӕ ради. Иухатт йе ’мкусджыты раз загъта, къаддӕр рӕстӕг куы кусин, уӕд цы хорз уаид, зӕгъгӕ. Уыцы ныхӕстӕ йӕ хицау дӕр фехъуыста ӕмӕ йын йӕхи бафарста, ӕцӕгдӕр афтӕ у, зӕгъгӕ. Ӕмӕ уымӕн дӕр йӕ фӕнды тыххӕй загъта. Фӕлӕ уыцы компанийы кусджытӕ иууылдӕр къуыри фондз боны кӕй хъуамӕ куыстаиккой, уымӕ гӕсгӕ Эмилийӕйы аныхас кӕнын хъуыди компанийы директоримӕ. Гъемӕ нӕ хо, цы зӕгъдзӕн, ууыл рагацау ахъуыды кодта ӕмӕ Йегъовӕмӕ скуывта, цӕмӕй директоримӕ ныхас кӕнгӕйӕ ма стыхстаид ӕмӕ ныфсджынӕй дзырдтаид.

Эмилийӕ директормӕ куы бацыд, уӕд ын уӕзданӕй, фӕлӕ фидарӕй загъта, къаддӕр рӕстӕг ӕй кӕй фӕнды кусын. Бамбарын ын кодта, уыцы рӕстӕг ӕй уый тыххӕй кӕй хъӕуы, цӕмӕй иннӕтӕн ӕххуыс кӕна. Эмилийӕ загъта: «Ӕз дӕн Йегъовӕйы Ӕвдисӕн ӕмӕ адӕмӕн ӕххуыс кӕнын, Библийы цы фыст ис, уый базонынӕн. Абон бирӕтӕ, хорз ӕмӕ ӕвзӕр цы у, уый нал ӕвзарынц. Ӕмӕ цӕмӕй сӕ бон раст уынаффӕтӕ хӕссын уа, уый тыххӕй сӕ хъӕуы Хуыцауы зонд. Мӕн фӕнды адӕмӕн фылдӕр ӕххуыс кӕнын. Фӕлӕ мӕ нӕ фӕнды, цӕмӕй уый мӕ куыстыл ӕвзӕрырдӕм фӕзына. Ӕмӕ уый тыххӕй та хъуамӕ къаддӕр рӕстӕг кусон».

Директор ӕм лӕмбынӕг байхъуыста ӕмӕ йын загъта, иуафон уый дӕр кӕй фӕндыди адӕмӕн ӕхцайӕ кӕнӕ ӕндӕр истӕмӕй ӕххуыс кӕнын. Ӕмӕ уый фӕстӕ загъта: «Иугӕр хабар афтӕ у, уӕд дын мӕ бон „нӕ“ зӕгъын нӕу. Фӕлӕ йӕ ӕмбарыс, уӕд мызд къаддӕр кӕй исдзынӕ?» Эмилийӕ бамбарын кодта, уымӕ дӕр цӕттӕ кӕй у ӕмӕ, кӕд бахъӕуа, уӕд йӕ цард дӕр кӕй фӕхуымӕтӕгдӕр кӕндзӕн. Ӕмӕ ма йӕ ныхӕстӕм бафтыдта: «Мӕнӕн уымӕй сӕйрагдӕр ницы ис, ӕмӕ адӕмӕн ӕххуыс кӕнон». Уӕд ын директор загъта: «Ӕз тынг аргъ кӕнын, йӕ рӕстӕг иннӕты тыххӕй чи не ’вгъау кӕны, ахӕм адӕймӕгтӕн».

Уыцы компанийы афтӕ никуыма уыди, ӕмӕ кусджытӕй искӕмӕн къаддӕр кусыны бар раттаиккой. Эмилийӕйӕн та радтой уый бар, цӕмӕй къуыри ӕрмӕстдӕр цыппар боны куса. Стӕй ма йӕм ӕнхъӕлмӕ каст ноджыдӕр иу ӕхсызгон хабар. Цы мыздмӕ ӕнхъӕлмӕ каст, уымӕй йын фылдӕр райдыдтой фидын, ӕмӕ кӕд ныр кусгӕ къаддӕр кӕны, уӕддӕр исы, раздӕр цас иста, уыйбӕрц! Эмилийӕ зӕгъы: «Мӕ бӕллиц сӕххӕст – ногӕй та мӕ бон у пионерӕй лӕггад кӕнын!»

Ды та ууыл никуы хъуыды кодтай, цӕмӕй дӕ хъуыддӕгтӕ афтӕ спълан кӕнай, ӕмӕ дӕ бон уа пионерӕй лӕггад кӕнын йе та кӕд раздӕр пионерӕй лӕггад кодтай, уӕд та ногӕй райдайын?

[Хицӕнгонд текст 32 фарсыл]

Директор ын загъта: «Ӕз тынг аргъ кӕнын, йӕ рӕстӕг иннӕты тыххӕй чи не ’вгъау кӕны, ахӕм адӕймӕгтӕн»