1, 2. Ацы статьяйӕ конгрессты тыххӕй цы базондзыстӕм?

ЙЕГЪОВӔЙЫ ӔВДИСӔНТӔ бирӕ азты дӕргъы иумӕ ӕрӕмбырд вӕййынц ӕхсӕнадӕмон ӕмӕ облӕстон конгрессты. Бирӕтӕ зӕгъдзысты, ахӕм конгрессты иу ӕмӕ дыууӕ хатты кӕй нӕ уыдысты ӕмӕ-иу сын уый стыр циндзинад кӕй ӕрхаста.

² Хуыцауы адӕмӕн-иу ахӕм стыр ӕмбырдтӕ уыди цалдӕр мин азы размӕ дӕр. Ацы статьяйӕ базондзыстӕм, Хуыцауы адӕмӕн рагзаманты цы стыр ӕмбырдтӕ уыди, уыдоны тыххӕй ӕмӕ, абон махӕн цы конгресстӕ вӕййы, уыдонимӕ ӕмхуызон цӕмӕй сты, уый тыххӕй дӕр. Стӕй ма аныхас кӕндзыстӕм, конгресстӕ нын цы пайда хӕссынц, ууыл дӕр (Пс. 44:1; Ром. 15:4).

3. а) Йегъовӕйы адӕмӕн фыццаг хатт стыр ӕмбырд куы уыд, уӕд цавӕр хабар ӕрцыд? ӕ) Израилӕгтӕ-иу куыд базыдтой, иу ранмӕ-иу кӕй хъуамӕ ӕрӕмбырд уыдаиккой, уый?

³ Библийы куыд фыст ис, афтӕмӕй Хуыцауы адӕмӕн фыццаг стыр ӕмбырд уыди Синайы хохрӕбын. Уыдон уым уый тыххӕй ӕрӕмбырд сты, цӕмӕй сын Йегъовӕ зонд бацамыдтаид. Уый уыди тынг ахсджиаг хабар. Уӕд Йегъовӕ израилӕгты раз равдыста йе стыр тых ӕмӕ сын йӕ Закъон радта. Уым чидӕриддӕр уыди, уыдонӕй уыцы хабар хъуамӕ макуы ферох уыдаид (Рац. 19:2–9, 16–19; бакӕс Рацыд 20:18; Дыккаг закъон 4:9, 10). Уыцы бон израилӕгтӕ систы Хуыцауы ӕвзӕрст адӕм. Цасдӕры фӕстӕ Йегъовӕ Моисейӕн бацамыдта, йӕ адӕмы-иу ын куыд хъуамӕ ӕрӕмбырд кодтаид, уый. Загъта йын, цӕмӕй дыууӕ ӕвзист уадындзы скодтаид. Уыцы уадындзтӕй-иу куы ныууасыдаиккой, уӕд-иу адӕм иууылдӕр хъуамӕ «ӕмбырды цатыры бахизӕны размӕ» ӕрӕмбырд уыдаиккой (Ным. 10:1–4). Ахъуыды-ма кӕн, уыцы ӕмбырдты-иу адӕм куыд цин кодтаиккой!

4, 5. Моисей ӕмӕ Йесо Навин цы стыр ӕмбырдтӕ скодтой, уыдон уӕлдай ахсджиаг цӕмӕн уыдысты?

⁴ Израилӕгтӕ ӕдзӕрӕг быдыры 40 азы куы фесты, уӕд  та Моисей скодта стыр ӕмбырд. Израилы адӕмӕн уый тынг ахсджиаг рӕстӕг уыди – тагъд хъуамӕ Зӕрдӕвӕрд зӕхмӕ бацыдаиккой. Ӕмӕ раст уыцы рӕстӕг Моисейы хъуыди йе ’фсымӕртӕн сӕ зӕрдыл ӕрлӕууын кӕнын, Йегъовӕ сын уӕды онг кӕй сарӕзта ӕмӕ ма сын ноджыдӕр кӕй сараздзӕн, уыцы хорздзинӕдтӕ (Дык. з. 29:1–15; 30:15–20; 31:30).

⁵ Моисей адӕмӕн, ӕвӕццӕгӕн, уыцы стыр ӕмбырды бамбарын кодта, ахӕм ӕмбырдтӕ-иу сын кӕй уыдзӕн алы ӕвдӕм аз дӕр Халагъудты бӕрӕгбоны рӕстӕг. Бафӕдзӕхста сын, зӕгъгӕ, Йегъовӕ кӕй равзара, уыцы бынатмӕ-иу ӕрӕмбырд кӕнут нӕлгоймӕгты, сылгоймӕгты, сывӕллӕтты ӕмӕ, уӕ горӕтты чи цӕры, уыцы ӕрцӕуӕггӕгты дӕр, цӕмӕй хъусой ӕмӕ ахуыр кӕной ӕмӕ тӕрсой уӕ Хуыцау Йегъовӕйӕ ӕмӕ, закъоны цыдӕриддӕр фыст ис, уый ӕххӕст кӕной. (Бакӕс Дыккаг закъон 31:1, 10–12.) Афтӕмӕй израилӕгтӕ бамбӕрстой, Йегъовӕйы кӕй фӕндыд, цӕмӕй-иу арӕх ӕрӕмбырд уыдаиккой ӕмӕ-иу ын йӕ фӕдзӕхстытӕ сӕ зӕрдыл ӕрлӕууын кодтаиккой ӕмӕ йын йӕ фӕндон хуыздӕр бамбӕрстаиккой. Израилӕгтӕ Зӕрдӕвӕрд зӕхх ӕнӕхъӕнӕй куы бацахстой, уӕд дӕр сӕ алыварс царди мӕнгхуыцӕуттӕн кувӕг адӕм. Уымӕ гӕсгӕ Йесо Навин Израилы адӕмы се ’ппӕты дӕр ӕрӕмбырд кодта, цӕмӕй сын сӕ ныфсыл ныфс бафтыдтаид, ӕмӕ дарддӕр дӕр Йегъовӕйыл иузӕрдион уыдаиккой. Ӕмӕ уыцы бон адӕм фидарӕй дзырд радтой, Хуыцауӕн кӕй лӕггад кӕндзысты (Йес. Н. 23:1, 2; 24:1, 15, 21–24).

6, 7. Нӕ рӕстӕджы Йегъовӕйы адӕмӕн сӕ лӕггадыл тынг цавӕр конгресстӕ фӕзындысты?

⁶ Йегъовӕйы адӕмӕн нӕ рӕстӕджы дӕр вӕййы, сӕ лӕггадыл тынг чи фӕзыны, ахӕм стыр ӕмбырдтӕ – конгресстӕ. Уыцы конгрессты фехъусын кӕнынц, организацийы цы ивындзинӕдтӕ ӕрцӕуы, уый тыххӕй. Стӕй дзы Библийӕ кӕцыдӕр стихтӕ раздӕр куыд ӕмбарын кодтой, афтӕ нӕ, фӕлӕ ӕндӕрхуызон бамбарын кӕнынц (Ӕмб. 4:18). Библииртасджытӕн фыццаг хатт ахӕм стыр конгресс уыди 1919 азы, Фыццаг дунеон хӕсты фӕстӕ. Уый уыди Сидар-Пойнты (штат Огайо, АИШ) ӕмӕ дзы уыди 7 000 адӕймаджы бӕрц. Уыцы конгрессы дзырд цыди, Хуыцауы адӕмы сӕ хъарутӕ иууылдӕр уымӕ саразын кӕй хъӕуы, цӕмӕй хорз хабар ӕгас дунейы дӕр хъуыстгонд ӕрцӕуа. 1922 азы ма уыцы ран уыди ноджыдӕр иу конгресс, ахаста фараст боны. Уым Джозеф Рутерфорд йӕ раныхасӕй ӕфсымӕртӕ ӕмӕ хоты ног хъарутӕ бауагъта. Разӕнгард сӕ кодта: «Хуыцауӕн ут иузӕрдион ӕмӕ ӕцӕг ӕвдисӕнтӕ. Тохы быдыры дарддӕр дӕр размӕ бырсут, цалынмӕ Вавилон бынтондӕр сӕфт не ’рцӕуа, уӕдмӕ. Хорз хабар хӕссут алы рӕттӕм. Зӕххы цъарыл алчидӕр хъуамӕ зона, Йегъовӕ кӕй у Хуыцау ӕмӕ Йесо Чырысти кӕй у паддзӕхты Паддзах ӕмӕ хицӕутты Хицау. Абон у ӕппӕты стырдӕр бон. Паддзах паддзахиуӕг кӕны! Сымах стут йӕ минӕвӕрттӕ. Уӕдӕ хъусын кӕнут, хъусын кӕнут, хъусын кӕнут Паддзах ӕмӕ йӕ паддзахады тыххӕй». Конгрессы чи уыди, уыдон се ’ппӕт дӕр, ӕмӕ Хуыцауы адӕм ӕгас дунейы дӕр, уыцы ныхӕстӕ сӕ зӕрдӕмӕ айстой ӕмӕ хъусын кӕныны хъуыддагмӕ ноджы зӕрдиагдӕрӕй бавнӕлдтой.

⁷ 1931 азы Колумбусы (штат Огайо) конгрессы Библииртасджытӕ цингӕнгӕйӕ сразы сты сӕ ног номыл – Йегъовӕйы Ӕвдисӕнтӕ. 1935 азы та Вашингтоны конгрессы ӕфсымӕр Рутерфорд бамбарын кодта, Раргомады чиныджы кӕй кой цӕуы, паддзахбадӕны ӕмӕ Уӕрыччы раз лӕууынц, зӕгъгӕ, уыцы «тынг бирӕ адӕм» чи сты (Рарг. 7:9–17). 1942 азы, Дыккаг дунеон хӕст куы цыди, уыцы рӕстӕг, Нейтан Норрӕн конгрессы уыди тынг цымыдисаг раныхас, «Цымӕ сабырдзинад бирӕ ахӕсдзӕн?», зӕгъгӕ. Норр бамбарын кодта, Раргомады чиныджы 17 сӕры цы «сырх-сырхид сырды» кой цӕуы, уый цӕмӕ амоны, уый ӕмӕ стӕй загъта, хӕсты фӕстӕ сӕм хъусын кӕныны хъуыддаджы нырма бирӕ куыст кӕй ӕнхъӕлмӕ кӕсы.

8, 9. Хуыцауы адӕмӕн иуӕй-иу конгресстӕ уӕлдай цины хос цӕмӕн уыдысты?

⁸ 1946 азы Кливленды (штат Огайо) цы конгресс уыди, уый хуынд «Адӕмтӕ, цин кӕнут!». Ӕфсымӕр Норрӕн дзы уыди диссаджы раныхас, «Хъӕуы стырдӕр бӕстыхӕйттӕ ӕмӕ фылдӕр бынӕттӕ», зӕгъгӕ. Норры раныхасмӕ хъусгӕйӕ адӕм куыд цин кодтой, уый тыххӕй иу ӕфсымӕр ныффыста: «Ахӕм  кад мӕм ӕрхауд, ӕмӕ уыцы изӕр сценӕйыл йӕ фӕстӕ лӕууыдтӕн. Ӕмӕ хъусын кӕныны хъуыддаджы нырма цас хъӕуы саразын, уый куы ӕмбарын кодта, стӕй Бруклины Вефил ӕмӕ типографи фестырдӕр кӕнын кӕй пълан кӕнынц, уый тыххӕй куы дзырдта, уӕд адӕм сӕ къухӕмдзӕгъдӕй нал ӕнцадысты. Кӕд мӕм сценӕйӕ сӕ цӕсгӕмттӕ дзӕбӕх нӕ зындысты, уӕддӕр бӕрӕг уыд, сӕ цинӕн кӕрон кӕй нӕ уыди». 1950 азы Нью-Йорчы ӕхсӕнадӕмон конгрессы хотӕ ӕмӕ ӕфсымӕртӕ райстой «Чырыстон Грекъаг Фыстытӕ – Ног дунейы тӕлмац». Фӕстӕдӕр нырыккон англисаг ӕвзагыл рацыд «Библи – Ног Дунейы тӕлмац» ӕнӕхъӕнӕй. Ацы тӕлмацы Хуыцауы ном фӕстӕмӕ фыст ӕрцыд, кӕмдӕриддӕр хъуамӕ уа, уым (Йер. 16:21).

⁹ Конгресстӕ-иу скодтой, Йегъовӕйы Ӕвдисӕнты бирӕ азты дӕргъы кӕм ӕфхӕрдтой кӕнӕ сӕ хъусын кӕнын кӕм нӕ уагътой, ахӕм бӕстӕты дӕр. Уыцы конгрессты-иу чи уыд, уыдон-иу фырцинӕй зӕххыл дӕр нал хӕцыдысты. Зӕгъӕм, кӕддӕр Гитлер расомы кодта, ӕз, дам, Германийы Йегъовӕйы Ӕвдисӕнтӕй иу дӕр нал ныууадздзынӕн. Фӕлӕ 1955 азы Йегъовӕйы Ӕвдисӕнтӕ конгресмӕ ӕрӕмбырд сты Нюрнбергы, Гитлер-иу парадтӕ кӕм скодта, раст уыцы ран. Уыди дзы 107 000 адӕймаджы ӕмӕ бирӕтӕ фырцинӕй сӕ цӕссыг нӕ урӕдтой. 1989 азы Польшӕйы ӕртӕ раны уыди конгресстӕ, «Хуыцауыл иузӕрдион ут», зӕгъгӕ. Уыцы конгрессты уыди 166 518 адӕймаджы. Бирӕтӕ дзы уыдысты раздӕры Советон Цӕдисӕй ӕмӕ Чехословакийӕ, стӕй Скӕсӕн Европӕйы иннӕ бӕстӕтӕй дӕр. Иуӕй-иутӕ сӕ ахӕм стыр ӕмбырды фыццаг хатт уыдысты, уымӕн ӕмӕ-иу раздӕр ӕмбырд кодтой гыццыл къордтӕй, 15 кӕнӕ 20 адӕймагӕй. 1993 азы Украинӕйы Киевы цы ӕхсӕнадӕмон конгресс уыди, уый та хуынди «Хуыцау ахуыр кӕны йӕ адӕмы». Уым донаргъуыд райстой 7 402 адӕймаджы – Йегъовӕйы Ӕвдисӕнтӕ иу бонмӕ уыйбӕрцӕй донаргъуыд никуыма райстой (Ис. 60:22; Аг. 2:7).

10. Тынгдӕр кӕцы конгресстӕ бахъуыды кодтай ӕмӕ цӕмӕн?

¹⁰ Ӕвӕццӕгӕн, ды дӕр кӕцыдӕр облӕстон кӕнӕ ӕхсӕнадӕмон конгресстӕ тынгдӕр бахъуыды кодтай. Хъуыды кӕныс, фыццаг хатт цы конгрессы уыдтӕ кӕнӕ донаргъуыд цы конгрессы райстай, уый? Уыцы конгресстӕ дӕ цардыл тынг фӕзындысты, ӕмӕ сӕ макуы ферох кӕн. Уыдон зынаргъ хӕзнайӕ уӕлдай не сты! (Пс. 42:4).

11. Хуыцауы фӕдзӕхстмӕ гӕсгӕ израилӕгтӕ алы аз дӕр цавӕр бӕрӕгбӕттӕм хъуамӕ цыдаиккой?

¹¹ Йегъовӕ израилӕгтӕн бафӕдзӕхста, цӕмӕй-иу алы аз дӕр ӕртӕ бӕрӕгбонмӕ Иерусалимы ӕрӕмбырд уыдаиккой. Уыцы бӕрӕгбӕттӕ уыдысты Донгонд дзулты бӕрӕгбон, Къуыриты бӕрӕгбон (фӕстӕдӕр ӕй хуыдтой Фӕндзайӕм бон) ӕмӕ Халагъудты бӕрӕгбон. Хуыцау израилӕгтӕн загъта: «Афӕдз-иу ӕртӕ хатты уӕ нӕлгоймӕгтӕ иууылдӕр ӕрбацӕуӕнт ӕцӕг Хицау Йегъовӕйы размӕ» (Дык. з. 16:16; Рац. 23:14–17). Бинонты хистӕртӕй бирӕтӕ ӕмбӕрстой, уыцы бӕрӕгбӕтты адӕймаджы уырнындзинад тынг кӕй бафидар вӕййы, ӕмӕ-иу сӕ бинонты дӕр семӕ акодтой (1 Сам. 1:1–7; Лук. 2:41, 42).

12, 13. Израилаг бинонтӕн алы аз дӕр Иерусалиммӕ бӕрӕгбӕттӕм цӕуын ӕнцон цӕуылнӕ уыди?

¹² Кӕй зӕгъын ӕй хъӕуы, израилаг бинонтӕн-иу ахӕм балцы ацӕуын ӕнцон нӕ уыди,  бирӕ цыдӕртӕ-иу сӕ хъуыди саразын. Зӕгъӕм, Иосиф ӕмӕ Марийӕйы Назаретӕй Иерусалиммӕ цӕуын хъуыди 100 километры бӕрц. Ахӕм балцы ды гыццыл сывӕллӕттимӕ куы цыдаис, уӕд дӕ цал боны бахъуыдаид цӕуын? Йесо йӕ ныййарджытимӕ Иерусалиммӕ куы ’рцыд, уыцы хабарӕй зыны, хатт-иу хиуӕттӕ ӕмӕ ӕмбӕлттӕ уыцы дард балцы къордтӕй кӕй цыдысты. Дӕ цӕстытыл-ма ауайын кӕн, иумӕ куыд цыдысты, иумӕ-иу хӕринаг куыд скодтой ӕмӕ-иу ӕнӕзонгӕ ран, ӕхсӕв кӕм бафынӕй кодтаиккой, ахӕм бынат куыд ссардтой. Куыд зыны, афтӕмӕй-иу ахӕм балцыты рӕстӕг тӕссаг ницӕмӕй уыди – кӕд Йесойыл 12 азы йеддӕмӕ нӕ цыд, уӕддӕр ын йӕ ныййарджытӕ бар радтой, цӕмӕй иннӕ бӕлццӕттимӕ цыдаид. Уыцы бӕрӕгбӕттӕм-иу чи ӕрцыд, уыдонӕй, ӕвӕццӕгӕн, никуы ферох сты, уӕлдайдӕр та кӕстӕртӕй! (Лук. 2:44–46).

¹³ Дзуттӕгтӕ дунейы алы рӕтты куы ныппырхытӕ сты, уый фӕстӕ-иу уыцы бӕрӕгбӕттӕм цы адӕм ӕрцыд, уыдон уыдысты бирӕ бӕстӕтӕй. Н. э. 33 азы Фӕндзайӕм боны дзуттӕгтӕ ӕмӕ, дзуттаг дин чи райста, уыдон Иерусалиммӕ ӕрцыдысты Италийӕ, Ливийӕ, Критӕй, Къаннӕг Азийӕ, Месопотамийӕ ӕмӕ бирӕ ӕндӕр бӕстӕтӕй ӕмӕ афтӕмӕй равдыстой, уыцы бӕрӕгбӕттӕн тынг кӕй аргъ кодтой (Хъуыд. 2:5–11; 20:16).

14. Израилӕгтӕ алы аз дӕр бӕрӕгбӕттӕм кӕй цыдысты, уый сын цы пайда хаста?

¹⁴ Иузӕрдион дзуттӕгтӕ-иу ахӕм дард балцы сӕйраджыдӕр уый тыххӕй ацыдысты, ӕмӕ сӕ тынг фӕндыд Йегъовӕйӕн йӕ иннӕ иузӕрдион лӕггадгӕнджытимӕ, мингай адӕмимӕ, иумӕ кувын. Уыцы бӕрӕгбӕттӕ сын цы пайда хастой? Дзуапп базонӕн ис, Йегъовӕ йӕ адӕмӕн, Халагъудты бӕрӕгбоны кой кӕнгӕйӕ, цы ныхӕстӕ загъта, уыдонӕй: «Бӕрӕгбоны рӕстӕг цин кӕн: дӕхӕдӕг дӕр, дӕ фырт дӕр, дӕ чызг дӕр, дӕ цагъар-нӕлгоймаг дӕр ӕмӕ дӕ цагъар-сылгоймаг дӕр, стӕй, дӕ горӕты чи цӕры, уыцы левит, ӕрцӕуӕггаг, сидзӕр ӕмӕ идӕдз дӕр. Йегъовӕ кӕй равзара, уыцы бынаты авд боны бӕрӕг кӕндзынӕ ацы бӕрӕгбон дӕ Хуыцау Йегъовӕйы номыл, уымӕн ӕмӕ дын дӕ Хуыцау Йегъовӕ дӕтдзӕн тыллӕджы бӕркад ӕмӕ арфӕ кӕндзӕн, цыдӕриддӕр аразай, уымӕн. Ӕмӕ-иу цин кӕн» (Дык. з. 16:14, 15; бакӕс Матфейы 5:3).

15, 16. Цӕмӕй конгресстӕм цӕуай, уый тыххӕй дӕ дӕхи цӕмӕйты бахъӕуы фӕцух кӕнын? Ӕмӕ уымӕ цӕттӕ цӕмӕн вӕййыс?

¹⁵ Уыцы рагон бӕрӕгбӕттӕй Хуыцауы адӕм абон бирӕ цӕуылдӕрты ахуыр кӕнынц. Кӕд уӕдӕй абоны онг бирӕ цыдӕртӕ фӕивта, уӕддӕр абон дӕр конгресстӕ стыр пайда сты Хуыцауы адӕмӕн. Хуыцауы рагон лӕггадгӕнджытау махӕн дӕр конгресмӕ ацӕуын алы хатт ӕнцон нӕ вӕййы, нӕхи нӕ бирӕ цӕмӕйдӕрты бахъӕуы фӕцух кӕнын. Фӕлӕ мах алкӕддӕр уымӕ цӕттӕ вӕййӕм, уымӕн ӕмӕ нын конгресстӕ стыр ӕххуыс сты Хуыцауӕн лӕггад кӕнынӕн. Уым цы фехъусӕм, уый фӕрцы ноджы хуыздӕр бамбарӕм, цы нӕ хъӕуы аразын, цӕмӕй дарддӕр дӕр Хуыцауы хӕлӕрттӕ уӕм. Конгрессты фӕрцы нӕ ноджы тынгдӕр бафӕнды, Библийӕ цы базонӕм, уымӕ гӕсгӕ нӕ цард аразын ӕмӕ нын баххуыс кӕнынц нӕхи рӕдыд къахдзӕфтӕй бахизынӕн. Стӕй ма нӕ конгресстӕ баразӕнгард кӕнынц, цӕмӕй-иу нӕ хъарутӕ, ӕцӕг циндзинад чи хӕссы, уыцы хъуыддӕгтӕм саразӕм ӕмӕ нӕхиуыл уӕлдай уӕргътӕ ма ӕвӕрӕм (Пс. 122:1–4).

¹⁶ Алы конгресс дӕр стыр циндзинад ӕрхӕссы, чи дзы вӕййы, уыдонӕн. 1946 азы Кливленды цы стыр конгресс уыди, уый тыххӕй ӕфсымӕртӕ ныффыстой: «Дуне хотӕ ӕмӕ ӕфсымӕртӕ, бирӕ минтӕ, иу ран куыд ӕрӕмбырд сты ӕмӕ кӕрӕдзийыл куыд цин кодтой, уымӕ кӕсын диссаг уыди. Уӕлдай ӕхсызгондӕр та уыди, стыр оркестры цагъдмӕ иууылдӕр иумӕ Йегъовӕйы кадӕн рӕсугъд зарджытӕ куыд зарыдысты, уымӕ хъусын». Стӕй ма ноджыдӕр ныффыстой: «Ӕххуысгӕнджыты хайадмӕ бирӕтӕ бацыдысты, цӕмӕй конгрессы рӕстӕджы алыхуызон куыстытӕ кодтаиккой. Тынг ӕхсызгон сын уыди сӕ хотӕ ӕмӕ се ’фсымӕртӕн лӕггад кӕнын». Дӕуӕн дӕр облӕстон конгресстӕ кӕнӕ ӕхсӕнадӕмон конгресстӕ ахӕм циндзинад ӕрхӕссынц? (Пс. 110:3; Ис. 42:10–12).

17. Конгресстӕ куыд фӕцӕуынц, уыцы хъуыддаджы цы фӕивта?

 ¹⁷ Конгресстӕ куыд фӕцӕуынц, уыцы хъуыддаджы цыдӕртӕ фӕивта. Зӕгъӕм, Хуыцауы адӕмӕй чидӕртӕ хъуыды кӕнынц, конгресстӕ-иу аст боны куы уыдысты, уыцы рӕстӕг. Алы бон дӕр-иу программӕ уыди ӕртӕ хайӕ: райсомӕй, фӕссихор ӕмӕ изӕрӕй. Алы конгрессы дӕр-иу бӕлвырд рӕстӕг рахицӕн кодтой хъусын кӕнынӕн. Хатт-иу конгресс цыди райсомы фараст сахатӕй изӕры фараст сахатмӕ. Ӕфсымӕртӕ ӕмӕ-иу хотӕй бирӕтӕ ӕнӕхъӕн бон фӕфыдӕбон кодтой ӕмӕ-иу ӕртӕ хатты алкӕй фаг дӕр хӕринаг скодтой. Абон конгресстӕ афтӕ бирӕ нал фӕцӕуынц. Стӕй хӕринаг дӕр алчи йемӕ ӕрбахӕссы, ӕмӕ уый фӕрцы ӕфсымӕртӕ ӕмӕ хотӕн сӕ бон вӕййы сӕ зӕрдӕтӕ ӕмӕ сӕ зонд ӕнӕхъӕнӕй дӕр, дзырд дзы цӕуыл фӕцӕуы, уымӕ саразын.

18, 19. Конгрессты программӕйӕ дӕ зӕрдӕмӕ тынгдӕр цы цӕуы ӕмӕ цӕмӕн?

¹⁸ Рагӕй фӕстӕмӕ дӕр конгрессты программӕйы кӕцыдӕр хӕйттӕм Хуыцауы адӕм уӕлдай зӕрдиагдӕрӕй фенхъӕлмӕ кӕсынц. Зӕгъӕм, конгрессты райсӕм «хӕринаг афоныл». Цы ног публикацитӕ дзы райсӕм ӕмӕ дзы цы раныхӕстӕ фехъусӕм, уыдоны фӕрцы хуыздӕр бамбарӕм Библийы пехуымпарӕдтӕ ӕмӕ ахуырӕдтӕ (Матф. 24:45). Уыцы ног публикацитӕй нын бирӕтӕ стыр ӕххуыс вӕййынц адӕмӕн Библи хуыздӕр ӕмбарын кӕнынӕн. Стӕй Библийыл арӕзт драмӕтӕм кӕсгӕйӕ, кӕстӕртӕ дӕр ӕмӕ хистӕртӕ дӕр ахъуыды кӕнынц, Йегъовӕйӕн цы зӕрдӕйӕ лӕггад кӕнынц, ууыл ӕмӕ сын уыцы драмӕтӕ баххуыс кӕнынц сӕхи ацы дунейы зондӕй бахизынӕн. Донаргъуыды фӕдыл цы раныхас вӕййы, уый фӕрцы та нӕ алчидӕр лӕмбынӕг ахъуыды кӕны, царды йын ӕппӕты сӕйрагдӕр цы у, ууыл. Уымӕй уӕлдай ма, йӕ цард Йегъовӕйӕн чи снывонд кодта, уыдон донаргъуыд куы фӕисынц, уӕд тынг фӕцин кӕнӕм.

¹⁹ Хуыцауы адӕмӕн конгресстӕ алкӕддӕр тынг ахсджиаг уыдысты. Конгресстӕ нын стыр ӕххуыс сты, цӕмӕй зын рӕстӕджыты дӕр Йегъовӕйӕн зӕрдӕрайгӕйӕ ӕмӕ иузӕрдионӕй лӕггад кӕнӕм. Стӕй нӕ баразӕнгард кӕнынц, цӕмӕй Хуыцауы хъуыддаджы ноджы фылдӕр аразӕм. Уымӕй уӕлдай ма нын конгрессты ног ӕмбӕлттӕ дӕр фӕзыны ӕмӕ ноджы хуыздӕр бамбарӕм, Йегъовӕйӕн ӕгас дунейы дӕр цы лӕггадгӕнджытӕ ис, уыдон иу бинонтӕй уӕлдай кӕй не сты. Йегъовӕ ныл куыд тыхсы ӕмӕ нын куыд арфӕ кӕны, уый уӕлдай тынгдӕр нӕхиуыл конгрессты бавзарӕм. Уӕдӕ нӕ алчидӕр ӕппӕт хъарутӕй архайӕд, цӕмӕй иу конгресс дӕр ӕмӕ программӕйы иу хай дӕр ма фӕцух кӕна (Ӕмб. 10:22).