1. Кӕмӕн хъусын кӕнӕм, уыдонмӕ хӕлар зӕрдӕ дарын ахсджиаг кӕй у, уымӕн цӕвиттон ӕрхӕсс. (Кӕс нывмӕ ацы фарсыл.)

ЦАЛДӔР азы размӕ Фиджийы иу бинонтӕ, нӕ хо ӕмӕ не ’фсымӕр, зиуы рӕстӕг адӕмы хуыдтой Чырыстийы мӕлӕт Ӕрымысӕн изӕрмӕ. Ӕмӕ иу сылгоймагимӕ йӕ хӕдзары раз куы ныхас кодтой, уӕд къӕвда уарын райдыдта. Ӕфсымӕр ӕм зонтик авӕрдта, йӕхӕдӕг ӕмӕ йӕ бинойнаг та иу зонтикы бын слӕууыдысты. Уый фӕстӕ уыцы сылгоймаг Ӕрымысӕн изӕрмӕ ӕрбацыд, ӕмӕ нӕ хо ӕмӕ не ’фсымӕрӕн уый тынг ӕхсызгон уыд. Сылгоймаг загъта, сӕ ныхӕстӕй сын бирӕ кӕй ницы бахъуыды кодта. Фӕлӕ йыл кӕй батыхстысты, уый йын йӕ зӕрдӕ афтӕ бацагайдта, ӕмӕ йӕхицӕн загъта, ӕнӕацӕугӕ мын нӕй, зӕгъгӕ. Хабар афтӕ цӕй фӕрцы рауад? Уыцы бинонтӕ архайдтой, иннӕтӕн куыд хъуамӕ уӕм, уый фӕдыл Чырысти цы уынаффӕ радта, уымӕ гӕсгӕ.

2. Чырысти цавӕр уынаффӕ радта ӕмӕ нӕ бон куыд у уымӕ гӕсгӕ архайын?

² Цавӕр уынаффӕ радта Чырысти? Уый загъта: «Алы хъуыддаджы дӕр [уӕ] куыд фӕнды, цӕмӕй уын адӕм уой, афтӕ сын ут уӕхӕдӕг дӕр» (Матф. 7:12). Нӕ бон куыд у ацы уынаффӕмӕ гӕсгӕ архайын? Фыццаг уый, ӕмӕ-иу хъуамӕ нӕхи иннӕ  адӕймаджы бынаты сӕвӕрӕм ӕмӕ-иу нӕхимӕ ахӕм фарста раттӕм: «Мӕн та куыд фӕндид, цӕмӕй мын иннӕтӕ уой?» Дыккаг та уый, ӕмӕ-иу хъуамӕ бацархайӕм, ацы фарстайӕн цы дзуапп раттӕм, уымӕ гӕсгӕ – адӕймагӕн хуыздӕр куыд уа, афтӕ-иу бакӕнӕм (1 Кор. 10:24).

3, 4. а) Чырыстийы уынаффӕ, не ’мчырыстӕттимӕ куыд хъуамӕ уӕм, ӕрмӕстдӕр уымӕ хауы? Бамбарын ӕй кӕн. ӕ) Ацы статьяйы цӕуыл аныхас кӕндзыстӕм?

³ Цымӕ Чырыстийы уынаффӕ, нӕ хотӕ ӕмӕ не ’фсымӕртимӕ куыд хъуамӕ уӕм, ӕрмӕстдӕр уымӕ хауы? Нӕ, Йесо кодта, адӕмӕн се ’ппӕтӕн дӕр, суанг не знӕгтӕн дӕр, куыд хъуамӕ уӕм, уый кой. (Бакӕс Лукайы 6:27, 28, 31, 35.) Уӕдӕ ахсджиаг у, цӕмӕй уацамынды дӕр уыцы уынаффӕмӕ гӕсгӕ архайӕм, уымӕн ӕмӕ, кӕмӕн хъусын кӕнӕм, уыдонӕй, чи зоны, бирӕты фӕнды «ӕнусон царды фӕндагыл цӕуын» (Хъуыд. 13:48).

⁴ Ныртӕккӕ аныхас кӕндзыстӕм, хъусын кӕнгӕйӕ нӕ зӕрдыл кӕй хъуамӕ дарӕм, цыппар ахӕм фарстайыл: «Кӕимӕ ныхас кӕнӕм, уыдон чи сты? Кӕм ныхас кӕнӕм семӕ? Кӕд уыдзӕн хуыздӕр семӕ аныхас кӕнын? Куыд хъуамӕ ныхас кӕнӕм семӕ?» Дарддӕр куыд базондзыстӕм, афтӕмӕй нын ацы фарстатӕ баххуыс кӕндзысты, цӕмӕй-иу, кӕмӕн хъусын кӕнӕм, уыдоны бынаты нӕхи сӕвӕрӕм ӕмӕ-иу, уыдонӕн хуыздӕр куыд уа, ууыл бацархайӕм (1 Кор. 9:19–23).

5. Цавӕр фарстатыл у нӕ бон ахъуыды кӕнын?

⁵ Зӕххыл дыууӕ ӕмхуызон адӕймаджы нӕй. Ӕмӕ уацамынды дӕр фӕныхас кӕнӕм алыхуызон адӕймӕгтимӕ. Уыдон схъомыл сты ӕндӕр ӕмӕ ӕндӕр уавӕрты, стӕй сӕ алкӕмӕн дӕр ис йӕхи зындзинӕдтӕ (2 Аз. 6:29). Цалынмӕ искӕимӕ ныхас кӕнын нӕ райдайай, уӕдмӕ уал-иу ахъуыды кӕн: «Ныр уый мӕ бынаты куы уаид, ӕз та уый бынаты, уӕд мӕ нӕ фӕндид, цӕмӕй мӕм хорз зӕрдӕ дара? Нӕма мӕ зоны, афтӕмӕй мӕм ӕвзӕр цӕстӕй куы ракӕсид, уӕд мын уый ӕхсызгон уаид? Нӕ мӕ фӕндид, цӕмӕй уал мӕ хуыздӕр базона?» Ахӕм фарстатыл-иу куы ахъуыды кӕнӕм, уӕд нӕ рох кӕндзыстӕм, алы адӕймагӕн дӕр кӕй хъуамӕ аргъ кӕнӕм.

6, 7. Уацамынды мӕстджын адӕймагыл куы сӕмбӕлӕм, уӕд куыд хъуамӕ архайӕм?

⁶ Чырыстӕттӕ кӕй стӕм, уымӕ гӕсгӕ хъуамӕ ууыл архайӕм, цӕмӕй «нӕ дзыхыныхас алкӕддӕр уа фӕлмӕн» (Кол. 4:6). Фӕлӕ, ӕнӕххӕст кӕй стӕм, уый тыххӕй иуӕй-иу хатт фӕзӕгъӕм, фӕстӕдӕр фӕсмон кӕуыл фӕкӕнӕм, ахӕм ныхӕстӕ (Иак. 3:2). Ӕмӕ, зӕгъгӕ, нӕ ныхӕстӕй искӕй фӕхъыг кодтам,– чи зоны, уыцы бон нӕ чемыл кӕй нӕ уыдыстӕм, уый тыххӕй,– уӕд нӕ нӕ фӕндид, цӕмӕй ныл уый тыххӕй «ӕнӕхсӕст адӕймаджы» ном сбада. Ӕвӕццӕгӕн, мах фӕндид, цӕмӕй уыцы адӕймаг бамбара, нӕ зӕрды искӕй фӕхъыг кӕнын кӕй нӕ уыд. Ӕмӕ-иу уӕд нӕхӕдӕг дӕр иннӕты хъуамӕ ма бамбарӕм?

⁷ Уацамынды мӕстджын адӕймагыл куы сӕмбӕлӕм, уӕд хорз уаид, йӕхи афтӕ цӕмӕн дары, уый бамбарыныл куы бацархаиккам. Чи зоны йын куысты кӕнӕ скъолайы цавӕрдӕр зындзинӕдтӕ ис йе та, чи зоны, цавӕрдӕр низӕй тыхсы. Арӕх афтӕ вӕййы, ӕмӕ адӕймаг Йегъовӕйы Ӕвдисӕнтӕм мӕстыйӕ ракӕсы, фӕлӕ уыдон сӕхи сабыр ӕмӕ уӕздан кӕй фӕдарынц, уый фӕрцы сӕм хуыздӕр байхъусы (Ӕмб. 15:1; 1 Пет. 3:15).

8. «Алыхуызон адӕмӕн дӕр» цӕмӕн хъуамӕ хъусын кӕнӕм?

⁸ Мах хорз хабар хъусын кӕнӕм алы ӕмӕ алыхуызон адӕймӕгтӕн. Фӕстаг цалдӕр азмӕ «Хъахъхъӕнӕн мӕсыджы» рубрикӕйы, «Библи ивы адӕймаджы цард», зӕгъгӕ, фыст ӕрцыд 60 хабарӕй фылдӕр. Уыцы рубрикӕйы цы адӕймӕгты кой цыд, уыдонӕй раздӕр чи давгӕ кодта, чи – фыднозт, чи та – наркотиктӕ, чидӕр та дзы фыдгӕнджыты къорды уыд. Чидӕртӕ сӕ уыдысты политиктӕ кӕнӕ алыхуызон динты разамонджытӕ, кӕмӕндӕр та сӕ царды нысан уый уыд, цӕмӕй сын сӕ куысты бирӕ бантыса. Чидӕртӕ та сӕ раздӕр ӕнӕгъдау цард кодтой. Фӕлӕ се ’ппӕт дӕр  хорз хабар фехъуыстой, Библи ахуыр кӕнын райдыдтой, сӕ цард фӕивтой ӕмӕ Хуыцауӕн лӕггад кӕнын райдыдтой. Уӕдӕ афтӕ хъуамӕ макӕмӕй ахъуыды кӕнӕм, ацы адӕймаг хорз хабармӕ никуы байхъусдзӕн, зӕгъгӕ. (Бакӕс 1 Коринфӕгтӕм 6:9–11.) «Алыхуызон адӕмӕн дӕр» сӕ бон у хорз хабар сӕ зӕрдӕмӕ айсын (1 Кор. 9:22).

9. Искӕй хӕдзармӕ куы ’рбацӕуӕм, уӕд нӕхи куыд хъуамӕ дарӕм ӕмӕ цӕмӕн?

⁹ Адӕмимӕ кӕм фӕныхас кӕнӕм? Арӕхдӕр сӕм ӕрбацӕуӕм хӕдзармӕ (Матф. 10:11–13). Махӕй алкӕй дӕр фӕнды, цӕмӕй йын йӕ хӕдзар уа, кӕм ӕй ничи хъыгдардзӕн ӕмӕ йын ӕдас кӕм уыдзӕн, ахӕм бынат. Ӕмӕ нӕм чи ӕрбацӕуы, уый нӕ хӕдзары йӕхи уӕздан куы фӕдары, уӕд нын ӕхсызгон вӕййы. Уӕдӕ хӕдзарӕй-хӕдзармӕ куы фӕхъусын кӕнӕм, уӕд нӕхӕдӕг дӕр искӕй хӕдзары хъуамӕ нӕхи уӕздан дарӕм (Хъуыд. 5:42).

10. Цӕмӕй уацамынды адӕмы мацӕмӕй стыхсын кӕнӕм, уый тыххӕй нӕхи куыд хъуамӕ дарӕм?

¹⁰ Абон дуне фыддзинадӕй йедзаг у, ӕмӕ уый тыххӕй бирӕтӕ, кӕй нӕ зонынц, уыдоныл не ’ууӕндынц (2 Тим. 3:1–5). Уымӕ гӕсгӕ хъуамӕ нӕхи афтӕ дарӕм, цӕмӕй ныл адӕм ӕнӕууӕнк ма кӕной. Зӕгъӕм, хӕдзарӕй-хӕдзармӕ хъусын кӕнгӕйӕ дуар бахостам, фӕлӕ нӕм ничи ракаст. Цымӕ уӕд хъуамӕ хӕдзары рудзгуытӕм кӕнӕ заборы хуынчъыты кӕсӕм, мыййаг, хӕдзары хицау уым искуы ис, зӕгъгӕ? Цымӕ хӕдзары хицауӕн уый йӕ зӕрдӕмӕ фӕцӕудзӕн? Йӕ сыхӕгтӕ та цы ахъуыды кӕндзысты? Кӕй зӕгъын ӕй хъӕуы, махӕн нӕ хӕс у бӕстон хъусын кӕнын (Хъуыд. 10:42). Стӕй адӕмӕн хӕссӕм ӕхсызгон хабар ӕмӕ нӕ ӕрмӕстдӕр сӕ хорз фӕнды (Ром. 1:14, 15). Фӕлӕ хъуамӕ ӕмбаргӕйӕ архайӕм, цӕмӕй-иу нӕ участокы цӕрӕг адӕмы мацӕмӕй стыхсын кӕнӕм. Апостол Павел ныффыста: «Мах къуылымпыйы хос никӕмӕн ницӕмӕй стӕм, цӕмӕй нӕ лӕггадмӕ фау ӕрхӕссӕн ма уа» (2 Кор. 6:3). Уӕдӕ хӕдзарӕй-хӕдзармӕ хъусын кӕнгӕйӕ нӕхи уӕздан куы дарӕм, уӕд кӕйдӕрты, чи зоны, бафӕнда рӕстдзинад базонын. (Бакӕс 1 Петры 2:12.)

11. Иннӕтӕ нын нӕ рӕстӕгӕн куы фӕаргъ кӕнынц, уӕд нын уый ӕхсызгон цӕмӕн вӕййы?

¹¹ Чырыстӕттӕн алы бон дӕр вӕййы бирӕ хъуыддӕгтӕ. Ӕмӕ-иу цӕмӕй алцӕуыл дӕр аххӕссӕм, уый тыххӕй нӕ фӕхъӕуы нӕ рӕстӕг пълан кӕнын (Еф. 5:16; Фил. 1:10). Ӕмӕ истӕй тыххӕй нӕ пълӕнттӕ куы фехӕлынц, уӕд кӕмдӕр мӕсты дӕр равӕййӕм. Уӕдӕ нӕм исчи исты хъуыддаджы фӕдыл куы ’рбацӕуы ӕмӕ нӕ бирӕ рӕстӕг куы нӕ байсы, уӕд нын уый ӕхсызгон вӕййы. Цымӕ нын Чырыстийы уынаффӕ куыд баххуыс кӕндзӕн, цӕмӕй хъусын кӕнгӕйӕ адӕмӕн сӕ рӕстӕгӕн аргъ кӕнын зонӕм?

12. Нӕ бон куыд у сбӕлвырд кӕнын, нӕ участокы цӕрӕг адӕмимӕ хуыздӕр кӕд уыдзӕн аныхас кӕнын?

¹² Хъуамӕ сбӕлвырд кӕнӕм, нӕ участокы цӕрӕг адӕмимӕ хуыздӕр кӕд уыдзӕн аныхас кӕнын. Ахъуыды кӕнӕм ахӕм фарстатыл: «Нӕ участокты адӕм хӕдзары арӕхдӕр цафон вӕййынц? Хуыздӕр нӕм кӕд байхъусдзысты?» Ӕмӕ хорз уаид, нӕ хъусын кӕныны хъуыддаг афтӕ куы пълан кӕниккам, цӕмӕй-иу фылдӕр адӕмимӕ аныхас кӕнӕм. Иуӕй-иу бӕстӕты нӕ хотӕ ӕмӕ не ’фсымӕртӕн фылдӕр бантысы, фӕссихор ӕмӕ изӕрыгӕтты куы фӕхъусын кӕнынц, уӕд. Кӕд уӕ бӕстӕйы дӕр хабар афтӕ у, уӕд дӕ бон нӕ уаид хӕдзарӕй-хӕдзармӕ уыцы афон хъусын кӕнын? (Бакӕс 1 Коринфӕгтӕм 10:24.) Ӕмӕ-иу кӕд уый тыххӕй дӕхи цӕмӕйдӕрты фӕцух кӕнай, уӕддӕр фидарӕй зон, Йегъовӕ дын дӕ фыдӕбонӕн ӕнӕмӕнгдӕр кӕй раарфӕ кӕндзӕн.

13. Цӕмӕй уыдзӕн бӕрӕг, адӕймагӕн йӕ рӕстӕгӕн кӕй аргъ кӕнӕм?

¹³ Цӕмӕй ма уыдзӕн бӕрӕг, адӕймагӕн йӕ  рӕстӕгӕн кӕй аргъ кӕнӕм? Кӕй зӕгъын ӕй хъӕуы, хорз цӕстӕй нӕм чи ракӕса, уыимӕ-иу хъуамӕ бӕстондӕр аныхас кӕнӕм. Фӕлӕ-иу ӕй хъуамӕ ныхӕстыл ма ныддарӕм. Чи зоны, уый уыцы рӕстӕг цавӕрдӕр ахсджиаг хъуыддагӕн рахицӕн кодта. Адӕймаг нын куы зӕгъа, нӕ мӕ ’вдӕлы, зӕгъгӕ, уӕд ын нӕ бон у зӕгъын, бирӕ йӕ кӕй нӕ бафӕстиат кӕндзыстӕм, ӕмӕ-иу хъуамӕ нӕ ныхасӕн хицау разынӕм (Матф. 5:37). Нӕ ныхас куы фӕуӕм, уӕд хорз уаид, адӕймаджы куы бафӕрсиккам, иннӕ хатт ӕм хуыздӕр кӕд уыдзӕн ӕрбацӕуын. Иуӕй-иу хъусынгӕнджытӕ афтӕ фӕзӕгъынц: «Ӕхсызгон мын уаид, ногӕй та куы фембӕликкам. Мӕ бон у, ӕмӕ дӕм ме ’рбацыды размӕ телефонӕй фӕдзурон кӕнӕ дӕм СМС афыссон». Адӕм ӕнӕвдӕлон кӕй сты, уый куы ӕмбарӕм ӕмӕ сын сӕ рӕстӕгӕн куы аргъ кӕнӕм, уӕд афтӕмӕй фӕзмдзыстӕм Павелы – уый «йӕхи пайдайыл нӕ хъуыды кодта, фӕлӕ бирӕты пайдайыл, цӕмӕй фервӕзтаиккой» (1 Кор. 10:33).

14–16. а) Адӕймагӕн-иу не ’рбацыды сӕр цӕмӕн хъуамӕ бамбарын кӕнӕм? Ӕрхӕсс цӕвиттон. ӕ) Иу цӕуӕг цӕстдарӕг йӕ ныхас куыд райдайы?

¹⁴ Ахъуыды кӕнӕм ахӕм цӕвиттоныл. Телефонӕй дӕм цыдӕр ӕнӕзонгӕ адӕймаг ӕрбадзырдта ӕмӕ дӕ фӕрсы, цавӕр хӕринӕгтӕ уарзыс, зӕгъгӕ. Ды дӕхинымӕр хъуыды кӕныс, зӕгъгӕ, чи у ӕмӕ йӕ цы хъӕуы. Ӕвӕццӕгӕн, ӕфсӕрмӕй йемӕ гыццыл аныхас кӕндзынӕ, фӕлӕ йын стӕй бамбарын кӕндзынӕ, дарддӕр дӕ ныхас кӕнын кӕй нал фӕнды. Фӕлӕ уал дын уыцы адӕймаг йӕхи куы бацамыдтаид ӕмӕ дын куы бамбарын кодтаид, цӕмӕн дӕм ӕрбадзырдта, уӕд та? Зӕгъӕм дын уӕзданӕй загъта, йӕ куыст кӕй у адӕмӕн  ӕххуыс кӕнын, цӕмӕй пайда хӕринӕгтӕ ӕвзарын зоной, ӕмӕ йӕ бон кӕй у уыцы хъуыддаджы дӕуӕн дӕр баххуыс кӕнын. Уӕд ӕм, ӕвӕццӕгӕн, зӕрдиагдӕрӕй байхъуыстаис. Ӕцӕгдӕр, адӕм нын бӕлвырд ӕмӕ уӕзданӕй куы бамбарын кӕнынц, чи сты ӕмӕ сӕ цы хъӕуы, уӕд нын семӕ ныхас кӕнын ӕнцондӕр вӕййы. Махӕн та нӕ бон куыд у уацамынды афтӕ архайын?

¹⁵ Бирӕ бӕстӕты ахӕм ӕгъдау ис, ӕмӕ искӕмӕ куы ӕрбацӕуай, уӕд уал ын фыццаг хъуамӕ бамбарын кӕнай, цӕй тыххӕй йӕм ӕрбацыдтӕ, уый. Дзырд дӕр ыл нӕй, мах хъусын кӕнӕм, адӕм ӕнӕмӕнг кӕй хъуамӕ фехъусой, ахӕм ахсджиаг хабар. Фӕлӕ, зӕгъӕм, хӕдзары хицауӕн нӕхи нӕ бацамыдтам, афтӕмӕй йӕм ӕвиппайды ахӕм фарста радтам: «Абон дунейы цы зындзиндтӕ ис, уыдонӕй кӕрон кӕцыйӕн скӕнис, дӕ бон куы уаид, уӕд?» Кӕй зӕгъын ӕй хъӕуы, ахӕм фарстатӕ мах уый тыххӕй фӕдӕттӕм, цӕмӕй-иу адӕймагӕн йӕ хъуыды базонӕм ӕмӕ стӕй йемӕ Библимӕ гӕсгӕ аныхас кӕнӕм. Фӕлӕ уый, чи зоны, йӕхинымӕр ахъуыды кӕна: «Цымӕ ацы адӕймаг чи у ӕмӕ мӕм ахӕм фарста цӕмӕн дӕтты?» Уӕдӕ-иу хъуамӕ нӕ ныхас афтӕ райдайӕм, цӕмӕй-иу адӕймаг ма стыхса (Фил. 2:3, 4). Нӕ бон куыд у уый аразын?

¹⁶ Иу цӕуӕг цӕстдарӕг, цалынмӕ адӕймагимӕ ныхас кӕнын нӕ райдайы, уӕдмӕ уал ын салам ратты ӕмӕ йын йӕхи бацамоны. Стӕй йын равдисы буклет, «Рӕстдзинад базонын дӕ фӕнды?», зӕгъгӕ, ӕмӕ фӕзӕгъы: «Ацы буклет мах дӕттӕм, ам чи цӕры, уыдонӕн се ’ппӕтӕн дӕр. Ис дзы, бирӕты чи тыхсын кӕны, ӕхсӕз ахӕм фарстайы. Ацы буклет у дӕуӕн». Ӕфсымӕр куыд бафиппайдта, афтӕмӕй адӕмӕн сӕ фылдӕр, цӕй тыххӕй сӕм ӕрбацыдысты, уый куы бамбарынц, уӕд нал фӕтыхсынц, ӕмӕ уый фӕрцы семӕ дарддӕр ныхас кӕнын ӕнцондӕр вӕййы. Ӕфсымӕр адӕймагмӕ буклет куы ратты, уӕд ӕй бафӕрсы: «Ацы фарстатӕй искӕцыйыл хъуыды кодтай?» Адӕймаг фарста куы равзары, уӕд ӕфсымӕр буклет байгом кӕны ӕмӕ йемӕ аныхас кӕны, Библи уыцы фарстайы фӕдыл цы дзуры, ууыл. Куы ницы фӕзӕгъы, уӕд та ӕфсымӕр йӕхӕдӕг равзары искӕцы фарста, цӕмӕй-иу адӕймаг ма фӕтыхса. Кӕй зӕгъын ӕй хъӕуы, ныхас райдайынӕн бирӕ ӕндӕр мадзӕлттӕ дӕр ис. Иуӕй-иу бӕстӕты афтӕ у, ӕмӕ цалынмӕ адӕймагӕн де ’рбацыды сӕр нӕ бамбарын кӕнай, уӕдмӕ уал ын ноджыдӕр цыдӕртӕ хъуамӕ зӕгъай. Нӕ нысан у нӕ ныхас афтӕ райдайын, цӕмӕй адӕймаджы немӕ аныхас кӕнын бафӕнда.

17. Нӕ бон куыд у уацамынды Чырыстийы уынаффӕмӕ гӕсгӕ архайын?

¹⁷ Уӕдӕ нӕ зӕрдыл ӕрлӕууын кӕнӕм, нӕ бон куыд у уацамынды Чырыстийы уынаффӕмӕ гӕсгӕ архайын. Кӕмӕн хъусын кӕнӕм, уыдонӕй хъуамӕ алкӕмӕн дӕр аргъ кӕнӕм. Искӕй хӕдзармӕ куы ’рбацӕуӕм, уӕд-иу хъуамӕ нӕхи уӕздан дарӕм. Хъуамӕ-иу ахъуыды кӕнӕм, нӕ участокты адӕм хӕдзары цафон вӕййынц ӕмӕ нӕм хуыздӕр кӕд байхъусдзысты, ууыл. Нӕ ныхас-иу хъуамӕ афтӕ райдайӕм, цӕмӕй-иу нӕм адӕймаг зӕрдиагдӕрӕй байхъуса.

18. Кӕмӕн хъусын кӕнӕм, уыдонимӕ хӕларзӕрдӕ ӕмӕ уӕздан цӕмӕн хъуамӕ уӕм?

¹⁸ Кӕмӕн хъусын кӕнӕм, уыдонимӕ хӕларзӕрдӕ ӕмӕ уӕздан куы вӕййӕм, уӕд афтӕмӕй равдисӕм, Библийы уагӕвӕрдтӕм гӕсгӕ кӕй архайӕм, ӕмӕ уымӕй кад фӕхӕссӕм нӕ уӕларвон Фыдӕн (Матф. 5:16). Адӕмӕн куы аргъ кӕнӕм, уӕд, чи зоны, фылдӕр кӕйдӕрты бафӕнда рӕстдзинад базонын (1 Тим. 4:16). Адӕймаг хорз хабар йӕ зӕрдӕмӕ айса ӕви нӕ, уӕддӕр ӕй зондзыстӕм, нӕ бон цы уыд, уый кӕй сарӕзтам (2 Тим. 4:5). Цӕй уӕдӕ не ’ппӕт дӕр фӕзмӕм апостол Павелы. Уый ныффыста: «Адӕттӕ иууылдӕр аразын хорз хабары тыххӕй, цӕмӕй йӕ иннӕтӕн хъусын кӕнон» (1 Кор. 9:23). Цӕй ӕмӕ уацамынды алкӕддӕр архайӕм, Чырыстийы уынаффӕтӕй сӕйрагдӕр кӕй хонынц, уымӕ гӕсгӕ!