Хуыцауы Ныхас у удӕгас, ӕмӕ дзы пайда кӕн!
«Хуыцауы ныхас у удӕгас ӕмӕ дзы ис стыр тых» (ДЗУТ. 4:12).
1, 2. Йегъовӕ Моисейӕн цавӕр хъуыддаг бахӕс кодта ӕмӕ йын зӕрдӕ цӕмӕй бавӕрдта?
ДӔ ЦӔСТЫТЫЛ-МА ауайын кӕн, цыма дӕ бахъуыд зӕххыл ӕппӕты хъомысджындӕр паддзахы раз ӕрлӕууын ӕмӕ Йегъовӕйы адӕмы сӕрыл дзурын. Ӕвӕццӕгӕн, тыхсис, цы йын зӕгъдзынӕн, зӕгъгӕ. Стӕй тӕрсгӕ дӕр куыннӕ кӕнис. Уыцы хабармӕ дӕхи куыд бацӕттӕ кӕнис? Цавӕр ныхӕстӕ йын зӕгъис? Дӕ бон цы уаид саразын, цӕмӕй бӕрӕг уа, Ӕппӕтхъомысджын Хуыцауы номӕй кӕй дзурыс?
2 Растдӕр ахӕм уавӕры уыди Моисей. Библийы фыст ис, зӕгъгӕ, «зӕххыл... Моисейы хуызӕн сабыр адӕймаг нӕ уыд» (Ным. 12:3). Фӕлӕ йӕ Йегъовӕ равзӕрста, цӕмӕй йӕ фараонмӕ арвыстаид ӕмӕ йӕ адӕмы Египеты цагъарадӕй ссӕрибар кодтаид. Фараон разынд тынг сӕрбӕрзонд ӕмӕ фыдзонд адӕймаг (Рац. 5:1, 2). Фӕлӕ уӕддӕр Йегъовӕ Моисейӕн бафӕдзӕхста, цӕмӕй йын йӕ ныхас фараонмӕ фӕхӕццӕ кодтаид. Уыцы ныхасмӕ гӕсгӕ фараон хъуамӕ йӕ цагъартӕй ӕртӕ милуан адӕймаджы бӕрц ауагътаид. Уӕдӕ диссаг нӕу, Моисей Йегъовӕйы афтӕ кӕй бафарста: «Ӕз чи дӕн, цӕмӕй фараонмӕ ацӕуон ӕмӕ Израилы фыртты Египетӕй ракӕнон?» Моисей йӕ ныфс нӕ хаста фараонимӕ ныхас кӕнынмӕ. Фӕлӕ йын Хуыцау зӕрдӕ бавӕрдта, иунӕг кӕй нӕ уыдзӕн, уымӕй. Загъта йын: «Ӕз уыдзынӕн демӕ» (Рац. 3:9–12).
3, 4. а) Моисей цӕмӕй тарст? ӕ) Моисейау иуӕй-иутӕ сӕ ныфс цӕмӕ нӕ фӕхӕссынц?
3 Моисей цӕмӕй тарст? Ӕвӕццӕгӕн, тарсти, Йегъовӕ Хуыцауы номӕй чи дзуры, ахӕм адӕймаджы фараон йӕ галуанмӕ кӕй нӕ бауадздзӕн кӕнӕ йын йӕ ныхӕстӕ кӕй ницӕмӕ ’рдардзӕн. Стӕй ма уымӕй дӕр тарсти, ӕмӕ, мыййаг, израилӕгты куы нӕ бауырна, Йегъовӕ уый кӕй равзӕрста, цӕмӕй сӕ Египетӕй ракӕна. Гъемӕ Моисей Йегъовӕйӕн загъта: «Ӕмӕ мыл куы нӕ баууӕндой ӕмӕ мӕм куы нӕ байхъусой, афтӕ мын куы зӕгъой, нӕ дӕм фӕзынд Йегъовӕ, зӕгъгӕ, уӕд та?» (Рац. 3:15–18; 4:1).
4 Йегъовӕ Моисейӕн цы дзуапп радта ӕмӕ уый фӕстӕ цы хабӕрттӕ ӕрцыд, уыдонӕй махӕй алчидӕр ахуыр кӕны иу ахсджиаг хъуыддагыл. Чи зоны, дӕу никуы бахъуыди стыр хицауы раз ӕрлӕууын ӕмӕ йын Хуыцауы тыххӕй ӕмӕ йӕ Паддзахады тыххӕй дзурын. Фӕлӕ дын афтӕ никуы вӕййы, ӕмӕ ӕнӕуи адӕмимӕ аныхас кӕнынмӕ дӕр дӕ ныфс нӕ хӕссыс? Кӕд афтӕ у, уӕд дын Моисейы цӕвиттон баххуыс кӕндзӕн. Уӕдӕ ӕркӕсӕм, цӕуыл дзы ахуыр кӕнӕм, уымӕ.
«УЫЙ ДӔ КЪУХЫ ЦЫ ИС?»
5. Йегъовӕ Моисейы ныфс цӕй фӕрцы бауагъта? (Кӕс нывмӕ 11 фарсыл.)
5 Моисей, цӕмӕй тарсти, уый Йегъовӕйӕн куы загъта, уӕд ӕй Йегъовӕ бацӕттӕ кодта, цӕмӕй йӕ бон уыцы хӕс сӕххӕст кӕнын бауыдаид. Рацыды чиныджы фыст ис: «Йегъовӕ [Моисейы] бафарста: „Уый дӕ къухы цы ис?“ Моисей йын дзуапп радта: „Лӕдзӕг“. Ӕмӕ йын уӕд загъта: „Аппар-ма йӕ зӕхмӕ“. Гъемӕ йӕ Моисей дӕр зӕхмӕ аппӕрста, ӕмӕ лӕдзӕг калм фестад, ӕмӕ дзы Моисей лидзынмӕ фӕци. Фӕлӕ йын Йегъовӕ загъта: „Ныххӕц ын йӕ къӕдзилыл ӕмӕ йӕ сис“. Моисей дӕр ӕй систа, ӕмӕ калм йӕ къухы лӕдзӕг фестад. „Афтӕ хъуамӕ бакӕнай,– загъта йын Хуыцау,– цӕмӕй сӕ бауырна, кӕй дӕм фӕзынди Йегъовӕ“» (Рац. 4:2–5). Иннӕтӕм лӕдзӕг йеддӕмӕ чи ницы фӕкастаид, уый Хуыцауы хъаруйы фӕрцы фестад удӕгас калм! Уыцы лӕдзӕг хъуамӕ уыдаид бӕлвырдгӕнӕн, Моисей Йегъовӕйы номӕй кӕй дзуры, уымӕн. Йегъовӕ Моисейӕн загъта: «Мӕнӕ ацы лӕдзӕг... дӕ къухы ахӕсс, цӕмӕй дзы диссӕгтӕ саразай» (Рац. 4:17). Уыцы лӕдзӕджы фӕрцы Моисей фӕныфсджындӕр уыдаид, ӕмӕ йӕ бон бауыдаид фараонимӕ дӕр ӕмӕ Хуыцауы адӕмимӕ дӕр ныхас кӕнын (Рац. 4:29–31; 7:8–13).
6. а) Хъусын кӕнгӕйӕ нӕ къухы цы хъуамӕ уа ӕмӕ цӕмӕн? ӕ) Ацы ныхӕстӕ, «Хуыцауы Ныхас у удӕгас», зӕгъгӕ, куыд ӕмбаргӕ сты? Библийы «стыр тых» кӕй ис, уый адӕймаг йӕхиуыл куыд бавзары?
6 Махӕн та нӕ къухы цы вӕййы, хорз хабар куы фӕхъусын кӕнӕм, уӕд? Нӕ къухы вӕййы Библи, ӕмӕ алкӕддӕр цӕттӕ вӕййӕм, цӕмӕй-иу дзы адӕймагӕн исты бакӕсӕм. Бирӕтӕ афтӕ хъуыды кӕнынц, ӕмӕ Библи иннӕ чингуытӕй ницӕмӕй хицӕн кӕны. Фӕлӕ нын ӕцӕгӕй та Йегъовӕ уыцы чиныджы фӕрцы ӕргом кӕны йӕ фӕндтӕ (2 Пет. 1:21). Фыст дзы ис, Хуыцау нын зӕрдӕ цӕмӕй бавӕрдта ӕмӕ фидӕны йӕ Паддзахады фӕрцы цы сараздзӕн, уый тыххӕй. Апостол Павел афтӕ дӕр уымӕн ныффыста: «Хуыцауы ныхас у удӕгас ӕмӕ дзы ис стыр тых». (Бакӕс Дзуттӕгтӕм 4:12.) Хуыцауы ныхас удӕгас у, зӕгъгӕ, уый куыд ӕмбарын хъӕуы? Йегъовӕ ӕдзухдӕр архайы, цӕмӕй, зӕрдӕ цӕмӕй бавӕрдта, уый ӕххӕст кӕна, ӕмӕ йӕ ныхӕстӕй иу дӕр ӕнӕсӕххӕстӕй нӕ баззайдзӕн (Ис. 46:10; 55:11). Адӕймаг уыцы хабар куы бамбары, уӕд Хуыцауы Ныхас кӕсгӕйӕ йӕхиуыл бавзары, цы «стыр тых» дзы ис, уый – йӕ цард хуыздӕрырдӕм фӕивы.
7. Нӕ бон куыд у рӕстдзинад раст амонын?
7 Йегъовӕ нын йӕ «удӕгас» Ныхас кӕй радта, уый фӕрцы нӕ бон у адӕмӕн ӕмбарын кӕнын, цы хабар хъусын кӕнӕм, ууыл ӕууӕндӕн кӕй ис ӕмӕ Хуыцауӕй кӕй у. Уӕдӕ Павел Тимофейы дзӕгъӕлы нӕ разӕнгард кодта: «Ӕппӕт хъарутӕй архай, цӕмӕй Хуыцауы раз ӕрлӕууай... рӕстдзинады ныхас раст чи амоны ӕмӕ йӕ раст чи ӕмбарын кӕны, ахӕм кусӕгӕй» (2 Тим. 2:15). Цымӕ махӕн та нӕ бон куыд у Павелы уынаффӕмӕ гӕсгӕ архайын? Хъуамӕ-иу рагацау ахъуыды кӕнӕм, уацамынды адӕмӕн Библийӕ кӕцы стихтӕ бакӕсдзыстӕм, цӕмӕй сын сӕ зӕрдӕтӕм фӕндаг ссарӕм. Ацы хъуыддаджы нын стыр ӕххуыс сты, 2013 азы цы буклеттӕ рацыд, уыдон.
АДӔМӔН ЦАВӔР СТИХТӔ КӔСДЗЫНӔ, УУЫЛ-ИУ РАГАЦАУ АХЪУЫДЫ КӔН
8. Иу ӕмбырды уацамындӕн дзуапдӕттӕг цӕстдарӕг ног буклетты тыххӕй цы загъта?
8 Нӕ ног буклеттӕ иууылдӕр сты ӕмхуызон конд. Ӕмӕ дзы иуӕй пайда кӕнын куы сахуыр уӕм, уӕд нын иннӕтӕй пайда кӕнын дӕр ӕнцон уыдзӕн. Гавайы сакъадӕхтыл (АИШ) иу ӕмбырды уацамындӕн дзуапдӕттӕг цӕстдарӕг ныффыста: «Мах уый ӕнхъӕл дӕр нӕ уыдыстӕм, ӕмӕ нын ацы ног кусӕнгӕрзтӕ хӕдзарӕй-хӕдзармӕ ӕмӕ уынджы хъусын кӕнгӕйӕ ахӕм стыр ӕххуыс кӕй уыдзысты». Уыцы ӕфсымӕр куыд бафиппайдта, афтӕмӕй, буклетты фыццаг фарсыл сӕйраг фарстайӕн цалдӕр дзуаппы кӕй ис, уый фӕрцы уыцы буклеттӕй ӕнцондӕр вӕййы пайда кӕнын. Кӕимӕ фӕныхас кӕнӕм, уыдон не стыхсынц, мыййаг, раст дзуапп куы нӕ раттон, зӕгъгӕ. Уыцы ӕфсымӕр ма загъта, зӕгъгӕ, буклеттӕ афтӕ конд кӕй сты, уый фӕрцы нын ноджы фылдӕр адӕмимӕ бантысы дзӕбӕх аныхас кӕнын.
9, 10. а) Ног буклетты фӕрцы нын ӕнцондӕр цӕмӕн у Библийӕ пайда кӕнын? ӕ) Нӕ буклеттӕй дӕ зӕрдӕмӕ ӕппӕты тынгдӕр кӕцы цӕуы ӕмӕ цӕмӕн?
9 Алы буклеты дӕр ис, адӕймаджы зӕрдӕ чи бацагайдзӕн, ахӕм стих. Ӕркӕсӕм буклетмӕ «Искуы адӕмы хъизӕмӕрттӕн кӕрон уыдзӕн?». Ацы фарстайӕн дзы цы ӕртӕ дзуаппы ис, уыдонӕй адӕймаг кӕцыфӕнды ма равзара, уӕддӕр-иу буклет рафӕлдах ӕмӕ-иу ын зӕгъ: «Ам фыст ис, уый фӕдыл Библи цы дзуры, уый». Стӕй-иу ын бакӕс Раргомад 21:3, 4 стихтӕ.
10 Афтӕ бакӕнӕн ис, «Библи цавӕр чиныгыл нымайыс?», зӕгъгӕ, чи хуыйны, уыцы буклетӕй куы пайда кӕнай, уӕд дӕр. Адӕймаг кӕцыфӕнды дзуапп ма равзара, уӕддӕр-иу буклет рафӕлдах ӕмӕ-иу ын зӕгъ: «Библи куыд зӕгъы, афтӕмӕй „Фыстад ӕнӕхъӕнӕй дӕр у Хуыцауы комытӕфӕй фыст“». Стӕй ма йын зӕгъӕн ис: «Библийы ма ацы ран ноджыдӕр ис тынг ахсджиаг хъуыдытӕ». Уый фӕстӕ-иу Библи байгом кӕн ӕмӕ-иу ын 2 Тимофеймӕ 3:16, 17 стихтӕ ӕнӕхъӕнӕй бакӕс.
11, 12. а) Дӕ бон куыд у буклеттӕй пайда кӕнын, цӕмӕй уацамынды ӕнтыстджындӕр уай? ӕ) Буклетты фӕрцы куыд ис адӕймагимӕ баныхас кӕнӕн, иннӕ хатт цавӕр фарстамӕ ӕркӕсдзыстут, ууыл?
11 Чи зоны дӕ бафӕнда адӕймагӕн буклетӕй фылдӕр хъуыдытӕ бакӕсын ӕмӕ йыл фылдӕр аныхас кӕнын. Уый кӕнгӕ уыдзӕн, адӕймаг дӕм куыд байхъусдзӕн, уымӕй. Куыдфӕнды ма уа, уӕддӕр ын буклет кӕй радтай ӕмӕ йын Хуыцауы Ныхасӕй цыдӕр хъуыды кӕй бакастӕ, уый дӕр дын стыр цины хос уыдзӕн. Ӕмӕ йын фыццаг хатт Библийӕ иу кӕнӕ дыууӕ стихы йеддӕмӕ куы нӕ бакӕсай, уӕддӕр ӕм дӕ бон уыдзӕн иннӕ хатт бацӕуын, цӕмӕй дарддӕр йемӕ аныхас кӕнай.
12 Алы буклеты дӕр фӕстаг фарсыл ис фарста, «Куыд хъуыды кӕныс?», зӕгъгӕ. Ӕмӕ дзы дарддӕр фыст ис, адӕймагимӕ иннӕ хатт цавӕр фарстайыл ӕмӕ цавӕр стихтыл ис аныхас кӕнӕн, уый. Зӕгъӕм, буклеты «Фидӕны нӕм цы ӕнхъӕлмӕ кӕсы?» ис ахӕм фарста: «Хуыцау цы сараздзӕн, цӕмӕй цард хуыздӕрырдӕм фӕива?». Библийӕ дзы амынд ис Матфейы 6:9, 10 ӕмӕ Данелы 2:44. «Чи амард, уыдон райгас уыдзысты?», зӕгъгӕ, чи хуыйны, уыцы буклеты та ис ахӕм фарста: «Цӕмӕн зӕронд кӕнӕм ӕмӕ цӕмӕн мӕлӕм?». Библийӕ дзы амынд ис Райдианы 3:17–19 ӕмӕ Ромӕгтӕм 5:12.
13. Нӕ бон куыд у буклетты фӕрцы адӕмимӕ Библи ахуыр кӕнын райдайын?
13 Ацы буклетты фӕрцы дӕ бон у адӕмимӕ Библи ахуыр кӕнын райдайын. Буклетты фӕстаг фарсыл бынӕй цы код * ис, уый фӕрцы адӕймагӕн йӕ бон уыдзӕн нӕ сайтмӕ бацӕуын ӕмӕ дзы бакӕсын видеороликмӕ, «Библи ахуыр кӕнын цӕмӕн хъӕуы?», зӕгъгӕ. Уыцы видеоролик адӕмы разӕнгард кӕны, цӕмӕй Библи ахуыр кӕнын райдайой. Уӕдӕ ацы буклеттӕ афтӕ конд сты, цӕмӕй Библийӕ пайда кӕнӕм, адӕймагимӕ фыццаг хатт куы ныхас кӕнӕм, уӕд дӕр ӕмӕ йӕм ногӕй куы бацӕуӕм, уӕд дӕр. Ӕмӕ нын куыд амонынц, афтӕ сӕ куы пайда кӕнӕм, уӕд нӕ бон уыдзӕн фылдӕр адӕмимӕ Библи ахуыр кӕнын райдайын. Фӕлӕ ма ноджыдӕр дӕ бон цы у саразын, цӕмӕй хъусын кӕнгӕйӕ Хуыцауы Ныхасӕй арӕхстджынӕй пайда кӕнай?
АДӔМИМӔ НЫХАС КӔН, ЦӔУЫЛ ТЫХСЫНЦ, УУЫЛ
14, 15. Хъусын кӕнгӕйӕ дӕ бон куыд у Павелы бафӕзмын?
14 Павелы тынг фӕндыд, цӕмӕй хъусын кӕнгӕйӕ «фылдӕр адӕмӕн баххуыс кодтаид». (Бакӕс 1 Коринфӕгтӕм 9:19–23.) Ныфс ӕй уыди, йӕ бон баххуыс кӕнын кӕй бауыдзӕн «дзуттӕгтӕн», «закъоны дӕлбар чи уыд, уыдонӕн», «закъоны дӕлбар чи нӕ уыд, уыдонӕн» ӕмӕ, «лӕмӕгъ чи уыд, уыдонӕн». Павелы фӕндыд, цӕмӕй «алыхуызон адӕмӕн дӕр» сӕ зӕрдӕтӕм фӕндаг ссардтаид ӕмӕ «исты хуызы иуӕй-иуты уӕддӕр фервӕзын кодтаид» (Хъуыд. 20:21). Махӕн дӕр нӕ участокты цӕры «алыхуызон адӕм». Ӕмӕ хъусын кӕнынмӕ нӕхи куы цӕттӕ кӕнӕм, уӕд нӕ бон куыд у Павелы бафӕзмын? (1 Тим. 2:3, 4).
15 «Нӕ хъусын кӕныны хъуыддаджы» алы мӕй дӕр вӕййы хорз уынаффӕтӕ, адӕймагимӕ ныхас кӕнын райдайӕн куыд ис, уый фӕдыл, ӕмӕ дӕ бон у уыдонмӕ гӕсгӕ архайын. Фӕлӕ, зӕгъӕм, дӕ участокы чи цӕры, уыцы адӕмы ӕндӕр фарстатӕ тыхсын кӕнынц, уӕд та? Дӕ ныхас-иу афтӕ бацӕттӕ кӕн, цӕмӕй-иу сын сӕ зӕрдӕтӕм фӕндаг ссарай. Ахъуыды-иу кӕн, кӕм хъусын кӕныс, уым адӕм цы уавӕрты цӕрынц ӕмӕ цӕуыл тыхсынц, ууыл ӕмӕ-иу Библийӕ стих уымӕ гӕсгӕ равзар. Иу районон цӕстдарӕг ӕмӕ йӕ бинойнаг радзырдтой, цы сын ӕххуыс кӕны, цӕмӕй уацамынды Библийӕ арӕхдӕр пайда кӕной: «Адӕмимӕ дӕрдтыл куы нӕ фӕдзурӕм, фӕлӕ сын не ’рбацыды сӕр цыбыртӕй куы бамбарын кӕнӕм, уӕд нын арӕхдӕр бантысы Библийӕ исты бакӕсын. Нӕ Библиты рагацау ссарӕм, цы стих нӕ фӕнды бакӕсын, уый. Ӕмӕ адӕймагӕн салам куы раттӕм, уӕд ын уыцы стих бакӕсӕм». Цӕй уӕдӕ ӕркӕсӕм, уацамынды адӕмимӕ цӕуыл ис ныхас кӕнӕн, стӕй цавӕр фарстатӕ ӕмӕ стихтӕй ис пайда кӕнӕн, уымӕ. Чи зоны, дӕу дӕр бафӕнда уацамынды уыцы уынаффӕтӕй спайда кӕнын.
Уацамынды Библийӕ ӕмӕ буклеттӕй арӕхстджынӕй фӕпайда кӕныс? (кӕс 8–13 абзацтӕ)
16. Адӕймагимӕ ныхас кӕнгӕйӕ нӕ бон куыд у Исайы 14:7 стихӕй спайда кӕнын?
16 Кӕд, кӕм цӕрыс, уым змӕстытӕ арӕх вӕййы ӕмӕ дзы фыдракӕндтӕ дӕр арӕх ӕрцӕуы, уӕд дӕ бон у адӕймагӕн афтӕ зӕгъын: «Цы ахъуыды кӕнис, газеты фыццаг фарсыл ахӕм ныхӕстӕ куы бакӕсис: „Ӕгас зӕхх дӕр сулӕфыд, ӕрсабыр. Адӕм цин кӕнынц, фырцинӕй хъӕр кӕнынц“? Диссаг дӕм нӕ фӕкӕсид?» Адӕймаг дын дзуапп куы ратта, уӕд ын ис зӕгъӕн: «Ацы ныхӕстӕ фыст сты Библийы, Исайы 14:7. Библийы бирӕ рӕтты ис фыст, Хуыцау тагъд зӕххыл сабыр ӕмӕ фӕрнӕйдзаг цард кӕй скӕндзӕн». Уый фӕстӕ, фидӕны кой кӕм цӕуы, ахӕм стих ссар ӕмӕ йын зӕгъ, цӕмӕй йӕ йӕхӕдӕг бакӕса.
17. Уацамынды дӕ бон куыд у ныхас Матфейы 5:3 стихмӕ гӕсгӕ райдайын?
17 Чи зоны, кӕм цӕрыс, уым нӕлгоймӕгтӕй бирӕтӕн куыст ссарын зын у. Уӕд дӕ бон у дӕ ныхас афтӕ райдайын: «Куыд хъуыды кӕныс, нӕлгоймаг цас ӕхца хъуамӕ куса, цӕмӕй йӕ бинонтӕ амондджын уой?» Адӕймаг дын дзуапп куы ратта, уӕд ын дӕ бон у зӕгъын: «Бирӕ нӕлгоймӕгтӕ уымӕй дӕр фылдӕр бакусынц, фӕлӕ уӕддӕр сӕ бинонтӕ сӕ цардӕй райгонд не сты. Уӕдӕ сӕ цымӕ ӕцӕгӕй цы хъӕуы, цӕмӕй амондджын уой?» Уый фӕстӕ йын бакӕс Матфейы 5:3 ӕмӕ йын зӕгъ Библи ахуыр кӕныны тыххӕй.
18. Йеремийы 29:11 стихы фӕрцы дӕ бон куыд у адӕмы ныфс уадзын?
18 Чи зоны, кӕм цӕрыс, уым ӕрӕджы цавӕрдӕр бӕллӕх ӕрцыд. Уӕд дӕ бон у дӕ ныхас афтӕ райдайын: «Ныфс мӕ ис, ацы ныхӕстӕ дӕуӕн дӕр стыр удӕнцой кӕй ӕрхӕсдзысты. (Бакӕс Йеремийы 29:11.) Бафиппайдтай йӕ, ацы ран ӕртӕ хъуыддаджы кой кӕй цӕуы? Хуыцауы фӕнды, цӕмӕй хайджын уӕм „фарнӕй“ ӕмӕ нын уа „фидӕн“ ӕмӕ „ныфс“. Хуыцау нын зӕрдӕ ахӕм диссаджы фидӕнӕй кӕй ӕвӕры, уымӕй хуыздӕр ма цы хъуамӕ уа! Фӕлӕ уымӕн гӕнӕн куыд ис?» Уый фӕстӕ йын йӕ хъус ӕрдар, нӕ публикацитӕй уый тыххӕй дзырд кӕм цӕуы, уымӕ.
19. Хуыцау кӕй уырны, уыцы адӕмимӕ ныхас кӕнгӕйӕ дӕ бон куыд у Раргомады 14:6, 7 стихтӕй спайда кӕнын?
19 Кӕд ахӕм ран цӕрыс, ӕмӕ дзы адӕмы Хуыцау уырны, уӕд та дӕ бон у дӕ ныхас афтӕ райдайын: «Гъеныр зӕгъгӕ дӕ разы зӕд фестад ӕмӕ дын цыдӕр дзуры. Лӕмбынӕг ӕм нӕ хъусис? (Бакӕс Раргомад 14:6, 7.) Ам куыд фыст ис, афтӕмӕй зӕд зӕгъы, зӕгъгӕ, тӕрсут Хуыцауӕй ӕмӕ бакувут арв ӕмӕ зӕхх Сфӕлдисӕгӕн. Арв ӕмӕ зӕхх чи сфӕлдыста, уымӕн йӕ ном зоныс?» Уый фӕстӕ адӕймагӕн бакӕс Псалом 124:8. Фыст дзы ис: «Не ’ххуысгӕнӕг у Йегъовӕйы ном, арв ӕмӕ зӕхх Скӕнӕджы ном». Ӕмӕ йын стӕй зӕгъ, иннӕ хатт уӕ бон кӕй у, Йегъовӕ цавӕр Хуыцау у, уый тыххӕй фылдӕр аныхас кӕнын.
20. а) Ӕмбисӕндтӕ 30:4 стихы фӕрцы нӕ бон куыд адӕймагӕн Хуыцауы ном базонынӕн баххуыс кӕнын? ӕ) Уацамынды арӕхдӕр цавӕр стихӕй фӕпайда кӕныс ӕмӕ цӕмӕн?
20 Ӕрыгон адӕймагимӕ куы ныхас кӕнай, уӕд ын дӕ бон у зӕгъын: «Дӕ хъус-ма ӕрдар, ацы ран цы ахсджиаг фарста ис, уымӕ. (Бакӕс Ӕмбисӕндтӕ 30:4.) Ацы ныхӕстӕ иу адӕймагӕй дӕр нӕй зӕгъӕн. Уӕдӕ бӕрӕг у, ам Сфӕлдисӕджы тыххӕй кӕй цӕуы дзырд *. Фӕлӕ йын йӕ ном куыд ис базонӕн? Иннӕ хатт дын Хуыцауы ном Библийы равдисдзынӕн».
ХУЫЦАУЫ НЫХАСЫ ЦЫ ТЫХ ИС, УЫЙ ДЫН УАЦАМЫНДЫ ӔХХУЫС КӔНӔД
21, 22. а) Уацамынды адӕмӕн цы стихтӕ бакӕсӕм, уыдоны фӕрцы сӕ цард куыд фӕивы? ӕ) Хъусын кӕнгӕйӕ зӕрдиагӕй цӕуыл архайдзынӕ?
21 Уацамынды цавӕр стихтӕ бакӕсдзыстӕм, ууыл рагацау кӕй ахъуыды кӕнӕм, уый фӕрцы нын бирӕ бантысы. Ӕркӕсӕм, Австралийы чи ’рцыд, иу ахӕм хабармӕ. Йегъовӕйы Ӕвдисӕнтӕ иу сылгоймаджы дуар бахостой. Сӕ иу ӕй бафарста: «Хуыцауы ном куыд у, уый зоныс?» Стӕй йын Библийӕ бакаст Псалом 83:18. Уыцы сылгоймаг радзырдта: «Джихӕй баззадтӕн! Куы ацыдысты, уӕд машинӕйы сбадтӕн ӕмӕ 56 километры фӕцыдтӕн, чырыстон дины чингуытӕ кӕм уӕй кодтой, уыцы дуканимӕ, цӕмӕй Библийы ӕндӕр тӕлмацтӕм дӕр ӕркастаин. Уый фӕстӕ бакастӕн, уыцы номы тыххӕй дзырдуаты цы фыст ис, уый. Хуыцауы ном Йегъовӕ кӕй у, ууыл куы нал дызӕрдыг кодтон, уӕд хъуыды кӕнын райдыдтон, зӕгъын ма ноджыдӕр цы нӕ зонын, цымӕ». Уымӕй бирӕ нӕ рацыд, афтӕ уыцы сылгоймаг йӕхӕдӕг дӕр ӕмӕ, йӕ цард кӕимӕ хъуамӕ баиу кодтаид, уыцы нӕлгоймаг дӕр Библи ахуыр кӕнын райдыдтой ӕмӕ фӕстӕдӕр донаргъуыд райстой.
22 Адӕймаг Хуыцауы Ныхас куы фӕкӕсы ӕмӕ, Йегъовӕ зӕрдӕ цӕмӕй ӕвӕры, ууыл фидарӕй куы баууӕнды, уӕд йӕ цард фӕивы. (Бакӕс 1 Фессалоникӕгтӕм 2:13.) Адӕймаджы зӕрдӕмӕ, Библийы цы фыст ис, уый куыд бахъара, афтӕ йӕм нӕ ныхӕстӕ никуы бахъардзысты. Хуыцауы Ныхас у удӕгас! Уӕдӕ алкӕддӕр архайӕм, цӕмӕй дзы хъусын кӕнгӕйӕ пайда кӕнӕм.
^ 13 абз. Ахӕм код (QR Code) ӕрымысыд компани «Denso Wave Incorporated».