РӔСУГЪД ливайнаг кедримӕ абаргӕйӕ, зылын-мылынтӕ чи рӕзы, уыцы оливӕбӕлас адӕймагмӕ, чи зоны, афтӕ рӕсугъд ма фӕкӕса. Фӕлӕ оливӕбӕласӕн ис диссаджы миниуӕг – йӕ бон у ӕвзӕр уавӕрты дӕр рӕзын. Иуӕй-иу оливӕбӕлӕстыл цӕуы 1 000 азы бӕрц. Оливӕбӕлас йӕ уидӕгтӕ зӕххы тынг арф ауадзы ӕмӕ йӕ бон вӕййы сзайын, йӕ хъӕд ын куы акъуырой, суанг уӕд дӕр. Цалынмӕ йӕ уидӕгтӕ нӕ бахус вӕййынц, уӕдмӕ йӕ бон вӕййы ног талатӕ раттын.

Иузӕрдион Иов фидарӕй зыдта, куы амӕла, уӕддӕр та ногӕй кӕй цӕрдзӕн (Иов 14:13–15). Хуыцауӕн ӕй йӕ бон райгас кӕнын кӕй уыдзӕн, ууыл фидарӕй кӕй ӕууӕндыд, уый равдисынӕн цӕвиттонӕн ӕрхаста бӕлас, ӕмӕ, ӕвӕццӕгӕн, кодта оливӕбӕласы кой. Иов загъта: «Бӕласӕн дӕр ма ис ныфс. Куы йӕ акъуырой, уӕд та ногӕй тау суадздзӕн». Хус рӕстӕджы фӕстӕ къӕвда куы ӕруара, уӕд хус оливӕбӕласӕн йӕ бон у, ӕмӕ та фӕстӕмӕ зайын райдайа ӕмӕ «ногсагъд талайау къалиутӕ рауадза» (Иов 14:7–9).

Кӕй акъуырдтой, уыцы оливӕбӕлас та ногӕй зайын кӕд райдайдзӕн, уымӕ зӕхкусӕг куыд тынг фенхъӕлмӕ кӕсы, афтӕ Йегъовӕ Хуыцау дӕр бӕллы, йӕ лӕггадгӕнджыты ӕмӕ ма бирӕ ӕндӕр адӕмы кӕд райгас кӕндзӕн, уымӕ (Матф. 22:31, 32; Иоан. 5:28, 29; Хъуыд. 24:15). Дӕ цӕстытыл-ма ауайын кӕн, куыд цин кӕндзыстӕм, чи амард, уыдон куы райгас уой ӕмӕ та ногӕй куы цӕрой, уӕд!