БИРӔТӔ зонынц, Йесойӕн дыууадӕс апостолы кӕй уыд. Фӕлӕ йӕ ахуыргӕнинӕгты ’хсӕн сылгоймӕгтӕ дӕр кӕй уыди ӕмӕ йын уыдон дӕр йӕ лӕггады стыр ӕххуыс кӕй уыдысты, уый, чи зоны, нӕ зонынц. Уыцы сылгоймӕгтӕй иу уыд Иоаннӕ (Матф. 27:55; Лук. 8:3).

Цымӕ Иоаннӕ Йесойӕн куыд ӕххуыс кодта ӕмӕ нын уыцы сылгоймаг фӕзминаг цӕмӕй у?

Иоаннӕ уыди «Ироды хӕдзары уынаффӕгӕнӕг Хузӕйы ус». Чи зоны, Хузӕйы бар уыдысты Ирод Антипӕйы хӕдзары хъуыддӕгтӕ. Иоаннӕ уыди, Йесо йӕ низӕй кӕй сдзӕбӕх кодта, уыцы сылгоймӕгтӕй сӕ иу. Иоаннӕ ӕмӕ ма иннӕ сылгоймӕгтӕ Йесо ӕмӕ йӕ апостолтимӕ иу ранӕй иннӕмӕ цыдысты (Лук. 8:1–3).

Дзуттаг раввинтӕ дзырдтой, зӕгъгӕ, сылгоймӕгтӕн, сӕ хӕстӕг чи нӕу, уыцы нӕлгоймӕгтимӕ иумӕйагӕй хъуамӕ мацы уа, семӕ искуыдӕм ацыдаиккой, ууыл та дзырд дӕр нӕ уыд. Нӕлгоймӕгтӕ сылгоймӕгтимӕ, гӕнӕн уӕвгӕйӕ, ныхас дӕр хъуамӕ ма кодтаиккой. Фӕлӕ сӕм кӕд ахӕм ӕгъдӕуттӕ уыд, уӕддӕр Йесо Иоаннӕйӕн ӕмӕ иннӕ иузӕрдион сылгоймӕгтӕн бар радта, цӕмӕй иннӕ ахуыргӕнинӕгтау йемӕ уыдаиккой.

Иоаннӕ, Йесоимӕ ӕмӕ йӕ апостолтимӕ кӕй уыд, уымӕй йӕхи адӕмы цӕсты ӕфтыдта. Ӕниу, Чырыстиимӕ чи цыди, уыдон се ’ппӕт дӕр хъуамӕ цӕттӕ уыдаиккой сӕхи цӕмӕйдӕрты фӕцух кӕнынмӕ. Фӕлӕ Йесо уыцы адӕмы тыххӕй загъта: «Хуыцауы ныхас чи хъусы ӕмӕ йӕ чи ӕххӕст кӕны, уыдон сты мӕ мад ӕмӕ ме ’фсымӕртӕ» (Лук. 8:19–21; 18:28–30). Бӕрӕг у, Чырысти хионы зӕрдӕ кӕй дары, йӕ фӕдыл цӕуыны тыххӕй йӕхи цӕмӕйдӕрты чи фӕцух кодта, уыдонмӕ. Ӕмӕ нын уый тынг ӕхсызгон куыннӕ у!

Иоаннӕ ӕмӕ ма бирӕ ӕндӕр сылгоймӕгтӕ дӕр, «цы сӕм уыд, уый не ’вгъау кодтой», ӕмӕ афтӕмӕй Йесойӕн ӕмӕ дыууадӕс апостолӕн лӕггад кодтой (Лук. 8:3). Иу фыссӕг ныффыста: «Уыцы сылгоймӕгтӕ хӕринаг кӕй кодтой, къустӕ кӕй ӕхсадтой ӕмӕ дзаумӕттӕ кӕй ӕмпъызтой, уый тыххӕй Лука ницы ныффыста. Чи зоны, уыцы куыстытӕ дӕр кодтой [...] фӕлӕ Лука ахӕмӕй ницы загъта». Ӕвӕццӕгӕн, уыцы сылгоймӕгтӕ се ’мбӕлттӕн се ’хца ӕмӕ сӕ исбоны фӕрцы дӕр ӕххуыс кодтой.

Йесо ӕмӕ-иу йӕ апостолтӕ искуыдӕм хъусын кӕнынмӕ куы ацыдысты, уӕд-иу уыцы рӕстӕг кусгӕ нӕ кодтой. Уӕдӕ сӕм, ӕвӕццӕгӕн, уыйбӕрц ӕхца нӕ уыдаид, цӕмӕй иу-20 адӕймаджы фаг хӕринаг ӕмӕ ӕндӕр ахӕм хабӕрттӕ  амал кодтаиккой. Кӕд-иу сӕ арӕх адӕм суазӕг кодтой, уӕддӕр Йесойы ӕмӕ йӕ апостолты уый ныфс нӕ уыд, ӕмӕ сӕ ӕдзухдӕр уазӕгуаты хондзысты. Ӕмӕ сӕм «ӕхцайы къопп» дӕр уымӕн уыди (Иоан. 12:6; 13:28, 29). Сӕ хӕрдзтӕ бамбӕрзынӕн сын, ӕвӕццӕгӕн, Иоаннӕ ӕмӕ иннӕ сылгоймӕгтӕ дӕр ӕххуыс кодтой.

Чидӕртӕ зӕгъынц, зӕгъгӕ-иу дзуттаг сылгоймагӕн йӕхи ӕхца кӕнӕ мулк нӕ уыд. Фӕлӕ уӕды заманты фыст хабӕрттӕй бӕрӕг у, уый гӕнӕн кӕй уыд, ӕмӕ дзуттаг сылгоймагӕн йӕхи исбон уыдаид. Зӕгъӕм, 1) йӕ фыдӕн-иу фырттӕ куы нӕ уыди, уӕд-иу йӕ бынтӕ уымӕн баззадысты; 2) цавӕрдӕр исбон-иу ын балӕвар кодтой; 3) зӕгъгӕ-иу йӕ лӕгӕй ахицӕн, уӕд ӕм гӕххӕттытӕм гӕсгӕ цы ’хца ӕмбӕлди, уый-иу ын радтой; 4) йӕ сӕрыхицау-иу куы амард, уӕд-иу ын йӕ лӕджы исбонӕй рахицӕн кодтой; 5) йӕхӕдӕг-иу ӕхца бакуыста.

Дзырд дӕр ыл нӕй, Йесойӕн йӕ фӕдылдзӕуджытӕ, сӕ бон цӕмӕй уыд, уымӕй кӕй ӕххуыс кодтой. Уыдоны ’хсӕн, ӕвӕццӕгӕн, хъӕздыг сылгоймӕгтӕ дӕр уыд. Иоаннӕ Ироды уынаффӕгӕнӕджы ус кӕй уыд (уӕдмӕ йӕ лӕг, чи зоны, ӕгас нал уыди), уымӕ гӕсгӕ иуӕй-иутӕ зӕгъынц, уый дӕр хъӕздыг сылгоймаг уыдаид, зӕгъгӕ. Йесо кӕй дардта, уыцы зынаргъ хӕдон дӕр ын, чи зоны, уыцы сылгоймӕгтӕй чидӕр балӕвар кодта. Иу фыссӕг куыд зӕгъы, афтӕмӕй «хуымӕтӕг кӕсагахсӕджы бинойнагӕн ахӕм дарӕс балхӕнын йӕ бон нӕ бауыдаид» (Иоан. 19:23, 24).

Иоаннӕ мысайнӕгтӕ кӕй лӕвӕрдта, уый тыххӕй Фыстады бӕлвырд ницы ис фыст. Фӕлӕ фидарӕй зӕгъӕн ис, ӕмӕ, йӕ бон цыдӕриддӕр уыд, уый арӕзта, ӕмӕ нын уымӕй у фӕзминаг. Паддзахады хъуыддагӕн цас ратдзыстӕм, ӕмӕ уӕвгӕ исты ратдзыстӕм ӕви нӕ, уый ӕрмӕстдӕр нӕхицӕй кӕнгӕ у. Хуыцауӕн ӕхсызгон вӕййы, нӕ бон раттын цы у, уый зӕрдиагӕй куы фӕдӕттӕм, уӕд (Матф. 6:33; Мар. 14:8; 2 Кор. 9:7).

Йесойы хъӕдыл куы байтыгътой, уӕд уым уыдысты йӕ ахуыргӕнинӕгтӕ дӕр. Марчы 15:41 фыст ис: «Уыдон йемӕ уыдысты ӕмӕ йын лӕггад кодтой, Галилейӕйы ма куы уыди, уӕд. Уыди ма дзы, йемӕ Иерусалиммӕ чи ’рцыд, бирӕ ӕндӕр ахӕм сылгоймӕгтӕ дӕр». Ӕмӕ уыцы сылгоймӕгты ’хсӕн уыд Иоаннӕ дӕр. Йесойы хъӕдӕй куы ’ристой ӕмӕ йӕ зӕппадзы бавӕрынмӕ куы ахастой, уӕд, «Галилейӕйӕ цы сылгоймӕгтӕ рацыд, уыдон дӕр ацыдысты, цӕмӕй федтаиккой зӕппадз, стӕй йын йӕ мард куыд бавӕрдтой, уый дӕр. Ӕмӕ уӕд фӕстӕмӕ аздӕхтысты, цӕмӕй хӕрздӕфгӕнаг кӕрдӕджытӕ ӕмӕ хӕрздӕф сойтӕ ӕрцӕттӕ кодтаиккой». Сабаты фӕстӕ, къуырийы фыццаг бон, уыцы сылгоймӕгтӕ,– Лукайы ныхӕстӕм гӕсгӕ, «Марийӕ Магдалинӕ, Иоаннӕ ӕмӕ Иаковы мад Марийӕ»,– зӕппадзмӕ ӕрыздӕхтысты ӕмӕ дзы федтой зӕдты. Зӕдтӕ сын загътой, Йесо кӕй райгас (Лук. 23:55–24:10).

Нӕ эрӕйы 33 азы Фӕндзайӕм бон Иерусалимы Йесойы ахуыргӕнинӕгтӕ, уыимӕ йӕ мад Марийӕ ӕмӕ йе ’фсымӕртӕ дӕр, куы ӕрӕмбырд сты, уӕд, ӕвӕццӕгӕн, Иоаннӕ дӕр уым уыди (Хъуыд. 1:12–14). Лука Ирод Антипӕйы тыххӕй цы лыстӕг хабӕрттӕ ныффыста, уыдон ын, чи зоны, Иоаннӕ радзырдта. Цӕмӕн ис афтӕ зӕгъӕн? Уымӕн ӕмӕ Иоаннӕйы лӕг уыди паддзахы хӕдзары уынаффӕгӕнӕг, стӕй йӕ ном ӕрмӕстдӕр Лукайы чиныджы ӕмбӕлы (Лук. 8:3; 9:7–9; 23:8–12; 24:10).

Иоаннӕ нын бирӕ цӕмӕйдӕрты у фӕзминаг. Уыцы сылгоймаг, Йесойӕн лӕггад кӕнгӕйӕ, йӕ бон цы уыд, уый арӕзта. Иоаннӕйӕн ӕхсызгон уыди Йесойӕн, йӕ дыууадӕс апостолӕн ӕмӕ йӕ иннӕ ахуыргӕнинӕгтӕн ӕхцайӕ ӕххуыс кӕнын, цӕмӕй сӕ бон уыдаид алы рӕттӕм цӕуын ӕмӕ иумӕ хъусын кӕнын. Уый Йесойыл зындзинӕдты рӕстӕг дӕр иузӕрдион уыд. Уӕдӕ хорз уыдзӕн, абон дӕр чырыстон сылгоймӕгтӕн Иоаннӕйы хуызӕн зӕрдӕйы уаг куы уа, уӕд.