1. Уырнындзинад куыд ахсджиаг у, уый тыххӕй цы зӕгъӕн ис? (Кӕс нывмӕ статьяйы райдианы.)

ЧИ ЗОНЫ, искуы ахъуыды кодтай: «Цымӕ мӕ Йегъовӕ стыр бӕллӕхы рӕстӕг фервӕзын кӕндзӕн?» Кӕй зӕгъын ӕй хъӕуы, нӕ ирвӕзындзинад бирӕ хъуыддӕгтыл баст у, фӕлӕ дзы иу уӕлдай ахсджиаг у, ӕмӕ уый кой кодта апостол Павел. Павел загъта: «Ӕнӕ уырнындзинадӕй... Хуыцауы зӕрдӕ барухс кӕнӕн нӕй» (Дзут. 11:6). Ацы ныхӕстӕ, чи зоны, уадиссаг макӕмӕ фӕкӕсой, фӕлӕ хабар афтӕ у, ӕмӕ «уырнындзинад се ’ппӕтмӕ нӕй», ӕндӕр ныхӕстӕй, алкӕй нӕ фӕнды уыцы миниуӕг йӕ удыхъӕды фидар кӕнын (2 Фес. 3:2). Ацы дыууӕ стихы фӕрцы хуыздӕр ӕмбарӕм, уырнындзинад фидар кӕнын куыд ахсджиаг у, уый.

2, 3. а) Уырнындзинады тыххӕй Петры ныхӕстӕй цы базонӕн ис? б) Цавӕр фарстатӕм ӕркӕсдзыстӕм?

² Апостол Петр дзырдта «фӕлвӕрд уырнындзинады» тыххӕй. (Бакӕс 1 Петры 1:7.) Стыр бӕллӕх бонӕй-бонмӕ ӕввахсдӕр кӕны, ӕмӕ нӕ, кӕй зӕгъын ӕй хъӕуы, фӕнды, цӕмӕй нӕ уырнындзинады фӕрцы «нӕ цард бахъахъхъӕнӕм» (Дзут. 10:39). Уӕдӕ хъуамӕ ӕппӕт хъарутӕй архайӕм нӕ уырнындзинад фидар кӕныныл, цӕмӕй нӕ Паддзах Йесо Чырысти куы раргом уа, уӕд мах дӕр схорзӕхджын кӕна. Ӕмӕ иухатт иу нӕлгоймаг Йесойӕ фылдӕр уырнындзинад куыд куырдта, афтӕ мах дӕр, чи зоны, Хуыцауӕй фӕкурӕм: «Уырнындзинад мын кӕм нӕ фаг кӕны, уым... мын ыл бафтау» (Мар. 9:24). Кӕнӕ та, чи зоны, Йесойы апостолтау  фӕзӕгъӕм: «Бафтау нын нӕ уырнындзинадыл» (Лук. 17:5).

³ Ацы статьяйы ӕркӕсдзыстӕм цалдӕр фарстамӕ: нӕ бон куыд у нӕ уырнындзинад фидар кӕнын? Цӕмӕй бӕрӕг уыдзӕн, нӕ уырнындзинад фидар кӕй у? Кӕцӕй йӕ зонӕм, Хуыцауӕй фылдӕр уырнындзинад куы курӕм, уӕд нӕ кӕй фехъусдзӕн?

4. Нӕ уырнындзинад фидар кӕнынмӕ нӕ кӕй цӕвиттонтӕ сразӕнгард кӕндзысты?

⁴ Библийы фыст ис: «Раздӕр цыдӕриддӕр фыст ӕрцыд, уый та фыст ӕрцыд махӕн зонд бацамонынӕн» (Ром. 15:4). Хуыцауы Ныхасы бакӕсӕн ис, йӕ уырнындзинадӕй фӕзминаг чи у, уыдоны тыххӕй. Зӕгъӕм, Авраам, Саррӕ, Исахъ, Иаков, Моисей, Раав, Гедеон, Варак ӕмӕ ма бирӕ ӕндӕр адӕймӕгты цӕвиттонтӕ нӕ баразӕнгард кӕндзысты, цӕмӕй нӕ уырнындзинад фидар кӕнӕм (Дзут. 11:32–35). Уымӕй уӕлдай ма, нӕ рӕстӕджы чи цӕры, уыцы хотӕ ӕмӕ ’фсымӕрты диссаджы уырнындзинады тыххӕй куы кӕсӕм, уӕд нӕ уый дӕр разӕнгард кӕндзӕн, цӕмӕй нӕ уырнындзинад фидар кӕныныл ӕппӕт хъарутӕй архайӕм *.

5. Илийа куыд равдыста, йӕ уырнындзинад фидар кӕй у, уый ӕмӕ мах цӕуыл хъуамӕ ахъуыды кӕнӕм?

⁵ Библийы цы цӕвиттонтӕ ис, уыдонӕй иу у пехуымпар Илийа. Илийа Йегъовӕйыл куыд тынг ӕууӕндыд, уый бӕрӕг у, зӕгъӕм, мӕнӕ ацы хабӕрттӕй: 1) Илийа паддзах Ахавӕн фехъусын кодта, Йегъовӕйы фӕндонмӕ гӕсгӕ хус рӕстӕг кӕй скӕндзӕн, ӕмӕ йын фидарӕй загъта: «Израилы Хуыцау Йегъовӕйы раз, ӕз кӕмӕн лӕггад кӕнын, уыцы удӕгас Хуыцауы раз дын сомы кӕнын: ацы цалдӕр азы зӕххыл нӕдӕр ӕртӕх уыдзӕн, нӕдӕр къӕвда ӕруардзӕн» (1 Пад. 17:1). 2) Илийа фидарӕй ӕууӕндыд, хус рӕстӕг куы скӕна, уӕд Йегъовӕ ууыл дӕр ӕмӕ йӕ иннӕ лӕггадгӕнджытыл дӕр кӕй батыхсдзӕн (1 Пад. 17:4, 5, 13, 14). 3) Илийа ӕппындӕр нӕ дызӕрдыг кодта, Йегъовӕ идӕдз сылгоймагӕн йӕ лӕппуйы кӕй райгас кӕндзӕн, ууыл (1 Пад. 17:21). 4) Фидарӕй ӕууӕндыд, Кармилы хохыл цы нывонд ӕрхаста, ууыл Йегъовӕ уӕлӕрвтӕй арт кӕй ӕруадздзӕн (1 Пад. 18:24, 37). 5) Къӕвда кӕй ӕруардзӕн, уый бӕрӕг дӕр куы нӕма уыд, уӕд Илийа Ахавӕн фидарӕй загъта: «Ацу, хӕр ӕмӕ нуаз, уымӕн ӕмӕ тӕрккъӕвдайы уынӕр хъуысы» (1 Пад. 18:41). Хорз уаид, ацы хабӕрттӕ кӕсгӕйӕ нӕ алчидӕр куы ахъуыды кӕнид: «Цымӕ мӕнӕн дӕр мӕ уырнындзинад Илийайы уырнындзинады хуызӕн фидар у?»

6. Нӕ уырнындзинад фидар кӕнынӕн нӕ Йегъовӕйӕ цы хъӕуы курын?

⁶ Махӕн нӕ бон нӕу нӕ уырнындзинад нӕхи хъаруйы фӕрцы фидар кӕнын. Уырнындзинад у, адӕймагмӕ Хуыцауы сыгъдӕг тыхы фӕрцы цы миниуджытӕ фӕзыны, уыдонӕй иу (Гал. 5:22). Уӕдӕ зондыл дзурӕг уыдзӕн, Йесойы уынаффӕмӕ куы байхъусӕм ӕмӕ Хуыцауӕй алкӕддӕр сыгъдӕг тых куы курӕм. Йесо нын зӕрдӕ бавӕрдта, Йегъовӕ кӕй «ратдзӕн сыгъдӕг тых, чи дзы куры, уыдонӕн» (Лук. 11:13).

7. Нӕ уырнындзинад фидар кӕнын нӕ бон куыд у, уый цӕвиттоны руаджы бамбарын кӕн.

⁷ Адӕймаг Хуыцауыл куы баууӕнда, уӕд хъуамӕ дарддӕр дӕр йӕ уырнындзинад фидар кӕна. Уырнындзинад ис артимӕ абарӕн. Арт куы скӕнӕм, уӕд райдианы тынг фӕсудзы. Фӕлӕ дзы суг куы не ’вӕрӕм, уӕд сабыргай ахуысдзӕн ӕмӕ дзы ӕппынфӕстаг фӕнык йеддӕмӕ ницыуал баззайдзӕн. Ӕдзухдӕр дзы суг куы калӕм, уӕд та судздзӕн ӕмӕ судздзӕн. Афтӕ у нӕ уырнындзинады хабар дӕр. Алы бон дӕр Хуыцауы Ныхас куы кӕсӕм ӕмӕ йыл куы хъуыды кӕнӕм, уӕд Библи дӕр ӕмӕ Йегъовӕйы дӕр тынгдӕр уарздзыстӕм. Ӕмӕ  уый фӕрцы нӕ уырнындзинад хъахъхъӕндзыстӕм ӕмӕ йӕ фидардӕр кӕндзыстӕм.

8. Нӕ уырнындзинад фидар кӕнынӕн нын цы баххуыс кӕндзӕн?

⁸ Дӕ уырнындзинад фидар кӕнынӕн ма дын цы баххуыс кӕндзӕн? Донаргъуыды размӕ цы базыдтай, уый фагыл ма нымай (Дзут. 6:1, 2). Дарддӕр дӕр иртас, Библийы пехуымпарӕдтӕй чи сӕххӕст, уыдон. Уый дын баххуыс кӕндзӕн, цӕмӕй дӕ уырнындзинад фидар кӕнай. Дӕ бон ма у Хуыцауы Ныхасы фӕрцы бамбарын, дӕ уырнындзинад ӕцӕгдӕр фидар у ӕви нӕ. (Бакӕс Иаковы 1:25; 2:24, 26.)

9, 10. Нӕ уырнындзинад куыд фидар кӕны: а) хорз ӕмбӕлтты фӕрцы? б) ӕмбырдты фӕрцы? в) хъусын кӕныны фӕрцы?

⁹ Апостол Павел чырыстӕттӕн загъта, сӕ бон кӕй у, цӕмӕй «кӕрӕдзийы уырнындзинадӕй бафидар» уой (Ром. 1:12). Уый куыд ӕмбаргӕ у? Нӕ рӕстӕг нӕ хотӕ ӕмӕ не ’фсымӕртимӕ, уӕлдайдӕр та «фӕлвӕрд уырнындзинад» кӕмӕн ис, уыдонимӕ, куы фервитӕм, уӕд нӕ бон вӕййы кӕрӕдзи уырнындзинад фидар кӕнын (Иак. 1:3). Ӕвзӕр ӕмбӕлттӕ уырнындзинад халгӕ кӕнынц, хорз ӕмбӕлттӕ та – фидар (1 Кор. 15:33). Ӕмӕ нын Хуыцау дӕр уымӕн дзуры, цӕмӕй «не ’мбырдтӕ ма цух кӕнӕм, фӕлӕ кӕрӕдзийы ныфсыл ныфс ӕфтауӕм». (Бакӕс Дзуттӕгтӕм 10:24, 25.) Уымӕй уӕлдай ма ӕмбырды цы уынаффӕтӕ фехъусӕм, уыдоны фӕрцы дӕр нӕ уырнындзинад фидар кӕны. Библийы кӕсӕм: «Уӕдӕ адӕймагмӕ уырнындзинад уӕд фӕзыны, ӕмӕ уыцы хабар куы фехъусы» (Ром. 10:17). Уымӕ гӕсгӕ ахъуыды кӕнӕм: «Ӕмбырдтӕм ӕдзухдӕр цӕуын?»

¹⁰ Нӕ уырнындзинад ма фӕфидар кӕнӕм, адӕмӕн хорз хабар куы фӕхъусын кӕнӕм, уӕд дӕр. Фыццаг чырыстӕттау мах дӕр ахуыр кӕнӕм, цӕмӕй нӕ ныфс Йегъовӕйыл дарӕм ӕмӕ цавӕрфӕнды уавӕры дӕр уӕндонӕй дзурӕм (Хъуыд. 4:17–20; 13:46).

11. Халев ӕмӕ Йесо Навинӕн фидар уырнындзинад цӕй фӕрцы уыди, ӕмӕ сӕ нӕ бон куыд у бафӕзмын?

¹¹ Йегъовӕ нын кӕй ӕххуыс кӕны ӕмӕ нын нӕ куывдтытӕ кӕй хъусы, уый куы фӕуынӕм, уӕд дӕр нӕ уырнындзинад фӕфидар кӕны. Афтӕ уыди Халев ӕмӕ Йесо Навины хабар дӕр. Йегъовӕйыл кӕй ӕууӕндыдысты, уый бӕрӕг уыди, Зӕрдӕвӕрд зӕхх сгарынмӕ куы ацыдысты, уӕд. Уый фӕстӕ дӕр, Йегъовӕ сын алы хатт дӕр куыд ӕххуыс кодта, уый уынгӕйӕ сӕ уырнындзинад фидарӕй-фидардӕр кодта. Уӕдӕ диссаг нӕу, Йесо Навин израилӕгтӕн фидарӕй афтӕ цӕмӕн загъта: «Уӕ Хуыцау Йегъовӕ уын цы хорз ныхӕстӕ загъта, уыдонӕй иу дӕр... нӕ фӕмӕнг – иууылдӕр сӕххӕст сты». Стӕй ма загъта: «Уӕдӕ Йегъовӕйӕ тӕрсут ӕмӕ йын ӕнаиппӕй ӕмӕ рӕстӕй лӕггад кӕнут». Ӕмӕ ма йӕ ныхӕстӕм бафтыдта: «Ӕз ӕмӕ мӕ бинонтӕ лӕггад кӕндзыстӕм Йегъовӕйӕн» (Йес. Н. 23:14; 24:14, 15). Нӕ ныфс Йегъовӕйыл куы фӕдарӕм ӕмӕ нын куыд ӕххуыс кӕны, уый куы фӕуынӕм, уӕд нӕ уырнындзинад фидардӕр фӕкӕны (Пс. 34:8).

12. Фидар уырнындзинад нын кӕй ис, уый цӕмӕй бӕрӕг уыдзӕн?

¹² Фидар уырнындзинад нын кӕй ис, уый цӕмӕй бӕрӕг уыдзӕн? Ахуыргӕнинаг Иаков загъта: «Ӕз та дын мӕ уырнындзинад равдисдзынӕн мӕ хъуыддӕгтӕй» (Иак. 2:18). Уӕдӕ, нӕ уырнындзинад фидар кӕй у, уый бӕрӕг уыдзӕн нӕ хъуыддӕгтӕй. Ӕркӕсӕм-ма цалдӕр цӕвиттонмӕ.

13. Цӕмӕн ис афтӕ зӕгъӕн, ӕмӕ, кӕй хъусын кӕнӕм, уымӕй бӕрӕг у нӕ уырнындзинад?

¹³ Нӕ уырнындзинад равдисынӕн диссаджы мадзал у хъусын кӕнын. Цӕмӕн ис афтӕ зӕгъӕн? Уымӕн ӕмӕ куы фӕхъусын кӕнӕм, уӕд бӕрӕг вӕййы, фидарӕй нӕ кӕй уырны, ацы фыддунейы кӕрон тагъд кӕй уыдзӕн ӕмӕ кӕй «нӕ байрӕджы кӕндзӕн» (Ав. 2:3). Нӕ уырнындзинад цы уавӕры ис, уый бамбарыны тыххӕй ахъуыды кӕнӕм: «Хъусын кӕнын мын цас ахсджиаг у? Мӕ бон цыдӕриддӕр у, уый аразын, цӕмӕй иннӕтӕн Хуыцауы тыххӕй дзурон? Мӕ бон фылдӕр лӕггад кӕнын куыд  уа, уымӕн фадӕттӕ фӕагурын?» (2 Кор. 13:5). Ирвӕзындзинады тыххӕй «ӕргом куы дзурӕм», ома хорз хабар куы хъусын кӕнӕм, уӕд бӕрӕг уыдзӕн, нӕ уырнындзинад фидар кӕй у. (Бакӕс Ромӕгтӕм 10:10.)

14, 15. а) Нӕ уырнындзинад ма ноджыдӕр цӕмӕй уыдзӕн бӕрӕг? б) Радзур, фидар уырнындзинад хъуыддӕгтӕй чи равдыста, ахӕм чырыстӕтты тыххӕй.

¹⁴ Нӕ уырнындзинад ма бӕрӕг вӕййы, зындзинӕдты рӕстӕг нӕ къухтӕ куы не ’руадзӕм, уӕд дӕр. Кӕд исты низӕй фӕрынчын стӕм, нӕ ныфс цӕйдӕр тыххӕй асаст, мӕгуыр цард кӕнӕм кӕнӕ ӕндӕр зындзинӕдтыл ӕмбӕлӕм, уӕд хъуамӕ ма дызӕрдыг кӕнӕм, Йегъовӕ ӕмӕ нын Йесо «бахъуаджы сахат» кӕй баххуыс кӕндзысты, ууыл (Дзут. 4:16). Йегъовӕйӕ ӕххуыс куы фӕкурӕм, уӕд уый дӕр уырнындзинадыл дзурӕг вӕййы. Чырысти загъта, нӕ бон кӕй у Йегъовӕйӕ алы боны фаг къӕбӕр курын (Лук. 11:3). Библийы цы хабӕрттӕ ис фыст, уыдонӕй бӕрӕг у, Йегъовӕйӕн йӕ бон кӕй у, цӕмӕй ныл батыхса. Зӕгъӕм, Израилы хус рӕстӕг куы скодта, уӕд Йегъовӕ Илийайы дзул ӕмӕ дон цух нӕ уагъта. Библийы кӕсӕм: «Ӕмӕ йын алы райсом дӕр ӕмӕ алы изӕр дӕр халӕттӕ хастой дзул ӕмӕ дзидза, дон та нызта цӕугӕдонӕй» (1 Пад. 17:3–6). Мах дӕр уырны, Йегъовӕ нын алкӕддӕр кӕй дӕтдзӕн, ӕнӕмӕнг нӕ цы хъӕуы, уый.

¹⁵ Мах зонӕм, Библийы уагӕвӕрдтӕм гӕсгӕ куы цӕрӕм, уӕд нӕ бон кӕй уыдзӕн нӕ бинонты дарын. Азийӕ иу моймӕдзыд хо, Ребеккӕ, зӕгъгӕ, радзырдта, йӕ бинонтӕ Матфейы 6:33 ӕмӕ Ӕмбисӕндты 10:4 фыст уагӕвӕрдтӕй куыд спайда кодтой, уый тыххӕй. Хо загъта, йӕ лӕг кӕй ӕмбӕрста, йӕ куысты тыххӕй сын тӕссаг кӕй у, Йегъовӕйӕ куы адард уой, уымӕй, ӕмӕ йӕ куыст ныууагъта. Фӕлӕ сӕ цыппар сывӕллоны дарын хъуыди. Ӕмӕ уӕд райдыдтой адджинӕгтӕ кӕнын ӕмӕ сӕ уӕй кӕнын. Сӕ фыдӕбоны фӕрцы сӕ бон уыди сӕ бинонты дарын. Ребеккӕ загъта: «Мах алкӕддӕр ӕмбӕрстам, Йегъовӕ нӕ фарсмӕ кӕй ис. Ӕххормаг никуы баззадыстӕм». Ахӕм хабӕрттӕ дын дӕ уырнындзинад нӕ фидар кӕнынц?

16. Нӕ ныфс Хуыцауыл кӕй дарӕм, уый нын цы пайда у?

¹⁶ Йегъовӕйы разамындмӕ куы хъусӕм, уӕд  хъуамӕ макуы дызӕрдыг кӕнӕм, кӕй нын ӕххуыс кӕндзӕн, ууыл. Пехуымпар Аввакум цы загъта, уый кой ракодта Павел дӕр, афтӕ куы ныффыста, зӕгъгӕ, «рӕстгӕнӕг цӕрдзӕн йӕ уырнындзинады фӕрцы» (Гал. 3:11; Ав. 2:4). Уымӕ гӕсгӕ хъуамӕ фидарӕй ӕууӕндӕм, ӕцӕгдӕр нын кӕй бон у баххуыс кӕнын, ууыл – Хуыцауыл. Павел нын нӕ зӕрдыл лӕууын кӕны: «Хуыцау нӕ мидӕг цы тыхӕй архайы, уый фӕрцы йӕ бон у, цы дзы курӕм йе та ӕрмӕст хъуыды дӕр цӕуыл акӕнӕм, уымӕй бирӕ фылдӕр саразын» (Еф. 3:20). Йегъовӕйы лӕггадгӕнджытӕ ӕппӕт хъарутӕй архайынц, цӕмӕй йын йӕ фӕндон ӕххӕст кӕной, фӕлӕ зонынц, сӕхи бон алцы кӕй нӕу, уый. Мах стыр бузныг стӕм Хуыцауӕй, нӕ фарсмӕ кӕй ис ӕмӕ нын нӕ фыдӕбонӕн кӕй арфӕ кӕны, уый тыххӕй.

17. а) Чырысти йӕ апостолты курдиат куыд сӕххӕст кодта? б) Цӕуылнӕ дызӕрдыг кӕнӕм, Хуыцауӕй фылдӕр уырнындзинад куы курӕм, уӕд нӕ кӕй фехъусдзӕн, ууыл?

¹⁷ Цы хабӕрттыл аныхас кодтам, уыдоныл хъуыды кӕнгӕйӕ мах дӕр апостолтау куыннӕ фӕнды зӕгъын: «Бафтау нын нӕ уырнындзинадыл» (Лук. 17:5). Чырысти йӕ апостолтӕн сӕ курдиат сӕххӕст кодта нӕ эрӕйы 33 азы Фӕндзайӕм боны: сыгъдӕг тых сыл ӕрцыд ӕмӕ сӕ бон баци, Хуыцаумӕ адӕмы тыххӕй цы фӕнд ис, уый бамбарын. Уый сын сӕ уырнындзинад бафидар кодта. Ӕмӕ уый фӕрцы райдыдтой, уӕдмӕ чи никуыма уыд, ахӕм стыр куыст кӕнын – хорз хабар ӕппӕт адӕмӕн дӕр хъусын кӕнын (Кол. 1:23). Цымӕ Хуыцауӕй фылдӕр уырнындзинад куы курӕм, уӕд нӕ фехъусдзӕн? Библи нын зӕрдӕ ӕвӕры: «[Хуыцауӕй] йӕ фӕндонмӕ гӕсгӕ цыфӕнды ма ракурӕм,– хъусы нӕ» (1 Иоан. 5:14).

18. Йӕ уырнындзинад чи фидар кӕны, уыдонӕн Йегъовӕ куыд арфӕ кӕны?

¹⁸ Йегъовӕйӕн ӕхсызгон вӕййы, нӕ ныфс ыл ӕгасӕй дӕр куы фӕдарӕм, уӕд. Фылдӕр уырнындзинад дзы куы курӕм, уӕд нӕ фехъусдзӕн. Ӕмӕ нӕ уырнындзинад фидар куы уа, уӕд та «Хуыцауы паддзахадмӕ бацӕуыны аккагыл» нымад ӕрцӕудзыстӕм (2 Фес. 1:3, 5).