ДӔУМӔ гӕсгӕ, Фредерик ӕмӕ Линӕн сӕ бӕллӕх цӕй мидӕг уыд? Сӕ дыууӕмӕ дӕр уыд хорз фӕндтӕ. Сӕ дыууӕ дӕр Хуыцауы уарзтой. Дыууӕйӕ дӕр ӕмбӕрстой, Библи иумӕ ахуыр кӕнын кӕй хъӕуы. Фӕлӕ сын ӕххуыс цы хъуамӕ фӕуыдаид, уый сын къуылымпыйы хос сси. Библи иумӕ ахуыр кодтой, фӕлӕ кӕрӕдзи уырнындзинад нӕ фидар кодтой.

Фидар уырнындзинад цы у? Бинонтӕ кӕрӕдзи уырнындзинад цӕмӕн хъуамӕ фидар кӕной? Бинонтӕ цавӕр цӕлхдуртыл сӕмбӕлынц ӕмӕ сӕ бон куыд у сӕ сӕрты хизын?

Библи зӕгъы, адӕм цардмӕ иухуызон цӕстӕй кӕй нӕ кӕсынц (Иудӕйы 18, 19). Зӕгъӕм, Библийы фысджытӕй иу, Павел, дзырдта, цӕмӕй хицӕн кӕнынц, Хуыцауы сыгъдӕг тыхы разамындмӕ чи хъусы ӕмӕ йӕ буары фӕндты фӕдыл чи цӕуы, уыдон. Йӕ буары фӕндты фӕдыл чи цӕуы, уыдон сӕхицӕй дарддӕр никӕуыл хъуыды кӕнынц. Ахӕм адӕм Хуыцауы закъӕттӕм гӕсгӕ нӕ цӕрынц, фӕлӕ аразынц, сӕхи цӕсты раст цы у, уый (1 Коринфӕгтӕм 2:14; Галатӕгтӕм 5:19, 20).

Хуыцауы сыгъдӕг тыхы разамындмӕ чи хъусы, уый Хуыцауы закъӕттӕн аргъ кӕны. Уымӕн Йегъовӕ Хуыцау у йе ’мбал, ӕмӕ фӕархайы, цӕмӕй йын йӕ миниуджытӕ фӕзма (Ефесӕгтӕм 5:1). Ахӕм адӕймаг вӕййы  хӕларзӕрдӕ, лӕмбынӕг ӕмӕ фӕлмӕн (Рацыд 34:6). Хуыцаумӕ фӕхъусы, ӕнцон ын куы нӕ вӕййы, уӕд дӕр (Псалом 15:1, 4). Канадӕйӕ иу лӕг Дарен йӕ бинойнагимӕ цӕры 35 азы ӕмӕ зӕгъы: «Мӕнмӕ афтӕ кӕсы, ӕмӕ ӕцӕг чырыстон адӕймаг кӕддӕриддӕр хъуыды кӕны, йӕ ныхӕстӕ ӕмӕ йӕ хъуыддӕгтӕ Йегъовӕимӕ йӕ ахастытыл куыд фӕзындзысты, ууыл». Йӕ бинойнаг Джейн та зӕгъы: «Ӕцӕг чырыстон сылгоймаг хъуамӕ алы бон дӕр, Хуыцауы сыгъдӕг тых цы дыргъ дӕтты, уый йӕ удыхъӕды фидар кӕна» (Галатӕгтӕм 5:22, 23).

Кӕй зӕгъын ӕй хъӕуы, цӕмӕй адӕймаг Хуыцауы сыгъдӕг тыхы разамындмӕ хъусын сахуыр уа, уый тыххӕй йӕ ӕнӕмӕнг чындзы цӕуын кӕнӕ ус курын нӕ хъӕуы. Библи дзуры, алы адӕймагӕн дӕр йӕ хӕс кӕй у, цӕмӕй Хуыцауы хуыздӕр базона ӕмӕ йӕ фӕзма (Хъуыддӕгтӕ 17:26, 27).

Лӕг ӕмӕ ус кӕрӕдзи уырнындзинад цӕмӕн хъуамӕ фидар кӕной? Ӕркӕсӕм ахӕм цӕвиттонмӕ: дыууӕ адӕймаджы фӕнды сӕ цӕхӕрадоны халсартӕ ныссадзын. Сӕ иу зӕгъы, ныр сӕ садзын кӕй хъӕуы, иннӕ та зӕгъы, фӕстӕдӕр садзгӕ кӕй сты. Иуы фӕнды, цӕмӕй сыл хъацӕнтӕ (удобрение) ныккӕна, иннӕ та фидарӕй зӕгъы, ӕппындӕр сыл ницы кӕнын хъӕуы, зӕгъгӕ. Сӕ иуы фӕнды алы бон дӕр цӕхӕрадоны кусын, иннӕйы та нӕ фӕнды. Афтӕмӕй, гӕнӕн ис, сӕ цӕхӕрадоны исты ӕрзайа, фӕлӕ сӕ ныхас кӕрӕдзийыл куы бадид ӕмӕ иумӕ куы кусиккой, уӕд сын ноджы фылдӕр халсартӕ ӕрзаид.

Лӕг ӕмӕ ус дӕр уыцы дыууӕ адӕймаджы хуызӕн сты. Ӕрмӕст сӕ иу куы архайа йӕ уырнындзинад фидар кӕныныл, уӕд, гӕнӕн ис, кӕрӕдзи хуыздӕр ӕмбарой (1 Петры 3:1, 2). Фӕлӕ цас хуыздӕр уаид, дыууӕйӕ дӕр Хуыцауы закъӕттӕм гӕсгӕ куы цӕриккой ӕмӕ кӕрӕдзийӕн куы ’ххуыс кӕниккой Хуыцауӕн лӕггад кӕнын! «Дыууӕ адӕймагӕн, иунӕгӕй чи у, уымӕй хуыздӕр у»,– ныффыста паддзах Соломон. Цӕмӕн? «Уымӕн ӕмӕ сӕ фыдӕбон дзӕгъӕлы нӕу. Сӕ иу куы ахауа, уӕд иннӕ схӕцдзӕн йе ’мбалыл» (Екклесиаст 4:9, 10).

Ды дӕр, ӕвӕццӕгӕн, архайыс, цӕмӕй дӕ цардӕмбалимӕ кӕрӕдзи уырнындзинад фидар кӕнат. Фӕлӕ цӕхӕрадонимӕ цы цӕвиттон ӕрхастам, уым куыд уыди, афтӕмӕй ӕрмӕст фӕндтӕ фаг не сты. Ӕркӕсӕм, адӕймаг цавӕр цӕлхдуртыл сӕмбӕлы, уыдонӕй дыууӕмӕ ӕмӕ сӕ сӕрты куыд хизӕн ис, уымӕ.

1-АГ ЦӔЛХДУР. Рӕстӕг нын нӕй.

«Мӕ цардӕмбал мӕм куыстмӕ бацӕуы изӕры авд сахатыл,– зӕгъы Сью, нырма ӕрӕджы смой кодта.– Хӕдзармӕ куы ӕрбацӕуӕм, уӕд нӕм бирӕ куыстытӕ фенхъӕлмӕ кӕсы. Ӕмӕ адӕймагӕн йӕ зӕрдӕ ӕмӕ йӕ зонд тох кӕнын райдайынц: зонд фӕзӕгъы, ӕнӕмӕнг кӕй хъӕуы рӕстӕг рахицӕн кӕнын, цӕмӕй Хуыцауы тыххӕй фылдӕр базонӕм, зӕрдӕ та фӕдзуры, баулӕф, зӕгъгӕ».

Цы саразӕн ис. Уавӕртӕм гӕсгӕ архайут ӕмӕ ӕмвӕнд-ӕмзонд ут. Сью ма загъта: «Мӕ цардӕмбалимӕ сфӕнд кодтам, райсомӕй-иу раздӕр кӕй сыстдзыстӕм, цӕмӕй-иу куыстмӕ ацӕуыны размӕ иумӕ Библийӕ скъуыддзаг бакӕсӕм ӕмӕ йыл аныхас кӕнӕм. Мӕ цардӕмбал ма мын феххуыс кӕны хӕдзары куыстытӕ кӕнынмӕ дӕр, уый фӕрцы мын фӕзыны сӕрибар рӕстӕг ӕмӕ йӕ иумӕ фервитӕм». Афтӕ кӕй кӕнынц, уый сын цы пайда у? Сьюйы цардӕмбал Эд зӕгъы: «Сьюимӕ ӕдзух Библийыл кӕй фӕныхас кӕнӕм, уый фӕрцы нын бирӕ ӕнцондӕр у нӕ зындзинӕдтӕ скъуыддзаг кӕнын, ӕмӕ къаддӕр мӕт кӕнӕм».

Кӕрӕдзиимӕ ныхас кӕнынӕй уӕлдай ма ахсджиаг у, цӕмӕй-иу алы бон дӕр цалдӕр минут ссарат Хуыцаумӕ иумӕ кувынӕн. Уый цы пайда у? Рейн йӕ бинойнагимӕ цӕры 16 азы ӕмӕ зӕгъы: «Ӕрӕджы мӕ бинойнагимӕ кӕрӕдзи нал ӕмбӕрстам. Фӕлӕ-иу рӕстӕг рахицӕн кодтам, цӕмӕй-иу алы изӕр дӕр иумӕ Хуыцаумӕ куывтаиккам ӕмӕ йын нӕ тыхстытӕ дзырдтаиккам. Иумӕ кӕй куывтам, уый нын баххуыс кодта нӕ зындзинӕдты сӕрты ахизынӕн, ӕмӕ уый фӕрцы кӕрӕдзимӕ ӕнгомдӕр баистӕм».

2-АГ ЦӔЛХДУР. Ӕмхуызон не стӕм.

«Никуы уарзтон кӕсын»,– загъта Тони. Йӕ бинойнаг Натали та загъта: «Ӕз бирӕ уарзын кӕсын ӕмӕ цы базонын, ууыл ныхас кӕнын. Иуӕй-иу хатт мӕм афтӕ фӕкӕсы, цыма мӕ Тони иугыццыл тӕрсгӕ дӕр фӕкӕны, Библийӕ истӕуыл куы фӕныхас кӕнӕм, уӕд».

Цы саразӕн ис. Кӕрӕдзийӕн ӕххуыс кӕнут, иу уӕ иннӕмӕй йӕхи уӕлдӕр ма кӕнӕд кӕнӕ йӕ ма ӕфхӕрӕд. Дӕ цардӕмбалӕй куы ӕппӕлай, уӕд дзы ныфс бауадздзынӕ. «Мӕ бинойнаг Библийыл афтӕ зӕрдиагӕй фӕныхас кӕны, ӕмӕ хатт стыхсын,– зӕгъы Тони.– Раздӕр-иу мӕ нӕ фӕндыд йемӕ Библийыл ныхас кӕнын. Фӕлӕ мын Натали тынг баххуыс кодта. Ныр алы къуыри дӕр иумӕ Библийыл фӕныхас кӕнӕм ӕмӕ бамбӕрстон, тӕрсын кӕй ницӕмӕй хъӕуы. Ӕхсызгон мын у йемӕ уыдӕттыл ныхас кӕнын. Уый фӕрцы кӕрӕдзи хуыздӕр ӕмбарӕм ӕмӕ не ’хсӕн ис фарн».

Бирӕ бинонтӕ бамбӕрстой, сӕ цард кӕй фӕхуыздӕр, алы къуыри дӕр рӕстӕг кӕй рахицӕн кӕнынц иумӕ Библи кӕсынӕн ӕмӕ йӕ ахуыр кӕнынӕн, уый тыххӕй. Дӕ зӕрдыл дар: Библийы цы уынаффӕтӕ ис, уыдон-иу дӕхимӕ ахӕсс, дӕ цардӕмбалмӕ нӕ, фӕлӕ (Галатӕгтӕм 6:4). Кӕрӕдзиимӕ-иу цы хъуыддӕгты не сразы уат, уыдоныл ахуыры рӕстӕг ма ныхас кӕнут. Цӕуылнӕ?

Ахъуыды-ма кӕн, дӕ бинонтимӕ хӕрыныл куы ӕрбадай, уӕд дӕ хъӕдгом бӕттынмӕ бавналдзынӕ? Кӕй зӕгъын ӕй хъӕуы, нӕ. Иннӕтӕн сӕ хӕрд фенад кӕндзынӕ. Хуыцауы фӕндон базонын ӕмӕ йӕ ӕххӕст кӕнын Йесо абарста хӕринагимӕ (Матфейы 4:4; Иоанны 4:34). Библийы ахуыры рӕстӕг алы хатт дӕр дӕ зӕрдӕйы хъӕдгӕмттыл куы дзурай, уӕд дӕ цардӕмбалӕн уыцы ахуыр фенад кӕндзынӕ. Зындзинӕдтыл дзурын хъӕуы, фӕлӕ уыдонӕн ӕндӕр рӕстӕг хицӕн кӕнын хъӕуы (Ӕмбисӕндтӕ 10:19; 15:23).

Куы тауат, ома уӕ уырнындзинад куы фидар кӕнат, уӕд ӕркӕрддзыстут фарн ӕмӕ амондджын цард. Хуыцауы Ныхас фидарӕй зӕгъы: «Адӕймаг цы байтауа, уый ӕркӕрддзӕн» (Галатӕгтӕм 6:7).

Статьяйы райдианы цы Фредерик ӕмӕ Лины кой кодтам, уыдон базыдтой, ацы стихы цы фыст ис, уый ӕцӕгдӕр афтӕ кӕй у. Уыдон ныр 45 азы цӕрынц иумӕ ӕмӕ амондджын сты, уымӕн ӕмӕ архайынц сӕ уырнындзинад фидар кӕныныл. «Мӕ бинойнагӕн-иу уайдзӕф кодтон, йӕ хъуыдытӕ ӕргом кӕй нӕ дзырдта, уый тыххӕй.– дзуры Фредерик.– Фӕлӕ рӕстӕг рацыд, ӕмӕ бамбӕрстон, афтӕ кӕнын раст кӕй нӕу ӕмӕ мӕн дӕр ӕндӕрхуызон архайын кӕй хъӕуы». Лин зӕгъы: «Уыцы рӕстӕг нын ӕппӕты тынгдӕр баххуыс, Йегъовӕ Хуыцауы зӕрдиагӕй кӕй уарзӕм, уый. Цас цӕрӕм, уыйбӕрц алы къуыри дӕр иумӕ Библи ахуыр кӕнӕм ӕмӕ иумӕ кувӕм. Фредерик архайы, цӕмӕй йӕ удыхъӕд хуыздӕр кӕна ӕмӕ мын уый тыххӕй ӕнцондӕр у йӕ уарзын».