Ацы статьяйы ӕвзӕрст цӕуынц, ӕвӕццӕгӕн, ды дӕр кӕуыл хъуыды кодтай, ахӕм фарстатӕ. Йегъовӕйы Ӕвдисӕнтӕ демӕ ӕхсызгонӕй аныхас кӕндзысты, уыцы фарстатӕй алкӕцыйӕн дӕр Библи цы дзуапп дӕтты, ууыл.

1. Чырыстийы мӕлӕт нӕ зӕрдыл куыд хъуамӕ лӕууын кӕнӕм?

Чырысти йӕ мӕлӕты размӕ йӕ фӕдылдзӕуджытӕм дзул ӕмӕ сӕн алӕвӕрдта ӕмӕ сын бафӕдзӕхста, цӕмӕй-иу уыдон дӕр афтӕ кӕной йӕ мӕлӕт ӕрымысыны тыххӕй. Дзул нысан кӕны Чырыстийы буар, сӕн та – йӕ туг. (Бакӕс Лукайы 22:19, 20.)

Чырысти йӕ фӕдылдзӕуджытӕм цы дзул алӕвӕрдта, уый уыди донгонд, ома йыл ӕнхъизӕн нӕ уыд. Библийы ӕнхъизӕн арӕх фӕамоны тӕригъӕдмӕ. Уымӕ гӕсгӕ уыцы дзул хорз ӕвдыста Йесойы ӕнӕтӕригъӕд буар. Уый йӕ буар нывондӕн радта, ӕмӕ уый фӕстӕ нал хъуыди, Моисейы закъонмӕ гӕсгӕ цы фосы нывӕндтӕ хастой, уыдон (Дзуттӕгтӕм 10:5, 9, 10). Сӕн та ӕвдыста Йесойы зынаргъ туг – уыцы туг калд ӕрцыд нӕ тӕригъӕдты тыххӕй. (Бакӕс 1 Петры 1:19; 2:24; 3:18.)

2. Чырыстийы мӕлӕт кӕд хъуамӕ лӕууын кӕнӕм нӕ зӕрдыл?

Чырысти амард Куадзӕны рӕстӕджы, 14 нисаны. Дзуттӕгтӕм-иу бон райдыдта хурныгуылды фӕстӕ. Гъемӕ Йесо йӕ мӕлӕты размӕ изӕр йӕ апостолтимӕ Куадзӕны ӕхсӕвӕр бахордта ӕмӕ стӕй бындур ӕрӕвӕрдта ног бӕрӕгбонӕн – йӕ мӕлӕт Ӕрымысӕн изӕрӕн. (Бакӕс Лукайы 22:14, 15.)

Ӕмӕ абон дӕр Хуыцауы адӕм сӕ зӕрдыл ӕрлӕууын кӕнынц Чырыстийы мӕлӕт, уымӕн ӕмӕ Хуыцау Чырыстийы радта, цӕмӕй ӕппӕт адӕмы дӕр тӕригъӕд ӕмӕ мӕлӕтӕй фервӕзын кӕна (Рацыд 12:5–7, 13, 17). Дзуттӕгтӕ Куадзӕн афӕдз иу хатт бӕрӕг кодтой, ӕмӕ уымӕ гӕсгӕ Ӕрымысӕн изӕр дӕр бӕрӕг кӕнын хъӕуы афӕдз иу хатт. Уый Библийы къӕлиндармӕ гӕсгӕ вӕййы 14 нисаны, хурныгуылды фӕстӕ. (Бакӕс Иоанны 1:29.)

 3. Дзул ӕмӕ-иу сӕнӕй хъуамӕ чи сахода?

Чырысти йӕ фӕдылдзӕуджытӕм сӕн куы алӕвӕрдта, уӕд загъта: «Ацы сӕны къус нысан кӕны ног бадзырд» (1 Коринфӕгтӕм 11:25). Ног бадзырдӕй ивд ӕрцыд Моисейы закъонимӕ баст бадзырд. Уыцы бадзырд Хуыцау скодта израилӕгтимӕ ӕмӕ сын зӕрдӕ бавӕрдта, зӕгъгӕ, алы хъуыддаджы дӕр мӕ коммӕ куы кӕсат, уӕд мӕ адӕм суыдзыстут (Рацыд 19:5, 6). Фӕлӕ уыдон Хуыцауы коммӕ нӕ кастысты. Ӕмӕ уымӕ гӕсгӕ Йегъовӕ скодта ног бадзырд. (Бакӕс Йеремийы 31:31.)

Ног бадзырд арӕзт кӕимӕ ӕрцыд, уыдон бирӕ не сты – ӕрмӕстдӕр 144 000 адӕймаджы. Фӕлӕ Йегъовӕ уыдоны уылты йӕ арфӕдзинӕдтӕй схайджын кӕндзӕн бирӕты. Ӕппӕт адӕмтӕй милуантӕ ӕнустӕм зӕххыл дзӕнӕты цӕрдзысты. Ног бадзырды чи ис, уыдонӕй абон чидӕртӕ Йегъовӕйӕн лӕггад кӕнынц зӕххыл. Ӕрмӕстдӕр уыдонӕн ис уый бар, цӕмӕй-иу дзул ӕмӕ сӕнӕй саходой, уымӕн ӕмӕ сӕны къус «нысан кӕны ног бадзырд». (Бакӕс Лукайы 12:32; Раргомад 14:1, 3.)

4. Ӕрымысӕн изӕр бӕрӕг кӕнын махӕн цы пайда у?

Чырыстийы мӕлӕт Ӕрымысӕн изӕр алы аз дӕр кӕй бӕрӕг кӕнӕм, уый фӕрцы Йегъовӕйӕ ноджы тынгдӕр бузныг вӕййӕм, цы стыр уарзондзинад нӕм равдыста, уый тыххӕй. Хуыцау йӕ Фырты радта нӕ тӕригъӕдты тыххӕй. Уӕдӕ Ӕрымысӕн изӕрмӕ куы ’рбацӕуӕм, уӕд-иу хъуамӕ арф ахъуыды кӕнӕм, Чырыстийы мӕлӕт махӕн цы дӕтты, ууыл. Хъуамӕ-иу нӕ алчидӕр ахъуыды кӕна, Йегъовӕ ӕмӕ Чырыстийӕ бузныг кӕй дӕн, уый мӕ бон куыд у равдисын, зӕгъгӕ. (Бакӕс Иоанны 3:16; 2 Коринфӕгтӕм 5:14, 15.)

Фылдӕр базонӕн ис ацы чиныгӕй, «Библи бӕлвырдӕй цы дзуры?», кӕс 206–208 фӕрстӕ. Мыхуыры йӕ рауагътой Йегъовӕйы Ӕвдисӕнтӕ.