Валерӕ: Бахатыр кӕн, фӕлӕ мӕ Хуыцау тынг нӕ уырны, ӕмӕ мыл дӕ рӕстӕг дзӕгъӕлы ма хардз кӕн.

Руслан: Ӕргом ныхасы къӕм нӕй. Хӕдӕгай, мӕ ном Руслан.

Валерӕ: Мӕнӕн та Валерӕ.

Руслан: Уӕдӕ зонгӕ уыдзыстӕм.

Валерӕ: Уыдзыстӕм!

Руслан: Валерӕ, бафӕрсын аипп ма уӕд, фӕлӕ-иу хӕдзары Хуыцауы ном не ссардтат?

Валерӕ: Куыннӕ. Фӕлӕ колледжмӕ куы бацыдтӕн, уӕд Хуыцауыл афтӕ тынг нал хъуыды кодтон.

Руслан: Ӕмӕ дзы цы ахуыр кодтай?

Валерӕ: Социологи ӕмӕ истори. Истори рагӕй уарзын: адӕм рагзамантӕй абонмӕ куыд цардысты, уый базонын мӕ тынг фӕндыди.

Руслан: Ӕцӕгдӕр, истори диссаджы наукӕ у. Ӕвӕццӕгӕн ӕй зоныс, историйы цы хабӕрттӕ цыд, уыдоны тыххӕй Библийы дӕр кӕй ис фыст. Никуы йӕм ӕркастӕ?

Валерӕ: Раст зӕгъгӕйӕ, нӕ. Хорз чиныг у, уый зонын, фӕлӕ дзы ахӕм хабӕртты кой ис, уый нӕ зыдтон.

Руслан: Ӕмбаргӕ адӕймагимӕ ӕнцон у ныхас кӕнын! Кӕд дын иугыццыл рӕстӕг ис, уӕд дын равдисдзынӕн, Библийы цы историкон хабӕрттӕ фыст ис, уыдон раст кӕй сты, уымӕн иу-дыууӕ цӕвиттоны.

Валерӕ: Равдис. Фӕлӕ мӕм Библи нӕй.

Руслан: Ницы кӕны, мӕхи Библийы дын сӕ равдисдзынӕн. Фыццаг хабар фыст ис 1 Азфыстыты 29 сӕры 26 ӕмӕ 27 стихты: «Йессейы фырт Давид паддзах уыд ӕнӕхъӕн Израилӕн. Давид Израилӕн паддзах уыди цыппор азы. Авд азы хицауиуӕг кодта Хевроны, ӕртын ӕртӕ азы та – Иерусалимы».

Валерӕ: Ӕмӕ амӕй куыд зыны, цы историкон хабӕрттӕ дзы фыст ис, уыдон раст кӕй сты?

Руслан: Кӕддӕр ахуыргӕндтӕ паддзах Давиды тыххӕй дзырдтой, зӕгъгӕ, дам, ахӕм адӕймаг никуы цард.

Валерӕ: Ӕмӕ афтӕ цӕмӕн дзырдтой?

Руслан: Уымӕн ӕмӕ йӕ кой Библийы йеддӕмӕ ӕндӕр никуы уыд. Фӕлӕ 1993 азы археологтӕ ссардтой рагон къӕйдуры къӕртт. Фыст ыл уыд «Давиды хӕдзар».

Валерӕ: Уый нӕ зыдтон.

Руслан: Раст ма афтӕ дызӕрдыг кодтой иу адӕймаджы тыххӕй. Уыцы адӕймаг уыди Понтий Пилат, Йесо Чырыстийы рӕстӕг уый уыд хицау. Лукайы 3 сӕры 1 стихы фыст сты уыцы рӕстӕджы хицӕуттӕй цалдӕрӕн сӕ нӕмттӕ, ӕмӕ дзы иу у Понтий Пилат.

Валерӕ: Ӕцӕгдӕр, ам фыст ис, зӕгъгӕ, Понтий Пилат уыд Иудейӕйы бӕстӕйы хицау, Ирод та – Галилейӕйы хицау.

Руслан: Афтӕ у. Бирӕ азты дӕргъы ахуыргӕндтӕй чидӕртӕ дызӕрдыг кодтой, Понтий Пилат ӕцӕг кӕй цард, ууыл. Фӕлӕ иу-50 азы  размӕ Ӕввахс Скӕсӕны иу дур ссардтой, ӕмӕ ууыл фыст уыд йӕ ном.

Валерӕ: Гъым. Фыццаг хатт ӕй хъусын.

Руслан: Ӕз дӕр ӕй куы базыдтон, уӕд тынг бадис кодтон.

Валерӕ: Раст зӕгъгӕйӕ, Библи алкӕддӕр диссаджы чиныгыл нымадтон, фӕлӕ, мӕнмӕ гӕсгӕ, ӕгӕр рагон чиныг у. Цы хабӕрттӕ фыст дзы ис, уыдон, чи зоны, историмӕ гӕсгӕ раст сты, фӕлӕ дзы абоны царды не спайда кӕндзынӕ.

Руслан: Бирӕтӕ хъуыды кӕнынц афтӕ. Фӕлӕ ӕз демӕ разы нӕ дӕн. Цӕмӕн, уый дын зӕгъдзынӕн: уӕды заманты адӕм цӕуыл тыхстысты, абон дӕр уыдӕттыл тыхсынц. Зӕгъӕм, адӕм алкӕддӕр тыхстысты хӕринагыл, дзаумайыл ӕмӕ, кӕм цӕрой, ууыл. Стӕй афтӕ конд стӕм, ӕмӕ нӕ фӕнды кӕрӕдзиимӕ ныхас кӕнын ӕмӕ нӕ бинонтимӕ амондджынӕй цӕрын. Уыдӕттыл алы адӕймаг дӕр фӕхъуыды кӕны, афтӕ нӕу?

Валерӕ: Афтӕ у.

Руслан: Ӕмӕ нын ӕппӕт уыцы хъуыддӕгты Библи у стыр ӕххуыс. Уымӕ гӕсгӕ ис зӕгъӕн, Библи кӕй у рагон, фӕлӕ ног чиныг.

Валерӕ: Ома?

Руслан: Ӕндӕр ныхасӕй, сӕдӕгай азты размӕ Библийы фыст ӕрцыдысты сӕйраг уагӕвӕрдтӕ, куыд цӕрын хъӕуы, уый тыххӕй, ӕмӕ уӕд куыд пайда уыдысты, афтӕ пайда сты абон дӕр.

Валерӕ: Бамбӕрстон дӕ. Фӕлӕ цавӕр хъуыддӕгты сты пайда?

Руслан: Зӕгъӕм, ӕххуыс нын кӕнынц, цӕмӕй ӕхцамӕ раст цӕстӕй кӕсӕм, нӕ бинонтимӕ амондджынӕй цӕрӕм ӕмӕ хорз ӕмбӕлттӕ уӕм. Йӕ уагӕвӕрдтӕ йын абарӕн ис, фӕндагыл цы амонӕнтӕ вӕййы, уыдонимӕ. Зӕгъ-ма, дӕ бинонты ӕмӕ дыл дӕ цардӕмбалы раз цы хӕстӕ ис, уыдон, куыд ӕмбӕлы, афтӕ ӕххӕст кӕнын абон ӕнцон у?

Валерӕ: Кӕй зӕгъын ӕй хъӕуы, нӕу. Бинонты хъуыддаг фарон бакодтон, ӕмӕ йӕ зонын, лӕг ӕмӕ усӕн кӕрӕдзи бамбарын алыхатт ӕнцон кӕй нӕ вӕййы.

Руслан: Раст зӕгъыс. Библийы уый фӕдыл фыст ис хуымӕтӕг, фӕлӕ зондджын уынаффӕтӕ. Зӕгъӕм, Ефесӕгтӕм 5 сӕры 22, 23 ӕмӕ 28 стихты. Дӕхӕдӕг сӕ бакӕсдзынӕ?

Валерӕ: Бакӕсдзынӕн сӕ: «Устытӕ сӕ лӕгты коммӕ кӕсӕнт, Хицауы коммӕ куыд кӕсынц, афтӕ, уымӕн ӕмӕ лӕг у усӕн йӕ сӕрыхицау, Чырысти ӕмбырды, йӕ буары, сӕр куыд у, афтӕ – уый у йӕ ирвӕзынгӕнӕг». 28 стих: «Раст афтӕ лӕгтӕ дӕр, сӕхи буар куыд уарзынц, афтӕ хъуамӕ уарзой сӕ устыты. Йӕ усы чи уарзы, уый уарзы йӕхи дӕр».

Руслан: Дӕ цӕрӕнбон бирӕ. Куыд дӕм кӕсы, лӕг ӕмӕ ус ацы хуымӕтӕг уынаффӕтӕм куы хъусой, уӕд сӕ бинонты цард амондджындӕр нӕ уыдзӕн?

Валерӕ: Мӕнмӕ гӕсгӕ, о. Фӕлӕ йӕ зӕгъын куыд ӕнцон у, йӕ аразын дӕр афтӕ ӕнцон куы уаид!

Руслан: Афтӕ у, ӕххӕст адӕймаг нӕй. Ацы сӕры ма иу хорз стих фыст ис. Уый та нӕ разӕнгард кӕны, цӕмӕй ӕмбаргӕ уӕм *. Цӕмӕй дыууӕ адӕймаджы кӕрӕдзи ӕмбарой, уый тыххӕй хъуамӕ алцӕмӕ дӕр раст цӕстӕй кӕсой ӕмӕ ӕнцондзырд уой. Мӕнӕн дӕр ӕмӕ мӕ цардӕмбалӕн дӕр Библи тынг баххуыс кодта цардмӕ раст цӕстӕй кӕсынӕн.

Валерӕ: Ӕцӕг зӕгъыс?

Руслан: Йегъовӕйы Ӕвдисӕнтӕн ис сайт ӕмӕ дзы ссарӕн ис хорз ӕрмӕг бинонты царды тыххӕй. Кӕд ма дын иу-дыууӕ минуты ис, уӕд дын цалдӕр хорз хъуыдыйы равдисдзынӕн.

Валерӕ: Разы дӕн.

Руслан: Кӕс-ма, мӕнӕ сайты адрис www.pr418.com/os. Ахӕм у йӕ сӕйраг фарс.

Валерӕ: Рӕсугъд къамтӕ дзы ис.

Руслан: Ам ӕвдыст цӕуы, Йегъовӕйы Ӕвдисӕнтӕ ӕгас дунейы дӕр хорз хабар куыд хъусын кӕнынц. Мӕнӕ вкладкӕ «Цардӕмбӕлттӕ  ӕмӕ ныййарджытӕ». Ис дзы, алыхуызон уавӕрты куыд кӕнгӕ у, уый тыххӕй цыбыр статьятӕ. Тынгдӕр дӕ кӕцы фӕндид бакӕсын?

Валерӕ: Мӕнӕ ай – «Кӕрӕдзи бамбарӕн куыд ис». Мӕнмӕ гӕсгӕ, мӕнӕн дӕр пайда уыдзӕн!

Руслан: Ацы статьяйы дзырд цӕуы, зындзинӕдтимӕ цавӕр цыппар хъуыддаджы фӕрцы ис тох кӕнӕн, ууыл. Ацы абзацмӕ-ма ӕркӕс. Бакӕсдзынӕ йӕ?

Валерӕ: О. «Адӕймаджы буары тугдадзинтӕ куыд сты, афтӕ у ӕргом ныхас лӕг ӕмӕ усы ’хсӕн. Зӕрдӕ ӕмӕ рӕуджытӕ куыд сты, афтӕ сын сты кӕрӕдзийы уарзын дӕр ӕмӕ кӕрӕдзийӕн аргъ кӕнын дӕр». Гъым, ацы цӕвиттон мӕ зӕрдӕмӕ фӕцыди.

Руслан: Мӕ зӕрдӕмӕ дӕр цӕуы. Ам ма фыст ис Библийы стих. Куы йыл ныххӕцай, уӕд байгом уыдзӕн.

Валерӕ: Уынын ӕй. Ефесӕгтӕм 5:33: «Фӕлӕ сымахӕй алчи, йӕхи куыд уарзы, афтӕ уарзӕд йӕ усы дӕр. Ус та хъуамӕ йӕ лӕджы нымайа».

Руслан: Бафиппайдтай йӕ? Иу иннӕмӕн хъуамӕ дӕтта, цы цух у, уый.

Валерӕ: Уый та куыд ӕмбаргӕ у?

Руслан: Зӕгъ-ма, нӕлгоймаджы цы хъӕуы? Цӕмӕй йын йӕ цардӕмбал аргъ кӕна, нымайа йӕ. Сылгоймаджы та? Цӕмӕй йын йӕ сӕрыхицау дзура, кӕй йӕ уарзы, уый.

Валерӕ: Раст зӕгъыс.

Руслан: Лӕг йӕ усы кӕй уарзы, уый арӕх истӕмӕйты куы ӕвдиса, уӕд усӕн ӕнцондӕр нӕ уыдзӕн йӕ лӕгӕн аргъ кӕнын?

Валерӕ: Ӕвӕццӕгӕн, уыдзӕн.

Руслан: Ахъуыды-ма кӕн, ӕрмӕст иу стихыл аныхас кодтам, фӕлӕ дзы цас хорз хъуыдытӕ ис. Кӕд ӕй 2 мин азы размӕ ныффыстой, уӕддӕр дзы цы уынаффӕтӕ ис, уыдон абоны царды дӕр ахадынц. Ӕмӕ сӕ лӕг ӕмӕ ус куы пайда кӕной, уӕд ӕрдӕбоны цӕвиттоны цы «зӕрдӕ ӕмӕ рӕуджыты» кой кодтам, уыдон ӕнӕниз уыдзысты.

Валерӕ: Уый ӕнхъӕл нӕ уыдтӕн, ӕмӕ Библийы ахӕм цыдӕртӕ дӕр фыст ис.

Руслан: Валерӕ, Библийы ма ис бирӕ диссаджы хабӕртты кой. Иннӕ хатт куы фембӕлӕм, уӕд ацы сайты ахӕм темӕйыл аныхас кӕндзыстӕм: «Кӕрӕдзи бамбарӕн куыд ис, уый фӕдыл цыппар уынаффӕйы».

Валерӕ: Хорз. Мӕ цардӕмбалимӕ йӕм иумӕ ӕркӕсдзыстӕм.