СӔЙРАГ ТЕМӔ | БИБЛИ БАМБАРЫН ДӔ БОН У
Бамбарӕн кӕй ис, ахӕм чиныг
Куыд ӕй зонӕм, афтӕмӕй Библи тынг рагон чиныг у. Цас ыл цӕуы? Библи фыссын райдыдтой Ӕввахс Скӕсӕны иу-3 500 азы размӕ. Уый уыди, Китайы хицӕуттӕ хъомысджын династи Шан-Инь куы уыдысты, уыцы заманы ӕмӕ Индийы буддизм куы фӕзынд, уымӕй та иу-дӕс ӕнусы раздӕр. (Кӕс рамкӕ « Ӕцӕг хабӕрттӕ Библийы тыххӕй».)
Библийы ссарӕн ис бӕлвырд дзуаппытӕ царды ахсджиагдӕр фарстатӕн
Цӕмӕй чиныг адӕмӕн пайда уа, уый тыххӕй хъуамӕ фыст уа ӕнцонӕмбарӕн ӕвзагӕй ӕмӕ йӕ уынаффӕтӕ пайда уой. Библи растдӕр ахӕм чиныг у. Ссарӕн дзы ис бӕлвырд дзуаппытӕ царды ахсджиагдӕр фарстатӕн.
Искуы дӕм ахӕм фарста сӕвзӕрд: «Цӕмӕн цӕрӕм?» Ацы фарста адӕмы тыхсын кӕны мингай азты дӕргъы. Фӕлӕ йын Библи дзуапп дӕтты йӕ фыццаг чиныджы – Райдианы – фыццаг дыууӕ сӕры. Уыцы сӕртӕ мах ахӕссынц райдианмӕ – миллиардгай азты размӕ – нӕ Дун-дуне, галактикӕтӕ, стъалытӕ ӕмӕ зӕхх куы фӕзындысты, уыцы рӕстӕгмӕ (Райдиан 1:1). Уыцы сӕрты фыст ис, Хуыцау нӕ планетӕ куыд цӕттӕ кодта, цӕмӕй йыл цӕрӕн уыдаид, куыд фӕзындысты зайӕгойтӕ, цӕрӕгойтӕ ӕмӕ адӕм. Стӕй ма дзы базонӕн ис, ӕппӕт уыдӕттӕ цӕмӕн сарӕзта, уый дӕр.
ХУЫМӔТӔГ ӔМӔ ӔНЦОНӔМБАРӔН ӔВЗАГӔЙ ФЫСТ
Библийы ис, ӕрвылбоны царды нын чи ӕххуыс кӕны, ахӕм разамынд. Уыцы разамынд ӕнцонӕмбарӕн у. Уый зыны дыууӕ хъуыддагӕй.
Фыццаг уый, ӕмӕ Библи фыст у хуымӕтӕг, ӕнцонӕмбарӕн ӕмӕ зӕрдӕмӕхъаргӕ ӕвзагӕй. Зынӕмбарӕн иумӕйаг дзырдты бӕсты дзы ис, адӕймаджы зӕрдӕ чи бацагайы, ахӕм бӕлвырд ныхӕстӕ. Арф хъуыдытӕ дзы фыст сты, алы бон дӕр кӕуыл дзурӕм, ахӕм хуымӕтӕг ӕвзагӕй.
Зӕгъӕм, Йесо Чырысти адӕмы зӕрдӕтӕ бацагайынӕн ӕрхаста бирӕ цӕстуынгӕ цӕвиттонтӕ. Уыдон уыдысты хуымӕтӕг ӕмӕ баст уыдысты сӕ алыбоны цардимӕ. Бирӕтӕ дзы радзырдта, адӕмы хохыл куы ахуыр кодта, уӕд. Фыст сты Библийы Матфейы чиныджы 5 сӕрӕй 7 сӕры онг. Йесо уӕд цы дзырдта, уый иу ахуыргонд схуыдта «царды ӕнӕмӕнгхъӕугӕ раныхас», ӕмӕ загъта, зӕгъгӕ, йӕ нысан уый нӕу, ӕмӕ «нӕ сӕр алыхуызон хъуыдытӕй байдзаг кӕнӕм; йӕ нысан у, цӕмӕй нын разамынд дӕтта ӕмӕ нӕ куыд цӕрын хъӕуы, уый зонӕм». Уыцы сӕртӕ бакӕсӕн ис 15–20 минутмӕ. Фӕлӕ сӕ куы бакӕсай, уӕд тынг бадис кӕндзынӕ, Йесойы ныхӕстӕ хуымӕтӕг кӕй уыдысты, фӕлӕ сӕ стыр тых кӕй уыди, ууыл.
Дыккаг уый, ӕмӕ Библийы цы хабӕрттӕ фыст ис, уыдон зын бамбарӕн не сты. Уый аргъӕуттӕ кӕнӕ таурӕгъты чиныг нӕу. Иу энциклопедийы куыд фыст ис, афтӕмӕй йӕ фылдӕр хайы дзырд цӕуы «номдзыд ӕмӕ хуымӕтӕг адӕмыл», стӕй «цӕуыл тыхстысты, цӕмӕ бӕллыдысты, кӕм-иу фӕрӕдыдысты ӕмӕ-иу куыд фӕуӕлахиз сты, ууыл» (The World Book Encyclopedia). Махӕн ӕнцон у, ӕцӕг чи царди, уыцы адӕмы бынаты нӕхи сӕвӕрын ӕмӕ, ӕцӕг чи ’рцыд, уыцы хабӕрттӕ бамбарын ӕмӕ дзы цыдӕртӕ нӕхицӕн зондӕн райсын (У ТЫНГ ПАРАХАТ
Цӕмӕй, чиныджы цы фыст ис, уый бамбарай, уый тыххӕй хъуамӕ фыст уа, цы ӕвзаг зоныс, ууыл. Абон дӕр, кӕмфӕнды ма цӕрай ӕмӕ цыфӕнды адӕмыхаттӕй ма уай, уӕддӕр Библи дӕ бон ссарын у, кӕй ӕмбарыс, ахӕм ӕвзагыл. Ӕркӕсӕм, ууыл цы стыр фыдӕбон бакодтой, уымӕ.
Тӕлмац кӕныны куыст. Библи райдианы фыст ӕрцыд дзуттаг, арамейаг ӕмӕ грекъаг ӕвзӕгтыл. Уымӕ гӕсгӕ йӕ бирӕтӕн сӕ бон кӕсын нӕ уыди. Цӕмӕй йӕ адӕм ӕндӕр ӕвзӕгтыл дӕр кастаиккой, уый тыххӕй Хуыцауыл иузӕрдион тӕлмацгӕнджытӕ стыр фыдӕбон бакодтой. Уый фӕрцы абон Библи ӕнӕхъӕнӕй кӕнӕ йӕ иу хай тӕлмацгонд у иу-2 700 ӕвзагӕй фылдӕрмӕ. Уый та ууыл дзурӕг у, ӕмӕ адӕмӕн сӕ 90 процентӕн сӕ бон у Библийӕн ӕппынкъаддӕр йӕ иу хай сӕ мадӕлон ӕвзагыл кӕсын.
Мыхуыр кӕныны куыст. Библи фыццаг фыст ӕрцыд папирусыл ӕмӕ цармыл, фӕлӕ уыдон бирӕ нӕ лӕууыдысты. Ӕмӕ цӕмӕй Библийы текст ма фесӕфтаид, уый тыххӕй дзы фысджытӕ арӕхстгай къопитӕ кодтой, стӕй уыцы къопитӕй та – ӕндӕр къопитӕ. Уыцы текстытӕ уыдысты тынг зынаргъ ӕмӕ сӕ йӕ бон алкӕмӕн балхӕнын нӕ уыди. Фӕлӕ 550 азӕй фылдӕры размӕ Гутенберг мыхуыргӕнӕн станок куы ӕрымысыд, уӕд Библиты нымӕц дзӕвгар фӕфылдӕр. Бӕрӕггӕнӕнтӕм гӕсгӕ, абон Библи ӕнӕхъӕнӕй кӕнӕ йӕ кӕцыдӕр хай ис 5 миллиард экземплярӕй фылдӕр.
Уыцы хъуыддӕгты Библи ӕндӕр никӕцы дины чиныгимӕ ис абарӕн. Куыд базыдтам, афтӕмӕй Библи у, бамбарӕн кӕй ис, ахӕм чиныг. Раст зӕгъгӕйӕ, йӕ бамбарын алы хатт ӕнцон нӕ вӕййы. Фӕлӕ ӕххуыс дӕр ис. Уыцы ӕххуыс кӕм ис ссарӕн? Дӕ бон дзы куыд у спайда кӕнын? Уый базондзынӕ иннӕ статьяйӕ.