УЫЙ АХСДЖИАГ ЦӔМӔН У. Библи кӕимӕ ахуыр кӕнӕм, уый-иу йӕхи куы бацӕттӕ кӕна, уӕд-иу хуыздӕр бамбардзӕн ӕмӕ бахъуыды кӕндзӕн, цы йын амонӕм, уый. Ӕрмӕг-иу цас хуыздӕр бамбара ӕмӕ ӕй бахъуыды кӕна, уыйас тагъддӕр рӕздзӕн йӕ уырнындзинад дӕр. Донаргъуыд куы райса, уый фӕстӕ дӕр ӕй хъӕудзӕн ӕмбырдтӕм ӕмӕ уацамындмӕ цӕттӕ кӕнын, цӕмӕй «ма бафынӕй уа» (Мф 25:13). Библи иртасын куыд хъӕуы, уый куы зона ӕмӕ уыцы хорз ӕгъдауыл хӕст куы уа, уӕд ын уый царды алкӕддӕр пайда уыдзӕн. Уӕдӕ-иу нӕ ахуыргӕнинӕгтӕн ӕппӕты райдианы баххуыс кӕнӕм, цӕмӕй Библийы ахуырмӕ цӕттӕ кӕнын сахуыр уой.

УЫЙ КУЫД ИС АРАЗӔН

• Фӕзминаг у (Ро 2:21). Дӕхи-иу рагацау бацӕттӕ кӕн, дӕ ахуыргӕнинагыл-иу хъуыды кӕн, афтӕмӕй (km 11/15 3). Равдис-иу ын, цы пълан ахуыр кӕнут, уым дӕхӕдӕг цы бахахх кӕныс ӕмӕ дзы цы хъуыдытӕ ныффыссыс, уый.

• Йӕхи цӕттӕ кӕнынмӕ йӕ разӕнгард кӕн. Адӕймагимӕ Библи ахуыр кӕнын куыддӕр райдайай, афтӕ-иу ын зӕгъ, йӕхи ахуырмӕ кӕй цӕттӕ кӕндзӕн, уый дӕр Библи ахуыр кӕнынмӕ кӕй хаудзӕн. Бамбарын-иу ын кӕн, уыцы хъуыддаг ын цы пайда ӕрхӕсдзӕн, уый дӕр. Зӕгъ-иу ын, ахуырмӕ цӕттӕ кӕнынӕн йӕ бон рӕстӕг ссарын куыд у, уый. Иуӕй-иу хъусынгӕнджытӕ ахуыры рӕстӕг ахуыргӕнинагмӕ сӕхи пълан раттынц, цӕмӕй фена, дзуаппытӕ рагацау куы бахахх кӕнай ӕмӕ ма дзы цавӕрдӕр хъуыдытӕ куы бафыссай, уӕд ӕрмӕг бамбарын ӕнцондӕр кӕй у. Йӕхи-иу куы бацӕттӕ кӕна, уӕд-иу дзы раппӕл.

• Равдис ын, цӕттӕ кӕнын куыд хъӕуы. Иуӕй-иу хъусынгӕнджытӕ ӕппӕты райдианы сӕ ахуыргӕнинагимӕ ӕнӕхъӕн сӕр иумӕ бацӕттӕ кӕнынц, цӕмӕй йын равдисой, ахуырмӕ цӕттӕ кӕнын куыд хъӕуы, уый.