Уацамынды нӕм сывӕллон куы ракӕса, уӕд ын хъуамӕ зӕгъӕм, цӕмӕй йӕ ныййарджытӕм бадзура. Афтӕмӕй равдисдзыстӕм, ныййарджытӕ хӕдзары хистӕртӕ кӕй сты, уымӕн кӕй аргъ кӕнӕм (Ӕм 6:20). Сывӕллон нӕ мидӕмӕ куы хона, уӕд разы кӕнын нӕ хъӕуы. Йӕ ныййарджытӕ хӕдзары куы нӕ уой, уӕд хъуамӕ ӕндӕр хатт ӕрбацӕуӕм.

Сывӕллоныл 15–19 азы бӕрц куы цӕуа, уӕддӕр раст уыдзӕн, йӕ ныййарджытӕм ӕй куы бадзурын кӕнӕм, уӕд. Кӕд хӕдзары нӕ уой, уӕд ӕй нӕ бон у бафӕрсын, йӕ ныййарджытӕ йӕ, йӕхи цы фӕнды, уый кӕсын уадзынц ӕви нӕ. Кӕд, о, уӕд ын нӕ бон у нӕ литературӕйӕ исты ныууадзын кӕнӕ йын нӕ сайты тыххӕй зӕгъын.

Хорз нӕм чи байхъуыста, ахӕм сывӕллонмӕ дыккаг хатт куы бацӕуӕм, уӕд ын хъуамӕ зӕгъӕм, цӕмӕй нӕ йӕ ныййарджытимӕ базонгӕ кӕна. Уӕд сын нӕ бон уыдзӕн бамбарын кӕнын, цӕмӕн ӕрбацыдыстӕм, уый. Стӕй ма семӕ аныхас кӕнӕн уыдзӕн, Библийы бинонтӕн цы уынаффӕтӕ ис, уыдон сӕ цардыл хуыздӕрырдӕм кӕй фӕзынынц, ууыл (Пс 119:86, 138). Ныййарджытимӕ ныхас кӕнгӕйӕ бӕрӕг куы уа, кӕй сын аргъ кӕнӕм, уый, уӕд Йегъовӕйы ном кадджын кӕндзыстӕм ӕмӕ ма нын уый фӕрцы, чи зоны, ӕндӕр фадӕттӕ дӕр фӕуа, цӕмӕй бинонтӕн хорз хабар радзурӕм (1Пт 2:12).