ИЕГЪОВӔ у бинонты царды Бындурӕвӕрӕг ӕмӕ сӕ куыд цӕрын хъӕуы, уый тыххӕй йӕ Ныхасы ис ӕппӕты хуыздӕр амындтӕ. Бирӕ бинонтӕ сӕ цард уыцы амындтӕм гӕсгӕ кӕй аразынц, уый фӕрцы сты амондджын. Чидӕртӕ сӕ кӕд раздӕр иумӕ ӕнӕуи цардысты, уӕд ныр сӕ къухтӕ ӕрфыстой, ӕмӕ уый та арфӕйаг хъуыддаг у. Иннӕтӕ та ӕнӕгъдау цард нал кӕнынц. Раздӕр сӕ устытӕ ӕмӕ сӕ сывӕллӕттимӕ загъд чи кодта ӕмӕ сӕ чи надта, уыцы лӕгтӕ та сахуыр сты сӕ бинонты уарзын ӕмӕ рӕвдауын.

2. Чырыстон бинонты царды цавӕр ахсджиаг хъуыддӕгтӕ ис?

² Чырыстон бинонты царды бирӕ ахсджиаг хъуыддӕгтӕ ис. Зӕгъӕм: ӕмкъайады цӕдис цӕргӕ-цӕрӕнбонтӕм кӕй у, уымӕ цы цӕстӕй кӕсӕм ӕмӕ ныл нӕ бинонты раз цы хӕстӕ ис, уыдон куыд ӕххӕст кӕнӕм, нӕ бинонтӕн куыд стӕм (Ефесӕгтӕм 5:33—6:4). Библи бинонты тыххӕй цы дзуры, уый зонын иу у, йӕ аразын та бынтон ӕндӕр хъуыддаг у. Кӕй фӕнды, цӕмӕй, Хуыцауы фӕдзӕхстытӕ кӕй ницӕмӕ дардтой, уый тыххӕй Йесо кӕмӕн бауайдзӕф кодта, уыдоны хуызӕн уа? Уыдонмӕ афтӕ каст, ӕмӕ кӕд дины кӕнонтӕ ӕххӕст кӕнынц, уӕд уый фаг у. Фӕлӕ рӕдыдысты (Матфейы 15:4—9). Мах нӕ фӕнды, иннӕты раз йӕхи фидар уырнӕгӕй чи февдисы, хӕдзары та Хуыцау рох дӕр кӕмӕй фӕвӕййы, ахӕмтӕ уӕм. Нӕ, мах фӕнды, цӕмӕй нӕм алкӕддӕр Хуыцауы ӕфсарм уа, уымӕн ӕмӕ царды уымӕй  стырдӕр хорзӕх нӕй (1 Тимофеймӕ 5:4; 6:6; 2 Тимофеймӕ 3:5).

Лӕг ӕмӕ ус иумӕ цас хъуамӕ цӕрой?

3. а) Бирӕ бинонтыл цы ’рцӕуы, фӕлӕ мах цы хъуамӕ аразӕм? ӕ) Библийы ӕххуысӕй дзуапп радт, ацы абзацы цы фарстытӕ ис, уыдонӕн.

³ Фӕстаг рӕстӕг фылдӕрӕй-фылдӕр кӕны, сӕ цард кӕмӕн фехӕлы, ахӕм бинонты нымӕц. Иуӕй-иутӕ бирӕ азтӕ иумӕ фӕцӕрынц, уый фӕстӕ та ахицӕн вӕййынц ӕмӕ ӕндӕр искӕимӕ бацӕрынц. Афтӕ ма, хӕрз ӕрӕджы сӕ цард чи баиу кодта, дыууӕ ахӕм ӕрыгон уды кӕй ахицӕн вӕййынц, уый дӕр диссаг никӕмӕуал кӕсы. Фӕлӕ иннӕтӕ цыфӕнды ма аразой, мах фӕнды, Иегъовӕйы зӕрдӕмӕ цы цӕуы, уый кӕнын. Уымӕ гӕсгӕ ӕркӕсӕм цалдӕр фарстамӕ ӕмӕ Фыстадӕй цалдӕр бынатмӕ ӕмӕ фенӕм, Хуыцауы Ныхас ӕмуд бинонты тыххӕй цы дзуры, уый.

 Лӕг ӕмӕ ус иумӕ цас хъуамӕ цӕрой? (Маркы 10:6—9; Ромӕгтӕм 7:2, 3).

 Ӕрмӕстдӕр кӕд ис уый бар, цӕмӕй лӕг ӕмӕ ус ахицӕн уой ӕмӕ ногӕй бинонтӕ скӕной? (Матфейы 5:31, 32; 19:3—9).

 Исчи Библимӕ гӕсгӕ нӕ, фӕлӕ йӕхицӕн афтӕ ӕнцондӕр кӕй у, уый тыххӕй куы ахицӕн вӕййы йӕ цардӕмбалӕй, уӕд Иегъовӕ йӕхи куыд фӕхаты? (Малахи 2:13—16).

 Цымӕ Библи афтӕ дзуры, ӕмӕ лӕг ӕмӕ ус кӕрӕдзи куы нӕ ӕмбарой, уӕд хъуамӕ хицӕнтӕй цӕрой? (1 Коринфӕгтӕм 7:10—13).

 Лӕг ӕмӕ усӕн хицӕнтӕй цӕрыны бар кӕд ис? (Псалом 10:5; Лукайы 4:8; 1 Тимофеймӕ 5:8).

4. Бирӕ бинонтӕ фидар цӕмӕн сты?

⁴ Бирӕ бинонтӕ сты амондджын ӕмӕ фидар. Цӕй фӕрцы?  Иу уый, ӕмӕ цалынмӕ сӕ дыууӕ дӕр бинонты цардмӕ, куыд ӕмбӕлы, афтӕ цӕттӕ нӕ вӕййынц, уӕдмӕ бинонтӕ не скӕнынц. Гыццыл нысаниуӕг нӕй, дӕ цард цавӕр адӕймагимӕ баиу кӕндзынӕ, уымӕн дӕр: ӕмбардзӕн дӕ, мӕт дыл кӕндзӕн ӕмӕ цыфӕнды хъуыддаджы фӕдыл дӕр ӕргом ныхас кӕндзӕн. Ӕппӕты сӕйрагдӕр та у, цӕмӕй дӕ фидӕны цардӕмбал уарза Иегъовӕйы ӕмӕ зындзинӕдты ӕххуыс агура йӕ Ныхасы (Псалом 118:97, 104; 2 Тимофеймӕ 3:16, 17). Ахӕм адӕймаг афтӕ нӕ хъуыды кӕндзӕн, зӕгъгӕ, нӕ цард куы нӕ уайа, уӕд ӕй ныууадздзынӕн (кӕнӕ мӕ цӕгатмӕ ацӕудзынӕн) йе та дзы бынтондӕр ахицӕн уыдзынӕн. Йӕ цардӕмбал кӕй рӕдийы, уый йын ӕфсон нӕ уыдзӕн, цӕмӕй йӕ хӕстӕ ма ӕххӕст кӕна. Уый зындзинӕдтӕй нӕ тӕрсдзӕн, фӕлӕ сӕ куыд аскъуыддзаг кӕна, ууыл архайдзӕн.

5. а) Адӕймаг Иегъовӕйыл ӕнувыд кӕй у, уымӕн ӕмкъайады цы ахадындзинад ис? ӕ) Йӕ цардӕмбал йӕ ныхмӕ кӕмӕн цӕуы, ахӕм чырыстон Иегъовӕйы уагӕвӕрдтыл фидар куы хӕца, уӕд ын уый куыд фӕахъаз уыдзӕн?

⁵ Сайтан загъта, зӕгъгӕ, фыдӕвзарӕнты куы бахауӕм, уӕд Иегъовӕйы фӕндыл нал цӕудзыстӕм (Иов 2:4, 5; Ӕмбисӕндтӕ 27:11). Фӕлӕ Иегъовӕйы Ӕвдисӕнтӕй бирӕтӕ хъизӕмар кӕнынц, сӕ цардӕмбал сӕ ныхмӕ кӕй цӕуы, уый тыххӕй ӕмӕ уӕддӕр сӕ къайады цӕдис нӕ фехӕлдтой. Уыдон ӕнувыд сты Иегъовӕйыл ӕмӕ фидар хӕцынц йӕ фӕдзӕхстытыл (Матфейы 5:37). Ӕмӕ афтӕ фидар кӕй сты, уый дзӕгъӕлы нӕу — иуӕй-иутӕм сӕ бирӕ азты фӕстӕ ӕрбаиу сты сӕ цардӕмбӕлттӕ ӕмӕ иумӕ лӕггад кӕнынц Иегъовӕйӕн (1 Петры 3:1, 2). Ис ахӕм чырыстӕттӕ дӕр, ӕмӕ сӕ цардӕмбӕлтты нӕ фӕнды сӕ царды уаг фӕивын йе та, Иегъовӕйӕн кӕй лӕггад кӕнынц, уый тыххӕй сӕ уадзгӕ дӕр ныккодтой. Фӕлӕ уыдон дӕр фидарӕй зонынц, Хуыцауы ӕфсарм сӕм кӕй ис, уый тыххӕй фӕсмойнаг кӕй никуы фӕуыдзысты (Псалом 54:23; 144:16).

 Алчидӕр йӕ хӕс ӕххӕст кӕны

6. Цӕмӕй лӕг ӕмӕ ус амондджын уой, уый тыххӕй сӕ алчидӕр цавӕр фӕткӕн хъуамӕ аргъ кӕна?

⁶ Кӕй зӕгъын ӕй хъӕуы, афтӕ зӕгъӕн нӕй, ӕмӕ кӕд лӕг ӕмӕ ус иумӕ цӕрынц, нӕ хицӕн кӕнынц, уӕд амондджын сты. Сӕ дыууӕ дӕр хъуамӕ аргъ кӕной, Иегъовӕ бинонты ’хсӕн цы фӕтк сфидар кодта, уымӕн. Уӕд хӕдзары алцыдӕр уыдзӕн уаг ӕмӕ ӕгъдауыл, ӕмӕ бинонтӕй алчидӕр уыдзӕн амондджын. 1 Коринфӕгтӕм 11:3 кӕсӕм: «Алы лӕгӕн дӕр сӕр... у Чырысти; усӕн сӕр — йӕ лӕг; Чырыстийы сӕр та — Хуыцау».

7. Хӕдзары хицау йӕ бинонтӕн цавӕр хистӕр хъуамӕ уа?

⁷ Ацы стихы фыццаджыдӕр цӕй кой цӕуы, уымӕ дӕ хъус ӕрдардтай? О, алы лӕгӕн дӕр йӕ Сӕр у Чырысти, ӕмӕ йӕм хъуамӕ хъуса. Уый ууыл дзурӕг у, ӕмӕ лӕг хъуамӕ Йесойы фӕзма ӕмӕ йӕ бинонтӕн фӕзминаг хистӕр уа. Чырысти коммӕгӕс у Иегъовӕйӕн, тынг уарзы ӕмбырд ӕмӕ йыл ауды (1 Тимофеймӕ 3:15). «Уый сӕрвӕлтау Йӕхи нывондӕн... [дӕр] ӕрхаста». Йесо сӕрбӕрзонд ӕмӕ ӕнӕрхъуыды нӕу, фӕлӕ «сабыр ӕмӕ зӕрдӕфӕлмӕн» (НФ). Йӕ дӕлбар чи ис, уыдон «ссарынц ӕнцой сӕ удтӕн». Лӕг дӕр йӕ бинонтӕн афтӕ куы уа, уӕд уымӕй бӕрӕг уыдзӕн, йӕхи Чырыстийы бӕрны кӕй бакодта. Уӕд усӕн ӕнцон ӕмӕ ӕхсызгон уыдзӕн йӕ сӕрыхицауы зондыл цӕуын ӕмӕ йӕ коммӕ кӕсын (Ефесӕгтӕм 5:25—33, НФ; Матфейы 11:28, 29; Ӕмбисӕндтӕ 31:10, 28).

8. а) Иуӕй-иутӕм афтӕ цӕмӕн фӕкӕсы, ӕмӕ Библийы амындтӕ сӕ бинонты ’хсӕн нӕ ахадынц? ӕ) Ахӕм уавӕр куы сӕвзӕра, уӕд нын цы кӕнгӕ у?

⁸ Фӕлӕ-иу зындзинӕдтӕ дӕр фӕзындзӕн. Чи зоны, бинонтӕй чидӕр цалынмӕ Библийы уагӕвӕрдтӕм гӕсгӕ цӕрын нӕ райдыдта, уӕдмӕ искӕй коммӕ кӕсын ахуыр нӕ уыди. Хатгай иуӕй-иутӕм афтӕ фӕкӕсы, ӕмӕ адӕймагӕн цыфӕнды  фӕлмӕнӕй, цыфӕнды уӕзданӕй ма дзура, уӕддӕр ӕм ницы хъары. Мах зонӕм, Библи нӕ кӕй фӕдзӕхсы, цӕмӕй аиуварс кӕнӕм «маст ӕмӕ знӕт... ӕмӕ хъӕр, ӕмӕ ӕлгъыст» (Ефесӕгтӕм 4:31, НФ). Фӕлӕ нӕм афтӕ куы кӕса, ӕмӕ бинонтӕй чидӕр ӕндӕр никуыд ӕмбары, уӕд та куыд? Йесо, чи йӕ ӕфхӕрдта ӕмӕ йӕм чи ӕртхъирӕн кодта, уыдоны никуы бафӕзмыдта, фӕлӕ йӕхи йӕ Фыды бӕрны бакодта (1 Петры 2:22, 23). Уӕдӕ дӕ бинонты ’хсӕн ахӕм уавӕр куы сӕвзӕра, уӕд, ацы дунейы куыд кӕнынц, афтӕ кӕныны бӕсты дӕм Иегъовӕ Хуыцауы ӕфсарм уӕд ӕмӕ дзы ӕххуыс кур (Ӕмбисӕндтӕ 3:5—7).

9. Бирӕ чырыстон лӕгтӕ уайдзӕфтӕ кӕныны бӕсты цӕуыл сахуыр сты?

⁹ Уавӕр алы хатт уыцы тӕккӕ нӕ фӕивы, фӕлӕ кӕд дарддӕр дӕр быхсӕм ӕмӕ нын Библи куыд дзуры, афтӕ кӕнӕм, уӕд нын йӕ уынаффӕ ӕнӕмӕнг фӕахъаз уыдзӕн. Бирӕ лӕгтӕ фӕхатыдысты, сӕ бинонты цард кӕй фӕхуыздӕр, Чырысти ӕмбырдмӕ цы ахаст дары, уый куы бамбӕрстой, уӕд. Уыцы ӕмбырд ӕнӕххӕст адӕмӕй у. Фӕлӕ йӕ Йесо уарзы, у йын фӕзминаг ӕмӕ  йын Сыгъдӕг Фыстады руаджы ӕххуыс кӕны хуыздӕр кӕнынӕн. Суанг ма йӕ цард дӕр радта ӕмбырды сӕраппонд (1 Петры 2:21). Бирӕ чырыстон лӕгтӕ Йесойы кӕй фӕзмынц, уый фӕрцы сӕ бинонтӕн сты хорз хистӕртӕ ӕмӕ сӕ кӕрӕдзийыл бӕттынц. Уайдзӕфтӕ ӕмӕ мадзуратӕ кӕнынӕй уый бирӕ ахадгӕдӕр у.

10. а) Лӕг кӕнӕ ус кӕд йӕхи чырыстон хоны, уӕддӕр уый гӕнӕн куыд ис, ӕмӕ бинонтӕн маст кӕна? ӕ) Уавӕр фӕхуыздӕр кӕнынӕн цы ис саразӕн?

¹⁰ Лӕг йӕ бинонты рӕвдыдцух куы уадза кӕнӕ сын Библи ахуыр кӕнынӕн ӕмӕ ӕндӕр ахӕм хъуыддӕгтӕн куы ницы амӕлттӕ кӕна, уӕд та куыд? Кӕнӕ ус йӕ сӕры хицауӕн куы нӕ ӕххуыс кӕна ӕмӕ, Хуыцау куыд амоны, афтӕ йӕ коммӕ куы нӕ кӕса, уӕд та? Бирӕ бинонтӕ иумӕ ӕрбадынц, бауынаффӕ кӕнынц ӕмӕ хъуыддаг банывыл кӕнынц (Уӕвынад 21:10—12; Ӕмбисӕндтӕ 15:22). Фӕлӕ кӕд алы хатт, ӕнхъӕл куыд вӕййӕм, афтӕ нӕ рауайы, уӕддӕр нӕ алкӕмӕндӕр йӕ бинонты фарн бахъахъхъӕнынӕн йӕ бон бирӕ у саразын — Хуыцауы сыгъдӕг уды дыргъ куы хӕссӕм ӕмӕ афтӕмӕй нӕ бинонтӕй алкӕуылдӕр зӕрдӕбынӕй куы аудӕм, уӕд (Галатӕгтӕм 5:22, 23). Нӕ бинонты цард уӕд фӕивдзӕн, ӕмӕ иннӕтӕм куы нӕ ӕнхъӕлмӕ кӕсӕм, кӕд фӕивдзысты, зӕгъгӕ, фӕлӕ нӕхӕдӕг, цы нын ӕмбӕлы, уый куы кӕнӕм ӕмӕ афтӕмӕй, Хуыцауы ӕфсарм нӕм кӕй ис, уый куы ’вдисӕм (Колоссӕгтӕм 3:18—21).

Кӕм ссарӕн ис дзуаппытӕ

11, 12. Нӕ бинонты царды нын Иегъовӕ куыд ӕххуыс кӕны?

¹¹ Адӕм бинонты царды тыххӕй уынаффӕтӕ кӕм нӕ фӕагурынц, ахӕм нӕй. Фӕлӕ мах зонӕм, Библийы кӕй ис иууыл хуыздӕр уынаффӕтӕ ӕмӕ стыр бузныг стӕм Хуыцауӕй, йӕ зӕххон организацийы руаджы нын кӕй ӕххуыс кӕны уыцы уынаффӕтӕм гӕсгӕ цӕрынӕн. Уыцы ӕххуысӕй ӕххӕст пайда исыс? (Псалом 118:129, 130; Михей 4:2).

 ¹² Ӕмбырды фембӕлдтӕм цӕуынӕй дарддӕр ма дӕ бинонтимӕ Библи фӕахуыр кӕныс? Афтӕ цы бинонтӕ кӕнынц, уыдон Хуыцауӕн ӕмвӕнд-ӕмзондӕй кувынц. Хуыцауы Ныхасы амындтӕм гӕсгӕ кӕй цӕрынц, уымӕ гӕсгӕ сты амондджын ӕмӕ фӕрнӕйдзаг (Дыккаг закъон 11:18—21).

13. а) Бинонты царды тыххӕй нӕм фарстытӕ куы фӕзына, уӕд кӕм ис ӕххуыс ссарӕн? ӕ) Цы уынаффӕтӕ хӕссӕм, уыдон хъуамӕ цӕуыл дзурӕг уой?

¹³ Чи зоны дӕм бинонты царды тыххӕй ис фарстытӕ дӕр.  Зӕгъӕм, цал сывӕллоны рауадзынвӕнд кӕнут ӕмӕ уын цӕмӕй фылдӕр ма рацӕуа, уый тыххӕй цы араздзыстут? Ӕнхъӕлцау сылгоймаг йӕхи куы асыгъдӕг кӕны, уӕд уый раст у? Сывӕллоны Хуыцауӕн лӕггад кӕнын куы нӕ фӕнда, уӕд ын ӕй тыхӕй хъарын хъӕуы? Бирӕ ахӕм фарстытыл дзырд цӕуы Иегъовӕйы Ӕвдисӕнты уагъд литературӕйы. Дӕ фарстытӕн дзуапп ссарынӕн пайда кӕн, Библи ахуыр кӕнынӕн цы ӕххуысчингуытӕ ӕмӕ индекстӕ ис, уыдонӕй. Кӕд индекс цы ӕрмӕгмӕ амоны, уый дӕм хӕдзары нӕй, уӕд ӕй фен Паддзахады залы библиотекӕйы. Йе та дӕм кӕд компьютер ис, уӕд уым. Цы фарстытӕ дӕ тыхсын кӕнынц, уыдоныл аныхас кӕнӕн ис фӕлтӕрд чырыстон ӕфсымӕртӕ ӕмӕ хотимӕ. Фӕлӕ сӕм алы хатт уымӕ ма ӕнхъӕлмӕ кӕс, ӕмӕ дын дӕ алы фарстӕн дӕр комкоммӕ зӕгъдзысты, цы кӕнын дӕ хъӕуы кӕнӕ дӕ цы кӕнын нӕ хъӕуы, уый. Фылдӕр хатт уый хъуамӕ дӕхӕдӕг кӕнӕ та дӕ цардӕмбалимӕ скъуыддзаг кӕнай. Афтӕмӕй цы уынаффӕтӕ хӕссай, уыдонӕй канд адӕм нӕ, фӕлӕ дӕ бинонтӕ дӕр уындзысты, Хуыцауы ӕфсарм дӕм кӕй ис, уый (Ромӕгтӕм 14:19; Ефесӕгтӕм 5:10).

Цыбыр афӕлгӕст

• Адӕймаг Иегъовӕйыл ӕнувыд куы уа, уӕд йӕ цардӕмбалыл дӕр ӕнувыд цӕмӕн уыдзӕн?

• Бинонты царды нын зындзинӕдтӕ куы фӕзына, уӕд нын цы ӕххуыс кӕндзӕн, Хуыцауы зӕрдӕмӕ цы цӕуы, уый аразынӕн?

• Хӕдзары иннӕтӕ раст куы нӕ кӕной, уӕддӕр махӕн уавӕр фӕхуыздӕр кӕнынӕн нӕ бон цы у аразын?

[Фарстатӕ ахуыр кӕнынӕн]

[Ныв 155 фарсыл]

Лӕг хъуамӕ фӕзма Йесойы ӕмӕ йӕ бинонтӕн фӕзминаг хистӕр уа.

[Ныв 157 фарсыл]

Бинонтӕ иумӕ Библи куы ахуыр кӕной, уӕд уыдзысты ӕнгомдӕр.