Хуыцау ӕвзӕрыл цы хъуыддӕгтӕ нымайы, уыдонмӕ цы цӕстӕй хъуамӕ кӕсай? (1)

Цавӕр уагахаст у ӕнӕгъдау? (2)

Цы цӕстӕй хъуамӕ кӕса чырыстон сайынмӕ? (3) ӕхцайыл хъазынмӕ? (3) давынмӕ? (3) фыдмитӕм? (4) хинтӕ-кӕлӕнтӕм? (5) фыднозтмӕ? (6)

Адӕймагӕн йӕ бон куыд у ӕвзӕр хъуыддӕгтӕ ныууадзын? (7)

1. Хуыцауы лӕггадгӕнджытӕ уарзынц, хорз цы у, уый. Фӕлӕ ма уымӕй уӕлдай, ӕвзӕр цы у, уымӕй дӕр хъуамӕ се сӕфт уыной (Псалом 96:10). Ома, Хуыцау цы хъуыддӕгтӕ нӕ уарзы, уыдонӕй хъуамӕ сӕхи хизой. Цавӕр сты уыцы хъуыддӕгтӕ?

2. Хӕтындзинад. Хуыцау Йегъовӕ стыр тӕригъӕдыл нымайы, адӕймаг куы фӕхӕты, йӕ цардӕмбалыл гадзрахатӕй куы рацӕуы, фосимӕ чъизи митӕ куы фӕкӕны, тугхӕстӕг чи у, ахӕмимӕ йӕ цард куы баиу кӕны ӕмӕ нӕлгоймаг нӕлгоймагимӕ ӕмуат куы ’рцӕуы (Левиты 18:6; Ромӕгтӕм 1:26, 27; 1 Коринфӕгтӕм 6:9, 10). Нӕлгоймаг ӕмӕ сылгоймаг иумӕ куы цӕрой, фӕлӕ сын загс куы нӕ уа, уӕд хъуамӕ кӕнӕ ахицӕн уой, кӕнӕ та сӕ къухтӕ ӕрфыссой (Дзуттӕгтӕм 13:4).

3. Сайын, ӕхцайыл хъазын, давын. Йегъовӕ Хуыцау никуы фӕсайы (Титмӕ 1:2). Йӕ хорзӕх ссарын кӕй фӕнды, уыдон дӕр хъуамӕ ма сайой (Ӕмбисӕндтӕ 6:16–19; Колоссӕгтӕм 3:9, 10). Ӕхцайыл чи хъазы, уый свӕййы зыд ӕмӕ кӕрӕф. Уымӕ гӕсгӕ чырыстӕттӕ ӕхцайыл нӕ хъазынц, зӕгъӕм, лӕтӕрей, бӕхты  дугътӕ ӕмӕ ӕндӕр ахӕм хъӕзтытӕй (Ефесӕгтӕм 5:3–5). Чырыстӕттӕ давгӕ дӕр нӕ кӕнынц. Уӕййаг дзаума давӕггаг у, уый куы зоной, уӕд ӕй не ’лхӕнынц ӕмӕ искӕй дзаумӕттӕ ӕнӕбафӕрсгӕйӕ нӕ исынц (Рацыд 20:15; Ефесӕгтӕм 4:28).

4. Мӕсты кӕнын, фыдмитӕ. Адӕймагӕн йӕ маст уромын йӕ бон куы нӕ уа, уӕд ӕй уый фыдмитӕм дӕр ӕркӕндзӕн (Райдиан 4:5–8). Фыдмитӕ чи кӕны, уый Хуыцауы хӕлар никуы суыдзӕн (Псалом 10:5; Ӕмбисӕндтӕ 22:24, 25). Кӕд нын исчи смаст кодта, уӕд дзы маст исын раст нӕу (Ӕмбисӕндтӕ 24:29; Ромӕгтӕм 12:17–21).

5. Хинтӕ-кӕлӕнтӕ. Иуӕй-иу адӕм цӕмӕй сӕ низтӕй сдзӕбӕх уой, уый тыххӕй ӕххуыс курынц ӕнӕуынгӕ тыхтӕй. Иннӕтӕ та се знӕгтӕн хинтӕ скӕнынц, цӕмӕй сыл низтӕ бафтауой кӕнӕ цӕмӕй амӕлой. Ӕппӕт уыцы хъуыддӕгтӕ сты Хӕйрӕгӕй. Уымӕ гӕсгӕ чырыстӕттӕ ахӕм хъуыддӕгтӕй хъуамӕ сӕхи хизой (Дыккаг закъон 18:9–13). Йегъовӕмӕ ӕввахс куы уӕм, уӕд нӕ хинтӕй уымӕй хуыздӕр ницы бахъахъхъӕндзӕн (Ӕмбисӕндтӕ 18:10).

6. Фыднозт. Адӕймаг иу гыццыл сӕн, бӕгӕны кӕнӕ ӕндӕр карз нозт куы нуаза, уӕд уым ӕвзӕрӕй ницы ис (Псалом 103:15; 1 Тимофеймӕ 5:23). Фӕлӕ фыднозт кӕнын ӕмӕ расыг кӕнын Хуыцауы цӕсты у тынг ӕвзӕр (1 Коринфӕгтӕм 5:11–13; 1 Тимофеймӕ 3:8). Ӕгӕр куы нуазай, уӕд де ’нӕниздзинад дӕр фесафдзынӕ ӕмӕ дӕ бинонты цард дӕр фехӕлдзӕн. Уый ма дӕ ӕнцонтӕй ӕркӕндзӕн ӕндӕр ӕвзӕр хъуыддӕгтӕм дӕр (Ӕмбисӕндтӕ 23:20, 21, 29–35).

7. Хуыцау ӕвзӕрыл кӕй нымайы, ахӕм хъуыддӕгтӕ чи кӕны, уыдон «Хуыцауы паддзахадмӕ нӕ бацӕудзысты» (Галатӕгтӕм 5:19–21). Кӕд Хуыцауы ӕцӕгдӕр уарзыс ӕмӕ дӕ фӕнды, цӕмӕй дӕ райгонд уа, уӕд дӕ бон бауыдзӕн уыцы ӕвзӕр хъуыддӕгтӕ ныууадзын (1 Иоанны 5:3). Ахуыр кӕн, Хуыцау ӕвзӕрыл цы нымайы, уымӕй де сӕфт уынын (Ромӕгтӕм 12:9). Хуыцауы зӕрдӕмӕ чи цӕуы, ахӕм миниуджытӕ кӕмӕ ис, уыцы адӕмыл дӕхи бӕтт (Ӕмбисӕндтӕ 13:20). Стыр ӕххуыс дын уыдзысты фӕлтӕрд чырыстон хӕлӕрттӕ (Иаковы 5:14). Уымӕй уӕлдай ма Хуыцаумӕ кув ӕмӕ йыл дӕ ныфс дар (Филиппӕгтӕм 4:6, 7, 13).

[Нывтӕ 20, 21 фӕрстыл]

Хуыцау нӕ уарзы ахӕм митӕ: фыднозт, давын, ӕхцайыл хъазын ӕмӕ фыдмитӕ