Дунейы ӕппӕты арӕхӕмбӕлгӕдӕр чиныг
Дунейы ӕппӕты арӕхӕмбӕлгӕдӕр чиныг
«Библи у ӕгас историйы ӕппӕты арӕхӕмбӕлгӕдӕр чиныг, кӕцыйы кӕсынц... Иннӕ чингуыты уӕлдай, Библийы экземпляртӕй фылдӕр ӕрцыд парахатгонд. Афтӕ ма, Библи цыфӕнды ӕндӕр чиныгӕй, арӕхдӕр ӕмӕ фылдӕр ӕвзӕгтӕм цӕуы тӕлмац» («The World Book Encyclopedia»)1.
ЧИНГУЫТӔ цавӕрдӕр ӕгъдауӕй сты адӕймӕгты хуызӕн. Уыдон фӕзынынц дунемӕ, популярон свӕййынц ӕмӕ цалдӕр классикон уацмысӕй дарддӕр, зӕронд кӕнынц ӕмӕ сӕфынц. Библиотекӕтӕ-иу арӕх свӕййынц «уӕлмӕрдтӕ» ӕнӕнымӕц чингуытӕн, кӕцытӕ дугивгъуыд сты, ничиуал сӕ кӕсы ӕмӕ ӕцӕг мард сты.
Фӕлӕ уыцы классикон уацмысты ’хсӕн дӕр Библи у уӕлвӕтк. Кӕд Библи 3 500 азы размӕ райдыдтой фыссын, уӕддӕр йӕ ахсджиагдзинад нӕ фесӕфта. Иннӕ чингуыты уӕлдай зынгӕ нымӕцӕй у парахатгонд зӕххыл a. Ӕрвылаз ӕнӕхъӕн Библийӕ кӕнӕ йӕ хӕйттӕй 60 милуанмӕ ’ввахс экземпляры парахат цӕуы. Фыццаг рауагъд, кӕцы мыхуыр ӕрцыд ӕмбырдон шрифтӕй, рацыд немыцаг ӕрхъуыдыгӕнӕг Иоганн Гутенберджы мыхуырон прессыл иу-1455 азы. Уӕдӕй нырмӕ мыхуыргонд ӕрцыд Библийы цыппар миллиард экземпляры (ӕнӕхъӕнӕй кӕнӕ хӕйттӕй). Никӕцы ӕндӕр чиныг, динон у ӕви нӕ, йӕ тиражӕй нӕй абарӕн уыцы нымӕцмӕ.
Афтӕ ма, историйы дӕргъы Библи у иуыл фылдӕр ӕвзӕгтӕм кӕй ратӕлмац кодтой, уыцы чиныг. Ӕнӕхъӕн Библи кӕнӕ йӕ хӕйттӕ тӕлмац сты 2 100 йӕ фылдӕр ӕвзӕгтӕ ӕмӕ диалекттӕм b. Адӕмӕн сӕ 90 процентӕй фылдӕрӕн сӕ бон у кӕсын Библи сӕ мадӕлон ӕвзагыл, кӕд ӕнӕхъӕнӕй нӕ, уӕддӕр йӕ хӕйттӕй искӕцы2. Афтӕмӕй уыцы чиныг ахызт паддзахадон арӕнтӕй ӕмӕ фӕуӕлахиз расон ӕмӕ этникон цӕлхдуртыл.
Гӕнӕн ис, ӕрмӕст бӕрӕггӕнӕнтӕ дӕ нӕ разӕнгард кӕнынц Библи раиртасынмӕ. Фӕлӕ йӕ тираж ӕмӕ ӕвзӕгты нымӕц дисы ӕфтауы ӕмӕ бӕлвырд у, Библийӕн ӕппӕтдунеон хъӕуындзинад кӕй ис. Кӕй зӕгъын ӕй хъӕуы, чиныг, кӕцы стыр пайда хӕссы ӕмӕ кӕцы ӕппӕт адӕймагады историйы тӕлмац ӕрцыд иуыл фылдӕр ӕвзӕгтӕм, у дӕ хъусдарды аккаг.
[Фиппаинӕгтӕ]
a Нымайынц, зӕгъгӕ, дыккаг арӕхӕмбӕлгӕ публикаци у сырхцъар буклет «Цитатӕ Мао Цзэдуны куыстытӕй», кӕцытӕй уӕй кӕнӕ парахатгонд ӕрцыд 800 милуанмӕ ’ввахс экземпляры.
b Ӕвзӕгты нымӕцы тыххӕй статистикон бӕрӕггӕнӕнтӕ бындуриуӕг кӕнынц Библийы Иугонд Ӕхсӕнӕдты мыхуыргонд цифрӕтыл.
[Ныв 6 фарсыл]
Латинаг ӕвзагыл Гутенберджы Библи уыд фыццаг чиныг, кӕцы мыхуыр ӕрцыд ӕмбырдон шрифтӕй.
