Цы у ацы чиныджы мидис

Библиотекӕмӕ фыццаг хатт бацӕуӕг адӕймаг, гӕнӕн ис, бирӕ чингуыты нымӕцӕй фӕтыхса. Фӕлӕ йын гыццыл куы бамбарын кӕной, цавӕр принципмӕ гӕсгӕ сты ӕвӕрд чингуытӕ, уӕд тагъд базондзӕн, куыд агургӕ у хъӕуӕг чиныг. Раст ахӕм амалӕй дын Библийы дӕр исты агурын ӕнцондӕр уыдзӕн, куы йын ӕмбарай йӕ мидисы равӕрд.

ДЗЫРД «Библи» равзӕрд грекъаг дзырд библи́а-йӕ, кӕцы нысан кӕны «папирусы тыхтонтӕ» кӕнӕ «чингуытӕ»¹. Ӕцӕгӕй Библи у 66 сӕрмагонд чингуыты ӕмбырдгонд, библиотекӕ, кӕцытӕ фыст цыдысты 1 600 азы дӕргъы, нӕ эрӕйы агъоммӕ 1513 азӕй нӕ эрӕйы 98 азмӕ.

Фыццаг 39 чиныджы, Библийы мидисы ӕртыккаг ӕмбис, зындгонд у куыд Дзуттаг Фыстытӕ, уымӕн ӕмӕ уыдон ӕмткӕй ӕрцыдысты фыст уыцы ӕвзагыл. Уыцы чингуытӕ, хуымӕтӕгӕй гӕнӕн ис адих кӕнын ӕртӕ хъайыл: 1) историон, Царды Райдианӕй Есфиры онг, 17 чиныджы; 2) поэтикон, Иовӕй Соломоны Зарджыты Зарды онг, 5 чиныджы; ӕмӕ 3) пехуымпарадон, Исайӕ Малахийы онг, 17 чиныджы. Дзуттаг Фыстыты лӕвӕрд цӕуы зӕхх ӕмӕ адӕймагады рагон истори, ӕмӕ ма рагон израилаг адӕмы истори йӕ равзӕрдӕй нӕ эрӕйы агъоммӕ V ӕнусы онг.

Иннӕ 27 чиныджы зындгонд сты куыд Чырыстон Грекъаг Фыстытӕ, уымӕн ӕмӕ фыст уыдысты грекъаг ӕвзагыл, уӕды рӕстӕджы ӕхсӕнадӕмон ӕвзагыл. Уыдонӕн сӕ равӕрд темӕтӕм гӕсгӕ у: 1) фондз историон чиныджы — Евангелитӕ ӕмӕ Куыстытӕ, 2) дыууын иу бӕстонфысты ӕмӕ 3) Раргомад. Чырыстон Грекъаг Фыстыты хъусдард здӕхт у Йесо Чырысти ӕмӕ йӕ ахуыргӕнинӕгты ахуырӕдтӕ ӕмӕ архайдмӕ, кӕцытӕ цардысты нӕ эрӕйы I ӕнусы.