1.  Цы у Стыр Вавилон?

2.  Мессийӕ кӕд хъуамӕ фӕзындаид?

3.  Тугимӕ баст процедурӕтӕ

4.  Лӕг ӕмӕ усӕн хицӕнтӕй цӕрӕн кӕд ис

5.  Бӕрӕгбӕттӕ

6.  Хӕцгӕ низтӕ

7.  Юридикон ӕмӕ куыстимӕ баст фарстатӕ

 1. Цы у Стыр Вавилон?

Кӕцӕй йӕ зонӕм, «Стыр Вавилон» мӕнг динтӕм се ’ппӕтмӕ дӕр кӕй амоны? (Раргомад 17:5). Ӕркӕсӕм цалдӕр бӕлвырдгӕнӕнмӕ.

• Йӕ бар цӕуы ӕгас дунейыл дӕр. Библийы фыст ис, зӕгъгӕ, Стыр Вавилон бады «дзыллӕтыл» ӕмӕ «адӕмтыл» ӕмӕ «зӕххон паддзӕхтыл йӕ бар... цӕуы» (Раргомад 17:15, 18).

• Политикӕмӕ ӕмӕ коммерцимӕ нӕ амоны. «Зӕххон паддзӕхтӕ» ӕмӕ «сӕудӕджертӕ» йемӕ сӕфт не ’рцӕудзысты (Раргомад 18:9, 15).

• Хуыцауы ном ӕгад кӕны. Библи йӕ хоны хӕтаг сылгоймаг, уымӕн ӕмӕ хицауӕдтимӕ лымӕн кӕны ӕхцайы тыххӕй кӕнӕ ӕндӕр пайда райсыны тыххӕй (Раргомад 17:1, 2). Уый ӕппӕт адӕмты дӕр сайы ӕмӕ аххосджын у бирӕты мӕлӕты (Раргомад 18:23, 24).

Раздӕх 13 урокмӕ, 6 дӕлсӕргондмӕ

 2. Мессийӕ кӕд хъуамӕ фӕзындаид?

Библийы рагацау фыст ӕрцыд, Мессийӕйы фӕзындмӕ кӕй хъуамӕ рацыдаид 69 къуырийы. (Бакӕс Данелы 9:25.)

• 69 къуырийы кӕд райдыдтой? Нӕ эрӕйы размӕ 455 азы. Уӕд хицау Нееми Иерусалиммӕ ӕрцыд, цӕмӕй йӕ фӕстӕмӕ йӕ къахыл слӕууын кодтаид ӕмӕ йӕ ногӕй сарӕзтаид (Данел 9:25; Нееми 2:1, 5–8).

• 69 къуырийы цас ахастой? Библийы иуӕй-иу пехуымпарӕдты бон фӕамоны азмӕ (Нымӕцтӕ 14:34; Йезекил 4:6). Уӕдӕ ацы къуыритӕй алкӕцыйы дӕр ис авд азы. Ацы пехуымпарады 69 къуырийы уайынц 483 азы (7 хатты 69).

• 69 къуырийы кӕд фесты? Нӕ эрӕйы размӕ 455-ӕм азӕй 483 азы куы ранымайӕм, уӕд ӕрцӕудзыстӕм нӕ эрӕйы 29-ӕм азмӕ a. Раст уыцы аз Йесо донаргъуыд райста ӕмӕ сси Мессийӕ! (Лукайы 3:1, 2, 21, 22).

Раздӕх 15 урокмӕ, 5 дӕлсӕргондмӕ

 3. Тугимӕ баст процедурӕтӕ

Иуӕй-иу процедурӕтӕ баст вӕййынц рынчынӕн йӕхи тугимӕ. Уыдонӕй кӕцыдӕртӕ чырыстонӕн кӕнын не ’мбӕлы. Зӕгъӕм, не ’мбӕлы туг раттын, цӕмӕй йӕ искӕмӕн бауадзой. Кӕнӕ операцийы размӕ туг раттын, цӕмӕй йӕ бавӕрой ӕмӕ йӕ операцийы рӕстӕг адӕймагӕн фӕстӕмӕ бауадзой (Дыккаг закъон 15:23).

Фӕлӕ кӕцыдӕр процедурӕтыл чырыстӕттӕн сӕ бон у, ӕмӕ сразы уой. Уыдонмӕ хауынц туджы анализтӕ, гемодиализ, гемодилюци. Ис ма пайда кӕнӕн аппарат селл-сейверӕй ӕмӕ, туг кӕй фӕрцы зилдух кӕны, уыцы аппаратӕй дӕр. Дзырд медицинон процедурӕтыл, анализтыл ӕмӕ хи дзӕбӕх кӕныныл куы цӕуа, уӕд тугимӕ баст фарстатӕ алы чырыстон дӕр хъуамӕ йӕхӕдӕг аскъуыддзаг кӕна. Уыцы процедурӕтӕ алы дохтыр дӕр, гӕнӕн ис, гыццыл ӕндӕрхуызон кӕна. Уымӕ гӕсгӕ операци скӕныны, анализтӕ раттыны кӕнӕ хи дзӕбӕх кӕныны размӕ чырыстон хъуамӕ бӕстон базона, йӕ тугӕн ын цы араздзысты, уый. Ахъуыды кӕн ацы фарстатыл:

• Зӕгъӕм, мӕ тугӕй мын цасдӕр аппаратмӕ ауагътой ӕмӕ йын йӕ цыд дӕр рӕстӕгмӕ ӕрлӕууын кодтой. Ахӕм уавӕры ма мӕ бон уыдзӕн афтӕ хъуыды кӕнын, ӕмӕ уыцы туг уӕддӕр мӕ буарӕй у ӕмӕ йӕ уымӕ гӕсгӕ «зӕхмӕ акалын» нӕ хъӕуы, ӕмӕ мӕ цӕсгом сыгъдӕг уыдзӕн? (Дыккаг закъон 12:23, 24).

• Зӕгъӕм, цавӕрдӕр процедурӕйы рӕстӕг мын мӕ тугӕй цасдӕр райстой, хос ӕм бафтыдтой ӕмӕ мын ӕй фӕстӕмӕ бауагътой (кӕнӕ та дзы байсӕрстой, мӕ буар лыг кӕм у, уым). Ме ’фсарм Библимӕ гӕсгӕ ахуыр кӕй у, уымӕ гӕсгӕ мын уый бар ратдзӕн, цӕмӕй ахӕм процедурӕйыл сразы уон?

Раздӕх 39 урокмӕ, 3 дӕлсӕргондмӕ

 4. Лӕг ӕмӕ усӕн хицӕнтӕй цӕрӕн кӕд ис

Библи афтӕ нӕ зӕгъы, ӕмӕ лӕг ӕмӕ усӕн хицӕнтӕй цӕрӕн ис. Ӕмӕ хицӕнтӕй куы цӕрой, уӕддӕр сын, Библимӕ гӕсгӕ, уый бар нӕй, цӕмӕй сӕ цард ӕндӕр искӕимӕ баиу кӕной (1 Коринфӕгтӕм 7:10, 11). Фӕлӕ ис ахӕм уавӕртӕ, ӕмӕ чырыстон аскъуыддзаг кӕны, хицӕнӕй цӕрын йеддӕмӕ йын ӕндӕр гӕнӕн кӕй нӕй.

• Лӕджы йӕ бинонты дарын нӕ фӕнды. Лӕджы йӕ бинонты дарын нӕ фӕнды, ӕмӕ йӕ бинонтӕн, ӕнӕмӕнг цы хъӕуы, уый нӕй (1 Тимофеймӕ 5:8).

• Чырыстоны йӕ цардӕмбал фыднад кӕны. Йӕ цардӕмбал ӕй афтӕ тынг фӕнӕмы, ӕмӕ йе ’нӕниздзинадӕн кӕнӕ йӕ цардӕн тӕссаг у (Галатӕгтӕм 5:19–21).

• Чырыстоны уырнындзинадӕн ӕцӕгӕйдӕр тӕссаг у. Йӕ цардӕмбал ӕй Йегъовӕйӕн лӕггад кӕнын нӕ уадзы (Хъуыддӕгтӕ 5:29).

Раздӕх 42 урокмӕ, 3 дӕлсӕргондмӕ

  5. Бӕрӕгбӕттӕ

Чырыстӕттӕ нӕ бӕрӕг кӕнынц, Йегъовӕйы зӕрдӕмӕ чи нӕ цӕуы, ахӕм бӕрӕгбӕттӕ. Фӕлӕ уыцы бӕрӕгбӕтты рӕстӕг бахауынц алыхуызон уавӕрты. Ӕмӕ-иу алы чырыстон дӕр хъуамӕ йӕхӕдӕг аскъуыддзаг кӕна, куыд бакӕндзӕн, уый. Уыцы уавӕртӕй цалдӕрмӕ ӕркӕсӕм.

• Чидӕр дын бӕрӕгбоны фӕдыл арфӕ кӕны. Дӕ бон ын у «бузныг» зӕгъын. Бӕрӕгбон цӕуылнӕ бӕрӕг кӕныс, уый базонын ӕй куы бафӕнда, уӕд ын ӕй дӕ бон у бамбарын кӕнын.

• Дӕ цардӕмбал Йегъовӕйы Ӕвдисӕн нӕу ӕмӕ дӕ бӕрӕгбоны рӕстӕг йӕ хӕстӕджытӕм семӕ фынгыл абадынмӕ кӕны. Кӕд дын де ’фсарм уый бар дӕтты, цӕмӕй ацӕуай, уӕд дӕ цардӕмбалӕн рагацау бамбарын кӕн, бӕрӕгбоны номыл дзы истытӕ куы аразой, уӕд дзы кӕй нӕ архайдзынӕ.

• Куысты хицау дын бӕрӕгбонмӕ преми дӕтты. Хъуамӕ афтӕ зӕгъай, нӕ йӕ исын, зӕгъгӕ? Афтӕ бакӕнын ӕнӕмӕнг нӕу. Ахъуыды-иу кӕн: хицау дын преми бӕрӕгбоны фӕдыл дӕтты ӕви дӕ хорз куысты тыххӕй?

• Бӕрӕгбоны рӕстӕг дын чидӕр цыдӕр лӕвар кӕны. Лӕвар дын чи дӕтты, уый дын, гӕнӕн ис, зӕгъа: «Бӕрӕгбон кӕй нӕ бӕрӕг кӕныс, уый зонын. Фӕлӕ дын ацы лӕвар мӕ номыл». Чи зоны йӕ фӕнды, цӕмӕй дын исты хорздзинад ракӕна. Фӕлӕ уый гӕнӕн дӕр ис, ӕмӕ дын дӕ уырнындзинад фӕлвара кӕнӕ та йӕ фӕнда, цӕмӕй бӕрӕгбоны архайай. Уыдӕттыл-иу ахъуыды кӕн, ӕмӕ-иу стӕй аскъуыддзаг кӕн, лӕвар райсдзынӕ ӕви нӕ. Цавӕрфӕнды уынаффӕ ма рахӕссӕм – мах фӕнды, цӕмӕй нӕ цӕсгом сыгъдӕг уа ӕмӕ Йегъовӕйыл иузӕрдионӕй баззайӕм (Хъуыддӕгтӕ 23:1).

Раздӕх 44 урокмӕ, 1 дӕлсӕргондмӕ

 6. Хӕцгӕ низтӕ

Мах адӕмы уарзӕм. Уымӕ гӕсгӕ, нӕ бон цы у, уый фӕаразӕм, цӕмӕй макӕй фӕрынчын кӕнӕм, зӕгъӕм, хӕцгӕ низӕй рынчын куы уӕм кӕнӕ, рынчын куы нӕ уӕм, фӕлӕ нӕм афтӕ куы кӕса, ӕмӕ низ махӕй иннӕтыл бахӕцдзӕн, уӕд. Афтӕмӕй ӕххӕст кӕнӕм Библийы фӕдзӕхст: «Иннӕты уарз, дӕхи куыд уарзыс, афтӕ» (Ромӕгтӕм 13:8–10).

Ацы фӕдзӕхст кӕй ӕххӕст кӕнӕм, уый цӕмӕй бӕрӕг уыдзӕн? Рынчын чи у, уыцы адӕймаг хъуамӕ иннӕтӕн хъӕбыстӕ ӕмӕ пъатӕ ма кӕна. Хъуамӕ-иу ма фӕтӕргай уа, исчи йӕ бинонты ӕнӕниздзинадӕн куы тӕрса, ӕмӕ йӕ уый тыххӕй сӕхимӕ куы нӕ хона, уӕд. Донаргъуыд райсыны размӕ та хъуамӕ хистӕр нӕлгоймӕгты советы координаторӕн йӕ уавӕры тыххӕй зӕгъа. Уӕд ӕфсымӕртӕ бацархайдзысты, цӕмӕй, йемӕ ма донаргъуыд чи исдзӕн, уыдоны бахъахъхъӕной. Хӕцгӕ низӕй фӕрынчын кӕнынӕй тӕссаг кӕмӕн уыд, ахӕм адӕймаг искӕимӕ ӕмбӕлын райдайыны размӕ хъуамӕ ратта туджы анализ. Уӕд бӕрӕг уыдзӕн, йӕхицӕн куыд хуыздӕр уа, ӕрмӕст ууыл кӕй нӕ хъуыды кӕны, фӕлӕ, «иннӕтӕн куыд хуыздӕр уа», ууыл дӕр (Филиппӕгтӕм 2:4).

Раздӕх 56 урокмӕ, 2 дӕлсӕргондмӕ

 7. Юридикон ӕмӕ куыстимӕ баст фарстатӕ

Нӕхи бирӕ зындзинӕдтӕй бахиздзыстӕм, искӕимӕ (суанг не ’мчырыстӕттимӕ дӕр) ӕхцаимӕ баст хъуыддӕгты фӕдыл цӕуыл баныхас кӕнӕм, уымӕн-иу гӕххӕтт куы скӕнӕм, уӕд (Йереми 32:9–12). Фӕлӕ уӕддӕр гӕнӕн ис, ӕмӕ чырыстӕтты ’хсӕн дӕр гыццыл исты рауайа ӕхцаимӕ баст хъуыддӕгты кӕнӕ ӕндӕр хъуыддӕгты фӕдыл. Ахӕм уавӕры-иу хъуамӕ фарста уайтагъд аскъуыддзаг кӕной сабырӕй ӕмӕ сӕхи ’хсӕн.

Фӕлӕ ныл, зӕгъӕм, чидӕр сайдӕй рацыд кӕнӕ нӕ фыдкой фӕкодта, уӕд та? (Бакӕс Матфейы 18:15–17.) Йесо загъта, цавӕр ӕртӕ къахдзӕфы хъӕуы саразын:

1. Бацархай, цӕмӕй хъуыддаг уӕхи ’хсӕн аскъуыддзаг кӕнат. (15 стих)

2. Уымӕй куы ницы рауайа, уӕд ӕмбырдӕй иу кӕнӕ дыууӕ фӕлтӕрдджын чырыстонӕн зӕгъ, цӕмӕй йӕм демӕ бацӕуой. (16 стих)

3. Хъуыддагӕй та куы ницы рауайа, ӕрмӕстдӕр-иу уӕд зӕгъ хистӕр нӕлгоймӕгтӕн. (17 стих)

Арӕхдӕр не ’фсымӕртыл тӕрхондонмӕ хъаст бадӕттын нӕ фӕхъӕуы, уымӕн ӕмӕ уый Йегъовӕйы ӕмӕ ӕмбырды номыл ӕвзӕрырдӕм фӕзындзӕн (1 Коринфӕгтӕм 6:1–8). Фӕлӕ кӕцыдӕр уавӕрты хъуыддаг фӕхъӕуы тӕрхондонмӕ бадӕттын. Зӕгъӕм, лӕг ӕмӕ ус куы хицӕн кӕной кӕнӕ хъуыддаг опекунство, алименттӕ, страховкӕтӕ, банкротство ӕмӕ завещаниимӕ баст куы уа, уӕд. Ахӕм хъуыддӕгты фӕдыл чырыстон тӕрхондоны ӕххуыс куы бацагура, цӕмӕй алцыдӕр сабырӕй арӕзт ӕрцӕуа, уӕд Библийы уагӕвӕрдты сӕрты нӕ ахиздзӕн.

Чырыстон Библийы уагӕвӕрдтӕ нӕ фехалдзӕн, бартӕ кӕмӕ ис, уыдонӕн стыр фыдракӕнды тыххӕй куы фехъусын кӕна, уӕд. Уыцы фыдракӕндтӕй иуӕй-иутӕ сты: кӕмӕндӕр тыхми бакодтой, сывӕллонӕн тыхми ӕмӕ ӕвзӕр митӕ бакодтой, кӕмӕдӕр бабырстой кӕнӕ уынджы чидӕр кӕуылдӕр йӕхи ныццавта, бирӕ ӕхца кӕнӕ зынаргъ цыдӕртӕ адавтой йе та кӕйдӕр амардтой.

Раздӕх 56 урокмӕ, 3 дӕлсӕргондмӕ