1, 2. Цавӕр фарстайыл дӕ хъӕуы ахъуыды кӕнын ӕмӕ цӕмӕн?

БИБЛИ ахуыр кӕнгӕйӕ ды базыдтай, бирӕтӕ сӕхи Хуыцауы лӕггадгӕнджытӕ кӕй хонынц, фӕлӕ, цытӕ аразынц ӕмӕ иннӕтӕн цы амонынц, уыдӕттӕй Хуыцау йе сӕфт кӕй уыны (2 Коринфӕгтӕм 6:17). Ӕмӕ нын Йегъовӕ уымӕ гӕсгӕ дзуры, цӕмӕй мӕнг динӕй, кӕнӕ «Стыр Вавилонӕй», рацӕуӕм (Раргомад 18:2, 4). Ды куыд бакӕндзынӕ? Алчидӕр хъуамӕ равзара, куыд бакӕндзӕн, уый. Ӕмӕ нӕ алкӕй дӕр хъӕуы ахъуыды кӕнын ахӕм фарстайыл: «Хуыцауӕн, куыд ӕй фӕнды, афтӕ лӕггад кӕндзынӕн, ӕви йын ныронг куыд куывтон, дарддӕр дӕр ын афтӕ кувдзынӕн?»

² Кӕд мӕнг дин ныууагътай, уӕд хорз бакодтай. Фӕлӕ ма дӕ, чи зоны, уӕддӕр фӕнды мӕнг дины ӕгъдӕуттӕй кӕцыдӕртӕ ӕххӕст кӕнын кӕнӕ ма кӕцыдӕр бӕрӕгбӕттӕм ӕхсызгонӕй фенхъӕлмӕ кӕсыс. Цӕй ӕмӕ дзы иуӕй-иутӕм ӕркӕсӕм. Ӕмӕ стӕй аныхас кӕнӕм, Йегъовӕ сӕм цы цӕстӕй кӕсы ӕмӕ афтӕ ахсджиаг цӕмӕн у, цӕмӕй сӕм мах дӕр ахӕм цӕстӕй кӕсӕм.

3. а) Иуӕй-иутӕн зын цӕмӕн вӕййы, цӕмӕй Хуыцаумӕ кувгӕйӕ нывтӕй мауал пайда кӕной? б) Нывтӕн кувыны тыххӕй Библийы цы фыст ис?

³ Иуӕй-иутӕ бирӕ азты дӕргъы Хуыцаумӕ кувгӕйӕ  пайда кӕнынц нывтӕй кӕнӕ та сӕ хӕдзӕртты ис сӕрмагонд кувӕн бынӕттӕ. Чи зоны, ды дӕр афтӕ ахуыр дӕ, ӕмӕ дӕм Хуыцаумӕ ӕнӕ уыдӕттӕй кувын раст нӕ кӕсы. Фӕлӕ дӕ зӕрдыл дар, Йегъовӕ нын кӕй амоны, куыд ын хъуамӕ кувӕм, уый. Ӕмӕ Библийы комкоммӕ фыст ис, Йегъовӕйы кӕй нӕ фӕнды, цӕмӕй нывтӕн кувӕм. (Бакӕс Рацыд 20:4, 5; Псалом 115:4–8; Исай 42:8; 1 Иоанны 5:21.)

4. а) Мӕрдтӕн табу кӕнын раст цӕуылнӕ у? б) Йегъовӕ йӕ адӕмӕн цӕмӕн дзырдта, цӕмӕй мӕрдтимӕ ныхас кӕныныл ма архайдтаиккой?

⁴ Иуӕй-иутӕ бирӕ рӕстӕг, тыхтӕ ӕмӕ ӕхца хардз кӕнынц сӕ мӕрдтӕн цыдӕртӕ аразыныл, цӕмӕй сӕм ма фӕхъыг уой. Суанг ма сын табу дӕр фӕкӕнынц. Фӕлӕ мах базыдтам, чи амард, уыдонӕн сӕ бон кӕй нӕу махӕн нӕдӕр баххуыс кӕнын, нӕдӕр нын зиан ӕрхӕссын. Уыдон ӕндӕр кӕмдӕр нӕ цӕрынц. Уымӕй уӕлдай ма тӕссаг дӕр у семӕ аныхас кӕныныл архайын. Гӕнӕн ис, ӕмӕ нын исчи зӕгъа, нӕ мард хиуӕттӕй нӕм чидӕр цыдӕр ныхас кӕй ӕрбарвыста. Фӕлӕ ӕцӕгӕй та уый уыдзӕн хӕйрӕджытӕй. Ӕмӕ Йегъовӕ дӕр израилӕгты уый тыххӕй фӕдзӕхста, цӕмӕй ма архайдтаиккой мӕрдтимӕ ныхас кӕныныл ӕмӕ сӕхи бынтондӕр хызтаиккой хӕйрӕджытимӕ баст хъуыддӕгтӕй (Дыккаг закъон 18:10–12; кӕс 26-ӕм ӕмӕ 31-ӕм уӕлӕмхасӕнтӕ).

5. Цы дын баххуыс кӕндзӕн, цӕмӕй нывтӕн мауал кувай ӕмӕ мӕрдтӕн мауал табу кӕнай?

⁵ Цы дын баххуыс кӕндзӕн, цӕмӕй Хуыцаумӕ кувгӕйӕ нывтӕй мауал пайда кӕнай ӕмӕ мӕрдтӕн  мауал табу кӕнай? Библи кӕс ӕмӕ лӕмбынӕг хъуыды кӕн, Йегъовӕ ахӕм хъуыддӕгтӕм цы цӕстӕй кӕсы, ууыл. Уыдӕттӕ йын «ӕнад» сты, кӕнӕ йӕ цӕсты сты ӕлгъаг (Дыккаг закъон 27:15). Йегъовӕмӕ алы бон дӕр кув, цӕмӕй дын ӕххуыс кӕна алцӕмӕ дӕр уый цӕстӕй кӕсынӕн ӕмӕ дӕ бон уа, уый куыд фӕнды, афтӕ йын лӕггад кӕнын (Исай 55:9). Фидарӕй дӕ уырнӕд, Хуыцау дын уыйбӕрц тых кӕй ратдзӕн, цӕмӕй мӕнг дин ныууадзай ӕмӕ дын йемӕ иумӕйагӕй мацыуал уа.

6. Йесо Чырыстийы гуырӕнбон 25 декабры цӕмӕн бӕрӕг кӕнынц?

⁶ Рождество у, ӕгас дунейы дӕр ӕппӕты кадджындӕр бӕрӕгбӕттыл нымад чи у, уыдонӕй сӕ иу. Ӕмӕ адӕмӕн сӕ фылдӕр хъуыды кӕнынц, уый Йесо Чырыстийы гуырӕнбон кӕй у. Фӕлӕ Рождество баст у мӕнг динимӕ. Иу энциклопедийы фыст ис, чырыстон диныл хӕст чи нӕ уыд, уыцы ромӕгтӕ 25 декабры кӕй бӕрӕг кодтой хуры гуырӕнбон. Аргъуаны разамонджыты фӕндыд, цӕмӕй, чырыстон диныл хӕст чи нӕ уыд, уыцы адӕм чырыстӕттӕ суыдаиккой. Ӕмӕ кӕд Йесо Чырысти 25 декабры нӕ райгуырд, уӕддӕр ахӕм уынаффӕ рахастой, цӕмӕй уыцы бон бӕрӕг кодтаиккой йӕ гуырӕнбон * (Лукайы 2:8–12). Йесойы ахуыргӕнинӕгтӕ Рождество нӕ бӕрӕг кодтой. Иу чиныджы йӕ куыд  ӕмбарын кӕнынц, афтӕмӕй йӕ райгуырды фӕстӕ 200 азы дӕргъы «ничи зыдта, бӕлвырдӕй кӕцы бон райгуырд, уый, стӕй ууыл хъуыды дӕр ничи кодта» (Sacred Origins of Profound Things). Рождество бӕрӕг кӕнын райдыдтой, Йесо зӕххыл куы цард, уымӕй иу-300 азы фӕстӕ.

7. Ӕцӕг чырыстӕттӕ Рождество цӕуылнӕ бӕрӕг кӕнынц?

⁷ Бирӕтӕ зонынц, Рождество ӕмӕ йе ’гъдӕуттӕ, зӕгъӕм, фынгтӕ ӕвӕрын ӕмӕ кӕрӕдзийӕн лӕвӕрттӕ кӕнын, кӕй равзӕрдысты, чырыстон диныл хӕст чи нӕ уыд, уыцы адӕмты динтӕй *. Иу рӕстӕг Английы ӕмӕ Цӕгат Америкӕйы кӕцыдӕр рӕтты Рождество бӕрӕг кӕнын нал уагътой, кӕцӕй равзӕрд, уый зонгӕйӕ. Ӕмӕ-иу ӕй чи бӕрӕг кодта, уыдоны-иу бафхӕрдтой. Фӕлӕ йӕ ӕппынфӕстаг ногӕй бӕрӕг кӕнын райдыдтой. Ӕцӕг чырыстӕттӕ та Рождество цӕуылнӕ бӕрӕг кӕнынц? Уымӕн ӕмӕ уыдоны сӕ алы хъуыддагӕй дӕр фӕнды Йегъовӕйы зӕрдӕ рухс кӕнын.

8, 9. Фыццаг чырыстӕттӕ гуырӕнбонтӕ цӕуылнӕ кодтой?

⁸ Бирӕтӕ ма тынг уарзынц сӕ гуырӕнбон бӕрӕг кӕнын дӕр. Фӕлӕ Библийы цы гуырӕнбонты кой ис, уыдон бӕрӕг кодтой, Йегъовӕйӕн чи нӕ лӕггад кодта, ахӕм адӕм (Райдиан 40:20; Марчы 6:21). Гуырӕнбонты-иу кадджын кодтой мӕнг хуыцӕутты.  Уымӕ гӕсгӕ фыццаг чырыстӕттӕ «гуырӕнбон бӕрӕг кӕнын нымадтой мӕнг хуыцӕуттӕн кувӕг адӕмы ӕгъдауыл» (The World Book Encyclopedia). Ӕмӕ гуырӕнбонтӕ нӕ кодтой.

⁹ Рагон Ромы ӕмӕ Грецийы цӕрджыты уырныдта, алы адӕймаг дӕр кӕй райгуыры кӕцыдӕр хуыцауы гуырӕнбоны. Мӕнг хуыцӕуттӕн кувӕг адӕмы хъуыдымӕ гӕсгӕ, адӕймаг хъуамӕ йӕ гуырӕнбон бӕрӕг кодтаид, цӕмӕй йӕ йӕ хуыцау цӕрӕнбонты хъахъхъӕдтаид.

10. Абон чырыстӕттӕ гуырӕнбонтӕ цӕуылнӕ бӕрӕг кӕнынц?

¹⁰ Куыд хъуыды кӕныс, мӕнг динимӕ баст бӕрӕгбӕттӕ Йегъовӕйы зӕрдӕмӕ цӕуынц? (Исай 65:11, 12). Кӕй зӕгъын ӕй хъӕуы, нӕ цӕуынц. Ӕмӕ мах дӕр уый тыххӕй нӕ бӕрӕг кӕнӕм гуырӕнбонтӕ ӕмӕ мӕнг динимӕ баст бӕрӕгбӕттӕ.

11. Иуӕй-иутӕ бӕрӕгбӕттӕ цӕмӕн бӕрӕг кӕнынц? Ӕппӕты ахсджиагдӕр дын цы хъуамӕ уа?

¹¹ Кӕд иуӕй-иутӕ зонынц, Рождество ӕмӕ ӕндӕр кӕцыдӕр бӕрӕгбӕттӕ, чырыстон диныл хӕст чи нӕ уыд, уыцы адӕмты динтӕй кӕй равзӕрдысты, уӕддӕр сӕ бӕрӕг кӕнынц. Уыдон бӕрӕгбӕттӕ нымайынц хорз фадатыл, цӕмӕй сӕ рӕстӕг сӕ бинонтимӕ арвитой. Мыййаг, ды дӕр бӕрӕгбӕттӕм ахӕм цӕстӕй кӕсыс? Дӕ бинонтимӕ дӕ дӕ рӕстӕг ӕрвитын кӕй фӕнды, уым ӕвзӕрӕй ницы ис. Бинонтӕ Йегъовӕ скодта ӕмӕ йӕ фӕнды, цӕмӕй нӕ бинонтыл ӕмӕ нӕ хиуӕттыл ӕнувыд уӕм  (Ефесӕгтӕм 3:14, 15). Фӕлӕ нын сӕйрагдӕр хъуамӕ уа, цӕмӕй Йегъовӕ нӕ хӕлар уа. Раст нӕ уыдзӕн, нӕ хиуӕттӕн сӕ зӕрдӕ балхӕныны тыххӕй семӕ мӕнг динимӕ баст бӕрӕгбӕттӕ куы бӕрӕг кӕнӕм. Апостол Павел дӕр афтӕ уый тыххӕй загъта: «Ӕппынӕдзух бӕлвырд кӕнут, нӕ Хицауы зӕрдӕмӕ цы цӕуы, уый» (Ефесӕгтӕм 5:10).

12. Йегъовӕйы зӕрдӕмӕ цавӕр бӕрӕгбӕттӕ нӕ цӕуы?

¹² Бирӕтӕм афтӕ кӕсы, ӕмӕ, бӕрӕгбон кӕцӕй равзӕрд, уый ахсджиаг нӕу. Фӕлӕ Йегъовӕ афтӕ нӕ хъуыды кӕны. Уымӕн йӕ зӕрдӕмӕ нӕ цӕуынц, мӕнг динӕй чи равзӕрд, стӕй адӕмы кӕнӕ кӕцыдӕр бӕстӕ чи бӕрзонд кӕны, ахӕм бӕрӕгбӕттӕ. Зӕгъӕм, египетӕгтӕ сӕ мӕнг хуыцӕутты номыл бирӕ бӕрӕгбӕттӕ кодтой. Ӕмӕ израилӕгтӕ Египетӕй куы рацыдысты, уӕд египетӕгты бӕрӕгбӕттӕй иу скодтой ӕмӕ йӕ схуыдтой «бӕрӕгбон Йегъовӕйы номыл». Фӕлӕ сӕ Йегъовӕ уый тыххӕй бафхӕрдта (Рацыд 32:2–10). Пехуымпар Исай куыд загъта, афтӕмӕй, «чъизи цы у, ахӕмӕй» хъуамӕ мацӕмӕ ӕвналӕм! (Бакӕс Исайы 52:11.)

13. Куы аскъуыддзаг кӕнай, бӕрӕгбӕттӕ кӕй нал бӕрӕг кӕндзынӕ, уӕд дӕм, гӕнӕн ис, цавӕр фарстатӕ фӕзына?

¹³ Куы аскъуыддзаг кӕнай, бӕрӕгбӕттӕ кӕй нал бӕрӕг кӕндзынӕ, уӕд дӕм, чи зоны, бирӕ фарстатӕ фӕзына, зӕгъӕм, ахӕмтӕ: «Ме ’мкусджытӕ мӕ куы бафӕрсой, немӕ бӕрӕгбон цӕуылнӕ бӕрӕг кӕныс, зӕгъгӕ, уӕд сын цы хъуамӕ зӕгъон? Исчи мын бӕрӕгбонмӕ исты куы лӕвар кӕна, уӕд  куыд хъуамӕ бакӕнон? Ӕмӕ мӕ цардӕмбалы куы фӕнда, цӕмӕй бӕрӕгбон сбӕрӕг кӕнон, уӕд та? Мӕ сывӕллӕттӕн куыд баххуыс кӕнон, цӕмӕй ма ӕнкъард кӕной, бӕрӕгбӕттӕ ӕмӕ сын сӕ гуырӕнбонтӕ кӕй нӕ кӕнӕм, уый тыххӕй?»

14, 15. Исчи дын бӕрӕгбоны номыл куы арфӕтӕ кӕна кӕнӕ дын исты куы лӕвар кӕна, уӕд дӕ бон куыд у бакӕнын?

¹⁴ Уавӕртӕ алыхуызон вӕййынц. Уымӕ гӕсгӕ алы уавӕры дӕр хъуамӕ ӕмбаргӕйӕ архайай. Зӕгъӕм, исчи дын куы раарфӕ кӕна, бӕрӕгбоны хорзӕх дӕ уӕд, зӕгъгӕ, уӕд-иу дӕхи нӕхъусӕг ма скӕн. Дӕ бон ын у бузныг зӕгъын. Фӕлӕ искӕй фылдӕр базонын куы фӕнда, уӕд ын дӕ бон у бамбарын кӕнын, бӕрӕгбон цӕуылнӕ бӕрӕг кӕныс, уый. Ӕрмӕст-иу дӕ ныхас алкӕддӕр уӕд фӕлмӕн ӕмӕ-иу архай, цӕмӕй йӕ ма фӕхъыг кӕнай. Библийы фыст ис: «Уӕ дзыхыныхас алкӕддӕр уӕд фӕлмӕн ӕмӕ зӕрдӕмӕдзӕугӕ, цӕмӕй зонат, кӕмӕн цавӕр дзуапп раттын хъӕуы, уый» (Колоссӕгтӕм 4:6). Зӕгъӕм, дӕ бон ын у зӕгъын, дӕуӕн дӕр ӕхсызгон кӕй вӕййы иннӕтимӕ абадын ӕмӕ лӕвӕрттӕ кӕнын, фӕлӕ уыцы бӕрӕгбӕтты номыл нӕ.

¹⁵ Ӕмӕ дын исчи исты куы лӕвар кӕна, уӕд та куыд хъуамӕ бакӕнай? Библийы фыст нӕй, алы уавӕры дӕр куыд бакӕнын хъӕуы, уый. Фӕлӕ дзы фыст ис, нӕ цӕсгом Хуыцауы раз сыгъдӕг кӕй хъуамӕ уа (1 Тимофеймӕ 1:18, 19). Адӕймаг, гӕнӕн ис, зонгӕ дӕр ма кӕна, ды бӕрӕгбон кӕй нӕ кӕныс, уый. Йе та дын, чи зоны, зӕгъа: «Зонын ӕй, ацы бӕрӕгбон кӕй нӕ бӕрӕг кӕныс. Фӕлӕ мӕ уӕддӕр фӕнды, цӕмӕй ацы лӕвар айсай». Иу уавӕры  дӕр ӕмӕ иннӕ уавӕры дӕр дӕхӕдӕг скъуыддзаг кӕндзынӕ, лӕвар райсдзынӕ ӕви нӕ. Фӕлӕ куыдфӕнды ма бакӕнай, хъуамӕ дӕ цӕсгом Хуыцауы раз уа сыгъдӕг. Мах нӕ фӕнды, Хуыцауӕй цӕй тыххӕй адард уыдзыстӕм, ахӕм исты саразын.

16. Дӕ бинонты бӕрӕгбӕттӕ кӕнын куы фӕнда, уӕд куыд хъуамӕ бакӕнай?

¹⁶ Куыд хъуамӕ бакӕнай, дӕ бинонты бӕрӕгбон скӕнын куы фӕнда, уӕд? Семӕ тох кӕнын нӕ хъӕуы. Дӕ зӕрдыл дар, уый бар сын кӕй ис, цӕмӕй, сӕхи куыд фӕнды, афтӕ бакӕной. Дӕу фӕнды, цӕмӕй дын дӕ хъуыдыйӕн аргъ кӕной. Уӕдӕ сын ды дӕр сӕ хъуыдыйӕн аргъ кӕн ӕмӕ семӕ фӕлмӕнӕй ныхас кӕн. (Бакӕс Матфейы 7:12.) Ӕмӕ дӕ бинонты куы фӕнда, цӕмӕй, бӕрӕгбон куы вӕййы, уыцы бонты ӕнӕуи семӕ рӕстӕг арвитай, уӕд та куыд хъуамӕ бакӕнай? Куыд бакӕндзынӕ, уый аскъуыддзаг кӕныны размӕ Йегъовӕмӕ скув, цӕмӕй дын раст уынаффӕ рахӕссынӕн баххуыс кӕна. Ахъуыды кӕн, Хуыцау уыцы бӕрӕгбоны тыххӕй цы зӕгъы, ууыл. Стӕй раиртас, уыцы бӕрӕгбон кӕцӕй равзӕрд, уый фӕдыл Библи ӕмбарынгӕнӕн литературӕйы ӕмӕ ӕндӕр литературӕйы цы фыст ис, уый. Дӕ зӕрдыл дар, сӕйраг дын кӕй у Йегъовӕйы зӕрдӕ рухс кӕнын.

17. Дӕ бон куыд у дӕ сывӕллӕттӕн баххуыс кӕнын, цӕмӕй-иу бӕрӕгбӕтты рӕстӕг иннӕтӕм ма хӕлӕг кӕной?

¹⁷ Дӕ бон куыд у дӕ сывӕллӕттӕн баххуыс кӕнын, цӕмӕй-иу бӕрӕгбӕтты рӕстӕг иннӕтӕм ма хӕлӕг кӕной? Зӕгъӕм, рӕстӕгӕй-рӕстӕгмӕ-иу сын  исты хъӕлдзӕг бӕрӕгбон сараз. Дӕ бон ма сын у ӕнӕнхъӕлӕджы лӕвӕрттӕ кӕнын. Ӕппӕты стырдӕр лӕвар та сын уыдзӕн, дӕ рӕстӕг ӕмӕ сын дӕ уарзондзинад куы не ’вгъау кӕнай.

18. Чырыстон ӕмбырдтӕм цӕмӕн хъуамӕ цӕуӕм?

¹⁸ Цӕмӕй Йегъовӕйы зӕрдӕ рухс кӕнӕм, уый тыххӕй хъуамӕ ныууадзӕм мӕнг дин, стӕй йемӕ баст ӕгъдӕуттӕ ӕмӕ бӕрӕгбӕттӕ. Фӕлӕ ма уымӕй уӕлдай хъуамӕ, раст дин куыд амоны, афтӕ цӕрӕм. Хъуамӕ чырыстон ӕмбырдтӕй алкӕцымӕ дӕр цӕуӕм. (Бакӕс Дзуттӕгтӕм 10:24, 25.) Ӕцӕг Хуыцауы лӕггадгӕнджытӕн ӕмбырдтӕм цӕуын тынг ахсджиаг у (Псалом 22:22; 122:1). Иумӕ куы ӕрӕмбырд вӕййӕм, уӕд нӕ бон вӕййы кӕрӕдзийы ныфсыл ныфс бафтауын (Ромӕгтӕм 1:12).

19. Ахсджиаг цӕмӕн у, цӕмӕй, Библийӕ цы базыдтай, уый иннӕтӕн дзурай?

¹⁹ Уымӕй уӕлдай ма хъуамӕ иннӕтӕн дзурӕм, Библийӕ цы базыдтам, уый. Зӕххыл цы бӕллӕхтӕ ӕмӕ ӕвзӕр хабӕрттӕ цӕуы, уыдонмӕ кӕсгӕйӕ бирӕтӕн сӕ ныфс асӕтты. Чи зоны, ды дӕр ахӕм адӕмы зоныс. Радзур сын, цы диссаджы фидӕн нӕм ӕнхъӕлмӕ кӕсы, уый тыххӕй. Ӕмбырдтӕм куы цӕуай ӕмӕ иннӕтӕн, Библийы цы фыст ис, уый куы дзурай, уӕд дӕ нал фӕнддзӕн, цӕмӕй ма дӕ мӕнг динимӕ ӕмӕ йе ’гъдӕуттимӕ исты бӕтта. Йегъовӕйӕн, уый куыд фӕнды, афтӕ куы лӕггад кӕнай, уӕд уыдзынӕ амондджын ӕмӕ дын Йегъовӕ арфӕ кӕндзӕн! (Малахи 3:10).