ЦЫ УЫНЫС нывы? Уый у сӕрмагонд цатыр Иегъовӕйӕн кувынӕн. Хонынц ма йӕ хӕсгӕ цатыр дӕр. Адӕм Египетӕй куы рацыдысты, уӕд ӕй иу афӕдзы фӕстӕ сарӕзтой. Уыцы цатыр сын чи саразын кодта, уый зоныс?

Иегъовӕ. Моисей Синайы хохыл куы уыд, уӕд ын Иегъовӕ загъта, куыд ӕй хъӕуы саразын, уый. Загъта йын, цӕмӕй цатыр афтӕ сарӕзтаиккой, ӕмӕ йӕ ӕнцонтӕй куыд уыдаид райхалӕн. Цӕмӕй-иу ӕй хӕйттӕй ӕндӕр ранмӕ ахастаиккой ӕмӕ та-иу ӕй уым сӕвӕрдтаиккой. Афтӕмӕй, израилӕгтӕ ӕдзӕрӕг быдыры иу ранӕй иннӕ ранмӕ куы цыдысты, уӕд семӕ хастой уыцы цатыр дӕр.

Цатыры фӕстаг хайы цы гыццыл хатӕн ис, уырдӕм куы бакӕсай, уӕд дзы фендзынӕ асыкк, кӕнӕ чырын. Уый хуыйны бадзырды чырын. Йӕ уӕлӕ дыууӕрдыгӕй дӕр уыд сыгъзӕринӕй конд дыууӕ зӕды, кӕнӕ херувимы. Моисей тъӕпӕн дуртӕ кӕй ныппырх кодта, уымӕ гӕсгӕ Хуыцау Дӕс фӕдзӕхсты ногӕй ӕндӕр дыууӕ тъӕпӕн дурыл ныффыста ӕмӕ уыцы дуртӕ ӕвӕрд ӕрцыдысты бадзырды чырыны. Уым ма мигӕнӕны мидӕг ӕвӕрд уыд маннӕ дӕр. Маннӕ цы у, уый ма хъуыды кӕныс?

Иегъовӕ хистӕр сауджынӕй равзӕрста Моисейы ӕфсымӕр Аароны. Адӕм Иегъовӕйӕн куывтой, уый сын куыд амыдта, афтӕ. Ааронӕн йӕ фырттӕ дӕр сты сауджынтӕ.

Ныр та лӕмбынӕгдӕр ӕркӕсӕм цатыры стыр хатӕнмӕ. Уый дыууӕ хатты стырдӕр у гыццыл хатӕнӕй. Фӕздӕг кӕцӕй цӕуы, уыцы ассык, кӕнӕ чырын, уыныс? Уый нывондхӕссӕн у. Уым сауджынтӕ фӕсудзынц буд. Буд у, адджын тӕф чи кӕны, ахӕм буаргъӕд. Ис ма дзы рухсгӕнӕн дӕр авд цырагъдарӕнимӕ. Ацы хатӕны ӕртыккаг мигӕнӕн та у стъол. Уыцы стъолыл алкӕддӕр вӕййы 12 дзулы.

Хӕсгӕ кувӕндоны цатыры кӕрты ис стыр къус, кӕнӕ тас, донимӕ. Уыцы донӕй сауджынтӕ сӕхи фехсынц. Кӕрты ма ис стыр нывондхӕссӕн дӕр. Уым фӕсудзынц, Иегъовӕйӕн нывондӕн цы кусӕрттӕгтӕ ӕрхӕссынц, уыдон. Цатыр сӕвӕрынц, израилӕгтӕ кӕм ӕрбынат кӕнынц, уым тӕккӕ дӕр астӕуӕй. Адӕмы халагъудтӕ та ӕвӕрд вӕййынц йӕ алыварс.