УЫНЫС, цы ’рцыд? Лӕппу уӕрыччы байста арсы дзӕмбытӕй. Арс сӕрвӕтмӕ ’рцыд, уӕрыччы ахаста ӕмӕ йӕ бахӕрынмӕ хъавыд. Фӕлӕ йӕ лӕппу фӕстейӕ асырдта, ӕмӕ уӕрыччы арсы дзыхӕй байста. Арс йӕ фӕстаг дзӕмбытыл куы слӕууыд, уӕд ӕй лӕппу фӕцӕф кодта ӕмӕ йӕ амардта! Иу хатт та фысы байста домбайы дзыхӕй. Цӕй хъӕбатыр лӕппу у, нӕ? Зоныс ӕй, чи у?

Уый у ӕвзонг Давид. Цӕры Вифлеемы сахары. Йӕ фыдыфыд Овид уыди Руф ӕмӕ Воозы фырт. Хъуыды ма сӕ кӕныс? Давидӕн йӕ фыд та у Иессей. Давид хизы йӕ фыды фыстӕ. Давид райгуырд, Иегъовӕ Саулы паддзахӕй куы равзӕрста, уымӕй дӕс азы фӕстӕ.

Рацыд цасдӕр рӕстӕг, ӕмӕ Иегъовӕ Самуилӕн загъта: «Райс демӕ сӕрмагонд зети ӕмӕ ацу Вифлееммӕ Иессейы хӕдзармӕ. Йӕ фырттӕй йын иуы паддзахӕй равзӕрстон». Самуил Иессейӕн йӕ хистӕр фырт Елиавы куы федта, уӕд ахъуыды кодта: «Ӕнӕмӕнг ай равзӕрста Иегъовӕ». Фӕлӕ йын Иегъовӕ загъта: «Йӕ ас ӕмӕ йын йӕ кондмӕ ма кӕс. Уый нӕ равзӕрстон паддзахӕй».

Уӕд Иессей фӕдзырдта йӕ фырт Аминадавмӕ ӕмӕ йӕ Самуилмӕ бакодта. Фӕлӕ Самуил загъта: «Нӕ, уый дӕр нӕ равзӕрста Иегъовӕ». Уый фӕстӕ Иессей ӕрбакодта йӕ иннӕ фырты, Саммӕйы. «Нӕ, уый дӕр нӕ равзӕрста Иегъовӕ»,– загъта та Самуил. Афтӕ Иессей Самуилмӕ ӕрбакодта йӕ авд фырты, фӕлӕ дзы Иегъовӕ никӕйы равзӕрста. «Ӕндӕр дын нал ис лӕппу?»– бафарста йӕ Самуил.

«Ис ма мын иу лӕппу, се ’ппӕты кӕстӕр,– загъта Иессей.– Фӕлӕ ныртӕккӕ ам нӕй, фыстӕ хизы». Давиды куы ӕрбакодтой, уӕд Самуил федта, уый хӕрзконд лӕппу кӕй у. «Уый у,– загъта Иегъовӕ.– Рауадз ын йӕ сӕрыл зети». Самуил афтӕ бакодта. Фӕлӕ цалынмӕ Давид Израилы паддзах суа, уӕдмӕ ма рацӕудзӕн иу цасдӕр рӕстӕг.