АЦЫ нывы ӕвдыст у дзӕнӕт, Хуыцау ӕй, ӕвӕццӕгӕн, пехуымпар Исайӕн куыд равдыста, афтӕмӕй. Исай цард Ионӕйы хӕдфӕстӕ.

Дзӕнӕт у «цӕхӕрадон» кӕнӕ «парк». Ацы дзырд дын, чиныджы райдианы цы федтам, уый нӕ лӕууын кӕны дӕ зӕрдыл? Иегъовӕ Хуыцау Адам ӕмӕ Евӕйы цы диссаджы цӕхӕрадоны ӕрцӕрын кодта, уый хуызӕн дӕм нӕ кӕсы? Фӕлӕ цымӕ искуы зӕхх ӕгасӕйдӕр дзӕнӕт уыдзӕн?

Иегъовӕ йӕ пехуымпар Исайӕн загъта, цӕмӕй ныффыстаид, йӕ адӕм фидӕны ногӕй дзӕнӕты куыд цӕрдзысты, уый тыххӕй. Уый загъта: «Бирӕгътӕ ӕмӕ фыстӕ иумӕ лымӕнӕй цӕрдзысты. Родтӕ ӕмӕ домбайы лӕппынтӕ иумӕ хиздзысты, зилгӕ та сӕм кӕндзысты гыццыл сывӕллӕттӕ. Саби маргджын калмы цур куы хъаза, уӕддӕр ын тӕссаг нӕ уыдзӕн».

«Нӕ, уый никуы уыдзӕн,– чи зоны, зӕгъой бирӕтӕ.– Зӕххыл зындзинӕдтӕ алкӕддӕр уыд, ӕмӕ уыдзӕн». Фӕлӕ ма ахъуыды кӕн: Хуыцау Адам ӕмӕ Евӕйы ӕппӕты райдианы кӕм ӕрцӕрын кодта?

Дзӕнӕты. Ӕрмӕстдӕр, Хуыцаумӕ кӕй нӕ байхъуыстой, уый тыххӕй ӕрцыдысты сырд сӕ диссаджы хӕдзарӕй; уӕдӕ зӕронд дӕр уый тыххӕй баисты ӕмӕ мӕлгӕ дӕр уый тыххӕй акодтой. Фӕлӕ Хуыцау загъта, чи йӕ уарзы, уыдонӕн ногӕй кӕй ратдзӕн, Адам ӕмӕ Евӕ цыдӕриддӕр фесӕфтой, уый.

Фидӕны, зӕххыл ногӕй дзӕнӕт куы уа, уӕд фыддзинад бынтондӕр нал уыдзӕн, зиан ничи никӕмӕнуал кӕндзӕн. Уым уыдзӕн ӕцӕг сабырдзинад ӕмӕ фарн. Адӕм иууылдӕр уыдзысты ӕнӕниз ӕмӕ амондджын. Зӕххыл алцыдӕр уыдзӕни, Хуыцауы иууыл сӕрӕй куыд фӕндыди, растдӕр афтӕ. Фӕстӕдӕр базондзыстӕм, Хуыцау зӕххыл уыцы уавӕртӕ куыд скӕндзӕни, уый.