Йесо Чырысти у Иегъовӕйы Фырт ӕмӕ йе ’ппӕты хуыздӕр ӕмӕ зынаргъдӕр хӕлар. Йесо ма уӕларвыл куы цард, уӕд уыд хъомысджын уӕларвон фӕлдисонд (Иоанны 17:5). Уый фӕстӕ уый ӕрцыд зӕхмӕ, цӕмӕй адӕмӕн Хуыцауы тыххӕй ӕцӕгад раргом кодтаид (Иоанны 18:37). Уымӕй уӕлдай ма уый амард коммӕгӕс адӕймагады тӕригъӕд ӕмӕ мӕлӕтӕй фервӕзын кӕныны тыххӕй (Ромӕгтӕм 6:23). Ныртӕккӕ Йесо у Хуыцауы Паддзахады Паддзах; уыцы Паддзахад у уӕларвон хицауад, ӕмӕ уый руаджы зӕххыл арӕзт ӕрцӕудзӕн Дзӕнӕт (Раргомад 19:16).

Зӕдтӕ дӕр сты Хуыцауы хӕлӕрттӕ. Зӕдтӕ адӕмау зӕххыл никуы цардысты. Хуыцау зӕхх куы нӕма сфӕлдыста, уӕд сӕ сфӕлдыста уӕларвыл (Иов 38:4—7). Уӕлӕрвты ис милуангай зӕдтӕ (Данелы 7:10, БГТ). Хуыцауы уӕларвон хӕлӕртты фӕнды, цӕмӕй адӕм базоной ӕцӕгад Иегъовӕйы тыххӕй (Раргомад 14:6, 7).

Хуыцауӕн ма хӕлӕрттӕ ис зӕххыл дӕр; уый сӕ хоны йе ’вдисӕнтӕ. Ӕвдисӕн тӕрхондоны фӕдзуры, искӕй кӕнӕ истӕй тыххӕй цы зоны, уый. Иегъовӕйы Ӕвдисӕнтӕ та адӕмӕн дзурынц, Иегъовӕйы ӕмӕ йӕ фӕндоны тыххӕй цы зонынц, уый (Исай 43:10). Зӕдтау Ӕвдисӕнты дӕр фӕнды дӕуӕн баххуыс кӕнын, цӕмӕй Иегъовӕйы тыххӕй ӕцӕгад базонай. Уыдон фӕнды, цӕмӕй ды дӕр Хуыцауы хӕлар уай.