ИСЧИ ДЫН хорзӕй исты куы саразы, уӕд нӕ фӕцин кӕныс? ~ Иннӕтӕ дӕр фӕцин кӕнынц. Ӕмӕ ууыл алчидӕр фӕцин кӕны. Ӕппӕты хуыздӕр Ахуыргӕнӕг дӕр уый зыдта ӕмӕ адӕмӕн алкӕддӕр хорздзинад арӕзта. Уый загъта: «Ӕз уый тыххӕй не ’рцыдтӕн, ӕмӕ мын лӕггад кӕной, фӕлӕ цӕмӕй мӕхӕдӕг балӕггад кӕнон» (Матфейы 20:28).

Цӕмӕй мах дӕр Йесойы хуызӕн уӕм, уый тыххӕй цы хъуамӕ аразӕм? ~ Мах дӕр хъуамӕ адӕмӕн лӕггад кӕнӕм, хорздзинад сын аразӕм. Фӕлӕ бирӕтӕ афтӕ нӕ кӕнынц. Адӕмӕн сӕ фылдӕры фӕнды, цӕмӕй сын иннӕтӕ лӕггад кӕной. Иу рӕстӕг Йесойы ахуыргӕнинӕгтӕ дӕр афтӕ хъуыды кодтой. Алкӕй дӕр сӕ фӕндыд, цӕмӕй йын иннӕтӕй уӕлдӕр бынат уа.

Иухатт Йесо йӕ ахуыргӕнинӕгтимӕ ’рцыд горӕт Капернауммӕ. Уыцы горӕт уыдис Галилейы денджызы раз. Уым иу хӕдзармӕ куы бацыдысты, уӕд Йесо йӕ ахуыргӕнинӕгты бафарста: «Фӕндагыл та цӕуыл дзырдтат?» Уыдон ныхъхъус сты, уымӕн ӕмӕ фӕндагыл дзырдтой, уӕлдӕр бынаты сӕ чи ис, ууыл (Марчы 9:33, 34).

 Йесо йӕ зыдта: йӕ ахуыргӕнинӕгтӕй хъуамӕ мачи хъуыды кодтаид, иннӕтӕй хуыздӕр кӕй у ӕмӕ йын се ’ппӕтӕй уӕлдӕр бынат кӕй ис. Ӕмӕ фыццаг сӕрӕй куыд базыдтам, афтӕмӕй сын сӕ разы ӕрлӕууын кодта гыццыл сывӕллоны. Стӕй сын загъта, цӕмӕй сывӕллӕттау сӕрныллӕг уой. Фӕлӕ уӕддӕр ницӕуыл сахуыр сты. Ӕмӕ уӕд Йесо йӕ мӕлӕты размӕ иу хъуыддаг сарӕзта, ӕмӕ уымӕй цӕуыл сахуыр сты, уый сӕ никуы ферох. Зоныс, цы сарӕзта? ~

Иумӕ куы хордтой, уӕд Йесо фынгӕй сыстад, райста хисӕрфӕн ӕмӕ йӕ йӕ астӕуыл ӕрбабаста. Стӕй тасы дон ныккодта. Йесо цы кӕнынмӕ хъавыд, уый, ӕвӕццӕгӕн, йӕ ахуыргӕнинӕгтӕ не ’мбӕрстой. Йесо йӕ ахуыргӕнинӕгтӕй алкӕмӕ дӕр бацыд, йӕ къӕхтӕ йын ныхсадта ӕмӕ йын сӕ хисӕрфӕнӕй ныссӕрфта. Ахъуыды-ма кӕн! Ды дӕр уым куы уыдаис ӕмӕ дӕуӕн дӕр Йесо дӕ къӕхтӕ куы ныхсадтаид, уӕд цы загътаис? ~

Сӕ Ахуыргӕнӕг сын сӕ къӕхтӕ кӕй ныхсадта, уымӕй йӕ ахуыргӕнинӕгтӕ тынг фефсӕрмы сты. Петр Йесойы уадзгӕ дӕр нӕ кодта, цӕмӕй йын йӕ къӕхтӕ ныхсадтаид. Фӕлӕ йын Йесо загъта, уыцы хъуыддаг ӕнӕмӕнг кӕй хъуамӕ бакӕна.

Ныртӕккӕ ахӕм ӕгъдау нал ис, ӕмӕ адӕм сӕ кӕрӕдзийы къӕхтӕ ӕхсой. Фӕлӕ Йесо зӕххыл куы цард, уӕд-иу афтӕ кодтой. Зоныс, цӕмӕн? ~ Йесо ӕмӕ йӕ ахуыргӕнинӕгтӕ кӕм цардысты, уым адӕм дардтой гом дзабыртӕ. Ӕмӕ-иу рыг фӕндӕгтыл цӕугӕйӕ сӕ къӕхтӕ счъизи сты. Йӕ уазӕгӕн-иу йӕ къӕхтӕ чи ныхсадта, уый-иу ын хорздзинад сарӕзта.

Фӕлӕ Йесойы ахуыргӕнинӕгтӕй иу дӕр афтӕ нӕ загъта: «Ӕри-ма, ӕз уын ныхсон уӕ къӕхтӕ». Ӕмӕ сын Йесо йӕхӕдӕг ныхсадта сӕ къӕхтӕ. Йесо цы сарӕзта, уымӕй хъуамӕ иу цӕуылдӕр сахуыр уыдаиккой. Ууыл хъуамӕ мах дӕр сахуыр уӕм.

Зоныс ӕй, цӕуыл? ~ Йесо фӕстӕмӕ фынгыл куы сбадт, уӕд загъта: «Цы уын сарӕзтон, уый ӕмбарут? Сымах мӕн хонут  „Ахуыргӕнӕг“ ӕмӕ „Хицау“, ӕмӕ раст кӕнут, уымӕн ӕмӕ ӕцӕгдӕр афтӕ у. Ӕмӕ кӕд ӕз, уӕ Хицау ӕмӕ уӕ Ахуыргӕнӕг, сымахӕн уӕ къӕхтӕ ныхсадтон, уӕд сымах дӕр хъуамӕ уӕ кӕрӕдзийы къӕхтӕ ӕхсат» (Иоанны 13:2–14).

Ӕппӕты хуыздӕр Ахуыргӕнӕг йӕ ахуыргӕнинӕгтӕн уымӕй равдыста, кӕрӕдзийӕн кӕй хъуамӕ лӕггад кӕной. Нӕ йӕ фӕндыд, цӕмӕй ӕрмӕстдӕр сӕхи мӕт кодтаиккой. Хъуамӕ афтӕ мачи хъуыды кодтаид: ӕз хуыздӕр дӕн, мӕнӕн уӕлдӕр бынат ис, ӕмӕ хъуамӕ мӕнӕн лӕггад кӕной. Йесойы фӕндыд, цӕмӕй уыдон сӕхӕдӕг иннӕтӕн лӕггад кодтаиккой.

Куыд хъуыды кӕныс, хорз хъуыддагыл сӕ нӕ сахуыр кодта? ~ Фӕнды дӕ, цӕмӕй ды дӕр ӕппӕты хуыздӕр Ахуыргӕнӕджы хуызӕн уай ӕмӕ иннӕтӕн лӕггад кӕнай? ~ Махӕй алкӕмӕн дӕр йӕ бон у иннӕтӕн ӕххуыс кӕнын. Ӕмӕ уӕд адӕм цин кӕндзысты. Фӕлӕ ууыл фыццаджыдӕр цин кӕндзысты Йесо ӕмӕ йӕ Фыд.

Иннӕтӕн лӕггад кӕнын зын нӕу. Дзӕбӕх куы ахъуыды кӕнай, уӕд ӕй бамбардзынӕ, дӕ бон бирӕ цӕмӕйдӕрты кӕй у иннӕтӕн баххуыс кӕнын. Зӕгъӕм, дӕ мад хӕдзары бирӕ  куыстытӕ кӕны дӕу ӕмӕ ӕнӕхъӕн бинонты тыххӕй. Истӕмӕй йын у дӕ бон баххуыс кӕнын? ~ Бафӕрс-ма йӕ.

Зӕгъӕм, хӕрды размӕ дӕ бон у стъолыл тӕбӕгътӕ ӕмӕ уидгуытӕ ӕрӕвӕрын. Кӕнӕ хӕрды фӕстӕ стъол бафснайын. Иуӕй-иу сывӕллӕттӕ алы бон дӕр пъолтӕ ныммӕрзынц ӕмӕ сӕ ныхсынц. Ӕмӕ цыфӕнды ма аразай, ды дӕр Йесойы хуызӕн иннӕтӕн лӕггад кӕндзынӕ.

Ис дын кӕстӕр ӕфсымӕртӕ ӕмӕ хотӕ? Уыдонӕн та дӕ бон цӕмӕй у балӕггад кӕнын? Ӕрхъуыды-ма кӕн, ӕппӕты хуыздӕр Ахуыргӕнӕг Йесо йӕ ахуыргӕнинӕгтӕн кӕй лӕггад кодта. Дӕ кӕстӕр ӕфсымӕртӕ ӕмӕ хотӕн куы лӕггад кӕнай, уӕд ды дӕр уыдзынӕ Йесойы хуызӕн. Дӕ бон сын цӕмӕй у баххуыс кӕнын? ~ Ахуыр сӕ кӕн, цӕмӕй сӕ хъазӕнтӕ сӕ бынаты ӕвӕрой. Ӕххуыс сын кӕн сӕ дзаумӕттӕ кӕнынмӕ ӕмӕ сӕ хуыссӕнтӕ ӕфснайынмӕ.  Дӕ бон ма сын у ноджыдӕр истӕмӕй баххуыс кӕнын? ~ Уыдон дӕ дӕ хорз хъуыддӕгты тыххӕй уарздзысты, Йесойы йӕ ахуыргӕнинӕгтӕ куыд уарзтой, афтӕ.

Скъолайы та дӕ бон у де ’мкъласонтӕн ӕмӕ дӕ ахуыргӕнджытӕн лӕггад кӕнын. Де ’мкъласонтӕй искӕмӕн йӕ чиныг куы ’рхауа, уӕд-иу ӕй сис. Дӕ бон у ахуыргӕнӕджы бӕсты фӕйнӕг ныссӕрфын кӕнӕ ма йӕм ӕндӕр истӕмӕй дӕр фӕкӕсын. Искӕмӕн дуарыл куы фӕхӕцай, уӕд ын уымӕй дӕр хорздзинад сараздзынӕ.

Иннӕтӕн кӕй лӕггад кӕнӕм, уый тыххӕй нын алы хатт бузныг нӕ дзурдзысты. Куыд хъуыды кӕныс, уый тыххӕй хъуамӕ хорздзинад мауал аразӕм? ~ Нӕ, хъуамӕ аразӕм! Йесойӕн дӕр бирӕтӕ бузныг нӕ дзырдтой. Фӕлӕ уый уӕддӕр адӕмӕн хорздзинад арӕзта.

Цӕй уӕдӕ алкӕддӕр адӕмӕн лӕггад кӕнӕм. Ӕмӕ алы хатт дӕр хъуыды кӕнӕм, ӕппӕты хуыздӕр Ахуыргӕнӕг Йесо куыд кодта, ууыл, ӕмӕ мах дӕр афтӕ кӕнӕм.