Сӕр 11

Мах цӕрӕм фӕстаг бонты!

1. Цӕмӕн бафтынц бирӕтӕ мӕты, куы фӕкӕсынц дунейы цы цӕуы уымӕ, фӕлӕ кӕм ис ссарӕн дунеон цауты раст ӕмбарынад?

 КУЫД ӕрцыд нӕ тыхст дуне ахӕм уавӕрмӕ? Цы нӕм ӕнхъӕлмӕ кӕсы? Искуы ахӕм фарстытыл хъуыды кодтай? Абоны уавӕрмӕ кӕсгӕйӕ дунейы бирӕтӕ мӕты бафтынц. Цы ӕрхӕсдзӕн фидӕн — нӕ алыварс ӕрмӕст хӕстытӕ, низтӕ ӕмӕ фыдракӕндтӕ кӕй ис. Паддзахӕдты хицӕуттӕ дӕр ницы ныфс дӕттынц. Фӕлӕ Хуыцау йӕ Ныхасы ӕмбарын кӕны ацы тыхст бонты бӕлвырд нысаниуӕг. Библи нын ӕууӕнкджынӕй ӕххуыс кӕны, цӕмӕй нын фенын кӕна цы рӕстӕджы цӕрӕм. Уый нын ӕвдисы, ацы цардыуагон системӕйы «фӕстаг бонты» кӕй цӕрӕм (2 Тимофеймӕ 3:1).

2. Цавӕр фарст раттой Йесомӕ йӕ ахуыргӕнинӕгтӕ ӕмӕ сын цы сдзуапп кодта?

² Цӕвиттонӕн, дӕ хъус ӕрдар Йесойы дзуаппӕн йӕ ахуыргӕнинӕгтӕ цы фарстытӕ ӕрӕвӕрдтой, уыдонмӕ. Йесойы мӕлӕтмӕ ма ӕртӕ бон куы хъуыд, афтӕ йӕ бафарстой: «Цы нысан ис Дӕу ӕрцӕуынӕн ӕмӕ ӕнусы кӕронӕн [«цардыуагон системӕйы фӕудӕн» a, НД] (Матфейы  24:3). Йесо сын дзуаппӕн ӕрфыста конкретон цаутӕ ӕмӕ уавӕртӕ, кӕцытӕ ӕргомӕй амыдтой ацы ӕнӕхуыцау цардыуагон системӕйы фӕстаг бонты ралӕудмӕ.

3. Цӕмӕн фӕфыддӕр сты зӕххыл уавӕртӕ Йесойы хицауиуӕгады райдианимӕ?

³ Библион хронологимӕ гӕсгӕ раздӕр сӕры куыд ӕвдыст у, афтӕмӕй Хуыцауы Паддзахад нырид хицауиуӕг кӕны. Фӕлӕ уымӕн куыд гӕнӕн ис? Нӕ алыварс кӕд алцы хуыздӕр нӕ, фӕлӕ фыддӕр кӕны. Раст уый ӕвдисӕн кӕны, Хуыцауы Паддзахад нырид кӕй хицауиуӕг кӕны. Куыд? Псалмы 109:2-ӕй базондзыстӕм, Йесо цасдӕр рӕстӕг кӕй хъуамӕ хицауиуӕг кӕна йе «знӕгты ’хсӕн». Ӕцӕгдӕр, фыццаг цы сарӕзта куыд уӕларвон Паддзах, уый Сайтаны ӕмӕ йӕ хӕйрӕджытӕ суӕвӕг зӕдты раппӕрста зӕххы арӕнтӕм (Раргомад 12:9). Цы уыд дарддӕр та? Раргомады 12:12-ы цы уыд рагзагъд, уый ӕрцыд: «Зындзинад зӕххыл ӕмӕ денджызы цӕрджытӕн, уымӕн ӕмӕ сымахмӕ ныццыд хӕйрӕг тыхджын тызмӕгӕй, зонгӕйӕ бирӕ рӕстӕг ын кӕй нал баззад!» Ныртӕккӕ мах цӕрӕм уыцы рӕстӕджы, кӕцыйӕ бирӕ нал баззад.

4. Цавӕртӕ сты фӕстаг бонты иуӕй-иу хицӕндзинӕдтӕ ӕмӕ цӕмӕ амонынц ацы хицӕндзинӕдтӕ? (Кӕс информацимӕ рамкӕйы.)

⁴ Уымӕ гӕсгӕ диссаг нӕу, Йесойы куы бафарстой йӕ уӕвындзинады нысан ӕмӕ цардыуагон системӕйы кӕроны тыххӕй, уӕд йӕ дзуапп раст кӕй уыд, уый. Нысан аразӕг алыхуызон цаутӕ, хаст сты 102-ӕм фарсыл рамкӕйы. Куыд уыныс, афтӕмӕй чырыстон апостолтӕ Павел, Петр ӕмӕ Иоанн фӕстаг бонты иуӕй-иу лыстӕгдзинӕдты кой дӕр кӕнынц. О, сӕйраджыдӕр фӕстаг бонты нысан дзуры ӕнамонд уавӕртыл. Фӕлӕ ацы пехуымпарӕдты сӕххӕст адӕмы хъуамӕ сразы кӕна, ацы ӕвзӕр системӕйы кӕроны ӕрхӕстӕгыл. Цӕй уӕдӕ, базонгӕ уӕм фӕстаг бонты иуӕй-иу сӕйраг хицӕндзинӕдтимӕ.

ФӔСТАГ БОНТЫ ХИЦӔНДЗИНӔДТӔ

5, 6. Куыд ӕххӕст кӕнынц хӕстытӕ ӕмӕ ӕххормагдзинады тыххӕй пехуымпарӕдтӕ?

⁵ «Сыстдзысты адӕм адӕмыл ӕмӕ паддзахад паддзахадыл» (Матфейы 24:7; Раргомад 6:4). Фыссӕг Эрнест Хемингуэй Фыццаг дунеон хӕст схуыдта «зӕххыл ӕппӕты колосалон, тугмондаг, ӕнӕфӕткдар цӕгъдӕн». Иу чиныг куыд  дзуры, афтӕмӕй «уый уыд ӕнахуыр авнӕлды хӕст, адӕймагады историйы фыццаг тоталон хӕст. Йӕ дӕргъвӕтиндзинад, йӕ тыхархайд ӕмӕ йӕ масштабмӕ гӕсгӕ уый фӕфыддӕр, ӕппӕт зындгонд ӕмӕ ӕмткӕй ӕнхъӕл цы уыдысты, уымӕй» («The World in the Crucible​—1914-1919»). Уый фӕстӕ райдыдта Дыккаг дунеон хӕст, кӕцы разынд Фыццагӕй бирӕ фыддӕр. Историйы профессор Хью Томас дзуры: «Ссӕдзӕм ӕнусы хицауиуӕг кӕнынц автомат, танк, бомбардировщик Б-52, ядерон бомбӕ ӕмӕ, ӕппын фӕстаг, ракетон снарядтӕ. Ӕндӕр кӕцыфӕнды ӕнусы хӕстытӕй ацы ӕнус хицӕн кӕны тугкалӕндӕр ӕмӕ зианхӕссӕгдӕр хӕстытӕй». О, бирӕ дзырдтой гӕрзтӕ ӕрӕвӕрыныл, «Уазал хӕст»-ы фӕудыл. Фӕлӕ, иу отчетмӕ гӕсгӕ, ӕнхъӕлц куы фӕкъаддӕр уа, уӕд ма уый фӕстӕ дӕр баззайдзӕн 10 000​—20 000 онг ядерон бомбӕйы, кӕцы фӕфылдӕр уыдзӕн 900 хатт Дыккаг дунеон хӕсты цы зынджы тыхӕй спайда кодтой, уымӕй.

 ⁶ «Уыдзӕн ӕххормаг рӕстӕджытӕ» (Матфейы 24:7; Раргомад 6:5, 6, 8). Стыр ӕххормагдзинад 1914 азӕй ӕппын къаддӕр 20 хатты уыд. Уый сӕмбӕлд ахӕм бӕстӕтыл, куыд Бангладеш, Бурунди, Греци, Инди, Камбоджӕ, Китай, Нигери, Руандӕ, Сомали, Судан, Уӕрӕсе ӕмӕ Эфиопийы. Фӕлӕ ӕххормагдзинады аххосаг алыхатт хӕлцадон продуктты хъуагдзинадӕй нӕ вӕййы. «Фӕстаг дӕсазты ӕнӕхъӕн дунейы хӕлцады ӕвӕрӕнтӕ цӕрджытӕй тагъддӕр рӕзтысты»,— ахӕм хатдзӕгмӕ ӕрцыдысты агрокультурӕйы ахуыргӕндтӕ ӕмӕ экономистты къорд. «Фӕлӕ ацы бӕркадмӕ нӕкӕсгӕйӕ, иуыл къаддӕр 800 милуан адӕймаджы цӕрынц фырмӕгуырдзинады... сӕ бон нӕу иудадзыг хӕрдхъуагдзинадӕй сӕ цы фервӕзын кӕнид, уыцы ӕнӕмӕнгхъӕуӕг продукттӕ балхӕнын». Ӕндӕр цауты хайадисӕг у политикӕ. Торонтойы университеты д-р Абделгалил Элмекки цӕвиттонӕн ӕрхаста дыууӕ бӕстӕйы, кӕцыты мингай цӕрджытӕ сыдӕй куы мардысты, уӕд сӕ бӕстӕтӕ та хӕлцады стыр бӕрцӕй экспорт кодтой. Куыд зыны, афтӕмӕй хицауӕдтӕ се ’мбӕстӕгты бафсадынӕй сӕ хӕстытӕ ифтонг кӕнынӕн фӕсарӕйнаг валютӕ райсыныл тынгдӕр мӕт кӕнынц. Цавӕр хатдзӕгмӕ  ӕрцыд д-р Элмекки? Арӕх ӕххормагдзинад баст вӕййы «хӕлцады райуӕрст ӕмӕ хицауады политикӕйыл».

7. Цӕуыл дзурӕг сты эпидемиты тыххӕй абоны факттӕ?

⁷ «Низтӕ» (Лукайы 21:11; Раргомад 6:8). Ӕппын къаддӕр «Испайнаг гриппы» эпидеми, 1918-1919 азты, ахаста 21 милуан адӕймаджы цард. Чиныг «Стыр эпидемийы» («The Great Epidemic») А. А. Хоулинг фыссы: «Нырма дунейы адӕймаджы историйы никӕд уыд ахӕм лӕгмар, уыйбӕрц адӕмы афтӕ тагъд чи скуынӕг кодтаид». Абон дӕр ма эпидемитӕ цӕгъдӕн кӕнынц. Ӕрвылаз ракӕй амӕлы фондз милуан адӕймаджы, ахсӕн-тангон низтӕ аххӕссынц ӕртӕ милуан сабийы цардӕй фылдӕр, ӕмӕ туберкулезӕй та амӕлы ӕртӕ милуан адӕймаджы. Улӕфӕн оргӕнты инфекцитӕ, фыццаджыдӕр, пневмонийӕ ӕрвылаз амӕлы 3,5 милуан сывӕллоны фондз азы онг. Ӕнахуыр нымӕц 2,5 миллиард — зӕххы цӕрджыты ӕмбис — фыдӕбон кӕнынц низтӕй, кӕцытӕ расайдтой доны цухдзинад кӕнӕ чъизидзинад ӕмӕ ӕвзӕр санитарон уавӕртӕ. СИДС (ома СПИД) ма нын ӕвдисы медицинӕйы зынгӕ ӕнтыстдзинӕдтӕм ӕнӕкӕсгӕйӕ, адӕймаджы бон кӕй нӕу эпидемитӕн кӕрон скӕнын.

8. Цӕмӕй бӕрӕг у, адӕм «ӕвзистуарзаг» кӕй сты?

⁸ «Адӕм уыдзысты... ӕвзистуарзаг» (2 Тимофеймӕ 3:2). Дунейы алы бӕстӕты зыны, адӕмыл кӕй ӕртыхст ӕвӕрӕнтӕ кӕныныл ӕнӕбауромгӕ тырнындзинад. «Ӕнтыстдзинад» арӕх барст цӕуы мызды бӕрцӕй, ӕмӕ «къухы цы бафтыд» уый та — мулкӕй. «Материалон амонддзинады сагъӕс ныр дӕр у америкӕйаг ӕхсӕнады змӕлынгӕнӕг тыхтӕй сӕ иу... ӕмӕ у иуыл скъуыддзаггӕнӕг тых иннӕ егъау уӕйгӕнӕн базӕртты»,— загъта иу рекламон агентствӕйы вице-президент. Кӕм цӕрыс, уым дӕр афтӕ у?

9. Цы зӕгъӕн ис сывӕллӕтты ӕгоммӕгӕсдзинады рагзагъдӕй?

⁹ «Ныййарджытӕн ӕгоммӕгӕс» (2 Тимофеймӕ 3:2). Абон ныййарджытӕ, ахуыргӕнджытӕ ӕмӕ ӕндӕр адӕймӕгтӕ сӕрмагонд фӕлтӕрддзинадӕй базыдтой, бирӕ сывӕллӕттӕ ӕнӕхсӕст ӕмӕ ӕгоммӕгӕс кӕй сты. Арӕх уый вӕййы сывӕллӕтты реакци ныййарджыты ӕнӕраст архайдмӕ кӕнӕ уыдон бафӕзмыныны фӕлварӕн. Фылдӕрӕй фылдӕр сывӕллӕттӕ сафынц сӕ уырнындзинад ӕмӕ растынц скъолайы ӕгъдӕутты, закъоны, дин ӕмӕ  ныййарджыты ныхмӕ. Астӕуккаг скъолайы иу фӕлтӕрд ахуыргӕнӕг афтӕ зӕгъы: «Куыд зыны, афтӕмӕй уыдон цъус цӕмӕндӕрты аргъ кӕнынц». Фӕлӕ нӕ амондӕн, бирӕ хуыцауы тас цы сывӕллӕтты ис, уыдон фӕзминаг сты сӕ уагахастӕй.

10, 11. Цавӕр бӕлвырдгӕнӕнтӕ ис, адӕм ӕгъатыр кӕй сты ӕмӕ кӕрӕдзимӕ ӕцӕг уарзондзинад кӕй не ’нкъарынц?

¹⁰ «Хъӕбӕрзӕрдӕ» (2 Тимофеймӕ 3:3). Грекъаг дзырд, кӕцы тӕлмац у дзырд «хъӕбӕрзӕрдӕ»-йӕ нысан кӕны «ӕнӕхӕдзар, хъӕддаг, адӕймагон ӕнкъарӕнӕй ӕмӕ цардӕвзарӕнӕй цух». Куыд тынг бӕрӕг кӕны уый, абон тыхми чи кӕны, уыдонӕй бирӕты. Царды уыйбӕрц ӕвирхъау цаутӕ ис, афтӕ дзаг у туг ӕмӕ тасдзинадӕй ӕмӕ цӕмӕй ӕрвылбонон хабӕрттимӕ базонгӕ уай, уый тыххӕй дын хъуамӕ ӕндон нервтӕ уа»,— дзырдӕуыд иу редакцион уацы. Иу участковон пъӕлицӕйаг фӕнысан кодта, зӕгъгӕ, бирӕ ӕнахъомты фӕндгӕ дӕр нӕ кӕны сӕ ракӕндты фӕстиуджытыл хъуыды кӕнын дӕр. Уый загъта: «Афтӕ ӕнхъӕлын, цыма сӕхицӕн фӕдзурынц: „Нӕ зонын, цы уыдзӕн райсом. Ӕз мӕхион абон райсдзынӕн“».

¹¹ «Фыдзӕрдӕ» (2 Тимофеймӕ 3:2). Грекъаг дзырд, кӕцы тӕлмац у дзырд «фыдзӕрдӕ»-йӕ нысан кӕны «ӕгъатыр, дурзӕрдӕ» ӕмӕ амоны «ӕрдзон, хӕстӕгдзинады ӕнкъарӕнты цухдзинадмӕ» («Ног Фӕдзӕхсты ног ӕхсӕнадӕмон дзырдуат» [«The New International Dictionary of New Testament Theology»]). О, ӕгӕрыстӕмӕй уарзондзинад иуыл хуыздӕр кӕм фидауы — бинонты ’хсӕн — уым дӕр нӕй. Тасы ӕфтауы ӕрвылбонон кӕй систы ӕгъатыр ахасты цаутӕ: цардӕмбал, сывӕллӕттӕ ӕмӕ ма ацӕргӕ ныййарджыты ӕхсӕн дӕр. Мӕнӕ иу иртасӕг къорды цӕстӕнгас: «Адӕмы ’хсӕн тыхми — ӕхсӕрфарсы цӕф кӕнӕ къахӕй цӕф, карды рӕхуыст кӕнӕ ӕхст — нӕ ӕхсӕнады иуыл арӕхдӕр ӕрцӕуы бинонты ’хсӕн».

12. Цӕмӕн ис зӕгъӕн, адӕмӕн ӕрмӕст Хуыцаумӕ кувӕджы хуыз кӕй ис?

¹² «Бакастӕй намысджын, йӕ тых та иппӕрд у» (2 Тимофеймӕ 3:5). Библийӕн ис адӕмы цард хуыздӕрырдӕм ивыны тых (Ефесӕгтӕм 4:22—24). Фӕлӕ абон бирӕтӕ динӕй пайда кӕнынц куыд ширмӕйӕ, цӕмӕй йӕ фӕстӕ кӕной ӕнӕраст, Хуыцауӕн ӕнӕзӕрдӕмӕдзӕугӕ, хъуыддӕгтӕ. Сайын, къӕрныхдзинад ӕмӕ ӕрдон  ӕнӕгъдаудзинад арӕх динон къухдариуӕггӕнджытӕй растгонд ӕрцӕуынц. Бирӕ динтӕ амонынц уарзондзинадмӕ, фӕлӕ ӕххуыс кӕнынц хӕстытӕн. «Бӕрзонд Сфӕлдисӕджы номӕй,— бафиппайдта журнал «Индиа тудей»-йы иу редакцион уац,— адӕм аразынц ӕппӕты ӕлгъагдӕр ӕгъатырдзинӕдтӕ се ’мдинонтӕн». Ӕцӕгдӕр, нӕ рӕстӕджы ӕппӕты тугджындӕр конфликттӕй дыууӕ — Фыццаг ӕмӕ Дыккаг дунеон хӕстытӕ — чырыстон дунейы зӕрдӕйы ссыгъдысты.

13. Зӕхх кӕй сафынц, уымӕн цавӕр бӕлвырдгӕнӕнтӕ ис?

¹³ «Зӕхх сафджыты» (Раргомад 11:18). Ӕппӕт дунейӕ 1 600 фылдӕр ахуыргонды, уыдонимӕ Нобелы премийы 104 лауреаты, ӕрфыстой фӕдзӕхст, кӕцы рауагъта «Мӕтыбафтӕг ахуыргӕндты Цӕдис», уым дзырдӕуыд: «Адӕймаг ӕмӕ ӕрдз мӕнӕ-мӕнӕ сӕмбӕлдзысты. [...] Цалдӕр дӕсазы ма, ӕмӕ нӕ къухтӕй аивгъуыйдзӕн цы тас ныл ӕртыхст, уый аиуварс кӕныны фадат». Хъусинаджы дзырдӕуыд, зӕгъгӕ, цардӕн тӕссаг адӕймаджы архӕйдтытӕн, «дуне сӕ бон афтӕ фӕивын у, ӕмӕ нал уыдзӕн цардыл фӕхӕцынӕй цы амӕлттӕ зонӕм, уыдон». Озонон цъары къаддӕркӕнынад, доны чъизидзинад, хъӕдты ныццагъд, мӕры мӕгуырдзинад, ӕмӕ ма цӕрӕгойты ӕмӕ зайӕгойты бирӕ хуызты мыггагскъуыдыл цыд дзырд, куыд ӕнӕаргъӕвгӕ проблемӕтыл, кӕцыты ӕмбӕлы аскъуыддзаг кӕнын. «Нӕ хайадистӕй царды вазыгджын ӕндӕхты быды,— дзырдӕуы «Мӕтыбафтӕг ахуыргӕндты Цӕдис»-ы хъусинаджы,— гӕнӕн ис, ӕркӕна алыраны фӕстиуджытӕм, уыимӕ расайа биологон системӕты быцӕу, кӕцыты динамикӕ нырма ӕххӕстӕй не ’мбарӕм».

14. Матфейы 24:14 стих нӕ бонты кӕй ӕххӕст кӕны, уый куыд сбӕлвырд кӕнис?

¹⁴ «Ӕмӕ хъуыстгонд уыдзӕн ацы Паддзахады Евангели ӕппӕт дунейыл» (Матфейы 24:14). Йесо рагзагъд скодта, Паддзахады цины хабар ӕгас зӕххыл ӕппӕт адӕмты ӕвдисӕйнадӕн хъуыстгонд кӕй ӕрцӕудзӕн. Хуыцауы ӕххуыс ӕмӕ арфӕдзинадӕй милуангай Иегъовӕйы Ӕвдисӕнтӕ, ацы уацамынды хъуыддагӕн ӕмӕ ахуыргӕнинӕгтӕ цӕттӕ кӕнынӕн хардз кӕнынц миллиардгай сахаттӕ (Матфейы 28:19, 20). О, Ӕвдисӕнтӕ ӕмбарынц, цины хабар куы нӕ хъусын кӕной, уӕд туг ныккалды кӕй уыдзысты аххосджын (Иезекиль 3:18, 19). Уыдон амондджын сты,  ӕрвылаз Паддзахады хабармӕ мингай адӕймӕгтӕ кӕй раздахынц се ’ргом бузныгдзинадимӕ ӕмӕ кӕй слӕууынц ӕцӕг чырыстӕтты, Иегъовӕйы Ӕвдисӕнты фарс. Иегъовӕйӕн лӕггад кӕнын ӕмӕ афтӕмӕй Хуыцауы зонындзинӕдтӕ хӕссын у, аргъ кӕмӕн нӕй, ахӕм уӕлидзинад. Цины хабар хъуыстгонд куы ’рцӕуа ӕппӕт цӕрӕгджын зӕххыл, уӕд ацы фыдзӕрдӕ системӕйӕн йӕ кӕрон ӕрцӕудзӕн.

БАЗОН ФАКТТӔ ӔМӔ АРХАЙ

15. Куыд ӕрцӕудзӕн нырыккон фыдзӕрдӕ системӕ йӕ кӕронмӕ?

¹⁵ Куыд ӕрцӕудзӕн ацы системӕ йӕ кӕронмӕ? Библийы рагзагъд уыд «стыр зындзинад», кӕцы райдайдзӕн дунеон мӕнг дины паддзахадӕй, «Стыр Вавилонмӕ» ацы дунейы политикон тыхты ныббырстӕй (Матфейы 24:21; Раргомад 17:5, 16). Йесо загъта, зӕгъгӕ, уыцы рӕстӕджы «хур баталынг уыдзӕн, ӕмӕ мӕй йӕ рухс нал ратдзӕн, ӕмӕ стъалытӕ ӕрхаудзысты арвӕй, ӕмӕ уӕларвон тыхтӕ фенкъуысдзысты» (Матфейы 24:29). Уый, гӕнӕн ис, нысан кӕна комкоммӕ уӕларвон фӕзындтӕ. Куыд фӕнды ма уа, динон дунейы зынгӕ рухсдартӕ ӕрцӕудзысты ӕргом ӕмӕ куынӕггонд. Уый фӕстӕ Сайтан, кӕцыйы ма хонынц «Гог Магоджы зӕххы», спайда кӕндзӕн ӕнӕгъдау адӕмӕй Иегъовӕйы адӕмыл ӕппӕтиумӕйаг ныббырстӕн. Фӕлӕ Сайтан ӕнтыстджын нӕ уыдзӕн, уымӕн ӕмӕ Хуыцау фӕзындзӕн йӕ адӕммӕ ӕххуысмӕ (Иезекиль 38:1, 2, 14—23). «Стыр фыддзинад» йӕ апогеймӕ бахӕццӕ уыдзӕн Армагеддоны — «Ӕппӕтылхӕцӕг, Хуыцауы уыцы стыр бон». Ацы хӕст ныссӕрфдзӕн Сайтаны зӕххон организацийы фӕдтӕ иуылдӕр ӕмӕ удӕгас баззайӕг адӕймагадӕн ратдзӕн ӕнӕкӕрон арфӕдзинӕдтӕй ӕхцондзинад исыны фадат (Раргомад 7:9, 14; 11:15; 16:14, 16; 21:3, 4).

16. Кӕцӕй зонӕм, фӕстаг бонты рагзагъд миниуджытӕ нӕ рӕстӕгмӕ кӕй хауынц?

¹⁶ Пехуымпарӕдты иуӕй-иу хицӕндзинӕдтӕ, кӕцытӕ дӕттынц фӕстаг бонты афыст, гӕнӕн ис зыной куыд историйы ӕндӕр периодтӕм ахӕсгӕтӕ дӕр. Фӕлӕ иумӕ райсгӕйӕ, рагзагъды нысӕнттӕ сӕ хъусдард здахынц абонмӕ. Цӕвиттонӕн: адӕймаджы ӕнгуылдзты фӕд аразӕг хӕххытӕ, аразынц ныв, кӕцы нӕй гӕнӕн ӕндӕр искӕй уа.  Афтӕ ам дӕр, фӕстаг бонтӕн ис сӕхи бӕрӕг хицӕндзинӕдтӕй кӕнӕ цаутӕй конд ныв. Уыдон аразынц цавӕрдӕр «ӕнгуылдзты фӕд», кӕцыйӕн нӕй ахӕссӕн рӕстӕджы ӕндӕр ӕхсӕнуатмӕ. Хуыцауы уӕларвон Паддзахад нырид кӕй хицауиуӕг кӕны, уый тыххӕй Библийы амындтӕ нымайгӕйӕ куы ’взарӕм ацы цаутӕ, уӕд факттӕ ратдзысты ӕххӕст бындур, цӕмӕй хатдзӕг скӕнӕм: мах ӕцӕгдӕр фӕстаг бонты кӕй цӕрӕм. Уымӕй уӕлдай, Библийы цӕстуынгӕ бӕлвырдгӕнӕнтӕ амонынц нырыккон фыдзӕрдӕ системӕйы куынӕгмӕ.

17. Цӕмӕ нӕ хъуамӕ сразӕнгард кӕна фӕстаг бонты кӕй цӕрӕм, уый зонындзинад?

¹⁷ Цавӕр цӕстӕнгас дарыс, фӕстаг бонты кӕй цӕрӕм, уымӕ? Ӕрмӕст ма ахъуыды кӕн: тыхджын дымгӕ куы ӕрбацӕйхӕстӕг кӕны, уӕд ӕвӕстиатӕй хи бахизыны мадзӕлттӕ нӕ фӕисӕм. Афтӕ ам дӕр: нырыккон системӕйы тыххӕй нӕ Библийы рагзагъдтӕ хъуамӕ сразӕнгард кӕной архайдмӕ (Матфейы 16:1—3). Бӕлвырдӕй уынӕм, уӕвӕг дунеон системӕйы фӕстаг бонты кӕй цӕрӕм. Уый нӕ хъуамӕ сразӕнгард кӕна цыфӕнды ивддзинӕдтӕ скӕнынмӕ, кӕцытӕ ӕнӕмӕнгхъӕуӕг сты Хуыцауы хорзӕх райсынӕн (2 Петры 3:3, 10—12). Йӕхимӕ куыд ирвӕзындзинад хӕссӕгмӕ куы бацамыдта, уӕд Йесо хъӕддыхӕй расидт: «Кӕсут уӕхимӕ, цӕмӕй уӕ зӕрдӕтӕ ма ӕруӕззау уой фырхӕрдӕй ӕмӕ расыг кӕнынӕй ӕмӕ царды мӕтӕй, ӕмӕ уӕ цӕмӕй уыцы бон ма ӕрӕййафа ӕвиппайды: уымӕн ӕмӕ уый, куыд хыз, ӕрцӕудзӕн зӕххы цӕсгомыл ӕппӕт цӕрджытыл; уӕдӕ, хъӕлдзӕг ут алы афон ӕмӕ кувут, цӕмӕй ӕппӕт ӕрцӕуинаг бӕллӕхтӕй аирвӕзат ӕмӕ Адӕймаджы Фырты раз балӕууыны аккаг уат» (Лукайы 21:34—36).

[Фиппаинӕгтӕ]

СБӔЛВЫРД КӔН ДӔ ЗОНЫНДЗИНӔДТӔ

Библийы рагзагъдтӕм гӕсгӕ цавӕр дунеон цаутӕ хъуамӕ райдыдтаиккой Йесойы хицауиуӕгады райдиан?

Цавӕртӕ сты фӕстаг бонты иуӕй-иу хицӕндзинӕдтӕ?

Фӕстаг бонты кӕй цӕрӕм, уый бӕлвырд цӕй руаджы ис базонӕн?

[Фарстатӕ ахуыр кӕнынӕн]

[Рамкӕ 102 фарсыл]

ФӔСТАГ БОНТЫ ИУӔЙ-ИУ ХИЦӔНДЗИНӔДТӔ

• Ӕвирхъау хӕстытӕ (Матфейы 24:7; Раргомад 6:4).

• Ӕххормагдзинад (Матфейы 24:7; Раргомад 6:5, 6, 8).

• Эпидемитӕ (Лукайы 21:11; Раргомад 6:8).

• Ӕнӕзакъондзинӕдты сарӕх (Матфейы 24:12).

• Зӕххы сӕфт (Раргомад 11:18).

• Зӕххӕнкъуыстытӕ (Матфейы 24:7).

• Уӕззау рӕстӕджытӕ, кӕцытӕ сты зын сфӕразгӕ (2 Тимофеймӕ 3:1).

• Ӕнӕкӕрон уарзондзинад ӕхцамӕ (2 Тимофеймӕ 3:2).

• Ныййарджытӕн ӕгоммӕгӕсдзинад (2 Тимофеймӕ 3:2).

• Ӕрдзон уарзондзинады хъуагдзинад (2 Тимофеймӕ 3:2).

• Хуыцаумӕ уарзондзинадӕй ӕхцондзинӕдтӕм уарзондзинад тынгдӕр у (2 Тимофеймӕ 3:4).

• Хиуылхӕцындзинады хъуагдзинад (2 Тимофеймӕ 3:3).

• Хорздзинадмӕ уарзондзинады нӕ уӕвын (2 Тимофеймӕ 3:3).

• Ӕрхӕстӕггӕнӕг тасдзинады ницӕмӕдард (Матфейы 24:39).

• Хынджылӕггӕнджытӕ иуварс кӕнынц фӕстаг бонты бӕлвырдгӕнӕнтӕ (2 Петры 3:3, 4).

• Хуыцауы Паддзахады уацамынд ӕппӕт дунейыл (Матфейы 24:14).

 [Ныв ахсы 101 фарс ӕнӕхъӕнӕй]