КОЛУМБИЯ-ХАЙТС, 25, Бруклин (штат Нью-Йорк), 2016 азы 7 ӕмӕ 8 май. Ацы дыууӕ боны Йегъовӕйы Ӕвдисӕнты сӕйраг хайады, уазджытыл кӕм фембӕлынц, уыцы залы адӕмӕй къух бакӕнӕн нӕ уыд. Улӕфгӕ бонты-иу дзы выставкӕтӕ ӕмӕ экскурситӕ нӕ уыд, фӕлӕ ацы хатт, Вефилы алыварс чи цӕры, уыдоны фӕхуыдтой библион выставкӕмӕ.

Адӕмы фӕхоныны тыххӕй скодтой зиу. Чи дзы архайдта, уыдон бирӕтимӕ хорз аныхас кодтой, стӕй сӕхицӕн дӕр сӕ уырнындзинад тынг бафидар. Уӕлдай ӕхсызгон та уыди арфӕйы ныхӕстӕ нӕ рагон сыхӕгтӕй хъусын.

 Иу нӕлгоймаг загъта: «1960-ӕм азтӕй фӕстӕмӕ, ам [Вефилы алыварс] цы хӕдзӕрттӕ ис, уыдонӕй цалдӕры цардыстӕм, ӕмӕ сымахӕй хуыздӕр сыхӕгтӕ нӕй. Мысдзыстӕм уӕ. Нӕ нӕ фӕнды, цӕмӕй ардыгӕй ацӕуат».

Иу сылгоймаг та загъта: «Сымах куы нӕ уыдаиккат, уӕд нӕ район, ныр цыхуызӕн у, ахӕм никуы суыдаид. Уал азы дӕргъы нын ахӕм хорз сыхӕгтӕ кӕй уыдыстут, уый тыххӕй уӕ бузныг стӕм».

Пионертӕй бирӕтӕ дзырдтой, сыхӕгтӕ-иу сыл кӕй бацин кодтой ӕмӕ-иу сӕм кӕй байхъуыстой. Сыхӕгтӕй иу нӕлгоймаг нӕ организацийӕ раппӕлыд ӕмӕ загъта, тынг хъыг ын кӕй у, кӕдӕмдӕр кӕй цӕуы ӕмӕ выставкӕйы бонты горӕты кӕй нӕ уыдзӕн, уый.

Хоты ӕмӕ ’фсымӕрты фыдӕбон дзӕгъӕлы кӕй нӕ фӕци, уый ноджы тынгдӕр рабӕрӕг выставкӕйы. Йегъовӕйы Ӕвдисӕн чи нӕ уыд, уыдонӕй дыууӕ бонмӕ выставкӕ фенынмӕ ӕрбацыд 48 адӕймаджы. Вефилы бинонтӕй-иу бирӕтӕ уыдысты выставкӕйы, цӕмӕй-иу уазджытӕн ӕгасцуай загътаиккой ӕмӕ-иу семӕ аныхас кодтаиккой.

Салли, 30 азмӕ ӕввахс кӕуыл цӕуы, ахӕм сылгоймаг, выставкӕйы фӕци сахаты ӕрдӕджы бӕрц. Куы ӕрбацыд, уӕд амбӕлд, чи йӕ фӕхуыдта, уыцы пионертыл. Салли загъта, уый ӕнхъӕл кӕй нӕ уыд, ӕмӕ выставкӕйы Библитӕ уыдзӕн. Пионертӕ Саллийӕн загътой, ӕхсызгон сын кӕй у, ахӕм ӕрыгон ахуыргонд адӕймаг Библийӕн кӕй аргъ кӕны. Салли афтӕ бакодта: «Уӕдӕ ӕндӕр куыд? Ӕрмӕстдӕр Библийӕ ис базонӕн, Хуыцау нын цы дзуры, уый. Библи удӕгас чиныг у ӕмӕ, куыд цӕрын хъӕуы, уый нын амоны».

Салли загъта, Библийӕн тынг кӕй аргъ кӕны, уымӕ гӕсгӕ йӕ кӕй бафӕндыд латинаг ӕмӕ грекъаг ӕвзӕгтӕ сахуыр кӕнын ӕмӕ, Библи куыд тӕлмац кӕнынц,  уый йӕ тынг кӕй цымыдис кӕны. Йӕ хъуыдымӕ гӕсгӕ, Библи хъуамӕ раст тӕлмац кӕной, кӕмӕдӕр раст куыд кӕсы, афтӕ нӕ, фӕлӕ. Пионертӕ Саллийӕн куы загътой, нӕ сайты Библийы тыххӕй литературӕ 800 ӕвзагӕй фылдӕрыл кӕй ис, уӕд тынг бадис кодта. Хотӕ йын куы радзырдтой, Библи чи тӕлмац кодта, уыдон Йегъовӕйы номӕн цы бакодтой, уый, уӕд сӕ дисгӕнгӕ афарста: «Ӕмӕ Йегъовӕйы ном Библийӕ цӕмӕн айстой?» Салли куы цыд, уӕд загъта: «Мӕхи цы зонын, уӕдӕй фӕстӕмӕ уӕ фарсмӕ цӕрын ӕмӕ мӕ бон зӕгъын у, сымахӕй хуыздӕр сыхӕгтӕ кӕй нӕй».

Къуырисӕры выставкӕйы фӕстӕ иу сауджын бацыд, Вефилы раз стендимӕ чи хъусын кодта, уыцы ӕфсымӕр Джонмӕ ӕмӕ йын загъта, выставкӕ йӕ зӕрдӕмӕ тынг кӕй фӕцыд, ӕмӕ нӕ раппӕлыд, Библимӕ гӕсгӕ кӕй цӕрӕм, уый тыххӕй. Гыццыл куы аныхӕстӕ кодтой, уыд ын ӕвиппайды афтӕ фӕкодта: «Мӕсты уӕм кӕнын!» Джон ӕй нӕ фембӕрста, ӕмӕ йӕ, цӕмӕн, зӕгъгӕ, афарста. «Уымӕн ӕмӕ ардыгӕй цӕугӕ кӕнут! АМ ЛӔУУТ! Стырдӕр агъуыстытӕ балхӕнут, йе та саразут, ӕрмӕст цӕугӕ ма акӕнут. Мах дӕр ма сымах фӕрцы куы фидауӕм. Кӕй цӕут, уый мын тынг хъыг у!»

Хотӕ ӕмӕ ’фсымӕртӕ выставкӕмӕ адӕмы кӕй хуыдтой, уый фӕрцы дӕр ӕмӕ выставкӕйы фӕрцы дӕр сыхӕгтыл Хуыцауы номы кой айхъуыст ӕмӕ, уӕдмӕ куыд никуы уыд, афтӕ скадджын.