1980 азты кӕрон не ’мбырдты журнал «Хъахъхъӕнӕн мӕсыг» уыд, ӕмбырд-иу чи уагъта, ӕрмӕстдӕр уыцы ӕфсымӕрмӕ. Журнал-иу арӕхдӕр уыд къухӕй фыст. Иубон хистӕр нӕлгоймӕгтӕй иумӕ, Генади Гудадземӕ, бацыдтӕн ӕмӕ йын загътон, уӕд та нӕ журналтӕ мыхуыр кӕнын афӕлвариккам, зӕгъгӕ.

Уӕдмӕ ’фсымӕртӕ пайда кодтой, сӕхӕдӕг кӕй сарӕзтой, ахӕм къопитӕгӕнӕн машинкӕйӕ, фӕлӕ-иу дзы сӕ бон бирӕ къопитӕ кӕнын нӕ уыд. Цӕмӕй журналтӕ ӕдзух мыхуыр кодтаиккой, уый тыххӕй сӕ хъуыд хуыздӕр къопитӕгӕнӕн машинкӕ, фӕлтӕрдджын мыхуыргӕнӕг, мыхуыргӕнӕн машинкӕ ӕмӕ сӕм цӕмӕй ӕдзухдӕр уыдаид, текст-иу фыццаг кӕуыл ныммыхуыр кодтаиккой, ахӕм гӕххӕтт. Фӕлӕ, мыхуыргӕнӕн машинкӕтӕ, суанг ма гӕххӕтт дӕр, уыдысты хицауадмӕ фыст, стӕй ма сӕм йӕ хъус дардта ӕдасдзинады службӕ дӕр.

Мӕ зонгӕйы фӕрцы самал кодтон, кӕмӕй нал пайда кодтой ӕмӕ хицауадмӕ фыст чи нал уыд, ахӕм машинкӕ. Мӕ  хо уыд мыхуыргӕнӕг ӕмӕ нын йӕ бон уыд баххуыс кӕнын. Ӕфсымӕртӕ сарӕзтой ног къопитӕгӕнӕн машинкӕ ӕмӕ ссардтой, гӕххӕтт ӕлхӕнӕн кӕм уыд, ахӕм бынат. Алцӕмӕй дӕр куы срӕвдз стӕм, уӕд гыццыл фӕстӕдӕр рацыд журнал «Хъахъхъӕнӕн мӕсыджы» фыццаг къопи гуырдзиаг ӕвзагыл.

Фӕлӕ нын фӕзынд ног цӕлхдур. Иубон мын Генади загъта: «Гӕххӕтт нӕ ӕндӕр ран хъӕуы самал кӕнын». Генади ахӕм гӕххӕтт федта иу цавӕрдӕр паддзахадон организацийы, фӕлӕ йӕ йӕ бон балхӕнын нӕ уыд, уымӕн ӕмӕ йӕ фӕдыл зылдысты милицӕйы кусджытӕ. Уӕдӕ куыд хъуамӕ бафтыдаид нӕ къухы? «Уый гӕнӕн нӕй!» – цалдӕр хатты загътон ӕз. Уӕд мын Генади фидарӕй загъта: «Уый гӕнӕн нӕй, зӕгъгӕ, мауал дзур. Хуыцауӕн алцыдӕр у йӕ бон!» (Матф. 19:26).

Дыккаг бон уыцы организацимӕ куы фӕцӕйцыдтӕн, уӕд йӕ ныхӕстӕ мӕ сӕрӕй нӕ хызтысты. Раст зӕгъгӕ, тынг тыхстӕн. Фӕлӕ мӕ Йегъовӕ барвыста иу хӕларзӕрдӕ мыхуыргӕнӕгмӕ. Сылгоймаг мын мӕ курдиат хицаумӕ фӕхӕццӕ кӕныныл сразы. Уый уыд йӕ сӕрыхицау! Гӕххӕтт уым ӕлхӕнын райдыдтон ӕмӕ уӕдӕй фӕстӕмӕ цух ницӕмӕйуал ӕййӕфтам.