«ЙЕГЪОВӔМӔ куы фӕкувын, уӕд ын арӕх фӕзӕгъын бузныг, рӕстдзинад мӕ мадӕлон ӕвзагыл кӕй фехъуыстон, уый тыххӕй»,– загъта Гулизар.

Гулизар аст азы уыди ӕнӕаргъуыд хъусынгӕнӕг, фӕлӕ донаргъуыд райста, йӕ мадӕлон ӕвзагыл цы ӕмбырд уыд, уырдӕм куы бацыд, уӕд. Гулизар у, Гуырдзыстоны фӕстаг азты рӕстдзинад сӕ зӕрдӕмӕ цы бирӕ курдӕгтӕ айстой, уыдонӕй иу. Фӕлӕ чи сты курдӕгтӕ?

Курдӕгтӕ ӕнусты дӕргъы цардысты Ӕввахс Скӕсӕны. Иуӕй-иу ахуыргӕндты хъуыдымӕ гӕсгӕ, курдӕгтӕ сты,  Библийы цы мидиӕгты кой ис, уыдоны байзӕддӕгтӕ (2 Пад. 18:11; Хъуыд. 2:9). Се ’взаг хауы ирайнаг ӕвзӕгты къордмӕ.

Абон милуангай курдӕгтӕ цӕрынц алы бӕстӕты, зӕгъӕм, Ираны, Иракы, Сирийы, Сомихы ӕмӕ Турцийы. Гуырдзыстоны цӕры 20 000 курдаджы бӕрц. Сӕ фылдӕр Хуыцауыл ӕууӕндынц ӕмӕ уарзынц Хуыцауы тыххӕй ныхас кӕнын.

Ныр Гуырдзыстоны ис 500 курдаг хъусынгӕнӕджы, ӕмӕ дзы ис ӕртӕ ӕмбырды курдаг ӕвзагыл. 2014 азы хъусынгӕнджытӕ се ’ппӕт дӕр тынг цин кодтой, Тбилисийы курдаг ӕвзагыл фыццаг регионалон конгресс кӕй уыд, ууыл. Уыдис дзы уазджытӕ Германийӕ, Сомихӕй, Турцийӕ ӕмӕ Украинӕйӕ.