Игорь: Дыууӕйӕ дӕр лӕггад кодтам, горӕт Тъхъварчелийы (Абхази) цы къорд уыд, уым. Нӕ къорд хауд горӕт Джварийы ӕмбырдмӕ, махӕй йӕм уыди 85 километры бӕрц. Уымӕ гӕсгӕ-иу алы мӕй дӕр Джваримӕ ацыдтӕн, цӕмӕй-иу нӕ къордӕн литературӕ ӕрхастаин. 1992 азы, Советон Цӕдис куы ныппырх, уый хӕдфӕстӕ Абхазийы хӕст райдыдта, Гуырдзыстонӕй йӕ ахицӕн кӕнын кӕй фӕндыд, уый тыххӕй. Уыцы хӕст адӕмӕн бирӕ зындзинӕдтӕ ӕрхаста.

Гизо: Донаргъуыд райстон, хӕстмӕ ма иу аз куы хъуыди, уӕд. Цыди мыл 21 азы. Хӕст куы райдыдта, уӕд фыццаг рӕстӕг ӕфсымӕртӕ тынг тарстысты ӕмӕ, куыд хъусын кодтаиккой, уый нӕ зыдтой. Фӕлӕ Игорь алкӕддӕр хорз фыййау уыд ӕмӕ-иу нӕ фидар кодта: «Ныр уыцы рӕстӕг у, цӕмӕй адӕмы зӕрдӕты ныфс уадзӕм. Нӕ уырнындзинад фидар уыдзӕн, хъусын куы кӕнӕм, ӕрмӕстдӕр уӕд». Мах  тынг къӕрцхъус уыдыстӕм ӕмӕ ныфсы хабар Хуыцауы Ныхасӕй алы бон дӕр нӕ сыхӕгтӕн дзырдтам.

Игорь: Хӕст кӕй цыди, уымӕ гӕсгӕ, Джварийӕ литературӕ цы фӕндагыл ластам, ууыл нын ӕй ласӕн нал уыд. Уым кӕй схъомыл дӕн, уымӕ гӕсгӕ мӕ бон уыд цайгӕрдӕджы быдырты ӕмӕ хӕхты ӕдас фӕндаг ссарын. Фӕлӕ уӕддӕр тӕссаг уыд ӕфсӕддонтыл фембӕлынӕй кӕнӕ минӕйыл ныллӕууынӕй. Мӕн нӕ фӕндыд, цӕмӕй ме ’фсымӕртӕй искӕуыл исты ӕрцыдаид, ӕмӕ-иу алы мӕй дӕр иунӕгӕй ацыдтӕн. Йегъовӕйы фӕрцы-иу литературӕ самал кӕнын алы хатт дӕр мӕ къухы бафтыд. Уырнындзинад фидаргӕнӕн хӕринаг нын алкӕддӕр кӕй уыд, уый фӕрцы не ’рлӕмӕгъ стӕм.

Кӕд Тъхъварчелийы хӕст нӕ цыд, уӕддӕр цыбыр рӕстӕджы фӕстӕ нӕ горӕтӕй ацӕуӕн никӕдӕмуал уыд. Афтӕмӕй нӕм хӕсты дӕрзӕг арм ӕххӕссын райдыдта. Зымӕг куы ралӕууыд, уӕд нӕм хӕринаг нал уыд, ӕмӕ, куыд цӕрдзыстӕм, ууыл мӕт кодтам. Ӕмӕ куыннӕ бацин кодтаиккам, Джварийӕ нӕм не ’фсымӕртӕ ӕххуыс кӕй рарвитдзысты, уый куы фехъуыстам, уӕд!

Гизо: Иубон нӕ Игорь бафарста, разы стӕм, Джварийы нын цы хӕринӕгтӕ ӕрӕмбырд кодтой, уыдон куы ӕрласа, уӕд сӕ цӕмӕй нӕ хӕдзары ӕрӕвӕрӕм ӕмӕ сӕ стӕй ӕфсымӕртӕн байуарӕм. Мах Игорӕн тарстыстӕм, уымӕн ӕмӕ йӕ цалдӕр постыл ахизын хъуыд, стӕй ӕфсӕддонтыл ӕмӕ абырджытыл амбӕлынӕй дӕр тӕссаг уыд (Иоан. 15:13).

Куыд цин кодтам, цалдӕр боны фӕстӕ нӕм Игорь сӕрӕгасӕй куы ӕрыздӕхт ӕмӕ машинӕйыл ӕнӕхъӕн зымӕджы фаг хӕринаг куы ӕрласта, уӕд! Уыцы уӕззау рӕстӕджыты нӕхиуыл бавзӕрстам, цы нысан кӕны, ӕцӕг чырыстон уарзондзинад алкӕддӕр кӕй уыдзӕн, уый (1 Кор. 13:8).