Филиппинтӕй иу ӕфсымӕр, Джонатан, иухатт дохтырмӕ ӕнхъӕлмӕ каст. Аив конд кӕй уыд, уымӕ гӕсгӕ йӕ регистратурӕйы кусӕг сылгоймаг бафарста, страховкӕтӕ чи кӕны, ахӕм агент дӕ, зӕгъгӕ. Джонатан ын загъта, Йегъовӕйы Ӕвдисӕн кӕй у ӕмӕ, Ӕвдисӕнтӕй кӕйдӕр ӕххуыс кӕй хъӕуы, уый тыххӕй кӕй ӕрбацыд. Уӕд ын уыцы сылгоймаг, Лайлӕ, загъта, йӕ фыд ӕдзух  «Хъахъхъӕнӕн мӕсыг» кӕй каст, фӕлӕ ӕрӕджы кӕй амард. Джонатан ын бакаст Иоанны 5:28, 29 стихтӕ ӕмӕ йын радта буклет «Чи нын амард, уыдоны ма искуы фендзыстӕм?».

Джонатан рынчындонмӕ дыккаг хатт куы ӕрбацыд, уӕд Лайлӕйӕн фылдӕр публикацитӕ ӕрбахаста ӕмӕ йӕ иу хойы бар бакодта. Уыцы хо йемӕ Библи ахуыр кӕнын райдыдта. Гыццыл фӕстӕдӕр Лайлӕйы сӕрыхицау, йӕ хо, йӕ мад ӕмӕ, йемӕ чи цард, уыдон се ’ппӕт дӕр райдыдтой Библи ахуыр кӕнын.

 Лайлӕмӕ йӕ сыхаг Роуз ӕрбацыд ӕмӕ йӕ бафарста, уыйбӕрц адӕм сӕм цӕмӕн ӕрбацӕуы. Лайлӕ йын загъта, Йегъовӕйы Ӕвдисӕнтимӕ Библи кӕй ахуыр кӕны. Ӕмӕ уӕд Роуз дӕр райдыдта Библи ахуыр кӕнын. Иухатт Роуз хъӕумӕ йӕ хойы бӕрӕг кӕнынмӕ куы ацыд, уӕд ын радзырдта, Библийӕ цы базыдта, уый. Йӕ хо Абигейлы йӕ ныхӕстӕ бацымыдис кодтой, ӕмӕ уый дӕр бафӕндыд Библи ахуыр кӕнын. Роузы мад дӕр Библи ахуыр кӕнын райдыдта.

Лайлӕ донаргъуыд райста фӕстаг регионалон конгрессы. Йӕ мад дӕр ныр донаргъуыд у. Йӕ сыхаг Роуз ӕмӕ йӕ хо донаргъуыд райстой фарон. Роузы мад иу ӕмбырд дӕр нӕ цух кӕны. Лайлӕйы бинонтӕй ма чидӕртӕ Библи ахуыр кӕнынц. Ӕппӕт уыцы адӕм Библи ахуыр кӕнын райдыдтой, ӕфсымӕр рынчындоны иу адӕймагимӕ кӕй аныхас кодта, уый фӕрцы!

Шри-Ланкайы, хъусӕй чи нӕ хъусы, уыдонӕй а фӕстаг рӕстӕг хорз хабар сӕ зӕрдӕмӕ бирӕтӕ айсынц. 2015 азы Йегъовӕйы Ӕвдисӕнтӕм уыди, хъусӕй чи нӕ хъусы, ахӕм адӕмы адристӕ. Уыдысты 80-йӕ къаддӕр ӕмӕ иууылдӕр фыст уыдысты иу гыццыл гӕххӕттыл. Уӕдӕй нырмӕ Шри-Ланкайы фӕзынд ӕмбырд къухӕйамонгӕ ӕвзагыл, ӕмӕ сӕм ныр компьютеры ис иу-420 адӕймаджы номы, стӕй сӕ адристӕ ӕмӕ сӕ кӕм ссарӕн ис, уыцы GPS-координаттӕ дӕр. Ӕфсымӕртӕ уыдонӕй иу-80 процентимӕ аныхас кодтой кӕнӕ лӕгӕй-лӕгмӕ, кӕнӕ видеойы уылты, кӕнӕ та СМС-ты уылты. Дыууӕ миссионеры, ус ӕмӕ лӕг, радзырдтой: «Хъусӕй чи нӕ хъусы, уыцы хъусынгӕнджытӕн ныр ис, кӕм хъусын кӕной, ахӕм территори. Ныры онг сӕ бон уыд бӕрӕг кӕнын ӕрмӕстдӕр сӕ зонгӕты».

Монголийы ӕфсымӕртӕ стендтимӕ фӕхъусын кӕнынц, 30 градусы уазал куы вӕййы, уӕд дӕр. Иу хицауады кусӕг стендӕй публикаци райста ӕмӕ стӕй ныффыста писмо арфӕйы ныхӕстимӕ. Уым фыст уыди: «Ӕз дӕн буддист. Фӕлӕ бирӕ ӕндӕр динты ахуырӕдтӕ дӕр иртӕстон, уымӕн ӕмӕ, мӕнмӕ гӕсгӕ, адӕймаг хъуамӕ ӕрмӕст иу фӕндагыл ма цӕуа, фӕлӕ ӕндӕр фӕндӕгтӕ дӕр басгара. Адӕмӕн кӕй фӕдӕттут, уыцы публикацитӕй цалдӕр бакастӕн, ӕмӕ мӕ бафӕндыд, цы хъуыды кӕнын, уый зӕгъын. Зонын ӕй, бирӕ рӕстӕг ӕмӕ уӕ тыхтӕ кӕй бахъӕуы, адӕмӕн стыр ӕххуыс чи фӕуыдзӕн, ахӕм ӕрмӕг бацӕттӕ кӕнынӕн. Уӕ публикациты фӕрцы бамбӕрстон, Библи ӕнӕмӕнгӕй кӕй хъӕуы кӕсын. Уыцы чиныджы ис рӕстдзинад. Библийы фыст ис, раст цӕрын куыд хъӕуы, уый. Литературӕ монгойлаг ӕвзагмӕ чи тӕлмац кӕны, уыдонӕн мӕ сӕ фыдӕбоны тыххӕй фӕнды бузныг зӕгъын. Уымӕй уӕлдай ма арфӕ кӕнын, фыртӕвдӕй зӕхх куы фӕсудзы, уӕд дӕр ӕмӕ, фыруазалӕй бӕстӕ къӕс-къӕс куы фӕкӕны, уӕд дӕр адӕмӕн литературӕ чи фӕдӕтты ӕмӕ сын афтӕмӕй чи ӕххуыс кӕны, уыдонӕн».

Гонконгы иу пионер-ӕфсымӕр, Бретт, иу ӕрыгон лӕппумӕ бацыд ӕмӕ йын радта буклет «Бинонтӕ амондджын цӕй фӕрцы уыдзысты?». Лӕппу буклет куы ауыдта, уӕд йӕ цӕссыгтӕ ӕркалдысты. Куыд загъта, афтӕмӕй рӕстдзинады схъомыл, фӕлӕ 16-аздзыдӕй хӕдзарӕй алыгъд ӕмӕ стӕй фондз азы дӕргъы уынджы цард. Уымӕй уӕлдай ма наркотиктыл бафтыд. Афтӕ уыд, цалынмӕ йын мӕгуыртӕн ӕххуысгӕнӕг организаци нӕ баххуыс кодта, уӕдмӕ.

Лӕппу ма ноджыдӕр загъта, зӕгъгӕ, ӕфсымӕрыл цы райсом фембӕлд, уыцы райсом Хуыцаумӕ кӕй скуывта, гыццылӕй цы диныл хӕст уыдтӕн, уый кӕд раст у, уӕд  ма мын уый абон искуыд бамбарын кӕн, зӕгъгӕ. Ӕмӕ йӕм не ’фсымӕр куы бацыд, уӕд бамбӕрста, Хуыцау ын йӕ куывд кӕй фехъуыста. Лӕппутӕ кафемӕ бацыдысты ӕмӕ аныхас кодтой брошюрӕйыл, «Йегъовӕмӕ ӕрбаздӕх», зӕгъгӕ. Уыцы изӕр уыцы лӕппу хъуамӕ фӕстӕмӕ Францимӕ ацыдаид, ӕмӕ уымӕ гӕсгӕ кӕрӕдзийӕн сӕ электронон почтӕйы адристӕ радтой. Фӕстӕдӕр уыцы ӕрыгон лӕппу Бреттмӕ ныффыста: «Мӕ зынаргъ ӕфсымӕр! Йегъовӕ мын мӕ куывдтытӕ фехъуыста. Хуыцаубоны цӕуын ӕмбырдмӕ». Уыцы лӕппу Францийы Йегъовӕйы Ӕвдисӕнты ссардта ӕмӕ Библи ахуыр кӕнын, стӕй ӕмбырдтӕм цӕуын райдыдта.