Гуырдзыстоны иу нӕлгоймаг литературӕйы стенды размӕ хъӕргӕнгӕ бацыд: «Ӕз уӕ нӕ бауадздзынӕн ам лӕууын! Гуырдзыстон православон бӕстӕ у». Стенды фарсмӕ цы ӕфсымӕр лӕууыд, уый йӕ сабырӕй бафарста, нӕ литературӕ нын искуы кастӕ, зӕгъгӕ. «Никуы»,– загъта нӕлгоймаг. Уӕд ын ӕфсымӕр загъта, цӕмӕй нын нӕ литературӕйӕ исты бакӕса. Ӕфсымӕр йемӕ фӕлмӕнӕй кӕй ныхас кодта,  уый фӕрцы нӕлгоймаг ӕрсабыр, ӕмӕ цалдӕр публикацийы райста. Цалдӕр боны фӕстӕ ногӕй ӕрбацыд ӕмӕ хатыр ракуырдта, уый размӕ сыл кӕй хъӕр кодта, уый тыххӕй. Загъта сын, нӕ журналтӕй нын иу йӕ куырм мадӕн кӕй бакасти, ӕмӕ сӕ дыууӕйы зӕрдӕмӕ дӕр тынг кӕй фӕцыд, ӕмӕ сӕ кӕй фӕнды ноджыдӕр исты бакӕсын. Ныр ӕдзух стендмӕ ног журналтӕ райсынмӕ ӕрбацӕуы.

Азербайджаны дыууӕ ӕфсымӕры уацамынды уыдысты ӕмӕ иу ӕрыгон нӕлгоймаджы иу агъуысты раз лӕугӕ федтой. Ӕфсымӕртӕ йӕм бацыдысты ӕмӕ йемӕ хорз хабары тыххӕй ныхас кӕнын райдыдтой. Нӕлгоймаг сын загъта: «Цытӕ дзурут, уыдӕттӕм хъусын мӕ бон нӕу. Уый тӕригъӕдыл нымад у». Уый фӕстӕ йӕ фӕстаг дзыппӕй кард систа ӕмӕ загъта: «Ӕнаххосӕй мӕ бафхӕрдтой, ӕмӕ ӕз ныртӕккӕ ацы кардӕй хъуыддаг сраст кӕндзынӕн».

Ӕфсымӕртӕ хорзау нал фесты, фӕлӕ йын загътой: «Лӕг амарын стыр тӕригъӕд у».

Уӕд сӕ нӕлгоймаг бафарста: «Уӕдӕ куыд бакӕнон?» Ӕфсымӕртӕ йын Ромӕгтӕм 12:17–21 стихтӕ бакастысты ӕмӕ йын бамбарын кодтой, мастисӕг Хуыцау кӕй у ӕмӕ ныл хъуамӕ ӕвзӕрдзинад ма фӕуӕлахиз уа, фӕлӕ хъуамӕ ӕвзӕрдзинадыл хорздзинадӕй уӕлахиз кӕнӕм. Стӕй йын загътой, фӕлмӕн ныхасӕн стыр тых кӕй ис ӕмӕ искӕй куы фӕцӕф кӕна кӕнӕ йӕ куы амара, уӕд йӕхи фӕсмонӕй кӕй хӕрдзӕн. Нӕлгоймаг сын сӕ ныхӕстыл хъуыды кӕнгӕйӕ ацыд.

Иу сахаты фӕстӕ нӕлгоймаг ӕфсымӕрты ссардта ӕмӕ сын загъта: «Марынмӕ кӕй хъавыдтӕн, уымӕ  уыдтӕн. Йемӕ аныхас кодтон, ӕвзӕрӕй йын ницы ракодтон. Бузныг уын, бӕллӕхӕй мӕ бахызтат». Ӕфсымӕртӕ йын загътой, уыдон ын кӕй нӕ баххуыс кодтой, фӕлӕ Йегъовӕ.

Цалдӕр азы размӕ Норвегийы иу хо рӕстдзинады фӕндагӕй адзӕгъӕл. Фӕлӕ Йегъовӕйы Ӕвдисӕнтӕ стендтимӕ хъусын кӕнын куы райдыдтой, уӕд-иу дуканимӕ арӕх цыд иу стенды рӕзты.

Стенды фарсмӕ-иу чи лӕууыд, уыцы Ӕвдисӕнтӕм кӕд никуы бацыд, уӕддӕр стендыл цы рӕсугъд нывтӕ ӕмӕ публикацитӕ уыд, уыдон ын йӕ цӕст сӕхимӕ ӕлвӕстой. Стенд дӕр, стӕй Ӕвдисӕнты хӕларзӕрдӕдзинад ӕмӕ сӕ аив бакаст дӕр хойы зӕрдӕ бацагайдтой, ӕмӕ йӕ бафӕндыд Йегъовӕмӕ ӕмӕ йӕ адӕммӕ ’рбаздӕхын.

Хо ма стендыл федта нӕ сайты адрис. Сайтмӕ куы бацыд, уӕд уайтагъд ссардта хӕстӕгдӕр Паддзахады залы адрис ӕмӕ фембӕлдты рӕстӕг. Хо тынг бадис кодта, куыд ӕнцон ссарӕн уыдысты, ууыл. Цалдӕр публикацийы рафыста ӕмӕ Паддзахады залмӕ ацыд, кӕд тынг тыхсти, уӕддӕр. Уым ыл тынг бацин кодтой. Хистӕр нӕлгоймӕгтӕ иу хойӕн загътой, цӕмӕй йемӕ Библи ахуыр кӕнын райдыдтаид. Цыбыр рӕстӕгмӕ хойӕн хорз ӕмбӕлттӕ фӕзынд ӕмӕ та ногӕй ӕмбырды хъуыддӕгты архайын райдыдта. Ныр ӕмбырдты ӕдзух дзуапп фӕдӕтты ӕмӕ хъусын кӕнынмӕ фӕцӕуы. Уый тынг цин кӕны, Йегъовӕмӕ та кӕй баввахс, ууыл.

Норвегийы 15-аздзыд Роньяйӕн скъоламӕ цӕугӕйӕ автобусы йӕ къласӕй ӕртӕ лӕппуимӕ эволюцийы тыххӕй ныхас бацайдагъ. Ронья цӕуыл ӕууӕнды, уый лӕппутӕм  худӕг фӕкаст, ӕмӕ чызг фӕтыхст. Фӕстаг рӕстӕг эволюцийы тыххӕй никӕимӕ ныхас кодта, ӕмӕ бӕлвырдӕй цы загътаид, уый нӕ зыдта. Уымӕ гӕсгӕ йӕ мадӕн загъта, цӕмӕй, Сфӕлдисӕг кӕй ис, уымӕн ын бӕлвырдгӕнӕнтӕ ссарынӕн баххуыс кодтаид.

Дыккаг бон автобусы Ронья радзырдта, цы бацӕттӕ кодта, уый. Фӕлӕ йыл йе ’мкъласӕгтӕ худын райдыдтой. Сӕ иу хъӕрӕй загъта: «Ацы автобусы иу дӕр Йегъовӕйыл не ’ууӕнды! Уӕ къухтыл-ма схӕцут: эволюци уӕ кӕй уырны? Йегъовӕйыл та чи ӕууӕнды?» Ронья уый ӕнхъӕл нӕ уыди, фӕлӕ йӕ фарсмӕ цы гыццыл лӕппу бадт, уый йӕ къухыл схӕцыд ӕмӕ загъта: «Ӕз ӕууӕндын Йегъовӕйыл!» Уалынмӕ ма ноджыдӕр дыууӕ сывӕллоны загътой: «Ӕз дӕр!» Ронья йе ’мкъласӕгтимӕ куыд ныхас кодта, уый хъуыстой иннӕ скъоладзаутӕ дӕр, ӕмӕ дзы иуӕй-иуты бауырныдта, Сфӕлдисӕг кӕй ис, уый!

Иу бон фӕссихор Данийы филиалмӕ бацыдысты араббаг ӕвзагыл дзурӕг дыууӕ нӕлгоймаджы Сирийӕ ӕмӕ, приёмнийы цы хотӕ уыди, уыдонӕн загътой, Йегъовӕйы Ӕвдисӕнты кӕй агурынц. Хотӕ сын куы загътой, кӕдӕм сӕ хъуыд, уырдӕм кӕй ӕрбацыдысты, уӕд бацин кодтой. Фӕлӕ цымӕ адрис куыд ссардтой? Бынӕттон библиотекӕмӕ бацыдысты ӕмӕ уым кусджытӕн сӕ телефоны иу къам равдыстой. Уый уыди, адӕмимӕ Библи кӕй фӕрцы фӕахуыр кӕнӕм, уыцы чиныджы рауадзджыты фарс араббаг ӕвзагыл. Ӕмӕ сын уӕд библиотекӕйы кусджытӕ филиалы адрис радтой.

Дыууӕ нӕлгоймаджы сын даниагау цыдӕртӕ тыххӕйты ӕмбарын кодтой. Уӕд хотӕ фӕдзырдтой, араббаг ӕвзаг чи зыдта, ахӕм ӕфсымӕрмӕ. Куыд рабӕрӕг, афтӕмӕй уыцы дыууӕ лӕгӕй иуы тынг фӕндыд Библи ахуыр кӕнын райдайын. Ӕфсымӕр ын йӕ адрис райста ӕмӕ йын зӕрдӕ бавӕрдта, тагъд ӕй кӕй абӕрӕг кӕндзӕн, араббаг ӕвзагыл чи дзуры, ӕндӕр ахӕм ӕфсымӕримӕ.

Ӕфсымӕртӕ йӕм куы бацыдысты, уӕд сын загъта, Йегъовӕйы Ӕвдисӕнтӕ йӕм кӕй никуы уыдысты. Радзырдта сын, чиныг йӕ почтӕйы асыччы кӕй ссардта. Уый диссаг уыд, уымӕн ӕмӕ асыккыл йӕ ном фыст нӕ уыд, ӕмӕ бӕрӕг нӕ уыд, араббаг ӕвзагыл дзурӕг адӕймаджы асыкк уыди, уый. Кӕсын кӕй нӕ зыдта, уымӕ гӕсгӕ йе ’мбӕлттӕй иуӕн загъта, цӕмӕй йын ӕй бакастаид, ӕмӕ йӕ ӕртӕ бонмӕ бакастысты. Цы базыдта, уый йын фаг уыд, цӕмӕй бамбӕрстаид, рӕстдзинад кӕй ссардта, уый.

Нӕлгоймаг йӕ райгуырӕн бӕстӕйӕ лидзинаг кӕй фӕци ӕмӕ йӕ бинонтӕй дард кӕй уыд, уый йын тынг зын у, фӕлӕ йын Библи удӕнцой хӕссы. Ӕфсымӕртӕ йӕм фыццаг хатт куы бацыдысты, уӕд сӕ бафарста: «Нырмӕ кӕм уыдыстут? Ай мӕ цы хъуыд, уый куы у».  Ныр ӕфсымӕртӕ йемӕ Библи ахуыр кӕнынц ӕмӕ, цы базоны, уый йӕ зӕрдӕмӕ тынг цӕуы.

Дмитрий куыста хицауӕй тамакоуадзӕн компанийы Украинӕйы. Фӕлӕ, тамако дымын адӕймаджы ӕнӕниздзинадӕн цы зиан хӕссы, уый тыххӕй фылдӕр куы базыдта, уӕд йӕ куыст ныууагъта, кӕд хорз мызд иста, уӕддӕр. Фӕстӕдӕр ӕртӕ мӕйы мидӕг амардысты йӕ мад ӕмӕ йӕ усы мад. Сӕ мӕлӕт ын йӕ хъару асаста. Ӕнхъӕл уыд, аргъуанмӕ куы бацӕуа, уӕд ын кӕй фенцондӕр уыдзӕн ӕмӕ йӕ фарстатӕн дзуапп кӕй ссардзӕн. Фӕлӕ нӕдӕр удӕнцой ссардта, нӕдӕр – йӕ фарстатӕн дзуапп. Йе ’мбал ын загъта, зӕгъгӕ, православон чырыстонӕн йӕ хъуырыл крест вӕййы, Хуыцауы тыххӕй та ницы фӕзоны. Дмитрийӕн дӕр йӕ хабар раст афтӕ уыд. Уӕд бамбӕрста, Хуыцауы ӕмӕ Библийы тыххӕй ӕппындӕр кӕй ницы зыдта. Фырадӕргӕй Хуыцаумӕ кувын райдыдта, цӕмӕй йын баххуыс кодтаид. Уый фӕстӕ йӕ зӕрдыл Йегъовӕйы Ӕвдисӕнтӕ ӕрлӕууыдысты – сӕ кой-иу сын фехъуыста. Дмитрий нӕ сайтмӕ бацыд ӕмӕ тынг бадис кодта, Библийы тыххӕй дзы цас информаци уыди, ууыл. Уый фӕстӕ, хӕстӕгдӕр ӕм цы Паддзахады зал уыд, уый адрис ссардта. Йӕ машинӕ лӕууӕндоны куы сӕвӕрдта, уӕд ын уагдар салам радта ӕмӕ йӕ бафарста, мыййаг дӕ исты ӕххуыс хъӕуы, зӕгъгӕ. Дмитрий йын загъта: «Библи ахуыр кӕнын мӕ фӕнды». Ныр ӕхсӕз мӕйы ахуыр кӕны Библи, ӕдзух ӕмбырдтӕм цӕуы ӕмӕ дзуапп фӕдӕтты.

Пол ӕмӕ Фейт цӕрынц Великобританийы. Иу бон хорз аныхас кодтой иу сылгоймагимӕ, Сьюзанимӕ, ӕмӕ  йын загътой, кӕй та йӕ абӕрӕг кӕндзысты. Фӕлӕ йӕм куы бацыдысты, уӕд ӕй хӕдзары нӕ баййӕфтой. Уӕд Пол ӕмӕ Фейт бакодтой, 2014 азы ноябры «Нӕ хъусын кӕныны хъуыддаджы» цы уынаффӕ уыд, уымӕ гӕсгӕ – запискӕ йӕм афыстой, райсом дӕм ӕрбацӕудзыстӕм, зӕгъгӕ, ӕмӕ йын ӕй дуары ныууагътой. Ногӕй та йӕм куы бацыдысты, уӕд йӕ дуары уыд гӕххӕтт тъыст. Фыст ыл уыди, йӕ чызджы чындзӕхсӕвмӕ цыдӕртӕ ӕлхӕнынмӕ кӕй ацыд. Пол ӕмӕ та йӕм Фейт ногӕй ныффыстой, иннӕ къуыри йӕм кӕй ӕрбацӕудзысты. Ацы хатт сӕм Сьюзан ӕнхъӕлмӕ каст, ӕмӕ Библи ахуыр кӕнын райдыдтой.

Сьюзанӕн йӕ чызг тагъд чындзы кӕй цыд, уымӕ гӕсгӕ сын загъта, цӕмӕй уал банхъӕлмӕ кастаиккой, цалынмӕ чындзӕхсӕв нӕ ахицӕн уыдаид, уӕдмӕ. Пол ӕмӕ та Фейт ногӕй куы ӕрбацыдысты, уӕд сӕм ничи ракаст. Гъемӕ йын гӕххӕттыл сӕ телефоны номыр ныффыстой ӕмӕ та йын ӕй дуары ныууагътой. Сьюзан сӕм  СМС ӕрбарвыста. Хатыртӕ сӕ куырдта, кӕй сӕм нӕ ракаст, уый тыххӕй – уыцы рӕстӕг йӕ сыхагимӕ цӕхӕрадоны ныхӕстӕ кодта. Уӕдӕй фӕстӕмӕ Сьюзан Библи ахуыр кӕны, ӕмӕ ӕрӕджы фыццаг хатт ӕмбырдмӕ ӕрбацыд.

Пол ӕмӕ Фейтӕн сӕ зӕрдӕмӕ цӕуы, хӕдзары кӕй нӕ баййафынц, уыдонимӕ запискӕты фӕрцы ныхас кӕнын. Пол загъта: «Запискӕтӕ ма нын ноджыдӕр цалдӕр хатты баххуыс кодтой. Замманай мадзал!»

2014 азы августы Венгрийы иу ӕфсымӕр йӕ рӕуджытӕй (легочная эмболия) рынчындонмӕ бахауд. Фӕлӕ, хъыгагӕн, бирӕ нал ахаста. Иу медицинон хо, Тюнде, ӕфсымӕрмӕ тынг хорз касти. Тюндейы тыххӕй ӕфсымӕры бинойнаг ныффыста:

«2015 азы сӕрды мӕ фыртимӕ уыдтӕн регионалон конгрессы „Чырыстийы фӕзмут!“. Ӕртыккаг бон конгрессы фӕстӕ машинӕты лӕууӕндонмӕ куы бацыдыстӕм, уӕд нӕ разы иу сылгоймаг ӕрлӕууыд, йӕ хызынтӕ зӕхмӕ ӕрӕппӕрста, ныхъхъӕбыс мын кодта ӕмӕ кӕуын райдыдта. Уый уыди, иу-афӕдзы размӕ рынчындоны мӕ сӕрыхицаумӕ чи каст, уыцы медицинон хо. Радзырдта мын, сменӕйы размӕ алы медицинон хойӕн дӕр кӕй фӕзӕгъынц, кӕцы рынчынмӕ кӕсдзӕн, уый. Уый-иу алы хатт дӕр скуывта, цӕмӕй-иу ын мӕ сӕрыхицаумӕ кӕсын бахӕс кодтаиккой. Ӕмӕ афтӕ никуы уыд, цӕмӕй йӕ ӕндӕр искӕмӕ арвыстаиккой!

Тюнде загъта, мӕ сӕрыхицау уӕздан кӕй уыд, йӕ уырнындзинад тынг фидар кӕй уыд ӕмӕ-иу ӕдзух, фидӕнӕй йӕ цы ныфс уыд, уый кой кӕй кодта, уымӕ гӕсгӕ уый дӕр кӕй бафӕндыд Йегъовӕйы Ӕвдисӕнтимӕ Библи ахуыр кӕнын райдайын.

 Тюнде ныр ахуыр кӕны Библи ӕмӕ ӕнхъӕлмӕ кӕсы, мӕ сӕрыхицауӕн мын ногӕй „Ӕгас цу!“ кӕд зӕгъдзӕн, уыцы рӕстӕгмӕ. Ӕнхъӕлмӕ кӕсы, кӕд ын радзурдзӕн, йӕ уӕздандзинад ӕмӕ йын йӕ фидар уырнындзинад кӕй баххуыс кодтой, Йегъовӕйы, стӕй, зӕрдӕ цы диссаджы фидӕнӕй ӕвӕры, уый базонынӕн».

Змӕстыты аххосӕй-иу Греци ӕмӕ Болгарийы арӕныл кӕцыдӕр постытӕ рӕстӕгмӕ сӕхгӕдтой. Уыцы рӕстӕг-иу машинӕтӕ арӕныл цалдӕргай километртӕ рарӕнхъ сты. Болгарийы арӕнмӕ хӕстӕг чи уыд, уыцы ӕмбырды хъусынгӕнджытӕ уыцы уавӕрӕй спайда кодтой – публикацитӕ-иу 12 ӕвзагыл райстой ӕмӕ-иу сӕ, машинӕты чи бадт, уыдонӕн лӕвӕрдтой. Шофыртӕй бирӕтӕ уыдысты фӕллад ӕмӕ мӕсты, фӕлӕ-иу уӕддӕр семӕ аныхас кодтой. Ӕфсымӕртӕ-иу сӕм лӕмбынӕг хъуыстой ӕмӕ-иу сӕ Библийы фӕрцы бафидар кодтой. Иу шофыр сӕ бафарста: «Йегъовӕйы Ӕвдисӕнтӕ стут?» О, зӕгъгӕ йын куы загътой, уӕд афтӕ бакодта: «Афтӕ дӕр ӕй зыдтон! Ӕрмӕстдӕр Йегъовӕйы Ӕвдисӕнтӕ хъусын кӕнынц хорз хабар сымахау». Австрийӕ та иу шофыр хынджылӕгӕй загъта: «Ам дӕр уӕ нӕ бамбӕхсдзынӕ! Уӕллӕй, раппӕлинаг стут! Адӕмы ма ныууадзут – сӕ зӕрдӕтӕ сын сабыр кӕнут ӕмӕ сӕ ныфс уадзут». Иннӕ шофыр та загъта: «Уӕ публикацитӕ кӕсын мӕ никуы фӕндыд, фӕлӕ сӕ ныр ӕнӕмӕнг бакӕсдзынӕн». Иу шофырӕн та йӕ цӕссыгтӕ йӕ рустыл ӕргӕр-гӕр кодтой, ӕфсымӕр ӕм куы бацыд, уӕд. Уый загъта, Йегъовӕйы Ӕвдисӕн кӕй уыд, фӕлӕ бирӕ азты дӕргъы ӕмбырдтӕм кӕй нал цӕуы. Ӕфсымӕртӕ йын загътой, цӕмӕй йын цы публикацитӕ радтой, уыдон бакастаид, стӕй цӕмӕй ӕмбырдмӕ дӕр ацыдаид.