Йегъовӕйы Ӕвдисӕнтӕ ӕдзух ахуыр кӕнынц, цӕмӕй сӕ царды алы хъуыддаджы дӕр Чырыстийы фӕзмой. Стӕй ма ӕххӕст кӕнынц, Йесо Чырысти йӕ фӕдылдзӕуджытӕн цы бахӕс кодта, уый – Хуыцауы Паддзахады тыххӕй хорз хабар хъусын кӕнын ӕмӕ ахуыргӕнинӕгтӕ цӕттӕ кӕнын (Матфейы 24:14; 28:19, 20). Цӕмӕй уыцы хъуыддагмӕ хуыздӕр арӕхсӕм, уый тыххӕй нын алы къуыри дӕр вӕййы фембӕлдтӕ, стӕй ма нын алы аз дӕр вӕййы конгресстӕ. Йегъовӕйы Ӕвдисӕнтӕй ӕмбырды кӕнӕ нӕ организацийы цавӕрдӕр хӕстӕ чи феххӕст кӕны, уыдон ма фӕахуыр кӕнынц нӕ организацийы кӕцыдӕр скъолаты.

Ацы статьяйы

•  Йегъовӕйы Ӕвдисӕнты сӕ организаци куыд ахуыр кӕны?

•  Йегъовӕйы Ӕвдисӕнты скъолатӕ

•  Йегъовӕйы Ӕвдисӕнтӕн сӕ ахуырадон программӕ цӕуыл арӕзт у?

•  Йегъовӕйы Ӕвдисӕнты сӕ ахуырӕн фидын хъӕуы?

•  Йегъовӕйы Ӕвдисӕнтӕ се скъолаты тыххӕй цы дзурынц?

 Ӕмбырды фембӕлдтӕ. Къуыри дыууӕ хатты нын вӕййы фембӕлдтӕ, Хуыцауӕн кӕм фӕкувӕм, уыцы рӕтты. Хуыйнынц Паддзахады залтӕ. Иу фембӕлд нын вӕййы кусгӕ бонты, иннӕ та – улӕфгӕ бонты. Фембӕлдтӕм алкӕй бон дӕр у ӕрбацӕуын. Ӕхца фидын дзы нӕ хъӕуы.

•   Кусгӕ бонты нын чи вӕййы, уыцы фембӕлд. Ацы фембӕлды ахуыр кӕнӕм хуыздӕр кӕсын, адӕмимӕ ныхас кӕнын, раныхӕстӕ дзурын, хорз хабар хъусын кӕнын ӕмӕ иннӕты ахуыр кӕнынмӕ хуыздӕр арӕхсын. Вӕййы дзы раныхӕстӕ, раныхӕстӕ фарстатӕ ӕмӕ дзуаппытимӕ, равдыстытӕ ӕмӕ видеороликтӕ. Уыдӕттӕ нын ӕххуыс кӕнынц, цӕмӕй хуыздӕр арӕхсӕм, Библийы цы фыст ис, уый иннӕтӕн дзурынмӕ ӕмӕ, фылдӕр базонын кӕй фӕфӕнды, уыдонимӕ Библи ахуыр кӕнынмӕ. Ацы фембӕлдмӕ чи ’рбацӕуы, уыдонӕй алкӕмӕн дӕр стыр пайда ӕрхӕссы. Уымӕй уӕлдай ма фембӕлдты нӕ уырнындзинад бафидар вӕййы, стӕй нын ӕххуыс кӕнынц, цӕмӕй Хуыцауы дӕр ӕмӕ не ’мчырыстӕтты дӕр тынгдӕр уарзӕм.

•   Улӕфгӕ бонты нын чи вӕййы, уыцы фембӕлд. Ацы фембӕлд дыууӕ хайӕ конд у. Фыццаг хайы вӕййы раныхас, ӕмӕ уӕлдай пайда вӕййы, фылдӕр базонын кӕй фӕнды, уыдонӕн. Дыккаг хайы та фарстатӕ ӕмӕ дзуаппыты фӕрцы равзарынц статья журналӕй «Хъахъхъӕнӕн мӕсыг» (ахуыр кӕнынӕн чи у, уыцы журналӕй) a. Уыцы статьяты дзырд фӕцӕуы Библийӕ алыхуызон темӕтыл ӕмӕ уагӕвӕрдтыл ӕмӕ нын нӕ царды ӕмӕ нӕ лӕггады цы пайда сты, ууыл.

 Конгресстӕ. Алы аз дӕр нын вӕййы ӕртӕ стыр фембӕлды. Уыцы фембӕлдтӕм ӕрбацӕуы бирӕ адӕм алы ӕмбырдтӕй. Дзырд дзы фӕцӕуы Библийӕ цавӕрдӕр темӕйыл ӕмӕ дзы вӕййы раныхӕстӕ, равдыстытӕ, интервьютӕ ӕмӕ видеороликтӕ. Ӕмбырды фембӕлдтӕ нын куыд ӕххуыс кӕнынц, афтӕ нын конгресстӕ дӕр ӕххуыс кӕнынц, цӕмӕй Библи хуыздӕр ӕмбарӕм ӕмӕ хорз хабар хъусын кӕнынмӕ хуыздӕр арӕхсӕм. Конгресмӕ дӕр алкӕй бон дӕр у ӕрбацӕуын ӕмӕ уым дӕр ӕхца фидын нӕ хъӕуы.

 Йегъовӕйы Ӕвдисӕнтӕй кӕйдӕрты фӕхонынц нӕ организацийы кӕцыдӕр скъолатӕм. Цавӕр скъолатӕ сты? Скъолатӕн сӕ нысан цы у? Цас фӕцӕуынц ӕмӕ дзы кӕй бон у ахуыр кӕнын?

Пионерты скъола

•   Йӕ нысан: ацы скъолайӕн йӕ нысан у, Хуыцауӕн йӕ лӕггадгӕнджытӕй иуӕй-иуты, хуыйнынц пионертӕ b, сахуыр кӕнын, цӕмӕй хъусын кӕныны ӕмӕ ахуыргӕнинӕгтӕ цӕттӕ кӕныны хъуыддаджы ноджы ӕнтыстджындӕр уой. Ахуыры рӕстӕг цавӕрдӕр темӕтыл фӕныхас кӕнынц, равдыстытӕ ӕмӕ раныхӕстӕ бацӕттӕ кӕнынц ӕмӕ сын вӕййы практикӕ.

•   Цас фӕцӕуы: ӕхсӕз боны.

•   Кӕй фӕхонынц: иу аз пионерӕй чи лӕггад кӕны, уыдоны. Пионерӕй бирӕ азты дӕргъы чи лӕггад кӕны ӕмӕ ацы скъолайы фӕстаг фондз азы чи нӕ ахуыр кодта, уыдонӕй дӕр кӕйдӕрты ногӕй фӕхонынц.

Хуыцауы Паддзахад хъусынгӕнджыты скъола

•   Йӕ нысан: фӕлтӕрдджын лӕггадгӕнджыты – пионерты – сахуыр кӕнын, цӕмӕй хъусын кӕнынмӕ ӕмӕ иннӕты ахуыр кӕнынмӕ ноджы хуыздӕр арӕхсой. Уыдон Библи ноджы лӕмбынӕгдӕр фӕиртасынц. Ацы скъолайы фӕстӕ бирӕты снысан кӕнынц, хъусынгӕнджытӕ кӕм нӕ фаг кӕны, ахӕм рӕттӕм.

•   Цас фӕцӕуы: дыууӕ мӕйы.

•   Кӕй фӕхонынц: скъолайы домӕнтӕм гӕсгӕ йӕ бон кӕмӕн у ахуыр кӕнын ӕмӕ, хъусынгӕнджытӕ кӕм нӕ фаг кӕны, уым лӕггад кӕнын йӕ бон кӕмӕн уыдзӕн, ахӕм пионерты.

Хистӕр нӕлгоймӕгты скъола

•   Йӕ нысан: хистӕр нӕлгоймӕгтӕн c баххуыс кӕнын, цӕмӕй сыл ӕмбырды цы хӕстӕ ис, уыдон ӕххӕст кӕной, зӕгъӕм, се ’мчырыстӕтты ахуыр кӕной, ӕххуыс сын кӕной ӕмӕ Хуыцауы ӕмӕ се ’мчырыстӕтты ноджы тынгдӕр уарзой (1 Петры 5:2, 3).

•   Цас фӕцӕуы: фондз боны.

•   Кӕй фӕхонынц: хистӕр нӕлгоймӕгтӕй ӕрӕджы кӕй снысан кодтой, уыдоны, стӕй ацы скъолайы фӕстаг фондз азы чи нӕ ахуыр кодта, ахӕм фӕлтӕрдджын хистӕр нӕлгоймӕгты.

Скъола районон цӕстдарджытӕн ӕмӕ сӕ устытӕн

•   Йӕ нысан: цӕуӕг цӕстдарджыты, хонынц сӕ районон цӕстдарджытӕ d, сахуыр кӕнын, цӕмӕй сӕ хӕстӕ ноджы хуыздӕр ӕххӕст кӕной (1 Тимофеймӕ 5:17). Уыцы чырыстон хистӕр нӕлгоймӕгтӕн ӕмӕ сӕ устытӕн ацы скъола ӕххуыс кӕны, цӕмӕй Библи хуыздӕр ӕмбарой.

•   Цас фӕцӕуы: иу мӕй.

•   Кӕй фӕхонынц: районон цӕстдарджытӕй иу аз чи лӕггад кӕны, уыдоны сӕ устытимӕ. Уый фӕстӕ сӕ ногӕй фӕхонынц, ацы скъолайы куы ахуыр кодтой, уымӕй иу-фондз азы фӕстӕ.

Бӕрнон ӕфсымӕрты скъола

•   Йӕ нысан: хистӕр нӕлгоймӕгтӕн ӕмӕ кӕстӕриуӕггӕнӕг ӕфсымӕртӕн e баххуыс кӕнын, цӕмӕй сыл ӕмбырды цы хӕстӕ ис, уыдон ӕххӕст кӕной (2 Тимофеймӕ 3:1). Ацы скъола фӕцӕуы алы дыууӕ кӕнӕ ӕртӕ азы.

•   Цас фӕцӕуы: арӕхдӕр иу бон.

•   Кӕй фӕхонынц: районон цӕстдарджыты, хистӕр нӕлгоймӕгты ӕмӕ кӕстӕриуӕггӕнӕг ӕфсымӕрты.

Ног вефилӕгты скъола

•   Йӕ нысан: Вефилы f чи лӕггад кӕны, уыдонӕн баххуыс кӕнын, цӕмӕй сӕ куысты ӕнтыстджын уой ӕмӕ Хуыцауы ӕмӕ кӕрӕдзи тынгдӕр уарзой.

•   Цас фӕцӕуы: фондз боны ӕмӕ ’рдӕг.

•   Кӕй фӕхонынц: Вефилы лӕггад кӕнын чи райдыдта, уыдоны. Вефилы рагӕй чи лӕггад кӕны ӕмӕ, ацы скъолайы фӕстаг фондз азы чи нӕ ахуыр кодта, уыдоны, гӕнӕн ис, ногӕй фӕхоной.

Галаады скъола

•   Йӕ нысан: чи дзы ахуыр кӕны, уыдонӕн баххуыс кӕнын, цӕмӕй Хуыцауы Ныхас тынгдӕр бауарзой, хуыздӕр ӕй бамбарой ӕмӕ, цы базонынц, уымӕ гӕсгӕ архайой (1 Фессалоникӕгтӕм 2:13). Ацы скъола чи фӕвӕййы, уыцы иузӕрдион нӕлгоймӕгтӕ ӕмӕ сылгоймӕгтӕ стыр ӕххуыс вӕййынц, Йегъовӕйы организаци ӕнӕхъӕн дунейы дӕр цы куыст кӕны, уым. Чи йӕ фӕвӕййы, уыдоны снысан кӕнынц сӕхи бӕстӕйы кӕнӕ ӕндӕр бӕстӕйы филиалмӕ кӕнӕ сӕ снысан кӕнынц сӕрмагонд пионертӕй, районон цӕстдарджытӕй йе та миссионертӕй.

•   Цас фӕцӕуы: фондз мӕйы.

•   Кӕй фӕхонынц: филиал кӕмӕн загъта, цӕмӕй ацы скъолайы ахуыр кӕныны тыххӕй анкетӕ байдзаг кӕной, уыцы сӕрмагонд ӕххӕстрӕстӕг лӕггадгӕнджыты. Скъола фӕцӕуы Хъахъхъӕнӕн мӕсыджы ахуырадон центры Паттерсоны (штат Нью-Йорк).

Скъола филиалты комитетты уӕнгтӕн ӕмӕ сӕ устытӕн

•   Йӕ нысан: филиалты комитетты g уӕнгтӕн баххуыс кӕнын, цӕмӕй сӕ хъус дарой филиалы куыстмӕ ӕмӕ, сӕ филиалмӕ чи хауы, уыцы бӕстӕйы кӕнӕ бӕстӕты Йегъовӕйы Ӕвдисӕнтӕ цы куыст кӕнынц, уымӕ.

•   Цас фӕцӕуы: дыууӕ мӕйы.

•   Кӕй фӕхонынц: Йегъовӕйы Ӕвдисӕнты сӕйраг хайад фӕхоны филиалты комитетты ӕмӕ бӕстӕты комитетты чи ис, уыцы ӕфсымӕрты ӕмӕ сӕ устыты. Скъола фӕцӕуы Хъахъхъӕнӕн мӕсыджы ахуырадон центры Паттерсоны (штат Нью-Йорк).

 Йегъовӕйы Ӕвдисӕнтӕ сӕйраджыдӕр Библи ахуыр кӕнынц. Мах фидарӕй зонӕм, Библи Хуыцауы фӕндӕй кӕй ӕрцыд фыст ӕмӕ дзы ис, чырыстонӕн алы хъуыддаджы дӕр стыр пайда чи у, ахӕм уынаффӕтӕ (2 Тимофеймӕ 3:16, 17).

 Нӕ. Ахуырӕн фидын нӕ хъӕуы. Йегъовӕйы Ӕвдисӕнтӕн сӕ куыст цӕуы барвӕндон мысайнӕгты фӕрцы (2 Коринфӕгтӕм 9:7).