¿Dä za rä Zithu dä kontrola yä mexiꞌmhai?
Näꞌä udi rä Mäkä Tꞌofo
Rä Zithu ꞌne yä u̱xjua pe̱ꞌtsi ndunthi rä tsꞌe̱di pa dä kadi yä mexiꞌmhai hänge rä Mäkä Tꞌofo enä: «Gatꞌho rä xiꞌmhai o ha rä yꞌe̱ rä tsꞌondähi» (1 Juan 5:19, Nueva Versión Internacional). ꞌNehe ha rä Mäkä Tꞌofo xikägihu̱ ndaꞌu̱ nuꞌu̱ yä trampa usa rä Zithu pa kadi yä jäꞌi. Ma gä handihu̱ rꞌa de geꞌu̱.
Yä nkꞌuamba. Rä Mäkä Tꞌofo xikägihu̱ ge di debe gä nsuhu̱ «pa hindä za dä däkägihu̱ rä tsꞌondähi ko yä nthate» (Efesios 6:11, Ra ꞌRaꞌyo Testamento ). Rä Zithu di usa nuꞌu̱ toꞌo pe̱päbiꞌä pa dä ñꞌetꞌä ꞌme̱go de Äjuä ꞌne njabu̱ dä hyakägihu̱ (2 Corintios 11:13-15).
Rä ntꞌete. Rä Zithu di usa yä adivino, yä bruho, yä ꞌñete pa dä adivinabi yä suerte yä jäꞌi o pa dä xipäbi te ma dä thogi mꞌe̱fa, gehya rꞌa de nuꞌu̱ yä trampa di usa rä Zithu pa dä hyatꞌi yä jäꞌi (Deuteronomio 18:10-12). ꞌNehe nuꞌu̱ toꞌo tsi yä droga ꞌne nuꞌu̱ toꞌo ja yä meditasio, hopi dä du yä mfeni o dä gohi en blanco ꞌne njabu̱ umbäbi rä oportunida yä u̱xjua pa dä kontrolabi yä mfeni (Lucas 11:24-26).
Yä hyate relijion. Nuꞌu̱ yä relijion hingi udi näꞌä mäjuäni japi ge yä jäꞌi dä ꞌuege de Äjuä ꞌne hindä yꞌo̱te (1 Corintios 10:20). Pe rä Mäkä Tꞌofo enä ge nuꞌu̱ yä nkꞌuamba udi nuꞌu̱ yä hyate relijion, go «yä ntꞌudi yä u̱xjua» (1 Timoteo 4:1).
Yä u̱xjua ku̱ꞌti ha rä ndoyꞌo yä jäꞌi. Rä Mäkä Tꞌofo ñä de rꞌa yä jäꞌi nuꞌu̱ xki yu̱tꞌi yä u̱xjua ha yä ndoyꞌo. Rꞌabu̱ nuꞌu̱ yä u̱xjua mi japi ge nuꞌu̱ yä jäꞌi xä nxada, xä ngone, o mi u̱nse̱ yä ndoyꞌo (Mateo 12:22; Marcos 5:2-5).
¿Te dä za gä pe̱fihu̱ pa hindä kontrolagihu̱ rä Zithu?
Hindi debe gä tsuhu̱ rä Zithu ꞌne yä u̱xjua, ngeꞌä rä Mäkä Tꞌofo xikägihu̱ hanja gä nsuhu̱ de geꞌu̱. Ma gä handihu̱ rꞌa yä forma:
Gä pädihu̱ nuꞌu̱ yä trampa di usa geꞌä ma dä maxkägihu̱ pa hindä hyakägihu̱ (2 Corintios 2:11).
Gä nxadihu̱ rä Mäkä Tꞌofo ꞌne gä pe̱fihu̱ näꞌä di yꞌo di pädihu̱. Mu̱ gä hopihu̱ dä gu̱nkägihu̱ nuꞌu̱ yä tsꞌofo uni rä Biblia, geꞌä ma dä sugägihu̱ de rä Zithu ꞌne yä u̱xjua (Efesios 6:11-18).
Gä e̱ihu̱ o gä tsätꞌihu̱ gatꞌho nuꞌu̱ yä kosa di ho yä u̱xjua (Hechos 19:19). ꞌNehe gatꞌho nuꞌu̱ yä kosa ñä o udi de rä ntꞌete. Por ejemplo yä mfistꞌofo, yä bideo, yä thuhu, yä revista o asta nꞌa rä foto.
