Rä Fenäte de rä du rä Hesu, rꞌakägihu̱ rä oportunida pa gä ntso̱ꞌmihu̱ hanja po mäde de näꞌä njutꞌi bi uni Jeoba, ma dä hänkägihu̱ ndunthi yä jäpi. Nꞌa de geꞌu̱; gä handihu̱ mänꞌaki nuꞌu̱ yä jäꞌi xä du. Jeoba himi ne ge yä jäꞌi xä du. Po rängeꞌä nuꞌmu̱ tu nuꞌu̱ yä jäꞌi di mädihu̱, xa di sufrihu̱ ndunthi (1Co 15:26). Rä Hesu ꞌnehe bi sufri ndunthi mi hyandi ge yä de̱ni mi zoni ngeꞌä xki du rä Lasaro (Jn 11:33-35). Rä Hesu nzäntho bi ꞌñudi te nguꞌä rä mꞌu̱i rä Dada. Po rängeꞌä, di pädihu̱ ge Jeoba di sufri ndunthi nuꞌmu̱ handi di zonihu̱ ngeꞌä tu nuꞌu̱ mä jäꞌihu̱ xa di mädihu̱ (Jn 14:7). ¡Hängu ne rä Zi Dada Jeoba ge ya dä zo̱ho̱ näꞌä rä pa xä hñutsꞌi pa dä koꞌspäbi yä te nuꞌu̱ yä ꞌme̱go xä du! ¿Hänge nuju̱ ꞌnehe ya gä nehmähu̱ dä zo̱ho̱ näꞌä rä paꞌä? (Job 14:14, 15.)

Jeoba, näꞌä nꞌa rä Zi Dada de gä orden. Hänge dä za gä to̱ꞌmihu̱ ge ma dä koꞌspäbi yä te nuꞌu̱ mä jäꞌihu̱ xä du, ha näꞌä tiempo xä hñutsꞌiä (1Co 14:33, 40). En lugar de gä zonihu̱ de gä dumu̱i, nubye̱ ma gä zonihu̱ ko rä johya xkä umbäbihu̱ rä hogä ꞌñehe nuꞌu̱ yä jäꞌi ma dä nuhu de rä du. Ora tu nꞌa rä jäꞌi, ¿gi ꞌueke ri tiempo pa gi ntso̱ꞌmi ꞌne gi umbäbi njamädi Jeoba po nunä jäpi ma dä hä? (2Co 4:17, 18.) ¿Gi jamädibi ngeꞌä po mäde de rä Mäkä Tꞌofo xä xikägihu̱ ge ma dä nuhu nuꞌu̱ yä jäꞌi xä du? (Col 3:15.)

• ¿Toꞌo de nuꞌu̱ ri familia o amigo gi hohmä gi hyandi?

• De nuꞌu̱ yä jäꞌi no̱ni rä Mäkä Tꞌofo, ¿toꞌo gi hohmä gi hyandi ꞌne gi ñäui?