MÄ MꞌU̱IHU̱ NGU YÄ KRISTIANU
Hanja dä za gä uñhu̱ ntꞌo̱de mänꞌa xä ñho: ꞌÑuti nuꞌu̱ ri estudio hanja dä ñhoki ko rä imformasion
POR HANJA XA MÄHYONI: Mu̱ nuꞌu̱ yä jäꞌi di umfu̱ rä estudio di ñhoki ko näꞌä rä imformasion dende änte, mänꞌa ma dä ntiende ꞌne ma dä beni näꞌä di utihu̱. Geꞌä ma dä matsꞌi pa dä yꞌo̱tꞌe yä mpadi ha yä mꞌu̱i. Mäske ya bi nxixtehe, mähyoni dä sigi dä ñhoki ko rä imformasion dende änte pa dä ntini ha yä mhuntsꞌi ꞌne pa dä predika. Geꞌä ma dä matsꞌi pa dä sigi dä me̱päbi Äjuä ꞌne hindä ꞌuengi de rä ꞌñuu (Mt 25:13). Mu̱ dä bätuäbi dä nxadi rä imformasion ꞌne dä bädi hanja dä ja, geꞌä ma dä matsꞌi ha rä mꞌu̱i. Hänge ora ja ma gä fu̱dihu̱ nꞌa rä rꞌayꞌo estudio, mähyoni gä utihu̱ näꞌä jäꞌi hanja dä ñhoki ko näꞌä rä imformasion ma gä nxadihu̱.
TE DÄ ZA GÄ PE̱FIHU̱:
-
ꞌÑudi ko ri ejemplo (Ro 2:21). Änte de gi uni nꞌa rä estudio, mꞌe̱tꞌo mähyoni gi nxadi näꞌä rä imformasion pa gi hyandi hanja dä za gi fatsꞌi näꞌä jäꞌi gi uti (km 11/15 rä nxii 3). ꞌÑuti hanja xkä märka ha ri mfistꞌofo yä mpengi nuꞌu̱ yä ntꞌani.
-
Nupäbi rä mfeni ri estudio pa dä ñhoki ko näꞌä rä imformasion. Mu̱ nꞌa rä jäꞌi ya xä asepta nꞌa rä estudio, xipäbi ge xa mähyoni dä ñhoki dende änte ko näꞌä rä imformasion ꞌne xipi te mä benefisio ma dä hñäni mu̱ dä jabu̱. Xipäbi te dä za dä matsꞌi pa dä gu̱ki rä tiempo pa dä ñhoki. Durante rä estudio, rꞌa yä publikador hmipäbi rä mfistꞌofo näꞌä rä jäꞌi uti pa dä hyandi ge mu̱ dä märka yä mpengi nuꞌu̱ yä ntꞌani, mänꞌa ma dä ntiende näꞌä tꞌuti. Felisita ora gi handi ge xä ñhoki ko näꞌä imformasion.
-
ꞌÑuti hanja dä ñhoki ko rä imformasion. Ora ja ma dä mu̱di dä estudia nꞌa rä jäꞌi, rꞌa yä publikador uti mꞌe̱tꞌo hanja dä za dä ñhoki ko näꞌä rä imformasion.