Jeoba bi hyoki rä Xiꞌmhai ꞌne bi umbi näꞌä rä mu̱di ñꞌo̱ho̱ ꞌne näꞌä rä mu̱di ꞌme̱hñä pa ja xä mꞌu̱hni. Hänge rä Xiꞌmhai gehnä mä nguhu̱. Adan ꞌne Eba himbi thoki pa xä mꞌu̱i ha mähetsꞌi, ngeꞌä Äjuä ya xki hyoki yä e̱nxe̱ pa dä ꞌmu̱i ha mähetsꞌi (Job 38:4, 7). Äjuä bi hyoki nuua ha rä Xiꞌmhai nꞌa rä uädri xa tsꞌu̱ngänza mi rä thuhu Eden ꞌne ja bi ꞌñehni näꞌä mu̱di ñꞌo̱ho̱ pa ja xä mꞌu̱hni (Génesis 2:15-17). Jeoba bi hyoki Adan pa njabu̱ nuni ꞌne yä bätsi xä za xä me̱ꞌtsi nꞌa rä te pa nzäntho ko rä johya nuua ha rä Xiꞌmhai. Hñeti Salmo 37:29 ꞌne 115:16.

Ri mu̱di hingä gatꞌho rä Xiꞌmhai mi nꞌa rä uädri, ho̱nse̱ rä uädri Eden xa mi tsꞌu̱ngänza. Äjuä bi ꞌñembi Adan ꞌne Eba ge xä me̱ꞌtsi ndunthi yä bätsi pa njabu̱ xä ñuꞌtsi gatꞌho rä Xiꞌmhai. Bi tꞌembi dä su rä Xiꞌmhai ꞌne dä mpe̱fi pa njabu̱ nuyu̱ xä zo̱ho̱ xä hyoki nꞌa rä uädri ha gatꞌho rä Xiꞌmhai (Génesis 1:28). Rä Xiꞌmhai nunka ma dä uadi. Äjuä bi hyoki rä Xiꞌmhai pa nzäntho dä mꞌu̱i yä jäꞌi. Hñeti Salmo 104:5.

Hyandi rä bideo ¿Pa te bi hyoki Äjuä rä Xiꞌmhai?

Adan ꞌne Eba himbi yꞌo̱te Äjuä, hänge Jeoba bi yꞌe̱ni de näꞌä rä uädri. Njabu̱ bi mꞌe̱di näꞌä rä uädri Eden ꞌne nixi nꞌa rä jäꞌi hinxä za xä hyoki mänꞌaki näꞌä uädriꞌä. Rä Mäkä Tꞌofo enä: «Rä Xiꞌmhai bi zo ha yä yꞌe̱ yä tsꞌomꞌu̱i jäꞌi» (Job 9:24). Hñeti Génesis 3:23, 24.

¿Xä pumfri rä Zi Dada Jeoba näꞌä mi beni dä me̱fi dende ri mu̱di po yä jäꞌi? Hinä, Jeoba pe̱ꞌtsi gatꞌho rä tsꞌe̱di pa dä me̱fi gatꞌho näꞌä go dä ne. Gatꞌho näꞌä pe̱fi Jeoba, po̱ni xä ñho (Isaías 45:18). Äjuä ma dä japi yä jäꞌi dä mꞌu̱i ja ngu mi ne dende ri mu̱di. Hñeti Salmo 37:11, 34.

Rä Xiꞌmhai ma dä zo̱ho̱ dä uädri nuꞌmu̱ xti mända rä Hesu ngu nꞌa Ndä xä hñutsꞌi Äjuä. Ha näꞌä tuhni rä thuhu Armäjedon, yä e̱nxe̱ Äjuä ma dä de̱ni rä Hesu pa dä huati gatꞌho nuꞌu̱ yä nkontra Äjuä. ꞌNepu̱ rä Hesu ma dä gotꞌi rä Zithu po nꞌa mꞌo yä je̱ya. Pe rä hnini Äjuä hingä ma dä uadi ngeꞌä rä Hesu ma dä  gu̱hni ꞌne ma dä su. Nuyu̱ ma dä me̱ꞌtsi nꞌa rä te pa nzäntho ko rä johya nuua ha rä Xiꞌmhai. Hñeti Apocalipsis (Revelación) 20:1-3 ꞌne 21:3, 4.

¿Hämꞌu̱ ma dä huati Äjuä gatꞌho nuꞌu̱ yä ntsꞌomꞌu̱i di nheki ha rä Xiꞌmhai? Rä Hesu bi uni nꞌa «señä» näꞌä ma xä ꞌñudi ge ꞌmu̱i getbu̱ näꞌä pa habu̱ ma dä uadi gatꞌho yä tsꞌo tꞌo̱tꞌe. Nunä señä ya di nheki mäpaya ha rä Xiꞌmhai, ꞌne udi ge mu̱ dä sigi dä thogi gatꞌho nuya yä tsꞌo tꞌo̱tꞌe, ma dä huati gatꞌho yä jäꞌi. ꞌNehe udi ge ya di ꞌmu̱ihu̱ ha nuꞌu̱ yä gäxä pa habu̱ «ma dä uadi gatꞌho nuꞌu̱ yä tsꞌo tꞌo̱tꞌe ja ha rä Xiꞌmhai» (Mateo 24:3, NM). Hñeti Mateo 24:7-14, 21, 22.

Nuꞌmu̱ xti mända rä Hesu dende mähetsꞌi po 1,000 yä je̱ya, ma dä huati gatꞌho yä sufrimiento (Isaías 9:6, 7; 11:9). Rä Hesu hingä ho̱nse̱ ma dä mända ngu nꞌa rä Ndä, ꞌnehe ma dä mpe̱fi ngu nꞌa Däta Majhä ꞌne ma dä hñäkuäbi yä tsꞌoki gatꞌho nuꞌu̱ yä jäꞌi di mädi Äjuä. Njabu̱, Äjuä po mäde de rä Hesu ma dä huati yä ñheni, rä du, ꞌne ya hinto ma dä nxita. Hñeti Isaías 25:8 ꞌne 33:24.

Nuꞌu̱ yä jäꞌi o̱te Äjuä geꞌu̱ ma dä mꞌu̱i ha rä Uädri (1 Juan 2:17). Rä Hesu bi mändabi nuꞌu̱ yä de̱ni ge dä hyoni nuꞌu̱ yä hogä jäꞌi pa dä ꞌñuti te mähyoni dä me̱fi ꞌne njabu̱ Äjuä dä nuu xä ñho. Mäpaya, Jeoba uti yä miyontho yä jäꞌi pa dä za dä mꞌu̱i mꞌe̱fa ha näꞌä Uädri nuua ha rä Xiꞌmhai (Sofonías 2:3). Ha yä Ngu de gä Mhuntsꞌi de yä testigo rä Jeoba, di tꞌuti yä däme ge dä mädi yä ꞌme̱hñä ꞌne yä bätsi. ꞌNehe di tꞌuti yä ꞌme̱hñä ge dä mädi yä däme ꞌne yä bätsi. Yä dada ko yä bätsi di xo̱kämbeni mähye̱gi Äjuä, ꞌne di nxadi hanja nuꞌu̱ yä hogä noya bi ehe de Äjuä dä za dä matsꞌi pa dä me̱ꞌtsi nꞌa rä hogä mꞌu̱i. Hñeti Miqueas 4:1-4.