RÄ NTHEKE 10
¿Hanja dä za gi pädi ndañꞌä näꞌä relijion xa mäjuäni?
1. ¿Ja ho̱nse̱ nꞌatho näꞌä relijion xa mäjuäni?
“Nsuhu̱ [...] de nuꞌu̱ ma dä ꞌñepu̱ pa dä ne dä hyaꞌähu̱.” (MATEO 7:15.)
Rä Hesu bi ꞌñuti yä de̱ni ho̱nse̱ nꞌadä rä relijion, näꞌä xa mäjuäni rä relijion. Rä Hesu bi ꞌñenä ge nunä relijion ꞌñenä ngu nꞌa ꞌñuu näꞌä tsitsꞌi ha nꞌa rä te pa nzäntho, pe “tsꞌu̱tho nuꞌu̱ tini” nunä ꞌñuu (Mateo 7:14). Äjuä di ho gä xo̱kämbenihu̱ ja ngu udi rä Mäkä Tꞌofo. Ha näꞌä mäjuäni rä relijion gatꞌho nuꞌu̱ yä jäꞌi mähye̱gi di xo̱kämbeni Äjuä ja ngu di mända rä Mäkä Tꞌofo. Hñeti Juan 4:23, 24, NM; 14:6, ꞌne Efesios 4:4, 5.
Hyandi rä bideo ¿Di numäñho Äjuä gatꞌho yä relijion?
2. ¿Te bi mää rä Hesu de nuꞌu̱ yä hyate kristianu?
“Nuyu̱ mää ge pädi Äjuä, pe ko nuꞌu̱ yä tsꞌo ꞌme̱fi o̱tꞌe, di nheki ge hinä.” (TITO 1:16.)
Rä Hesu bi ꞌñenä ge ma xä zo̱ho̱ xä mꞌu̱i yä hyate kristianu, nuꞌu̱ ma xä tsꞌoni nuꞌu̱ xa mäjuäni yä kristianu. Nuyu̱ yä jäꞌi ꞌne yä nijä mää ge yä thuhu yä kristianu. Mäske nuyu̱ di ñꞌetsꞌi ge udi näꞌä mäjuäni, nuyu̱ hatꞌi yä jäꞌi. ¿Hanja dä za gi pädi toꞌo nuꞌu̱ xa mäjuäni yä kristianu? Ho̱nse̱ ha näꞌä relijion xa mäjuäni ja bi eheni nuꞌu̱ yä kristianu o̱tꞌe ntsꞌe̱di po dä me̱ꞌtsi nꞌa rä hogä mꞌu̱i. Hñeti Mateo 7:13-23.
3. ¿Hanja dä za gi pädi toꞌo nuꞌu̱ xa mäjuäni di xo̱kämbeni Äjuä?
Ma gä handihu̱ ku̱tꞌa de nuꞌu̱ yä mꞌu̱i pe̱ꞌtsi:
-
Nuꞌu̱ xa mäjuäni yä kristianu handi rä Mäkä Tꞌofo ngu rä Noya Äjuä. Nuꞌu̱ xa mäjuäni yä kristianu ꞌmu̱i ja ngu mää nuꞌu̱ yä tsꞌofo uni rä Mäkä Tꞌofo, ꞌne hingi de̱ni ha nixi udi nuꞌu̱ yä nzäi bi ehe de yä mfeni yä jäꞌi. Njabu̱, näꞌä relijion xa mäjuäni di nꞌañꞌo de gatꞌho nuꞌu̱ yä relijion hate (Mateo 15:7-9). Nuꞌu̱ xa mäjuäni yä kristianu, nzäntho o̱tꞌe ntsꞌe̱di po dä me̱fi näꞌä pa bi uti märꞌa yä jäꞌi. Hñeti Juan 17:17 ꞌne 2 Timoteo 3:16, 17.
-
Nuꞌu̱ xa mäjuäni yä de̱ni rä Hesu di nsundabi rä thuhu Äjuä, Jeoba. Rä Hesu mi pe̱ꞌspäbi rä tꞌekꞌei rä thuhu Äjuä ꞌne mi uti märꞌa yä jäꞌi. Rä Hesu bi matsꞌi yä jäꞌi dä bädi Äjuä ꞌne bi ꞌñuti hanja dä yꞌadi ha yä sadi ge rä thuhu Äjuä dä zo̱ho̱ dä nsunda ꞌne dä tꞌespäbi rä nsu (Mateo 6:9). Xi habu̱ gi ꞌmu̱i, ¿xkä da ngue̱nda toꞌo nuꞌu̱ yä jäꞌi mämbäbi rä thuhu Äjuä? Hñeti Juan 17:26 ꞌne Romanos 10:13, 14.
-
Nuꞌu̱ xa mäjuäni yä kristianu di ungä ntꞌo̱de de rä Tsꞌu̱tꞌhui Äjuä. Äjuä bä pe̱hni rä Hesu pa bi ꞌñudi nuꞌu̱ yä hogä noya de rä Tsꞌu̱tꞌhui. Rä Tsꞌu̱tꞌhui Äjuä ho̱nse̱ geꞌä rä humu̱i ja pa gatꞌho yä mexiꞌmhai. Rä Hesu geꞌä bi ꞌñudi asta näꞌä pa bi du (Lucas 4:43; 8:1; 23:42, 43). Rä Hesu bi mää ge nuꞌu̱ yä de̱ni ꞌnehe ma xä ꞌñudi de rä Tsꞌu̱tꞌhui Äjuä. Hänge mu̱ nꞌa jäꞌi dä ze̱njuaꞌi pa dä xiꞌi de rä Tsꞌu̱tꞌhui Äjuä, ¿gi pädi ndaꞌä rä relijion näꞌä jäꞌi? Hñeti Mateo 24:14.
-
Nuꞌu̱ xa mäjuäni yä de̱ni rä Hesu hingi pe̱fi nuꞌu̱ yä tsꞌo tꞌo̱tꞌe ja nuua ha rä Xiꞌmhai. Nuꞌi dä za gi hyandi toꞌo xa mäjuäni yä kristianu, ngeꞌä nuyu̱ hingi ku̱tꞌi ha yä tuhni ha nixi ha yä politika (Juan 17:16; 18:36). ꞌNehe, nuꞌu̱ xa mäjuäni yä kristianu hingi pe̱fi nuꞌu̱ yä tsꞌo tꞌo̱tꞌe ha nixi nuꞌu̱ yä tsꞌo mfeni pe̱ꞌtsi nunä Xiꞌmhai. Hñeti Santiago 4:4.
-
Nuꞌu̱ xa mäjuäni yä kristianu di mädi nꞌa ngu mänꞌaa. Rä Noya Äjuä, xä ꞌñuti nuyu̱ xa mäjuäni yä kristianu ge mähyoni dä mädi yä jäꞌi de gatꞌho yä hnini ꞌne de gatꞌho yä rasa. Mäske nuꞌu̱ yä hyate relijion njatꞌä di nheki ge ku̱tꞌi ha yä tuhni, nuꞌu̱ xa mäjuäni yä kristianu hinte mä mfatsꞌi uni nuꞌmu̱ ja yä däta tuhni (Miqueas 4:1-3). Pe nuyu̱, hää uni de yä tiempo, de yä bojä, ꞌne näꞌä pe̱ꞌtsi pa fatsꞌi ꞌne nupäbi yä mfeni märꞌa yä jäꞌi. ꞌNe hinte mä njutꞌi to̱ꞌmi dä hñäni. Hñeti Juan 13:34, 35 ꞌne 1 Juan 4:20.
4. ¿Da za gi pädi ndaꞌä näꞌä relijion xa mäjuäni?
¿Te mä relijion udi gatꞌho näꞌä hutsꞌi ha rä Mäkä Tꞌofo? ¿Te mä relijion pe̱ꞌspäbi rä tꞌekꞌei rä thuhu Äjuä? ¿Te mä relijion ungä ntꞌo̱de de rä Tsꞌu̱tꞌhui Äjuä, ꞌne udi ge ho̱nse̱ gehnä rä humu̱i ja pa gatꞌho yä jäꞌi de rä Xiꞌmhai? ¿Te mä relijion udi ge di mädi nꞌa ngu mänꞌaa, ꞌne hingi ku̱tꞌi ha yä tuhni? ¿Ya gä da ngue̱nda ndaꞌä näꞌä relijion xa mäjuäni? Hñeti 1 Juan 3:10-12.
