Ha gatꞌho yä relijion, ꞌmu̱i yä jäꞌi nuꞌu̱ xa mäjuäni honi Äjuä. ¿Hänge nꞌa rä johya nuꞌmu̱ di pädihu̱ ge Äjuä turämu̱i po nuyu̱ yä jäꞌi? Pe ungä rä dumu̱i ngeꞌä ha yä relijion xä nheki ndunthi yä ntsꞌomꞌu̱i (2 Corintios 4:3, 4; 11:13-15). Ha yä notisia xä nheki hanja yä relijion xä tsꞌombäbi yä mꞌu̱i yä bätsi, ku̱tꞌi ha yä terrorismo, ha yä nthote, ꞌne ha yä däta tuhni. ¡Hängu xä u̱ yä mfeni nuꞌu̱ yä jäꞌi xa mäjuäni honi Äjuä! Hñeti Mateo 24:3-5, 11, 12.

Näꞌä relijion xa mäjuäni, eꞌspäbi rä nsu Jeoba. Pe nuꞌu̱ yä relijion hingä mäjuäni u̱mbäbi rä mfeni, ngeꞌä hingi udi mäjuäni de Äjuä, udi yä nhemhñä o nkꞌuamba de nuꞌu̱ yä jäꞌi xä du, ꞌne udi märꞌa yä mfeni nuꞌu̱ hingi ehe ha rä Mäkä Tꞌofo. Pe rä Zi Dada Jeoba ne ge yä jäꞌi dä bädi näꞌä xa mäjuäni de geꞌä. Hñeti Ezequiel 18:4 ꞌne 1 Timoteo 2:3-5.

Jeoba hinto ma dä hyatꞌi, hingi ho nuꞌu̱ yä relijion mää ge di mädi Äjuä pe ha yä mꞌu̱i udi ge di de̱mbäbi rä mꞌu̱i rä Zithu (Santiago 4:4). Rä Noya Äjuä embi «Däta Babilonia» gatꞌho nuꞌu̱ yä relijion hingä mäjuäni. Mäyaꞌmu̱, mꞌe̱fa de bi nja näꞌä Däta däyꞌe ha yä pa Noe, bi nja nꞌa hnini mi tꞌembi Babilonia. Ja gehni bi mu̱di nuꞌu̱ yä relijion hingä mäjuäni. Nꞌa pa näꞌä hinto to̱ꞌmi, nse̱kitho Äjuä ma dä huati gatꞌho nuꞌu̱ yä relijion hatꞌi ꞌne japi dä sufri yä jäꞌi. Hñeti Apocalipsis (Revelación) 17:1, 2, 5, 16, 17 ꞌne 18:8.

¿Gi pädi? Ja mä nꞌa rä hogä noya pa gatꞌho yä jäꞌi: Jeoba yꞌo di muntsꞌi gatꞌho nuꞌu̱ yä zi jäꞌi xa mäjuäni honi Äjuä pe xä mꞌe̱di ha nuꞌu̱ yä relijion hingä mäjuäni. Äjuä di muntsꞌi nuyu̱ yä jäꞌi nuꞌmu̱ uti näꞌä mäjuäni. Hñeti Miqueas 4:2, 5.

Jeoba turämu̱i po nuꞌu̱ yä jäꞌi di mädi näꞌä mäjuäni ꞌne näꞌä xä ñho. Jeoba xipäbi nuyu̱ yä jäꞌi ge mähyoni dä bo̱ni de nuꞌu̱ yä relijion hingä mäjuäni, ꞌne dä paati yä mꞌu̱i mu̱ xa mäjuäni di mädi Äjuä. Hñeti Apocalipsis 18:4.

Ha näꞌä siglo I, bi mꞌu̱ rꞌa yä jäꞌi nuꞌu̱ bi dädi ko rä johya nuꞌmu̱ bi yꞌo̱de nuꞌu̱ yä hogä noya mi udi yä apostol. Jeoba bi ꞌñuti nuyu̱ yä jäꞌi hanja dä mꞌu̱i mänꞌa xä ñho ko rä johya, ꞌne bi ꞌñuti hanja dä me̱ꞌtsi nꞌa humu̱i ha yä te. Nuyu̱ yä jäꞌi bi zogägihu̱ nꞌa hogä kꞌoi pa nuju̱ mäpaya, ngeꞌä nuyu̱ bi jamäsu nuꞌu̱ yä hogä noya bi tꞌuti ꞌne bi hyoni mꞌe̱tꞌo Äjuä ha yä mꞌu̱i. Hñeti 1 Tesalonicenses 1:8, 9 ꞌne 2:13.

Jeoba handi ngu rä familia nuꞌu̱ yä jäꞌi xa mäjuäni pe̱päbi ngu di mända, ꞌne hopi dä yu̱tꞌi ha nunä rä familia nuꞌu̱ yä jäꞌi tsopu̱ nuꞌu̱ yä relijion hingä mäjuäni. Mu̱ gi hñäni nunä imbitasio di uni Jeoba, nuꞌi ma dä za gi ntsitsꞌi kongeꞌä, ma gi pe̱ꞌtsi nꞌa rꞌayꞌo familia ko gatꞌho nuꞌu̱ yä jäꞌi xa mäjuäni di xo̱kämbeni Äjuä ꞌne udi rä mhäte. ꞌNehe ma dä za gi hñäni nꞌa rä te pa nzäntho. Hñeti Marcos 10:29, 30 ꞌne 2 Corintios 6:17, 18.

¿Hänge di rꞌakägihu̱ ndunthi rä johya nuꞌmu̱ di pädihu̱ ge Äjuä ma dä yꞌapä ngue̱nda nuꞌu̱ yä relijion hingä mäjuäni? Po gatꞌho rä Xiꞌmhai ma dä hñäki näꞌä sufrimiento uni nuꞌu̱ yä relijion hingä mäjuäni. Ya nunka ma dä heke nixi ma dä japi dä mꞌe̱di yä jäꞌi. ¡Ngeꞌä gatꞌho yä jäꞌi ma dä xo̱kämbeni ho̱nse̱ Jeoba, näꞌä Zi Dada xa mäjuäni! Hñeti Apocalipsis 18:20, 21 ꞌne 21:3, 4.