RÄ NTHEKE 7
¿Te me̱ꞌä rä Tsꞌu̱tꞌhui Äjuä?
1. ¿Te me̱ꞌä rä Tsꞌu̱tꞌhui Äjuä?
¿Por hanja rä Hesu geꞌä rä hogä Ndä honi yä jäꞌi? (MARCOS 1:40-42.)
Rä Tsꞌu̱tꞌhui Äjuä, näꞌä nꞌa Tsꞌu̱tꞌhui bi ja ha mähetsꞌi. Nunä Tsꞌu̱tꞌhui nguntꞌä ma dä hñäki gatꞌho yä tsꞌu̱tꞌhui de nunä Xiꞌmhai, ꞌne ma dä japi dä tꞌo̱tꞌe rä bolunta Äjuä ha mähetsꞌi ꞌne ha rä Xiꞌmhai. Mänꞌitꞌho rä Tsꞌu̱tꞌhui Äjuä ma dä umbi yä jäꞌi näꞌä honi: ¡nꞌa rä hogä tsꞌu̱tꞌhui näꞌä ma dä japi dä ntsitsꞌi yä jäꞌi de gatꞌho rä Xiꞌmhai! ¿Hänge xa mähotho nuꞌu̱ yä hogä noya uni Äjuä de näꞌä rä Tsꞌu̱tꞌhui? Hñeti Daniel 2:44; Mateo 6:9, 10, ꞌne 24:14.
Nꞌa rä tsꞌu̱tꞌhui mähyoni dä me̱ꞌtsi nꞌa rä ndä pa dä mända. Jeoba xä huahni rä Tꞌu̱, Ñhesukristo pa dä Ndä ha näꞌä rä Tsꞌu̱tꞌhui Äjuä. Hñeti Apocalipsis (Revelación) 11:15.
Hyandi rä bideo ¿Te me̱ꞌä rä Tsꞌu̱tꞌhui Äjuä?
2. ¿Por hanja rä Hesu geꞌä rä hogä Ndä honi yä jäꞌi?
Äjuä bi huahni rä Tꞌu̱ pa dä Ndä ngeꞌä rä Hesu xa rä hojäꞌi ꞌne nzäntho o̱tꞌe rä tsꞌu̱tꞌhui xä ñho (Mateo 11:28-30). ꞌNehe pe̱ꞌtsi rä tsꞌe̱di pa dä matsꞌi yä jäꞌi ngeꞌä dende mähetsꞌi ma dä mända rä Xiꞌmhai. Mi gu̱tsꞌi Äjuä de rä du, rä Hesu bi mengi ha mähetsꞌi, ꞌne bi hñudi bi do̱ꞌmi ha rä hyo Äjuä, bi hñudi ha rä ñꞌe̱i (Hebreos 10:12, 13). Pa ri uadi, Jeoba bi umbäbi rä tsꞌe̱di pa bi mu̱di bi mända. Hñeti Daniel 7:13, 14.
3. ¿Toꞌo ma dä mända ko rä Hesu?
Nꞌa taxo yä jäꞌi nuꞌu̱ tꞌembi «yä santo», geꞌu̱ ma dä mända ko rä Hesu ha mähetsꞌi (Daniel 7:27). Nuꞌu̱ yä hogä apostol rä Hesu, geꞌu̱ yä mu̱di santo bi huahni Jeoba. Asta mäpaya, Jeoba di sigi di huahni märꞌa yä ñꞌo̱ho̱ ꞌne märꞌa yä ꞌme̱hñä pa dä zo̱ho̱ dä nsanto. Nuyu̱ yä jäꞌi xa yꞌo mänjuäntho ha rä ꞌñuu Äjuä. Nuꞌmu̱ tu nuyu̱ yä jäꞌi, Äjuä ju̱tsꞌi de rä du ja ngu bi ja ko rä Hesu, ꞌne umbäbi yä ndoyꞌo pa dä ꞌmu̱i ha mähetsꞌi, habu̱ yä jäꞌi hindä za dä hyandi. Hñeti Juan 14:1-3 ꞌne 1 Corintios 15:42-44.
¿Hängu nuꞌu̱ yä jäꞌi ma dä ma ha mähetsꞌi? Rä Hesu bi mää ge ho̱nse̱ nꞌa «zi tꞌu̱kä taxo» (Lucas 12:32). Nuyu̱ yä santo ma dä uadi dä nxo̱ge 144,000. Nuyu̱ ma dä matsꞌi rä Hesu dä mända gatꞌho rä Xiꞌmhai. Hñeti Apocalipsis 14:1.
4. ¿Te bi thogi nuꞌmu̱ rä Hesu bi mu̱di bi mända ha mähetsꞌi?
Rä Tsꞌu̱tꞌhui Äjuä bi mu̱di ha näꞌä je̱ya 1914. * Rä Hesu bi mu̱di bi mända ngu nꞌa Ndä ha mähetsꞌi ꞌne nguntꞌä bä fo̱te rä Zithu ꞌne nuꞌu̱ yä u̱xjua pa ha rä Xiꞌmhai. Gehnä mꞌe̱tꞌo bi me̱fi rä Hesu. Nubye̱, rä Zithu xa bi nkue̱ ngu nꞌa nogo tsatꞌyꞌo, ꞌne bi mu̱di bi japi yä jäꞌi bi thogi xi ndunthi yä xuñha ꞌne yä dumu̱i (Apocalipsis 12:7-10, 12). Dende geꞌmu̱, yä jäꞌi xä me̱ꞌtsi xi ndunthi yä u̱gi: yä däta tuhni, yä däta thuhu, yä däta ñheni, ꞌne yä däta mbiꞌmhai. Gatꞌho nuya yä tsꞌo tꞌo̱tꞌe gehnä näꞌä «señä» udi ge rä Tsꞌu̱tꞌhui Äjuä, nguntꞌä ma dä hñäki gatꞌho yä tsꞌo tꞌo̱tꞌe, ꞌne ma dä mända gatꞌho rä Xiꞌmhai. Hñeti Lucas 21:7, 10, 11, 31.
5. ¿Te pe̱fi rä Tsꞌu̱tꞌhui Äjuä, ꞌne te ma dä me̱fi mꞌe̱fa?
Po mäde de näꞌä di tꞌungä ntꞌo̱de de rä Noya Äjuä ha gatꞌho rä Xiꞌmhai, rä Tsꞌu̱tꞌhui Äjuä uti yä jäꞌi de gatꞌho yä hnini dä ntsitsꞌi nꞌa ngu mänꞌaa. Yä miyontho nuꞌu̱ yä hogä jäꞌi udi ge di ho dä yꞌo̱te rä Hesu. Rä Tsꞌu̱tꞌhui Äjuä ma dä su nuyu̱ yä jäꞌi nuꞌmu̱ xti huati gatꞌho yä tsꞌomꞌu̱i jäꞌi ꞌne yä tsꞌo tꞌo̱tꞌe ja nuua ha rä Xiꞌmhai. Hänge gatꞌho nuꞌu̱ yä jäꞌi ne dä hñäni nuꞌu̱ yä jäpi ma dä hä näꞌä rä Tsꞌu̱tꞌhui Äjuä, pe̱ꞌtsi te dä bädi dende nubye̱ dä yꞌo̱te rä Hesu. Hñeti Apocalipsis 7:9, 14, 16, 17.
Rä Tsꞌu̱tꞌhui Äjuä ma dä kumpli näꞌä mi ne Jeoba dende ri mu̱di nuꞌmu̱ bi hyoki yä jäꞌi. Gatꞌho rä Xiꞌmhai ma dä zo̱ho̱ dä uädri. Pa geꞌä ma dä zitsꞌi 1,000 yä je̱ya. Xti uadi nuꞌu̱ 1,000 yä je̱ya, rä Hesu ma dä umbi mänꞌaki rä Dada näꞌä Tsꞌu̱tꞌhuiꞌä (1 Corintios 15:24-26). ¿Toꞌo gi hohmä gi xipäbi nuya yä hogä noya de rä Tsꞌu̱tꞌhui Äjuä? Hñeti Salmo 37:10, 11, 29.
