RÄ NTHEKE 2
¿Toꞌo xa mäjuäni Äjuä?
1. ¿Por hanja ri ꞌñehe gä xo̱kämbenihu̱ Äjuä?
Äjuä go geꞌä bi hyoki gatꞌho näꞌä ja ha mähetsꞌi ꞌne ha rä Xiꞌmhai. Äjuä nzäntho xä mꞌu̱i ꞌne nunka ma dä du (Salmo 90:2). Nuꞌu̱ yä hogä noya hutsꞌi ha rä Mäkä Tꞌofo bi ehe de Äjuä (1 Timoteo 1:11). Äjuä geꞌä xä rꞌakägihu̱ mä tehu̱, hänge ho̱nse̱ꞌä ri ꞌñepi gä xo̱kämbenihu̱ ꞌne gä eꞌspäbihu̱ rä nsu. Hñeti Apocalipsis (Revelación) 4:11.
2. ¿Te nguꞌä Äjuä?
Ni nꞌa rä jäꞌi hinxä za xä hyandi Äjuä ngeꞌä näꞌä nꞌa espiritu. Äjuä pe̱ꞌtsi nꞌa rä te mänꞌa xa däta ke mä tehu̱ ꞌne hingi pe̱ꞌtsi rä ndoyꞌo ja ngu yä jäꞌi nuua ha rä Xiꞌmhai (Juan 1:18; 4:24,Traducción del Nuevo Mundo [NM]). Pe nuju̱ dä za gä pädihu̱ ndunthi te nguꞌä Äjuä nuꞌmu̱ di handihu̱ gatꞌho näꞌä xä hyoki. Gatꞌho nuꞌu̱ yä fruta ꞌne yä do̱ni ja, xikägihu̱ ge Äjuä pe̱ꞌtsi ndunthi rä mfädi ꞌne xi di mäkägihu̱. Ko näꞌä rä ndo̱te mähetsꞌi ꞌne rä Xiꞌmhai, xikägihu̱ hängu rä tsꞌe̱di pe̱ꞌtsi Äjuä. Hñeti Romanos 1:20.
ꞌNehe dä za gä pädihu̱ mänꞌa xä ñho te nguꞌä Äjuä mu̱ gä nxadihu̱ rä Mäkä Tꞌofo. Ja gekua ma gä pädihu̱ te di ho Äjuä ꞌne te hindi ho. ꞌNehe ma gä pädihu̱ hanja di trata yä mexiꞌmhai ꞌne te di mbeni nuꞌmu̱ yä jäꞌi pe̱fi näꞌä xä ñho ꞌne nuꞌmu̱ pe̱fi näꞌä xä ntsꞌo. Hñeti Salmo 103:7-10.
3. ¿Te rä thuhu Äjuä?
Rä Hesu bi ꞌñenä: «Mä Zi Dadaꞌihe gi ꞌmu̱i mähetsꞌi, drä nsunda ri mäkä thuhu» (Mateo 6:9). Mäske Äjuä tꞌembi Zi Dähmu o Zi Dada, näꞌä pe̱ꞌtsi ho̱nse̱ nꞌatho rä thuhu ꞌne ha kada nꞌa idioma xä tꞌofo nꞌañꞌo. De gä ñhämfo̱ tꞌembi Jehová, pe ndunthi yä jäꞌi embi Yavé. Hñeti Éxodo 6:3.
Ha ndunthi yä Mäkä Tꞌofo xä thäkuäbi rä thuhu Jeoba ꞌne se̱he̱ xä tꞌofo Äjuä o Zi Dada. Pe nuꞌmu̱ xa rä mu̱di bi tꞌofo rä Mäkä Tꞌofo, mi hutsꞌi ngu 7,000 yä mꞌiki rä thuhu Jeoba. Rä Hesu bi ꞌñuti yä jäꞌi toꞌo Äjuä ꞌne te rä thuhu. Hñeti Juan 17:26.
Hyandi rä bideo ¿Te rä thuhu Äjuä?
4. ¿Turämu̱i Jeoba po yä jäꞌi?
Ja ngu nunä dada hombäbi rä ꞌñethi nuni rä zi bätsi di hñeni, Äjuä honi mä ñhohu̱ pa xudi ndämäni
Mu̱ Jeoba mäjuäni di mäkägihu̱, ¿por hanja xä hye̱gi xä nja yä sufrimiento? Ndunthi yä jäꞌi mää ge Äjuä di jakägihu̱ gä sufrihu̱ pa dä hyandi mu̱ xa mäjuäni di mädihu̱. Pe hingä mäjuäni. Hñeti Santiago 1:13.
Rä Zi Dada Jeoba pe̱skägihu̱ rä tꞌekꞌei ꞌne xä hye̱gägihu̱ gä huahnihu̱ te mä ꞌñuu di ne gä te̱nihu̱. ¿Hänge mänꞌa xä ñho gä huahni gä pe̱päbihu̱ Äjuä? (Josue 24:15.) Pe ndunthi yä jäꞌi xä huahni dä me̱fi yä tsꞌo tꞌo̱tꞌe hänge po rängeꞌä ja ndunthi yä sufrimiento. Gatꞌho nuya yä tsꞌo tꞌo̱tꞌe di u̱mbäbi rä mfeni rä Zi Dada Jeoba. Hñeti Génesis 6:5, 6.
Rä Zi Dada Jeoba di mäkägihu̱, näꞌä ne gä pe̱ꞌtsihu̱ nꞌa rä hogä mꞌu̱i ko rä johya, hänge mänꞌitꞌho ma dä hñäki gatꞌho yä sufrimiento ꞌne gatꞌho yä tsꞌomꞌu̱i jäꞌi. Mäpaya, Jeoba pe̱ꞌtsi rꞌa yä raso pa he̱gi dä nja yä sufrimiento pe hingä nzäntho ma dä njabu̱. Ha rä ntheke 8 de nunä he̱ꞌmi ma gä pädihu̱ te mä rasoꞌu̱. Hñeti 2 Pedro 2:9 ꞌne 3:7, 13.
5. ¿Hanja dä za gä kuatꞌihu̱ Äjuä?
Rä Zi Dada Jeoba di mbitagihu̱ gä kuatꞌihu̱ kongeꞌä po mäde de rä sadi. Näꞌä turämu̱i po kada nꞌa de nuju̱ (Salmo 65:2; 145:18). Rä Zi Dada Jeoba di ho dä uni rä mpumbäte. Mäske rꞌabu̱ hingä geꞌä di pe̱fihu̱, näꞌä di johya nuꞌmu̱ handi ge di o̱tꞌehu̱ ntsꞌe̱di pa gä pe̱päbihu̱ rä bolunta. ꞌNehe mäske di pe̱ꞌtsihu̱ rä tsꞌoki, nuju̱ dä za gä ntsitsꞌihu̱ ko Äjuä. Hñeti Salmo 103:12-14 ꞌne Santiago 4:8.
Rä Zi Dada Jeoba geꞌä ri ꞌñepi mänꞌa gä mädihu̱ xa ndunthi ngeꞌä go geꞌä xa rꞌakägihu̱ mä tehu̱ (Marcos 12:30). Ma gi ꞌñudi ge gi mädi Jeoba mu̱ gi sigi gi pädi de geꞌä ꞌne mu̱ gi yꞌo̱te yä mhända. Mu̱ gi pe̱fi njabu̱, ma dä za gi pe̱ꞌtsi nꞌa rä hogä ntsitsꞌi ko Jeoba. Hñeti 1 Timoteo 2:4 ꞌne 1 Juan 5:3.
