Ha rä Mäkä Tꞌofo hutsꞌi nunä hogä noya: ¡ge yä jäꞌi ma dä mꞌu̱i pa nzäntho ha rä Xiꞌmhai! (Salmo 37:29.) Rä Mäkä Tꞌofo pe̱ꞌtsi 66 yä mfistꞌofo. Äjuä bi huahni ngu 40 yä ñꞌo̱ho̱ nuꞌu̱ xa mi pe̱päbi Äjuä pa bi yꞌofo rä Mäkä Tꞌofo. Nuꞌu̱ ku̱tꞌa yä mu̱di mfistꞌofo go bi yꞌofo Moises o̱tꞌe ngu 3,500 yä je̱ya. ꞌNe ya thogi 1,900 yä je̱ya, rä apostol Juan bi uadi bi yꞌofo näꞌä rä gäxä mfistꞌofo de rä Mäkä Tꞌofo. ¿Toꞌo bi umbi rä mfeni nuꞌu̱ 40 yä ñꞌo̱ho̱ pa bi yꞌofo rä Mäkä Tꞌofo? Äjuä po mäde de näꞌä rä mäkä tsꞌe̱di, bi xipäbi nuꞌu̱ yä ñꞌo̱ho̱ te mi ne xä tꞌofo ha rä Mäkä Tꞌofo (2 Samuel 23:2). Nuꞌu̱ yä ñꞌo̱ho̱ himbi yꞌofo nuꞌu̱ yä mfenise̱, bi yꞌofo ho̱nse̱ näꞌä bi xipäbi Jeoba. Hänge gatꞌho nuꞌu̱ yä mfeni hutsꞌi ha rä Mäkä Tꞌofo, bi ehe de Jeoba. Hñeti 2 Timoteo 3:16 ꞌne 2 Pedro 1:20, 21.

Hyandi rä bideo ¿De toꞌo bi ehe rä Mäkä Tꞌofo?

Nuju̱ di pädihu̱ ge nuꞌu̱ yä mfeni hutsꞌi ha rä Mäkä Tꞌofo bä ꞌñehe de Äjuä, ngeꞌä dende mäyaꞌmu̱ bi mää gatꞌho nuꞌu̱ yä thogi di nheki mäpaya, ꞌne xikägihu̱ gatꞌho näꞌä ma dä nheki mꞌe̱fa. Hinxä mꞌu̱i nꞌa jäꞌi näꞌä xä za xä bädi gatꞌho näꞌä ma dä thogi mꞌe̱fa (Josué 23:14). Ho̱nse̱ Äjuä pe̱ꞌtsi gatꞌho rä tsꞌe̱di ꞌne ho̱nse̱ꞌä pädi gatꞌho näꞌä ma dä thogi mꞌe̱fa. Hñeti Isaías 42:9 ꞌne 46:10.

Nꞌa rä mfistꞌofo näꞌä xpi ꞌñehe de Äjuä, pe̱ꞌtsi te di nꞌañꞌo de gatꞌho nuꞌu̱ märꞌa yä mfistꞌofo xä thoki. ꞌNe njabu̱ xä nheki, ngeꞌä thogi 2 yä biyon nuꞌu̱ yä kꞌoi xä thoki de rä Mäkä Tꞌofo ha thogi 450 yä idioma. Mäske rä Mäkä Tꞌofo bi uadi bi tꞌofo dende mäyaꞌmu̱ ꞌne hindi tꞌudi ha yä skuela, mää näꞌä mäjuäni nuꞌmu̱ udi hanja bi zo̱ho̱ bi nja rä Xiꞌmhai ꞌne märꞌa yä tꞌo̱tꞌe. ꞌNehe, o rä ꞌñuu näꞌä bi yꞌofo nuꞌu̱ 40 yä ñꞌo̱ho̱ ꞌne hingä rꞌa nꞌañꞌo bi yꞌofo. * Ha rä Mäkä Tꞌofo di nheki ꞌnehe näꞌä mhäte pe̱ꞌtsi  Äjuä po yä jäꞌi. Nuꞌu̱ yä tsꞌofo hutsꞌi ha rä Mäkä Tꞌofo ja rä tsꞌe̱di pa dä japi dä paati yä mꞌu̱i yä jäꞌi ꞌne pa dä matsꞌi dä me̱ꞌtsi nꞌa rä hogä mꞌu̱i. Nuya yä tꞌo̱tꞌe xä matsꞌi xa ndunthi yä mꞌo yä jäꞌi pa xa hyandi ge rä Mäkä Tꞌofo xa mäjuäni geꞌä rä Noya Äjuä. Hñeti 1 Tesalonicenses 2:13.

Hyandi rä bideo ¿Por hanja dä za gä kamfrihu̱ ge mäjuäni näꞌä hutsꞌi ha rä Mäkä Tꞌofo?

Ha gatꞌho rä Mäkä Tꞌofo mää ge po näꞌä mhäte pe̱ꞌtsi Äjuä pa ko yä mexiꞌmhai, ma dä hä nꞌa hogä mꞌu̱i temäꞌentho pa yä jäꞌi. Rä Mäkä Tꞌofo mää hanja nuꞌu̱ yä mu̱di jäꞌi bi ꞌme̱di näꞌä hogä mꞌu̱i mi pe̱ꞌtsi ha näꞌä uädri mi ja nuua ha rä Xiꞌmhai. Pe rä Mäkä Tꞌofo ꞌnehe mää hanja Äjuä ma dä hyoki mänꞌaki rä Xiꞌmhai pa dä zo̱ho̱ dä uädri ja ngu mi ne dende ri mu̱di. Hñeti Apocalipsis (Revelación) 21:4, 5.

ꞌNehe, ha rä Noya Äjuä hutsꞌi yä mhända, yä mhända hindi mpaati ꞌne yä tsꞌofo. Rä Mäkä Tꞌofo ꞌnehe xikägihu̱ hanja Äjuä xä trata yä jäꞌi dende mäyaꞌmu̱, ꞌne njabu̱ utkägihu̱ te nguꞌä rä mꞌu̱i Äjuä. Hänge rä Mäkä Tꞌofo dä za dä maxꞌäꞌi gi pädi Äjuä ꞌne ma dä xiꞌi hanja dä za gi pe̱ꞌtsi nꞌa rä hogä ntsitsꞌi Kongeꞌä. Hñeti Salmo 19:7, 11; Santiago 2:23, ꞌne 4:8.

Nuꞌmu̱ rä Hesu mi fatsꞌi yä jäꞌi dä bädi de rä Noya Äjuä, mꞌe̱tꞌo mi fu̱di mi mää rꞌa yä mfeni de rä Mäkä Tꞌofo. ꞌNepu̱, pa nuꞌu̱ yä jäꞌi bi za bi ntiende näꞌä mi o̱de, rä Hesu mi xipäbi te mi udi nuꞌu̱ yä mfeni de rä Mäkä Tꞌofo. Nunä he̱ꞌmi gi hñä, njabu̱ ꞌnehe ma dä maxꞌäꞌi gi ntiende näꞌä hutsꞌi ha rä Mäkä Tꞌofo. Hñeti Lucas 24:27, 45.

Mäpaya hindi o̱dehu̱ ndunthi yä hogä noya nuꞌu̱ rꞌakägihu̱ ndunthi rä johya ja ngu nuꞌu̱ yä hogä noya bi ehe de Äjuä. Pe mäske njabu̱, ndunthi yä jäꞌi hingi ne dä japämäsu nuya yä hogä noya, ꞌne märꞌaa asta di nkue̱tho. Pe nuꞌi ogi turimu̱i ꞌne sigi gi pädi de Äjuä. Mu̱ gi pe̱fi njabu̱, ¡Äjuä ma dä rꞌaꞌi nꞌa rä te pa nzäntho habu̱ ma gi ꞌmu̱i ko ndunthi rä johya! Hñeti Juan 17:3.